Pɔl bə Silas gəŋ Tɛsalɔnika
17
Lə Pɔl bə Silas kɨ gɨntɨ, bɔ chɛ kɨtuŋ kɨ Aŋfipɔlis bə kɨ Apɔlɔnia ntɨŋ ba llə gəŋ fɔ Tɛsalɔnika, ɨji tsɔŋ yi kɨntsɨsɨ yi Bəju nə̀ ji mɨ. 2 Pɔl gəŋ ba be tsɔŋ yi kɨntsɨsɨ ntɨŋ nɨ fiə wuhu nə̀ ji, yu kɨ chanyɛ bə bənɨ ba díɔ yi fufiɛ ntɨŋ tɛ, yu donchɛɛ fiɔŋ fichi nə Kɨŋwatɨ kɨ Nyɔ lə ntɨŋ. 3 Yu kɨ donchɛ yu nachɛ lə, Nchitə wu Nyɔ nə̀ kaa wa nə̀ji lə yu wɔ ŋgə ba dzakɔ nə kkpə lɨ. Yu tə lə, “Jisɔs wu nna nchanyɛ no kɨhɨ na Nchitə wa.” 4 Bənɨ bədɔ wɔ manɨ, bɔ bɨŋ ba tɛshɛ Pɔl bə Silas. Bəglek bədɔ bə nə̀ kuntə Nyɔ bə bəkansɨ bəbəŋ bədɔ kɨyɛŋ bɨŋ tɨ. 5 Bəmanɨ, kɨndɔ kɨ chindi Bəju bədɔ bə Pɔl bɔ bə Silas. Bɔ bəndɨ bənɨ bədɔ bə nə̀ ji kɨlɔlɔ bɔ tɛshɛ kɨntsu lɨ ba gbɔ bidəndə kɨtuŋ ntɨŋ. Bənɨ ba dza ba gəŋ buŋ tsɔŋ yi Jasɔn lə bɔ na se lə bɔ foso bə Pɔl bə Silas ba nya bə bənɨ binchi. 6 Bɔ nɔŋ ba jikə ŋəŋkəhə bɔ wɨ, bɔ kpa Jasɔn bə bənɨ bə kɨmbɨŋ'ə bədɔ ba gəŋ bə bɔ fó yi kɨtuŋ'ə nəfiə, kɨ wɛnti bɔ tɨdi lə, “Bənɨ bɛŋ na bə na gəndə bɔ nya ŋgə mbi chi ntɨŋ, bɔ ba ba fɔ mɛ, 7 Jasɔn ləkə bɔ ba ga yu tsɔŋ. Bɔ bəchi bunchi bilaŋ bi Ŋkuŋ wu Lom lə, bɔ tɨdi lə Ŋkuŋ wudɔ wa su yɨ wuhu ji lə Jisɔs.” 8 Lə fó yi kɨtuŋ'ə bə bənɨ bə nɔ wɔ manɨ, bɔ gbɔ kɨ ndzaŋkɔ. 9 Bɔ fə Jasɔn bə bənɨ bə kɨmbɨŋ'ə ba nya bɔ kpə lə ɨ fi chisə tɨchə, ɨ bɔ jikə chisə kpə wa bə bɔ. Bɔ tə tɔkaŋ nə bɔ wɨ lə bɔ kɨ gɨntɨ.Pɔl bɔ bə Silas gəŋ Bɛlia
10 Lə fu kɨ jimi, bənɨ bə kɨmbɨŋ'ə dze Pɔl bɔ bə Silas ba chində bɔ, bɔ kɨ gɨntɨ kɨtuŋ kɨ Bɛlia ntɨŋ. Lə bɔ gəŋ be sɔ, bɔ gəŋ tsɔŋ yi kɨntsɨsɨ yi Bəju ntɨŋ. 11 Bəju bə mɨ ba nə̀ bənɨ bə nə̀ ji bə fiə wu ndzeŋe ba ya Bəju bə Tɛsalɔnika, ndzɨ bɔ nə̀ dze tsa ba ləkə bitɨfiə bə shəŋ chi, bɔ chənəə Kɨŋwatɨ kɨ Nyɔ lə ntɨŋ díɔ chi lə bɔ ŋəŋ lə biɔŋ bi Pɔl na tɨfiə bɔ na bi yɛyi lə. 12 Bɔ bɨŋ diɛ yi Nyɔ kɨtso. Bəkansɨ bəbəŋ kɨyɛŋ bə nə̀ ji Bəglek ma bənɨnsə kɨyɛŋ bə nə̀ ji tɨ Bəglek bɨŋ. 13 Bəmanɨ, lə Bəju bə nə̀ ji Tɛsalɔnika wɔ lə Pɔl gəŋ kɨ tɨdi diɛ yi Nyɔ Bɛlia, bɔ gəŋ tɨ sɔ ba nyishi kɨntsu kɨ bənɨ lə kɨ gbɔ bidəndə. 14 Bənɨ bə kɨmbɨŋ'ə tə tə bə Pɔl tsa miu lə yu gəŋ fə ŋgɔŋ məmbəŋ ku. Bəmanɨ, Silas bə Timɔti shə Bɛlia. 15 Bənɨ bə nə̀ gəŋə lə bɔ chində Pɔl, gəŋ fɔ Atɛn ba tə shə yu. Lə bɔ tsu jiŋ, Pɔl faŋ bɔ lə bɔ gəŋ tə bə Silas bə Timɔti lə bɔ diɔnɔ ba biə yu fɔfɔ.
