Pɔl gəŋ Jɛlosalɛm
21
Bɨ bə Pɔl tsɨsɨ bɔ ba tə kəshə. Kə dza nə mɨ ba llə kɨkpɔŋkɔ ntɨŋ nyɨlɨlɨ ba fɔ Kɔs. Lə butsu wɔ, kə gəŋ Lɔdɛs ba dza nə mɨ gəŋ Patala. 2 Lə kə fɔ sɔ, kə ŋəŋ kɨdɔ kɨkpɔŋkɔ biɔ kɨ nə̀ gɨntɨ Fɔnisha, kə be sɔ kɨ gɨntɨ. 3 Lə kə ŋəŋ Saiplus, kə shə yu nəməsə ba chɛ gəŋ fɔ Taya, kɨtuŋ kɨ Silia, dɨ wu kɨkpɔŋkɔ nə̀ji lə kɨ foshɛ biɔŋ. 4 Kə nɔŋ bənɨ bə kɨmbɨŋ'ə, bɨ bə bɔ me díɔ fumba. Kɨn'yɨntɨ kɨ Ntsaaŋ fə bɔ nya Pɔl bitɨfiɛ lə yu kə̂ mɔŋkɔ lə yu gəŋ Jɛlosalɛm. 5 Butsu bwaha kwətsə bu dzanə, kə dze dzə. Bɔ bəchi bə bəkansɨ bəbɔlə ma beŋ chində bɨ ba fɔ nə kɨtuŋ ka ntɨŋ ba gəŋ fɔ fə ŋgɔŋ məmbəŋ ku, bɨ bə bɔ tuŋ nu ba tsɨsɨ lɨ ba tsɨshɛnɨ ba tə kəshə. 6 Kə be kɨkpɔŋkɔ ntɨŋ, bɔ kɨ tsu jiŋ.7 Kə dza nə Taya ba dze dzə gəŋ fɔ Tɔlɛmai. Bɨ bə bəŋgwɨŋ bə kɨmbɨŋ'ə tsɨshɛnɨ ba me butsu bumo. 8 Lə butsu wɔ, kə dza ba gəŋ fɔ Kasaliya ba gəŋ Felip tsɔŋ wu nə̀ gəndəə yu tɨfiə diɛ yi Nyɔ, kə me yu tsɔŋ. Felip no nə̀ miɨ miu nə kɨntsu kɨ bənɨ bə fumba bə bə́ nə̀ sabiɛ ba ntɨŋ. 9 Yu nə̀ keŋkɛ beŋ bəkansɨ bəna, bɔ bambi kə kkə bənɨnsə. Bɔ nə̀ ba bɔ kɨ tɨdi bənɨ biɔŋ bi bɔ na woko Nyɔ chanyɛ. 10 Lə kə biə jimiə sɔ díɔ yidɔ ntɨŋ, miɨ wudɔ wu nə̀ ba yu kɨ tɨdi biɔŋ bi yu na woko Nyɔ chanyɛ, dza nə Judɛya ba shi ba sɔ, yɨ wuhu ji lə Agabus. 11 Lə yu ba ŋəŋ bɨ wɨ, yu dze kɨtsa kɨ Pɔl lə ba kansɨ go bə bibandə bi yu wu Agabus lə, ba tə lə, “Kɨn'yɨntɨ kɨ Ntsaaŋ na tɨdi lə chinchi Bəju bə Jɛlosalɛm ná kansə miɨ wu na keŋkɛ kɨtsa kɨŋ ba nya yu bənɨ bə na jimiɛhɛ Bəju kaŋ.” 12 Lə kə wɔ manɨ, bɨ bə bənɨ bəchi bə nə̀ ji mɨ kɨ nende Pɔl lə yu kə gəŋkə Jɛlosalɛm. 13 Yu chi lə, “Fiŋ na la fi bə na fɨtɨ mɛ? Bə na kkəhə lə bə na dɨ mɛ bə bɨsə shəŋ yɛmɨ? Mɨ mfə gwɨ ɨjikə jimiə kwa lə mbe tsɔŋ yi buŋfia Jɛlosalɛm, mɨ mfə gwɨ lə ŋkkpə tɨmo sɔ ndzɨ yɨ wu Baba Jisɔs lə.” 14 Nɨ dzə nə̀ sɨŋ yi fənə lə yu yashənɨ kɨŋgɔmbiɛ kɨhɨ, kə jisə ba bu tə kwa lə, “Fi kɨ ji kwa nɨ Baba na se.”
