Bə́ ga nsa yi Pɔl Fɛlis nəfiə
24
Lə fɔ díɔ tɨŋ, Ananias fo wu bəchɛ bintɔfiɛ lə bə bənɨ bədɔ bə sakɨ kɨtuŋ bə Tɛtulus wu nə̀ dzɛɛ tsa ba fɨyə kɨlaŋ, shi ba gəŋ Kasaliya. Bɔ gəŋ ŋəŋ Fɛlis miɨ wu sakɨ, ba ga nsa yibɔ tsukɔ Pɔl wɨ yu nəfiə. 2 Bɔ bəndɨ Pɔl, Tɛtulus gbɔ kɨ tɨdi biɔŋ yu wɨ, yu tə bə Fɛlis lə, “Miɨ wubəŋ, budə na ji kɨtuŋ kɨŋ ntɨŋ ba fɔ ndɛŋ, ə ba nə nsa yɔhɔ yi ndzeŋe wɨ, biɔŋ kɨyɛŋ' tsu buni wə kaŋ. 3 Bənɨ bəchi na woko buni kɨtso, bɔ bɨmi nsa yɔhɔ bidɨ bichi ntɨŋ tsá chi. 4 Nna nsɛhɛ lə ntiŋ tsa yɔhɔ kɨtso, nna nnende lə wə wokɔ kwa tsəsɨ ba wɔ fiɔŋ fi kə jiba kə chanyɛ. 5 Kə' ŋəŋ lə miɨ no na miɨ wu loŋko. Yu na gəndə yu dzusɔ bidəndə Bəju bə na ji mbi chi ntɨŋ. Na tɨ yu fo wu kɨntsu kɨ bə́ na tsɨsə ka lə kɨntsu kɨ Nadzalɛt. 6-7 Yu nə̀ noŋko tɨ lə yu bɨsɨ tsɔŋ yi bintɔfiɛ, kə kwe yu.ª 8 Wə bi bə miɨ no, ɨ wə wɔ nə yu lɨ lə biɔŋ bichi bi kə na chanyɛ tsukɔ yu wɨ na yɛyi.” 9 Lə Tɛtulus chanyɛ manɨ, Bəju bɨŋ ba tə tɨ lə biɔŋ biŋ bichi na yɛyi.Pɔl tambi gwɨ Fɛlis nəfiə
10 Miɨ wu sakɨ wa nya Pɔl dzə lə yu chanyɛ. Pɔl tə lə, “Nna ŋkkɨ lɨ lə wə sa bənsa kɨtuŋ kɨŋ ntɨŋ biya kɨyɛŋ. Mɨ ŋkɨ ŋ'woko buni bə nləŋ ba tambi gwɨ yɛmɨ wə nəfiə. 11 Ɨ wə dze tɨ kɨ bishɛ, ɨ wə wɔ lə kə yasə díɔ yɔɔ ntse fɛ nɨ nnə̀ mbəndə Jɛlosalɛm kɨ tsɨsə Nyɔ. 12 Bəju nə̀ kə ŋəŋkəhə mɨ n'yimbiɛ bə miɨ, bɔ nə̀ kə ŋəŋkəhə tɨ ndzusɔ bənɨ bidəndə tsɔŋ yi bintɔfiɛ ntɨŋ makə tsɔ́ŋ yi kɨntsɨsɨ lə ntɨŋ, makə dɨ wudɔ lɨ toko. 13 Bɔ na keŋkɛhɛ tɨmo fiɔŋ fi na donchɛ lə nnə̀ mfə biɔŋ bi bɔ na bunchi biŋ mɨ wɨ. 14 Mɨ mbɨŋ fiŋ wə nəfiə lə nna ntsɨsə bə Nyɔ wu bəchɛ bətaa baha, mbiəlɨ Dzə yi bənɨ na tsɨsə lə na yibiə. Nna mbɨmi ji biɔŋ bichi bi na ji Kɨŋwatɨ kɨ bilaŋ bi Mose lə ntɨŋ bə bi na ji Biŋwatɨ bi bənɨ bə shɔŋ yi Nyɔ lə ntɨŋ. 15 Nna mbobi kwa fiə Nyɔ wɨ diəŋ nɨ bənɨ bɛŋ na bobi, lə bənɨ bəchi bəndzeŋe bə bəbiə ná dzakɔ nə kkpə lɨ. 16 Bəma, nna ndio buni tsá chi lə ŋkɨ njimi kɨjimiɛ kɨ diəŋ Nyɔ nəfiə bə bənɨ nəfiə tɨ, fə fiɔŋ kɨ jikə jimiɛ fi shəŋ yɛmɨ na sakɨ mɨ bə fi.
