Pɔl gəŋ Mɛsɛdɔnia ba gəŋ tɨ Gles
20
Tsa yi bidəndə bi nə̀ ji Ɛfɛsɔ nə̀ ka, Pɔl bəndɨ ntɛshɛ yi bənɨ bə kɨmbɨŋ'ə ba nya bɔ bitɨfiə, yu tsɨsɨ bɔ ba kɨ gɨntɨ Mɛsɛdɔnia. 2 Yu gəŋ kɨ gəndə sha ya ntɨŋ nɔ. Yu koso shəŋ yi bənɨ bə kɨmbɨŋ'ə buni ba tə llə gəŋ Gles 3 ba jiŋ sɔ fiə tɛ. Yu fə gwɨ lə yu jiwa yu gəŋ be kɨkpɔŋkɔ kɨ biɔ ntɨŋ ba gəŋ Silia, yu wɔ lə Bəju kɨki ba yu dzə. Yu ŋəŋ lə na ndzeŋe lə yu fichɛ ba tsu jiŋ dzə yi Mɛsɛdɔnia. 4 Yu nə̀ gəndəə bɔ bə Sɔpata wɛŋ wu Bilus miɨ wu Bɛlia, bə Alistakus bɔ bə Sɛkundus bənɨ bə Tɛsalɔnika, bə Gayɔs miɨ wu Dɛlbi, bə Timɔti, ma Tikikus bə Tɔfimus bə nə̀ ji bənɨ bə Ɛsha. 5 Bənɨ bɛŋ gəŋ fiə kɨ wokɔ bɨ bə bə Pɔl Tɔwas. 6 Lə Kɨgbeyɛ kɨ Blɛ wu bə́ kə galə Dzé sɔ lə chɛ, kə be kɨkpɔŋkɔ ntɨŋ Filipi ba dze díɔ tɨŋ ba tɨchə bɔ Tɔwas, bɨ bə bɔ jiŋ sɔ díɔ fumba.Pɔl chi lɛɛ kɨntsu kɨ Tɔwas jii
7 Lə kɨ ji butsu bu fiəfiə biənɨ ntɨŋ, kə tɛshɛ fudiɔ lə kə gbədiə blɛ. Chi Pɔl nə̀ji lə tsa yi butsu wɔɔ ɨ yu dza, yu gbɔ kɨ chanyɛ bə bɔ, yu kətə yu chanyɛ sɨŋsɨŋ fɔ bbutsu kɨntɨŋ kɨntɨŋ. 8 Bɨ bə bɔ nə̀ ji tsɔŋ yi nəbɔ́ ntɨŋ, bibɨlə bi kɨyɛŋ'ə tsalə sɔ. 9 Wɛŋ wu nɨnsə wudɔ wu yɨ wuhu nə̀ ji lə Yutikus' jiŋ kɨbɔŋɔ kɨ tsɔŋ'ə bɨŋ. Nɨ Pɔl nə̀ bu gəŋə fiə bə nchanyɛ, wɛŋ wa gbɔ kɨ me. Lə kɨnɨ ka be yu wɨ, yu bu dza nə mɨ ba gbɔ sɛŋ koso, mɨ nə̀ ji gá bɨŋ tɛ yi tsɔŋ'ə dze nə sɛŋ koso. Bə́ gəŋ ba dze yu ɨji yu' kkpə. 10 Pɔl shi ba gəŋ kuŋ yu bɨŋ, kukɔ yu ba tə bə bənɨ lə, “Yu wa wuwəŋ, shəŋ yɛnɨ kə kɨ bɨfi.” 11 Pɔl fichə ba bəndɨ tsɔŋ yi nəbɔ́ ya ntɨŋ, yu gbə blɛ ba diə lɨ ba chi gbɔɔ kɨ chanyɛ, yu chanyɛ butsu wɔ yu tə dza. 12 Bə́ dze wɛŋ wu nɨnsə wa kɨ kwəlɨ bə yu, yu ji wuwəŋ, shəŋ də bɔ nseeeŋ.
Pɔl nya bitɨfiə bə bənɨ bəbəŋ bə ntɛshɛ yi Ɛfɛsɔ lə
13 Kə be kɨkpɔŋkɔ kɨ biɔ ntɨŋ ba gəŋ Asɔs, dɨ wu Pɔl nə̀ sesɛ lə na sɔ wu kə ná dzɛɛ yu. Yu nə̀ tə manɨ ndzɨ yu nə̀ se lə yu gəndə bə go. 14 Yu tɨchə bɨ Asɔs, kə tə dze yu kɨkpɔŋkɔ ntɨŋ, bɨ bə bɔ gəŋ fɔ Mitilin. 15 Kə dza nə mɨ kɨkpɔŋkɔ ntɨŋ, butsu wɔ, kə fɔ fə Kiɔs ku ba chɛ lɨ, butsu chi wɔɔ, kə fɔ Samɔs, kə chi chɛɛ, bu chi wɔɔ, kə be Miletus. 16 Kə nə̀ gəndəə manɨ, kə kwaŋkɨ bukəŋ bukəŋ Ɛfɛsɔ ndzɨ Pɔl nə̀ sɛhɛ lə yu chɛse tsa Ɛsha. Yu nə̀ sokiɛ lə ma yu beke Jɛlosalɛm butsu bu Kɨgbeyɛ kɨ Pɛntikɔs lə.
