Pɔl gəŋ Ɛfɛsɔ
19
Tsa yi Apɔlɔs nə̀ ji Kɔlɛn, Pɔl chɛ bukəŋ bukəŋ ba fɔ Ɛfɛsɔ. Lə yu fɔ sɔ, yu ŋəŋ ntɛshɛ yidɔ yi bənɨ bə kɨmbɨŋ'ə, 2 yu bi bə bɔ lə, “Kɨn'yɨntɨ kɨ Ntsaaŋ nə̀ ba bəŋ wɨ tsa yi bə nə̀ galə shəŋ Jisɔs wɨ?” Bɔ chi lə, “Kə nə̀ kə saa wɔ tɨmo lə fiɔŋ fidɔ fia su lə Kɨn'yɨntɨ kɨ Ntsaaŋ.” 3 Pɔl bi lə, “Jilə fi na ji manɨ, kɨjilə nə̀ nchɛse yɨla yi bə́ nə̀ chɛsɛ bəŋ biɔ?” Bɔ chi lə, “Bə́ nə̀ chɛse bɨ biɔ biəlɨ nɨ Jɔŋ nə̀ tɨfiə.” 4 Pɔl tə tə bə bɔ lə, “Jɔŋ nə̀ chɛsɛ bənɨ biɔ bə ndonchɛ lə bɔ' fichə shəŋ yibɔlə, yu nə̀ tɨdi lə bɔ bɨ̂ŋ ji bə miɨ wu na ba yu nəjiŋ, miɨ wu yu nə̀ tɨdi no na Jisɔs.” 5 Lə bənɨ ba wɔ nɨ Pɔl tədiə manɨ, bə́ tə chɛse bɔ biɔ ji bə yɨ wu Baba Jisɔs lə. 6 Pɔl ga kaŋ bɔ bɨŋ, Kɨn'yɨntɨ kɨ Ntsaaŋ ba bɔ wɨ. Bɔ gbɔ kɨ chanyɛ díɛ yi bɔ nə̀ jikə kkə, bɔ tɨdi tɨ bənɨ biɔŋ bi bɔ na woko Nyɔ chanyɛ. 7 Bənɨ ba nə̀ ji nɨ yɔɔ ntse bəfɛ.8 Pɔl kətə kwa Ɛfɛsɔ fiə tɛ, yu gɨntɨ tsɔŋ yi kɨntsɨsɨ ntɨŋ, yu chanyɛ bə bənɨ sɔ nle sɨŋ. Bɔ bə bɔ kɨ yimbiɛ, yu noŋko lə yu fə bɔ bɨŋ fiɔŋ fi yu na chanyɛ tsukɔ buŋkuŋ bu Nyɔ lə wɨ. 9 Bənɨ bədɔ tɛ fo ba nɨŋŋ mbɨŋ ba kɨ chanyɛ díɛ yibiə bənɨ nəfiə tsukɔ Dzə yi Baba wɨ. Pɔl shə bɔ ba dze ntɛshɛ yi bənɨ bə kɨmbɨŋ'ə, bɔ bə bɔ gəŋ ji tsɔŋ yi bitɨfiə yi Tailanus ntɨŋ, yu kɨ chanyɛ bə bɔ sɔ díɔ chi. 10 Pɔl fə manɨ biya bifɛ. Bəma, Bəju bə Bəglek bəchi sɔ sha yi Ɛsha ya ntɨŋ wɔ diɛ yi Baba.
Beŋ bə Kɛba lə kɨ tɨkə Pɔl
11 Nyɔ fə Pɔl kɨ fɨtɨ biɔŋ bintaŋ bintaŋ ɨji bi kɨgəsə kɨ wɨŋə lə. 12 Bə́ nə̀ ba bə́ dze ma fiɔŋ fihi fi gwɨ nɨ kɨdiadia kɨ kɨndzu lə, makə kɨndzu kɨhɨ kɨ nɨŋ'ə ba gəŋ bukɔ miɨ wu gwɨ su, miɨ wa bu wəmiə, jilə na miɨ wu na keŋkɛ kɨn'yɨntɨ kɨbiə yu wɨ, kɨ fɔ.
