Pɔl gəŋ Kɔlɛn
18
Nəjiŋ wusu, Pɔl dza nə Atɛn ba gəŋ Kɔlɛn. 2 Lə yu gəŋ sɔ, bɔ bə Miɨbəju wudɔ bɨkənɨ, yɨ wuhu ji lə Akwela, ɨji bə́ nə̀ bɛyɛ yu Pɔntus. Akwela bə məku wuhu Pliska nə̀ bambi bɔ bu ba nə Itali, ndzɨ Klawdius Ŋkuŋ wu Lom nə̀ foso kɨlaŋ lə Bəju bəchi fɔ nə nɔ. Pɔl lɛ bɔ jii 3 ba ŋəŋ lə bɔ na nachɛ dzɨ́ yi bɔ nə̀ kusə bitsawo su, əji tɨ nɨŋ yi Pɔl yu wu yu nə̀ ji ndzɨ yi, yu kɨ me mɨ, bɔ bə bɔ nɨntɨ. 4 Ɨ kwətsə butsu bu fufiɛ buchi, yu gəŋ tsɔŋ yi kɨntsɨsɨ ntɨŋ ba chanyɛ bə Bəju ma Bəglek, yu diɔnɔ lə yu fə bɔ bɨŋ fiɔŋ fi yu nə̀ tɨdi.5 Lə Silas bɔ bə Timɔti dza nə Mɛsɛdɔnia ba ba lɨ, Pɔl dze tsa yihi chi kɨ tɨdi diɛ yi Nyɔ, yu donchɛ bə Bəju lə Nchitə wu Nyɔ nə̀ kaa wa na Jisɔs. 6 Bəmanɨ, Bəju ba dze kɨ nɨnntɨ fiɔŋ fi yu nə̀ chanyɛɛ, bɔ kɨ suŋku yu. Yu kuchə bidi nə bindzu bihi bi gwɨ wɨ ba tə bə bɔ lə, “Kkpə yɛnɨ na ji bəŋ kaŋ. Nna nsɨŋ bə kaŋ sɔ. Dze nə fɛŋ bɨŋ, njiwa ŋkɨ ŋgɨntɨ ji bənɨ bə na jimiɛhɛ Bəju wɨ.” 7 Yu shə bɔ ma ba fɔ gəŋ kɨ me ji bə miɨ wudɔ wu na jimiɛhɛ Miɨbəju, miɨ wa nə̀ kuntəə Nyɔ. Yɨ wuhu nə̀ ji lə Titius Jɔstus, ku wuhu ji fə tsɔŋ yi kɨntsɨsɨ ku. 8 Klipus fo wu tsɔŋ yi kɨntsɨsɨ lə bə bənɨ bəchi bə yu tsɔŋ ga shəŋ Baba wɨ. Bənɨ bə Kɔlɛn kɨyɛŋ kɨ woko nɨ Pɔl na tɨfiə tsukɔ Jisɔs wɨ, bɔ bɨmi, bə́ chɛsɛ bɔ biɔ.
9 Lə kɨ ji butsu budɔ bbutsu, Baba chanyɛ bə Pɔl budəŋfɨ ntɨŋ lə, “Nyiŋ wə kə̂ kwekɛhɛ, kɨ tɨdi kwa diɛ yɛmɨ wə gɨntɨ fiə. Wə kə̂ chində su, 10 ndzɨ mɨ wa bə wə, miɨ na sɨŋ su wu naji ɨ yu fə wə fiɔŋ. Bənɨ bɛmɨ ba kɨtuŋ kɨŋ ntɨŋ kɨyɛŋ.” 11 Bəma, Pɔl jiŋ sɔ kɨya kɨchidi bə kɨdiadia, yu tɨfiə bənɨ diɛ yi Nyɔ.
12 Lə Galiɔ ba kɨ ji fo sha yi Akɛya ntɨŋ, Bəju tɛshɛ gwɨ ba kwe Pɔl ba kansɨ gəŋ bə yu kansu ntɨŋ 13 ba tə bə Galiɔ lə, “Miɨ no na dio lə yu fichɛ bənɨ bɔ kɨ tsɨsə Nyɔ dzə yidɔ ntɨŋ chichi, ɨjikə jimiɛ nɨ kɨlaŋ na tɨdi.” 14 Lə Pɔl dza lə yu kɨ chanyɛ, Galiɔ dza ba tə bə Bəju ba lə, “Bəju bə wɔ̂, ɨ fiɔŋ fiŋ tə na ji fiɔŋ fidɔ fibiə fi miɨ no fəə, makə kɨlaŋ kɨdɔ kɨ yu buŋɔ, ntə ŋkansɨ shəŋ ba wokɔ fiɔŋ fi bə na chanyɛ. 15 Bəmanɨ, nɨ fiɔŋ fiŋ na ji yímbiə tsukɔ bənchanyɛ wɨ bə yɨ́, ma bilaŋ biɛnɨ wɨ, bə gə̂ŋ kasɨ bəŋbəŋ. Naji nsa fiŋ fiɔŋ kə.” 16 Lə yu chanyɛ manɨ, yu kɔŋ bɔ, bɔ fɔ nə kansu wa ntɨŋ. 17 Bɔ bəchi dza ba kpa Sɔstɛnes fo wu tsɔŋ yi kɨntsɨsɨ lə ba bumbu yu mɨ kansu wa nəfiə. Galiɔ jikə biɛhɛ bɔ lɨ kə.
