22
“Bətaa bə bəŋgwɨŋ, bə wɔ̂ ntambi gwɨ yɛmɨ bəŋ nəfiə.” 2 Lə bɔ wɔ yu chanyɛɛ ji díɛ yibɔlə yi Bəhiblu lə, bɔ kanə də mɛ nshiiŋ. Pɔl tə lə, 3 “Nna nji Miɨbəju, bə́ nə̀ bɛyɛ mɨ Tasɔs, kɨtuŋ kɨ Silisha ntɨŋ, bəmanɨ, bə́ lə mɨ sɛŋ Jɛlosalɛm, mfɨyə kɨŋwatɨ Gamalia kaŋ. Yu nə̀ dze tsa ba tɨfiə mɨ bilaŋ bi bəchɛ bətaa baha lə, ŋkɨ nlɨmi fɛŋ fiɔŋ fi Nyɔ lə wɨ buntaŋ diəŋ nɨ bəŋ bəchi bə na ji mɛ ndɛŋ. 4 Nnə̀ mba ŋkɨ nsesɛ gbo bənɨ nəjiŋ bə nə̀ biəlɨ Dzə yi Baba, mfɨtɨ bə́ kkpɨshə bɔ, ŋkwediɛ bəkansɨ bə bənɨnsə, mfaŋkɨ tsɔŋ yi buŋfia ntɨŋ. 5 Fiŋ na fiɔŋ fi fó yi bəchɛ bintɔfiɛ lə bə bənɨ bə sakɨ kɨtuŋ naji ɨ bɔ nɨŋŋ kə. Nə̀ bɔ bə nə̀ nya mɨ biŋwatɨ lə ŋgəŋ sɔ Damaskus, dɨ wu bəŋgwɨŋ baha nə̀ ji. Nnə̀ ŋgɨntɨ lə ŋkwediɛ bənɨ bə nə̀ biəlɨ Dzə yi Baba, ŋkanshɛ, mba bə bɔ Jɛlosalɛm, bə́ nya bɔ ŋgə.Pɔl tə nɨ fi nə̀ gəndə fə yu tə galə shəŋ Jisɔs wɨ
6 Lə kɨ gɨntɨ bbushə ŋgaaaŋ, ŋgɨntɨ fɔɔ Damaskus, ŋgwe yi kɨŋgbooŋ kɨdɔ jiji ba tsalə mɨ wɨ nə bɔ́. 7 Ŋgbɔ fəkoso, ŋ'wɔ diɛ chanyɛ bə mɨ lə, ‘Sɔl, Sɔl, wə na sesɛ gbo mɨ nəjiŋ mɛ ndzɨ la?’ 8 Mbi lə, ‘Baba, na wə yəŋ?’ Diɛ ya chi lə, ‘Na mɨ Jisɔs wu Nadzalɛt wu wə na sesɛ wa gbo yu nəjiŋ.’ 9 Bənɨ bə kə nə̀ ji ba bə bɔ nə̀ ŋəŋ kɨŋgbooŋ ka wɨ, bəmanɨ bɔ jikə wɔkɔhɔ diɛ yi nə̀ chanyɛ wa bə mɨ. 10 Nchi mbiɛ lə, ‘Baba, mfə nəŋ?’ Yu chi bə mɨ lə, ‘Dzâ wə, wə be ba gəŋ Damaskus, bə́ jiba ɨ bə́ tə wə sɔ nɨŋ chi yi Nyɔ sesɛ lə wə nɨŋ.’ 11 Ndza yɛmɨ nə mɨ nə̀ ji kɨŋgbooŋ ka' fə mɨ nyimə, bənɨ bə kə nə̀ gəndəə ba bə bɔ bu tsɛtsɛ mɨ ba be gəŋ bə mɨ Damaskus.
12 Miɨ wudɔ nə̀ ji sɔ Damaskus, yɨ wuhu ji lə Ananias, yu nə̀ kuntəə Nyɔ kɨtso, yu galɨ bilaŋ biaha, Bəju bəchi bə nə̀ ji sɔ sɛnti yu. 13 Lə yu ba ŋəŋ mɨ wɨ, yu ləŋ fə mɨ ku ba tə bə mɨ lə, ‘Sɔl ŋgwɨŋ, kɨ chisə ŋəŋə.’ Mɨ kɨsɨkɨ manɨ, nchi ŋgbɔɔ kɨ ŋɨntɨ, ŋŋəŋ tɨ yu wu Ananias wɨ. 14 Yu tə bə mɨ lə, ‘Nyɔ wu bəchɛ bətaa baha nə sa wə lə wə kkə fiɔŋ fi yu na se, ba ŋəŋ Miɨ wuhu wu Nɨŋ wu Diəŋ wɨ ba wɔ nchanyɛ yi na foto nə yu dze. 15 Wə jiwa wə kɨ ji miɨ wu kɨ tɨfiə tsukɔ yu wɨ, wə tɨdi bə bənɨ bəchi fiɔŋ fi wə nə ŋəŋə, bə fi wə nə wɔɔ. 16 Nɨ fi na ji manɨ, wə na wokɔ tə la fɛŋ? Dzâ wə, bə́ chɛse wə biɔ ba wwɔ məmbiə mɔhɔ, nɨ wə na bɨndɨ yɨ wu Baba lə.’