13 Bəju bədɔ bə nə̀ ba bɔ kɨ gəndə bɔ foshɛ bin'yɨntɨ bibiə nə bənɨ wɨ, bɔ dza kɨ moŋko lə bɔ kɨ ta yɨ wu Baba Jisɔs lə bɔ foshɛ bin'yɨntɨ bia. Miɨ gəŋ yu tə bə kɨn'yɨntɨ kɨbiə lə, “Nna mfosɔ wə yɨ wu Jisɔs lə lɨ wu Pɔl na tɨfiə wa.” 14 Bənɨ bə nə̀ moŋko fiɔŋ fia nə̀ ji fumba, ɨji nə̀ beŋ bə Kɛba fo wu bəchɛ bintɔfiɛ wu Bəju lə. 15 Kɨn'yɨntɨ kɨbiə jiji ba bi bə bɔ lə, “Nna ŋkkɨ Jisɔs, ŋkkɨ tɨ Pɔl, bə na ji bəyəŋ?” 16 Miɨ wu kɨn'yɨntɨ kɨbiə ka nə̀ ji yu wɨ bu chikə bənɨ ba, ba kə bɔ koso, bɔ lətə ba fɔ nə miɨ wa tsɔŋ bɔ ji bichilə biya bə biba gwɨ́.
17 Lə Bəju bə Bəglek bəchi bə nə̀ ji Ɛfɛsɔ wɔ ŋgwe yi fiŋ fiɔŋ, nyiŋ kwe bɔ. Bənɨ kɨ kuntə yɨ wu Baba Jisɔs lə ya nɨ fi nə̀ sa fi ji. 18 Bənɨ bə kɨmbɨŋ'ə kɨyɛŋ kɨ ba bɔ tɨdi, bɔ shafiɛ biɔŋ bi kɨjuwɔ lə bi bɔ nə̀ fɨtɨ, 19 bədɔ kɨyɛŋ bə nə̀ fɨtɨ mfiŋ, tɛshɛ biŋwatɨ bibɔlə bi mfiŋ'ə, ba bə bi ba tiŋ bənɨ nəfiə. Bə́ bɔmbiɛ kpə wu biŋwatɨ bia lə bichi, wu fɔ biba mbaashɨŋ (50,000).ª 20 Bəma, biɔŋ biŋ fə diɛ yi Baba kɨ beke bənɨ shəŋ bə buŋga, yi tsaŋkɨ, yi gɨntɨ fiəfiə.
Bənɨ gbɔ bidəndə Ɛfɛsɔ
21 Nəjiŋ wusu, Pɔl ŋəŋ lə yu jiwa yu gəŋ Jɛlosalɛm, yu ka lə yu dze kɨ gɨntɨ, ɨ yu chɛ dzə sha yi Mɛsɛdɔnia bə yi Akɛya ntɨŋ. Yu ka tɨ lə, “Tsa yi ŋgəŋə ba fɔ Jɛlosalɛm, ŋkɨ nji lə ŋgəŋ mfɔ tɨ Lom.” 22 Yu sa ba faŋ bənɨ bəfɛ, Timɔti bə Ɛlastus bə nə̀ chitəə yu, bɔ gəŋ fiə Mɛsɛdɔnia. Yu shə ba jiŋ Ɛsha tsəsɨ.
23 Lə kɨ ji tsa ya wɨ, bəŋgə jiji ba gbɔ Ɛfɛsɔ tsukɔ Dzə yi Baba wɨ jikə jimiɛ bə ntse. 24 Miɨ wudɔ wu nə̀ biɨ día nə̀ ji sɔ, yɨ wuhu ji lə Dɛmitiyus, yu nə̀ ba yu kɨ biɨ biɔŋ bi na boto tsɔŋ yi bintɔfiɛ yi nyɔ wu bə́ nə̀ tsɨsə lə Atɛmis.ª Nɨŋ nyi nə̀ ba yi kɨ nya bənɨ bə biɨ día kpə, jikə jimiə wu tsəsɨ. 25 Dɛmitiyus bəndɨ bənɨ bə nə̀ biɨ día bəchi ma bənɨ bə nə̀ nɨntɨ ŋgwe yi ya nɨŋ, bɔ tɛshɛ. Yu tə bə bɔ lə, “Bəŋgwɨŋ, bə na kkɨ lə kə na fichi kpə nə nɨŋ nyi wɨ. 26 Bə kɨ ŋɨntɨ bə woko fiɔŋ fi finɨntə fi Pɔl lə fiŋ na fɨtɨ. Yu na gəndə yu tɨdi lə bənyɔ bə bə́ na ma bə kaŋ na bənyɔ kə. Yu fə manɨ ba fichə bufɨ bu bənɨ lə kɨyɛŋ sɛŋ Ɛfɛsɔ, yu fichə wa tɨ bu bənɨ bə Ɛsha lə bəchi, bɔ bɨmi bə yu. 27 Nna ŋŋɨntɨ lə nɨŋ yaha nyi jiya yi keŋkɛ yɨ wubiə. Na kwa fia kə. Tsɔŋ yi bintɔfiɛ yi Atɛmis nyɔ wubəŋ wu kansɨ ná tsu fiɔŋ fi kɨlɔlɔ lə. Fi tɨchə manɨ, kɨjilə bə́' shisəsɨ nyɔ wubəŋ no wu bə́ na kuntə Ɛsha chi, mbi chi kuntə tɨ yu.”