Pɔl tsu Antiɔk
18 Nəjiŋ wusu, Pɔl jiŋ Kɔlɛn bə bənɨ bə kɨmbɨŋ'ə díɔ kɨyɛŋ ba tə dza shə bɔ mɨ ba dze Pliska bə Akwela shi bə bɔ ba be kɨkpɔŋkɔ kɨ biɔ ntɨŋ kɨ gɨntɨ Silia. Fə bɔ nə̀ dza nə Sɛŋklia dɨ wu bɔ nə̀ bɛɛ kɨkpɔŋkɔ, Pɔl kə yu yihi nə fi ndzɨ munchɛŋ mu yu nə̀ chɛŋɛ bə Nyɔ. 19 Bɔ gəŋ fɔ Ɛfɛsɔ, Pɔl shə Pliska bɔ bə Akwela sɔ ba gəŋ fihi ji tsɔŋ yi kɨntsɨsɨ yi Bəju ntɨŋ ba yimbiɛ bə Bəju sɔ. 20 Bɔ nende lə yu biə jimiɛ bə bɔ díɔ kɨyɛŋ, yu nɨŋŋ. 21 Bəmanɨ, lə yu kɨ dza, yu tə bə bɔ lə, “Njiwa nchisə mba, jilə Nyɔ' bɨŋ.” Lə yu tə manɨ, yu be kɨkpɔŋkɔ ntɨŋ ba dza nə Ɛfɛsɔ.
22 Lə kɨkpɔŋkɔ fɔ Kasaliya, Pɔl fɔ ba bəndɨ gəŋ tsɨsɨ ntɛshɛ yi bənɨ bə kɨmbɨŋ'ə Jɛlosalɛm, tə dza ba shi Antiɔk. 23 Yu biə jimiə mɨ tsa yidɔ wɨ, tə chi dza ba kɨ gəndə yu chɛti sha yi Galɛsha bə yi Flija ntɨŋ, yu kosɔ shəŋ yi bənɨ bə kɨmbɨŋ'ə bə sɔ.
Apɔlɔs tə diɛ yi Nyɔ Ɛfɛsɔ
24 Miɨ Bəju wudɔ dza ba ba Ɛfɛsɔ, yɨ wuhu ji lə Apɔlɔs, bə́ nə̀ bɛyɛ yu Alɛdzandia. Yu ji miɨ wu nə̀ kkɨ nchanyɛ, yu kkɨ tɨ Kɨŋwatɨ kɨ Nyɔ lə buni. 25 Nə̀ ji bə́ nə̀ tɨfiə yu Dzə yi Baba, yu tə kɨ shi tɨ bə bitɨfiɛ bi na tsukɔ Jisɔs wɨ, yu tɨfiə bənɨ diəŋ. Bəmanɨ, yu nə̀ kkɨ kwa chi Jɔŋ nə̀ tɨfiɛ yu chɛsɛ bənɨ biɔ. 26 Lə yu ba Ɛfɛsɔ, yu gbɔ kɨ tɨfiə bənɨ tsɔŋ yi kɨntsɨsɨ ntɨŋ nle sɨŋ. Lə Pliska bə Akwela wɔ nɨ yu na tɨfiə manɨ, bɔ dze yu ba gəŋ bɔ tsɔŋ ba chi nachə yu buni tsukɔ Dzə yi Nyɔ wɨ.
27 Apɔlɔs dza ba gɔmbiɛ lə yu jiwa yu llə ba gəŋ dia wu Akɛya. Bənɨ bə kɨmbɨŋ'ə bə Ɛfɛsɔ chitə yu ba bɔndu kɨŋwatɨ bə ntɛshɛ yi bənɨ bə kɨmbɨŋ'ə bə Akɛya, lə bɔ ləkə yu. Lə yu gəŋ fɔ sɔ, yu chitə bənɨ bə kɨmbɨŋ'ə kɨtso, bənɨ bɛŋ ji bə Nyɔ nə̀ donchə bɔ shəŋ yihi yi ndzeŋe ba fə bɔ ga shəŋ Jisɔs wɨ. 28 Yu kɨ yimbiɛ bə Bəju toko ɨjikə jimiɛ yímbiɛ yi ntse, yu yimbiɛ ba ya bɔ, yu donchɛ Kɨŋwatɨ kɨ Nyɔ lə ntɨŋ lə Jisɔs na Nchitə wu Nyɔ nə̀ kaa wa.