15 Lə díɔ yidɔ chɛ, kə banchɛ biɔŋ biaha ba kɨ bɨndɨ Jɛlosalɛm. 16 Kə bəndɨ bə bənɨ bə kɨmbɨŋ'ə bədɔ bə Kasaliya, bɔ ba dze bɨ kə gəŋ Nasɔ tsɔŋ, ɨji tsɔŋ ya yi nə̀ji lə kə kɨ me sɔ. Nasɔ no nə̀ miɨ wu Saiplus wu nə̀ ji miɨ miu nə bənɨ ntɨŋ bə nə̀ saa ba ga shəŋ Jisɔs wɨ.
Pɔl lɛ jii Jɛm ku
17 Lə kə fɔ Jɛlosalɛm, bənɨ bə kɨmbɨŋ'ə bə sɔ ləkə bɨ buni. 18 Lə butsu wɔ, bɨ bə Pɔl lɛ jii Jɛm ku, ɨji fó yi kɨntsu lə chi nə̀ ji mɨ. 19 Pɔl tsɨsɨ bɔ ba nachɛ bɔ biɔŋ bichi bi Nyɔ nə̀ fəə bə bənɨ bə na jimiɛhɛ Bəju, ɨ ba nə nɨŋ yi yu nə̀ nɨntɨ wɨ. 20 Bɔ wɔ manɨ ba kuntə Nyɔ. Bəmanɨ, bɔ jiji ba tə bə Pɔl lə, “Ŋgwɨŋ waha, bô ŋəŋ nɨ Bəju galə tɨ shəŋ Jisɔs wɨ bəntsuku lɨ. Bəmanɨ, bɔ bambi bɔ lɨmi bilaŋ bi Mose lə wɨ buntaŋ, 21 bə́' tə bə bɔ tsukɔ wə wɨ lə wə na gəndə wə tɨfiə Bəju bə na me bituŋ bidɔ ntɨŋ chichi lə bɔ shə̂ bilaŋ bi Mose lə, wə tɨdi lə bɔ kə kɨ sɔmbiɛ dzɔ́ yi beŋ bəbɔlə, wə tɨdi tɨ lə bɔ kə kɨ biəlɨ fiə waha wu ku lə. 22 Fɛŋ chi bɔ jiba bɔ kkə lə wə' ba, kə fɨtɨ nəŋ? 23 Kə jiba kə tə wə fiɔŋ fi naji lə wə fə. Kə na keŋkɛ bənɨ mɛ bəna bə sə diə nchínə bə Nyɔ. 24 Dzê bɔ, bəŋ bə bɔ gəŋ wwɔ bushi bwɛnɨ, wə sɔmbu fiɔŋ fichi fi naji lə bə́ sɔmbu fə bɔ gəŋə ba kə yu yibɔ. Wə fə manɨ, ɨ bənɨ bəchi tə kkə lə wə na galɨ tɨ bilaŋ bi Mose lə, ɨ biɔŋ bichi bi bɔ nə̀ chanyɛ kɔhɔ jikə jimiə yɛyi. 25 Fi na tsukɔ bənɨ bə kɨmbɨŋ'ə wɨ bə na jimiɛhɛ Bəju, kə sə jiŋ ba bɔndu kɨŋwatɨ faŋ bə bɔ lə bɔ kə kɨ diɨ bidiəŋ bi bə́' fəə bintsɨsɨ su bə bənyɔ. Bɔ kə kɨ diɨ ŋgwembe mə nyɛŋ'ə. Bɔ kə kɨ diɨ nyɛŋ yi bə́ kə yembɛhɛ lə ŋgwembe fɔ. Bɔ kə kɨ dzenɛ.” 26 Bəma, butsu wɔ Pɔl dze bənɨ ba, bɔ gəŋ wwɔlɔsɨ gwɨ́ yibɔlə. Pɔl gəŋ tsɔŋ yi bintɔfiɛ ntɨŋ ba tə butsu bu naji lə díɔ yi wwɔlɔsɨ lə ya ka lɨ, ɨ bə́ tə fə bintɔfiɛ bɔ lɨ miu miu.
