23
Pɔl dɔŋ yəsɨ bənɨ bə nə̀ sakɨ ba kɨtuŋ wɨ ba tə lə, “Bəŋgwɨŋ, nə kɨjimiɛ kɛmɨ ntɨŋ ba tuŋ ndɛŋ, nna mba ŋkɨ mfɨtɨ kwa ji biɔŋ bi nna ŋkkɨ lə bi na ji diəŋ Nyɔ nəfiə, shəŋ yɛmɨ na sakəhə mɨ bubiə.” 2 Ananias wu nə̀ ji fo wu bəchɛ bintɔfiɛ lə tə bə bənɨ bə nə̀ lɨmi fə Pɔl ku lə bɔ kwəŋ yu bə kɨŋkwəŋ bifuŋ wɨ. 3 Pɔl chi bə yu lə, “Nyɔ jiwa yu kwəŋ tɨ wə bə kɨŋkwəŋ. Wə na boto kɨmbɨ kɨ bə́' kushɛ kɨ, kɨ kɨ wosɔ kwa nəgwɨ. Wə jiŋ manɨ lə wə sakɨ wa mɨ wə biəlɨ kɨlaŋ, wə tsu wə bunchi kɨlaŋ kɨsu, wə tɨdi lə bə́ kwəŋ mɨ bə kɨŋkwəŋ!” 4 Bənɨ bə nə̀ lɨmi fə Pɔl ku bi bə yu lə, “Wə na sɛyi fo wu bəchɛ bintɔfiɛ bə Nyɔ lə?” 5 Yu chi lə, “Bəŋgwɨŋ, nsə ŋkkəhə lə na fo wu bəchɛ bintɔfiɛ lə. Fi na ji bubɔndɔ lə,‘Miɨ kə̂ chanyɛ díɛ yibiə kɨ miɨ wu sakɨ bənɨ lə.’”
6 Lə Pɔl bo ba ŋəŋ lə bənɨ bə nə̀ ji mɨ nə̀ Bəsadusi, bədɔ ji Bəfalasi, yu chanyɛ bə diɛ yintaŋ bənɨ bə nə̀ sakɨ ba kɨtuŋ ntɨŋ lə, “Bəŋgwɨŋ, nna nji miɨ Bəfalasi, nji wɛŋ wu Bəfalasi. Nna nji mɛni nsa ntɨŋ ndzɨ nna ŋkkɨ lə bəŋkkpə ná dzakɔ lɨ nə kkpə lɨ.” 7 Nɨ yu chanyɛ manɨ, Bəsadusi bə Bəfalasi gbɔ bəŋkpanə, kɨjimiɛ ka bu jɛ gwɨ. 8 Bɔ nə̀ kpanə manɨ ndzɨ Bəsadusi nə̀ ba bɔ kɨ nɨnntɨ lə bəŋkkpə ná dzakɔhɔ nə kkpə lɨ, bɔ tɨdi tɨ lə fiɔŋ fidɔ na sɨŋ nɨ bənchinda bə Nyɔ lə makə bin'yɨntɨ. Bəmanɨ, Bəfalasi bɨmi lə biɔŋ biŋ bichi na ji lɨ. 9 Bəŋkpanə ba gəŋ fiə, bənɨ bədɔ bə nə̀ ji kɨntsu kɨ Bəfalasi lə ntɨŋ bɔ tɨfiə bilaŋ ləŋ mɨ ba chanyɛ buntaŋ, tə lə, “Kə kə ŋəŋkəhə fiɔŋ fi miɨ no gbɔɔ bə fi. Naji ɨ kɨ ji kɨn'yɨntɨ kɨdɔ makə nchinda wu Nyɔ wu chanyɛ bə yu.” 10 Bəŋkpanə ba kɨ se lə bɔ tsu budiɔ, fo wu bənɨ bəbəŋ bə bənɨ bə bitsa lə kɨ lete lə diŋkəla ɨ bə́ shakiɛ Pɔl mɨ bidiadia lɨ. Yu tə lə bənɨ bə bitsa lə shi mɨ ba fasɨ Pɔl nə bɔ kaŋ, ba bəndɨ tsu bə yu ku wu bənɨ bə bitsa lə ntɨŋ.