17 Nɨ kə nə̀ bɛɛ Miletus, Pɔl faŋ shɔŋ bə bənsafiə bə ntɛshɛ yi bənɨ bə kɨmbɨŋ'ə bə Ɛfɛsɔ lə bɔ ba ŋəŋ yu. 18 Lə bɔ ba, yu chanyɛ bə bɔ lə, “Bə na kkɨ nɨ fiə wɛmɨ nə̀ ji bə bəŋ dze nə butsu bu fiəfiə bu nnə̀ ndəntə gbo sha yi Ɛsha ntɨŋ. 19 Nnə̀ ndze gwɨ yɛmɨ koso ba kɨ nɨntɨ Nyɔ lɨ bə məndəŋ yəsɨ. Ŋ'wɔ ŋgə dzə́ ntɨŋ kɨyɛŋ nɨ Bəju nə̀ sesɛ gbo mɨ nəjiŋ. 20 Bə na kkɨ tɨ nɨ nnə̀ ntɨfiə bəŋ toko, ŋgəndə ntɨfiə tɨ ku lɨ ku lɨ. Nnə̀ ŋkə nyələ fiɔŋ fidɔ fi naji ɨ fi chitə bəŋ. 21 Nnə̀ ntɨfiə kwa ji fiɔŋ fimo bə Bəju ma bə bənɨ bə na jimiɛhɛ Bəju, ntɨdi lə bɔ fîchə shəŋ yibɔlə ba tsu Nyɔ wɨ ba ga shəŋ Baba waha Jisɔs Klistu wɨ. 22 Fɛŋ, bə wôkɔ bə wɔ, nna ŋgɨntɨ Jɛlosalɛm ɨji nɨ Kɨn'yɨntɨ kɨ Ntsaaŋ tədiə bə mɨ, njikə kkə lə na la fi jifia fi gəŋ tɨchə mɨ sɔ lə. 23 Fiɔŋ fi nna ŋkkɨ na kwa lə, bidɨ bichi bi nna nchɛti bi ntɨŋ, na ji Kɨn'yɨntɨ kɨ Ntsaaŋ tɨdi kwa bə mɨ lə tsɔŋ yi buŋfia bə ŋgə na wokɔ mɨ sa fiə. 24 Bəmanɨ, nna ŋŋɨntəhə buwəŋ bwɛŋ fiɔŋ'ɨ, yasə lə ŋkanə nɨŋ yi Baba Jisɔs nya mɨ, nɨŋ ya ji lə ŋkɨ ntɨfiə shɔŋ yi Nyɔ yi ndzeŋe tsukɔ shəŋ yihi yi ndzeŋe wɨ yi yu na donchɛ bə bənɨ.
25 Bə fɛŋ, bə wôkɔ bə wɔ, nna ŋkkɨ lə miɨ wudɔ nə bəŋ ntɨŋ wu bɨ bə yu nə̀ ji, ntɨfiə tsukɔ buŋkuŋ bu Nyɔ lə wɨ naji ɨ yu tsu ŋəŋ bushi bwɛmɨ kə. 26 Nna ndze tsa nchanyɛ bə bəŋ ndɛŋ lə miɨ wudɔ nə bəŋ ntɨŋ la lɨ fɛŋ, tə kaŋ yɛmɨ na sɔ sɨŋ, 27 ndzɨ nnə̀ ŋkə nyələ ntə fiɔŋ fichi bə bəŋ fi Nyɔ na se. 28 Bə shə lɨ, bə kɨ tɨntɨ ŋkɨ bə gwɨ́ yɛnɨ ma ntɛshɛ yi bənɨ bə kɨmbɨŋ'ə bə na ji nɨ shíŋ yi Kɨn'yɨntɨ kɨ Ntsaaŋ galə bəŋ yi bɨŋ. Bə kɨ ji bəntɨŋkɨ bə ntɛshɛ yi bənɨ bə Nyɔ lə, yi yu nə̀ taŋŋə bə ŋgwembe mə wene lə. 29 Nna ŋkkɨ lɨ lə tsa yi nnya yasɨ, ɨ bəfwa bəŋga ba be ntɛshɛ yənɨ ntɨŋ ba jikə sabiɛ miɨ wu bɔ kwɛɛ. 30 Bənɨ bədɔ jiba bɔ fɔ tɨ nə bəŋ ntɨŋ, kɨ fukiɛ ntɛshɛ yi bənɨ bə kɨmbɨŋ'ə, bɔ kpa bɔ tsu bə bɔ kɨntsu kɨbɔlə ntɨŋ. 31 Bəma, bə kɨ dze tsa, bə sê lə biya ntɨŋ bitɛ nnə̀ ntɨfiə bəŋ bəchi bbutsu bə bbushə bə məndəŋ yəsɨ.
32 Nna nnya bəŋ fɛŋ Nyɔ kaŋ bə diɛ yihi yi na ji tsukɔ shəŋ yihi yi ndzeŋe wɨ yi yu na donchə bə bənɨ. Diɛ nyi na yi naji ɨ yi fə lə bə kɨ ko, ba fə lə bə keŋkɛ bishəŋə bi Nyɔ galə bənɨ lɨ, bə yu tsaləsɨ bɔ. 33 Nnə̀ ŋkə nshəntə bə kpə wu miɨ lə makə kɨndzu kɨ miɨ lə. 34 Bə na kkɨ buni lə na kaŋ yɛmɨ yiŋ yi nə̀ nɨntɨ fiɔŋ fichi fi bɨ bə kɨntsu kɛmɨ nə̀ se. 35 Nə biɔŋ bichi ntɨŋ, nnə̀ ndonchɛ bəŋ lə miɨ naji lə yu kɨ nɨntɨ buni yu chitəə bənɨ bə ŋgə lə, yu gɔmbiɛɛ nɨ Baba Jisɔs nə̀ chanyɛ lə, ‘Kɨnlaŋ kɨbəŋ na bə miɨ wu na nya, ya miɨ wu na ləkə buləkə.’”