Bə́ chikə Pɔl fə tsɔŋ yi bintɔfiɛ ku
27 Lə díɔ ya fumba kɨ ka, Bəju bədɔ bə nə̀ fɔɔ nə Ɛsha ŋəŋ Pɔl tsɔŋ yi bintɔfiɛ ntɨŋ ba nyishi kɨntsu kɨ bənɨ lə, kɨ kwe yu 28 ba kɨ kpɨsə wulu bɔ tɨdi lə, “Bənɨ bə Isla, bə chîtə bɨ. Na miɨ no wu na gəndə yu tɨfiə bənɨ biɔŋ bibiə bidɨ bichi tsukɔ kɨtuŋ kaha wɨ, bə bilaŋ bi Mose lə ma tsukɔ tsɔŋ yi bintɔfiɛ nyi wɨ. Yu nə kanə dzɛɛ bənɨ bə na jimiɛhɛ Bəju ba be bə bɔ tsɔŋ yi bintɔfiɛ nyi ntɨŋ ba bɨsɨ dɨ wu ntsaaŋ wuŋ.” 29 Bɔ nə̀ chanyɛɛ manɨ ndzɨ bɔ nə̀ ŋəŋ Pɔl gəndə toko bə Tɔfimus miɨ wu Ɛfɛsɔ. Bɔ tə kɨ gɔmbiɛ lə Pɔl sə be bə yu tsɔŋ yi bintɔfiɛ ntɨŋ. 30 Wulu wa fə kɨtuŋ kɨchi nɨkə, bənɨ lətə ba ba mɨ. Bɔ chikə Pɔl ba kpa fɔ bə yu nə tsɔŋ yi bintɔfiɛ ntɨŋ ba bu fasɨ bigwəŋ. 31 Bɔ kɨ se lə bɔ kkpɨsɨ Pɔl, shɔŋ fɔ fo wu bənɨ bə bitsa lə bə Lom wɨ lə Jɛlosalɛm chi nɨkə wa. 32 Yu bu dza tsa miu ba dze bənɨ bə bitsa lə bə fó yidɔ yi bintsu bi bənɨ bə bitsa lə, bɔ lətə ba shi sɔ. Lə bənɨ ŋəŋ chɛ kɨlaŋ wɨ ma bə bənɨ buhu bə bitsa lə bɔ bu tsukə kəkə Pɔl. 33 Chɛ kɨlaŋ wa kwe Pɔl ba tə lə bə́ kansɨ yu bə mfíaŋ fiɛ. Yu bi bə bɔ lə, “No na yəŋ? Na la fi yu gbɔɔ?” 34 Bɔ gbɔ kɨ yeke, bɛmbɛ yeke fiŋ, buhu yeke fihi. Yu jikə bɨkə dzə yi wɔŋɔ fiɔŋ fi' tɨchə. Yu tə tə lə bə́ dze Pɔl ba bəndɨ bə yu bənɨ bə bitsa lə ku. 35 Bənɨ bə bitsa lə dze yu ba kɨ bɨndɨ bə yu, lə bɔ kɨ bɨndɨ dzə yi bitanchɛ ntɨŋ, bɔ bu tɔ Pɔl ndzɨ kɨntsu ka nə̀ fu yu nəjiŋ. 36 Kɨ nə̀ biəlɨ manɨ kɨ wɛnti, kɨ tɨdi lə, “Bə́ kasɨ bə yu.”
Pɔl tambi gwɨ
37 Lə bə́ kɨ beke bə Pɔl bənɨ bə bitsa lə ku, yu nende chɛ kɨlaŋ lə, “Naji nchanyɛ fiɔŋ bə wə?” Lə yu wɔ manɨ, yu bi bə Pɔl lə, “Wə na kkɨ díɛ yi Glek? 38 Na wə kə miɨ wu Ijip wu nə̀ gbɔɔ wa bidəndə bə fó yi kɨtuŋ'ə tsa yidɔ wɨ, ba kpa bənɨ wə nəjiŋ bəntsuku bəna (4,000) ɨji bə nə̀ kkpɨshə bənɨ, bəŋ bə bɔ gəŋ kɨ ji kpa?” 39 Pɔl chi lə, “Nna nji Miɨbəju, bə́ nə̀ bɛyɛ mɨ Tasɔs kɨtuŋ kɨ Silisha ntɨŋ, ɨji Tasɔs na jimiɛhɛ kɨtuŋ kɨ kɨlɔlɔ lə. Butɨɨ, nya mɨ kwa dzə nchanyɛ bə bənɨ bɛŋ.” 40 Fo wu bənɨ bə bitsa lə wa nya dzə lə yu chanyɛ. Pɔl ləŋ bitanchɛ bia bɨŋ ba chi bənɨ bə kɨbandə. Bɔ də mɔɔŋ, yu tə bə bɔ díɛ yi Hiblu ntɨŋ lə,