11 Lə kɨ ji bbutsu, Baba ba ləŋ fə Pɔl ku ba tə bə yu lə, “Kânsɨ shəŋ. Nɨ wə tədiə bə bənɨ tsukɔ mɨ wɨ Jɛlosalɛm, na diəŋ tɨ nɨ wə jiwa wə tə Lom.”
Bənɨ bədɔ sese lə bɔ kkpɨsɨ Pɔl
12 Lə butsu wɔ, Bəju bədɔ kwe ntsuŋ ba chɛŋ lə naji bɔ diə makə bɔ mu fiɔŋ kə, fiəŋkə lə bɔ' kkpɨsɨ Pɔl. 13 Bənɨ bə nə̀ kwɛɛ ba ntsuŋ ya ba chɛŋ munchɛŋ muŋ nə̀ yakɨ bənɨ mbaania. 14 Bɔ gəŋ fə bəchɛ bintɔfiɛ bəbəŋ ku, ma bənɨ bə nə̀ sakɨ kɨtuŋ ba tə bə bɔ lə, “Kə' dze tsa ba chɛŋ lə naji ɨ kə chɛse fiɔŋ dze kə fiəŋkə lə kə' kkpɨsɨ Pɔl tsɔnyɔ. 15 Bə fɛŋ, bəŋ bə bənɨ bəchi bə sakɨ kɨtuŋ fâŋ shɔŋ bə fo wu bənɨ bəbəŋ bə bənɨ bə bitsa lə ba lənə bə yu lə yu faŋ Pɔl yu shi ba ba bəŋ nəfiə, lə bə na se lə bə chi chənə nsa yihi buni. Bəma, kə jiba ɨ kə kɨɨ yu dzə, tsa yi bɔ kɨ shichi bə yu, ɨ kə kkpɨsɨ yu yu bambi dzə.”
16 Nɨ bɔ nə̀ kwɛɛ ntsuŋ ya manɨ, wɛŋ wu dzəmbɨtə yi Pɔl wu nɨnsə wɔ ba gəŋ bənɨ bə bitsa lə ku ba tə bə Pɔl. 17 Pɔl bəndɨ fo wu kɨntsu kɨ bənɨ bə bitsa lə wudɔ ba tə bə yu lə, “Dzê wɛŋ wu nɨnsə no wə gəŋ bə yu fə fo wu bənɨ bəbəŋ bə bitsa lə ku, yu na keŋkɛ fiɔŋ fi tədiə yu.” 18 Fo wa dze yu ba gəŋ bə yu fə fo wu bənɨ bəbəŋ bə bitsa lə wa ku ba tə bə yu lə, “Pɔl miɨ wu tsɔŋ yi buŋfia sə bəndɨ mɨ ba tə lə ndze wɛŋ wu nɨnsə no mba bə yu fə wə ku, lə wɛŋ no na keŋkɛ fiɔŋ fi tədiə wə.” 19 Fo wa tə chiŋfi wɛŋ wa kɨbandə wɨ, bɔ bə yu baŋgə gwɨ, yu bi bə yu lə, “Wə na keŋkɛ la fi tədiə mɨ?” 20 Wɛŋ wu nɨnsə wa chi lə, “Bəju bədɔ sə sese lə bɔ jiba bɔ tə ɨ wə faŋ Pɔl ɨ yu ba bənɨ bə sakɨ kɨtuŋ nəfiə wɔki, lə bɔ na se lə bɔ chi chənə nsa yihi buni, ɨji bɔ na fɨtɨ manɨ bɔ lənə bə wə bulənə. 21 Wə kə̂ bɨmiə ndzɨ bənɨ basu bə na yakɨ mbaania bə jiba bɔ kɨɨ yu dzə. Bɔ' chɛŋ lə naji bɔ diə makə bɔ mu fiɔŋ kə, fiəŋkə lə bɔ' kkpɨsɨ Pɔl tsɔnyɔ. Fɛŋ, bɔ' banchɛ gwɨ ba kɨ wokɔ kwa ji fiɔŋ fi wə jiwa wə chanyɛ.” 22 Fo wu bənɨ bə bitsa lə wa tə lə wɛŋ wu nɨnsə wa kɨ gɨntɨ, yu loso wɛŋ wa lə yu kə̂ gəŋkə ba fə miɨ kkə lə yu' tə fiɔŋ fia bə yu.