Pɔl tə nɨ Jisɔs nə̀ faŋə yu bənɨ bə na jimiɛhɛ Bəju lɨ
17 Lə ntsu Jɛlosalɛm, ŋkɨ ntsɨsə tsɔŋ yi bintɔfiɛ ntɨŋ, budəŋfɨ kwe mɨ. 18 Ŋŋəŋ Baba wɨ budəŋfɨ bwa ntɨŋ, yu tə bə mɨ lə, ‘Fə̂ fɔfɔ wə dza nə sɛŋ Jɛlosalɛm ndzɨ bənɨ bə sɛŋ naji bɔ bɨŋ kə fiɔŋ fi wə na tɨfiə tsukɔ mɨ wɨ.’ 19 Nchi bə yu lə, ‘Baba, bɔ na kkɨ lɨ buni lə nnə̀ mba ŋkɨ mbekiɛ tsɔ́ŋ yi kɨntsɨsɨ lə ntɨŋ, ŋkwediɛ bənɨ bə nə̀ galə shəŋ wə wɨ, ŋkəchə bɔ. 20 Tsa yi bə́ nə̀ kkpɨsə Tefen wu nə̀ tɨfiə bənɨ tsukɔ wə wɨ, nnə̀ nji tɨ mɨ mbɨmi nu. Na mɨ wu bənɨ bə nə̀ kkpɨsə ba yu nə̀ sediɛ bindzu bibɔlə ba nya ŋkeŋkɛ.’ 21 Baba chi tədiə bə mɨ lə, ‘Dzâ wə, ndzɨ njiwa mfaŋ wə dzəbudə bənɨ bə na jimiɛhɛ Bəju lɨ.’”
22 Nɨ Pɔl nə̀ chanyɛɛ bənɨ wokɔ, lə nchanyɛ nyi fɔ yu nə dze, bɔ gbɔ kɨ wɛnti kɨtso, bɔ tɨdi lə, “Bə́ lasɨ ŋgwe yi no miɨ nə mbi ntɨŋ. Na miɨ wu na jimiɛhɛ lə yu kɨ ji wuwəŋ.” 23 Lə bɔ kɨ wɛnti manɨ, bɔ kɨ finchi bindzu bibɔlə, bɔ liyi bidi bɔ́. 24 Fo wu bənɨ bə bitsa lə tə lə bənɨ bə bitsa lə dze Pɔl ba gəŋ bə yu ku wubɔlə ntɨŋ, lə bɔ gəŋ kə yu ba bishɛ biɔŋ bə yu, fə yu tədiə fiɔŋ fi fəə lə Bəju kɨ wɛnti bə yu mɛ. 25 Bɔ gəŋ ba kansɨ yu, dze lə bɔ kɨ kɨtɨ, Pɔl bi bə fo wu kɨntsu kɨ bənɨ bə bitsa lə wudɔ wu nə̀ lɨmi mɨ lə, “Kɨlaŋ na bɨmi lə bə́ kə miɨ wu Lom ɨji bə́ bambi nsa yihi kə sakəhə?” 26 Fo wu kɨntsu kɨ bənɨ bə bitsa lə wa wɔ manɨ ba tə gəŋ ŋəŋ miɨ wubɔ wubəŋ ba tə bə yu lə, “Wə na se lə wə mɔŋ ji la? Kkə lə miɨ no na miɨ wu Lom.” 27 Lə miɨ wubəŋ wa wɔ manɨ, yu tə gəŋ ŋəŋ Pɔl ba bi bə yu lə, “Tə mɨ, wə na ji miɨ wu Lom?” Pɔl bɨŋ lə, “Ɨŋŋ.” 28 Miɨ wubəŋ wa tə bə yu lə, “Nnə̀ mbɨsɨ kpə kɨyɛŋ fə ntə ŋkɨ nji miɨ wu Lom.” Pɔl chi bə yu lə, “Nna nji fiɛŋ miɨ wu Lom wu shinshi.” 29 Bənɨ bə nə̀ ji ba lə bɔ bishɛ biɔŋ bə yu bu chində su mɨ kɨsɨkɨ. Nyiŋ kwe miɨ wubɔ wubəŋ wa, ndzɨ yu nə̀ tə, bə́ kansɨ Pɔl ɨji miɨ wu Lom.
Pɔl tambi gwɨ bənɨ bə sakɨ kɨtuŋ kɨ Bəju lə nəfiə
30 Miɨ wubəŋ wa kɨ noŋko kwa lə yu dze tsa ba kkə fiɔŋ fi Bəju nə̀ tɨdi Pɔl wɨ. Lə butsu wɔ, yu tə bɔ yanshə Pɔl. Yu bəndɨ bəchɛ bintɔfiɛ bəbəŋ bə bənɨ bəchi bə sakɨ kɨtuŋ, bɔ ba, yu ga Pɔl bɔ nəfiə.