28 Lə bənɨ ba wɔ manɨ, shəŋ bə bɔ. Bɔ gbɔ kɨ wɛnti, bɔ tɨdi lə, “Atɛmis wu Ɛfɛsɔ na nyɔ wubəŋ.” 29 Bulo bwa tsaŋ kɨtuŋ ka ntɨŋ kɨchi. Kuta wu bənɨ wu nə̀ tɛshɛ, chikə Gayɔs bə Alistakus, bə nə̀ ji bənɨ bə Mɛsɛdɔnia bə nə̀ gəndəə bə bə Pɔl ba kpa gəŋ bə bɔ tsɔŋ yi bənɨ na ba bɔ kɨ tɛshɛ ntɨŋ. 30 Pɔl kɨ se lə yu be ba gəŋ kɨntsu ka nəfiə, bənɨ bə kɨmbɨŋ'ə nɨŋŋ. 31 Bənɨ bədɔ bəbəŋ bəbəŋ bə sɔ kɨtuŋ ka ntɨŋ, bɔ ji bənsɨnɨ, bɔ chi faŋə shɔŋ yu lɨ, bɔ nende yu lə yu kə̂ mɔŋkɔ lə yu ta gbo wuhu mɨ. 32 Kɨntsu kɨ nə̀ tɛshɛ ka mɨ tsaŋ gwɨ kɨ wɛmiɛ chichi chichi. Bədɔ wɛnti fiŋ fiɔŋ, bədɔ wɛnti fihi. Bənɨ kɨyɛŋ nə̀ kkəhə tɨmo fiɔŋ fi bɔ nə̀ tɛshɛ mɨ ndzɨ fi. 33 Bəju dze Alɛdzanda ba ga kuta wu bənɨ nəfiə, bənɨ bədɔ ŋəŋ ba kɨ gɔmbiɛ lə yu na kkɨ nə fiɔŋ fia wɨ. Yu kɨ chichɛ bənɨ bə kɨbandə, lə yu tambi gwɨ yihi. 34 Lə bənɨ ba kkə lə Alɛdzanda na Miɨbəju, bɔ kanə wɛŋɛ bə diɛ miu, bɔ tɨdi lə, “Atɛmis wu Ɛfɛsɔ na nyɔ wubəŋ.” Bɔ kətə bɔ wɛnti manɨ ba gəŋ fɔ bitsə bi tsa lə bifɛ.
35 Kɨla wu kɨtuŋ ka ntɨŋ dza ba chi bɔ bə kaŋ, bɔ də mɔɔŋ. Yu bi bə bɔ lə, “Bənɨ bə Ɛfɛsɔ, miɨ wa su wu na masə lə na bɨ bə Ɛfɛsɔ bɛŋ bə na keŋkɛ tsɔŋ yi bintɔfiɛ yi nyɔ wu Atɛmis, bə ta wu nyɔ lə wu nə̀ gbɔɔ nə bɔ́? 36 Nɨ miɨ na sɨŋ su wu naji ɨ yu kɨ yimbiɛ fiŋ, kɨjilə bə naji lə bə kɨ ji nshiiŋ, ndzaŋkɔ sɨŋ mɛ. 37 Bə ba bə bənɨ bɛŋ mɛ ɨji bɔ kə yəhə fiɔŋ nə tsɔ́ŋ yi bənyɔ lə ntɨŋ, makə nchanyɛ yi díɛ yibiə tsukɔ nyɔ waha wu kansɨ no wɨ. 38 Jilə Dɛmitiyus bə bənɨ buhu na keŋkɛ nsa bə miɨ, tə díɔ yi nsa lə ya su yi naji ɨ bɔ gəŋ ŋəŋ bənɨ bə sakɨ bənsa, ɨ bɔ bə bɔ sa. 39 Jilə fiɔŋ fidɔ na ji su fi bə na gɔmbiɛ ya fiŋ, tə bə́ jiba ɨ bə́ jiŋgə fi kɨjimiɛ kɨ fó yi kɨtuŋ'ə ntɨŋ. 40 Nna nchanyɛ mɛ ndzɨ nna ŋŋɨntɨ lə fiɔŋ fi ndɛŋ'ə fiŋ jifia fi ga bɨ boso ntɨŋ lə kə' gbɔ bidəndə. Fi fɔ manɨ, ɨ kə jikə keŋkɛ fiɔŋ fi diəŋ fi kə chisə.” 41 Lə yu chanyɛ manɨ, yu tə kuta wu bənɨ wa saŋfiə.