Bə́ faŋ Pɔl Kasaliya fə Fɛlis miɨ wu sakɨ ku
23 Fo wu bənɨ bəbəŋ bə bənɨ bə bitsa lə wa bəndɨ bənɨ bəbəŋ bəfɛ bə bintsu bi bənɨ bə bitsa lə ba tə bə bɔ lə, “Bə tsɔ̂ bənɨ bə bitsa lə gɨ fɛ (200) bə bənɨ bə biŋfene lə gbɨ fumba (70) ma bə gwiŋ'ə gɨ fɛ (200), ɨ kɨ ji tsá bɨŋ fumbɔɔ bbutsu, ɨ bɔ gəŋ Kasaliya. 24 Bə dêŋ biŋfene Pɔl lɨ ba dze yu gəŋ bə yu fə Fɛlis miɨ wu sakɨ ku fiɔŋ mfə sɨŋ yu dzə.” 25 Lə yu tə manɨ, yu tə bɔndu kɨŋwatɨ kɨ tɨdi lə,
26 “Na mɨ Klawdius Lisias. Nna mbondo kɨŋwatɨ kɨŋ bə wə Fɛlis miɨ wubəŋ wu sakɨ. Nna ntsɨsə wə. 27 Bəju sə kwe miɨ no kɨ se lə bɔ kkpɨsɨ yu. Mɨ ŋ'wɔ lə na miɨ wu Lom, bɨ bə bənɨ bɛmɨ bə kɨlaŋ'ə be mɨ ba ləkə yu nə bɔ kaŋ. 28 Nnə ndio lə ŋ'wɔ fiɔŋ fi bɔ na tɨdi yu wɨ, ntə nshi bə yu bənɨ bəbɔlə bə sakɨ kɨtuŋ ku. 29 Bɔ chənə ba ŋəŋ lə biɔŋ bi bɔ na tɨdi yu wɨ na kwa yímbiə yi na tsukɔ bilaŋ bibɔlə wɨ, ɨji yu kə fəkə fiɔŋ fi naji lə bə́ kkpɨsɨ yu makə fi naji lə bə́ faŋ yu tsɔŋ yi buŋfia ntɨŋ. 30 Miɨ wudɔ ba tə bə mɨ lə Bəju bədɔ' kwe ntsuŋ lə bɔ kkpɨsɨ miɨ no, mɨ ntə mfaŋ yu wə lɨ mɨ kɨsɨkɨ. Mɨ' ntə tɨ bə bənɨ bə na bunchi biɔŋ yu wɨ lə bɔ ba ŋəŋ ji wə, bɔ tə fiɔŋ fi bɔ na keŋkɛ bə yu.”
31 Bənɨ bə kɨlaŋ'ə ba fə diəŋ nɨ fo wubɔlə' tədiə, bɔ dze Pɔl bbutsu, bɔ bə yu gəŋ fɔ Antipatis. 32 Lə butsu wɔ, bənɨ bə bitsa lə bə nə̀ gəndəə bə go shə Pɔl bə bənɨ bə nə̀ gəndəə biŋfene bɨŋ lə bɔ kɨ gɨntɨ bə yu fiə, bɔ tsu jiŋ bɔ ku. 33 Lə bɔ gəŋ fɔ Kasaliya, bɔ nya kɨŋwatɨ ka bə miɨ wu sakɨ ba nya tɨ Pɔl yu kaŋ. 34 Yu ləkə kɨŋwatɨ ka ba tanchɛ lɨ, bi lə Pɔl fɔ nə dia wu la lə. Lə yu wɔ lə Pɔl na ji miɨ wu Silisha, 35 yu tə bə yu lə, “Njiwa ŋ'wɔ nsa yɔhɔ tsa yi bənɨ bə bəŋ bə bɔ na keŋkɛ nsa fɔɔ mɛ.” Yu tə lə bə́ dze Pɔl ba gəŋ ga yu ntɔ wu Hɛlɔd lə ntɨŋ ba kɨ tɨntɨ ŋkɨ bə yu.