17 Ə jiŋ biya bidɔ fɛŋ nɨ nnə̀ mfɔɔ nə Jɛlosalɛm, ɨji nnə nchi gəŋə sɔ lə nnya bənɨ bɛŋŋ bə kɨtuŋ'ə kpə, ba nya tɨ kɨnya. 18 Na fiɔŋ fiŋ fi bɔ nə ŋəŋə mɨ tsɔŋ yi bintɔfiɛ ntɨŋ mfɨtɨ, nə̀ ji ŋ'wwɔlɔsɨ gwɨ yɛmɨ. Bənɨ nə jimiɛhɛ mɨ bə mɨ makə ŋgə wudɔ. 19 Bəju bədɔ bə Ɛsha nə ji mɨ, bɔ səji lə bɔ kɨ ji mɛ lə bɔ chanyɛ bə wə fiɔŋ fi bɔ na keŋkɛ tsukɔ mɨ wɨ, jilə fiɔŋ fia su. 20 Jikə jimiɛ manɨ, bənɨ bɛŋ tə̂ la fiɔŋ fi bɔ nə ŋəŋə lə nnə mfɨsə tsa yi nnə nlɨmi bənɨ bə sakɨ kɨtuŋ nəfiə, 21 yasə fiɔŋ fi nnə nchanyɛ bə diɛ yintaŋ bə bɔ lə, ‘Nna nji bəŋ nəfiə tsa nyi bɨŋ nsa ntɨŋ ndzɨ nnə mbɨŋ lə bəŋkkpə ná kɨ dzakɔ nə kkpə lɨ.’”
22 Lə Pɔl chanyɛ manɨ, Fɛlis wokɔ mɛ, ɨji nə̀ miɨ wu nə̀ kkɨ tsukɔ Dzə yi Baba wɨ buni, yu memɛ nsa ba tə lə, “Tsa yi Lisias fo wu bənɨ bə bitsa lə shiɛ ba lɨ, ntə ŋkəmbɨ nsa yɛnɨ.” 23 Yu tə tə lə fo wu kɨntsu kɨ bənɨ bə bitsa lə dze Pɔl ba gəŋ ga yu tsɔŋ, ba kɨ kɨki yu. Bəmanɨ, lə bɔ nya yu dzə ba shə mənshə muhu kɨ ba mɔ chitə yu.
Fɛlis memɛ nsa yi Pɔl biya bifɛ
24 Lə díɔ yidɔ chɛ su, Fɛlis bə məku wuhu Dusila wu nə̀ ji Miɨbəju ba. Fɛlis gəŋ bəndɨ Pɔl, yu ba, bɔ kɨ wokɔ fiɔŋ fi yu na chanyɛ tsukɔ ŋga yi shəŋ Jisɔs Klistu wɨ. 25 Lə yu kɨ chanyɛ tsukɔ nɨ naji ɨ miɨ kɨ ji miɨ wu ndzeŋe, bə nɨ naji ɨ miɨ kɨ tɨntɨ ŋkɨ bə gwɨ yihi, ma nɨ Nyɔ ná saa bənɨ, Fɛlis wɔ manɨ, fi nya yu nyiŋ. Yu tə bə Pɔl lə, “Naji wə dza fɛŋ, ŋkeŋkɛ tsa, nchi mbəndə wə.” 26 Yu nə̀ chanyɛɛ manɨ, yu keŋkɛɛ kɨŋgɔmbiɛ lə diŋkəla ɨ Pɔl nya yu kpə. Bəma, yu kɨ bɨndɨ Pɔl sususu bɔ bə yu tɨfɨ. 27 Ma ma ma, biya bifɛ chɛ. Bə́ ga Pɔlsius Fɛstus kɨtɨ kɨ Fɛlis lə bɨŋ, lə Fɛlis kɨ se lə yu fə Bəju kɨ laŋkɨ yu, yu shə Pɔl budzutə tsɔŋ yi buŋfia ntɨŋ.