Pɔl kɨ ji Atɛn
16 Pɔl kɨ wokɔ Silas bɔ bə Timɔti Atɛn. Lə yu kɨ gəndə sɔ, yu ŋəŋ kɨtuŋ ka' yi bə munyɔ. Fi nɨkə shəŋ yihi. 17 Yu gəŋ tsɔŋ yi kɨntsɨsɨ yi Bəju ntɨŋ ba chanyɛ bə bɔ ma bənɨ bə nə̀ jimiɛhɛ Bəju bə nə̀ tsɨsə tɨ Nyɔ sɔ. Yu chisə chanyɛ toko díɔ chi bə bənɨ bə nə̀ ba bɔ kɨ ba mɨ tsa lɨ tsa lɨ. 18 Bənɨ bədɔ bə bitɨfiə lə, bə́ tsɨsə bɔ lə Ɛpikɔlian ma bə bə bə́ nə̀ tsɨsə lə Sitɔyik, bɔ dza ba gbɔ kɨ yimbiɛ Pɔl. Nɨ Pɔl nə̀ tɨfiə tsukɔ Jisɔs wɨ, bə chi yu nə̀ dzakɔ nə kkpə lɨ, bədɔ kɨ bishɛ lə, “Mfidi no na kɨtɨ bifuŋ lə la lə?” Bədɔ kɨ tɨdi yibɔ lə, “Fi' yinshi bə bɨ wələ yu na tɨfiə tsukɔ bənyɔ bə bənɨ bədɔ lə wɨ.” 19 Bəma, bɔ dze Pɔl ba gəŋ dɨ wu kɨjimiɛ lə wɨ, wu bə́ nə̀ tsɨsə lə Aleɔpagɔs,ª ba tə bə yu lə, “Kə na se lə kə chi wɔɔ tsukɔ bitɨfiə bifa biŋ wɨ bi wə na ba bə bi lə bi na ji lə la lə? 20 Wə na chanyɛ biɔŋ bidɔ bi kə nə̀ kə saa wɔ lɨ. Bəma, kə kɨ se lə kə kkə kɨnyi kɨsu.” 21 (Bənɨ bə Atɛn ma bəbanə bə sɔ nə̀ ba bɔ kɨ ji yibɔ lə bɔ kɨ shɨ bɔ woko ji biɔŋ bifa, bɔ chanyɛ kɨ bi lə.)
22 Pɔl ləŋ kɨjimiɛ kɨ Aleɔpagɔs kɨsu nəfiə ba tə lə, “Bənɨ bə Atɛn, nna ŋŋɨntɨ dzə́ ntɨŋ chi lə bə na kuntə bənyɔ kɨtso. 23 Nna nchanyɛ mɛ ndzɨ nnə ŋgəndə kɨtuŋ kɛnɨ ntɨŋ, lə ŋkɨ njiŋgə bidɨ bi bə́ na tsɨsə bənyɔ bi ntɨŋ, ŋŋəŋ tanyə wu bintɔfiɛ lə wudɔ wɨ, bə́' bɔndu su bɨŋ lə, ‘Bə nyɔ wu bə́ na ji kə kkə.’ Nyɔ wu bə na tsɨsə wa bə ŋkkə sɨŋ yu, na yu wu njiwa nchanyɛ bə bəŋ tsukɔ yu wɨ fɛŋ. 24 Nyɔ no na wu nə̀ fəə mbi no bə biɔŋ bichi bi na ji sɔ. Na yu Ŋkuŋ wu bɔlu bə sha, yu na mɛhɛ tsɔ́ŋ yi bintɔfiɛ lə ntɨŋ yi na ji lə na bənɨ bə' wɛyɛ. 25 Yu na fiəŋkəhə fiɔŋ fidɔ fi yu na se lə miɨ nɨŋ yu lɨ, ndzɨ na yu wu na fɨtɨ bənɨ bəchi yɨntə, bɔ ji bəwəŋ, bɔ keŋkɛ fiɔŋ fichi fi bɔ na se. 26 Yu nə̀ fə ŋgwé yi bənɨ lə chi fɔ nə miɨ miu wɨ kɨ ji bo yi mbi no lə ntɨŋ chi. Yu nə̀ fɨtɨ manɨ, ɨji yu nə̀ sese tsa yi bɔ ná kɨ ji su, ma ntándə yi bidɨ lə, bi bɔ ná kɨ me bi ntɨŋ. 27 Yu nə̀ fə manɨ fə bənɨ kɨ noŋko yu, ma bɔ ŋɨntɨ yu wɨ. Bəmanɨ, Nyɔ na jimiɛhɛ tɨmo dzəbudə nə miɨ wudɔ wɨ nə bɨ ntɨŋ. 28 Fiŋfi na diəŋ nɨ miɨ wudɔ nə̀ chanyɛ lə,
‘Na yu wu na fɨtɨ kə ji bə buwəŋ, kə gəndə,
kə ji chi kə na ji chiŋ.’
Miɨ wɛnɨ wu ntəfɨ wudɔ nə̀ chanyɛ tɨ lə,
‘Kə na ji beŋ buhu kɨbɛɛ.’
29 Nɨ kə na ji beŋ bə Nyɔ lə manɨ, kə kə kɨ gɔmbiɛ lə Nyɔ na boto fiɔŋ fi miɨ' nachɛ bə bufɨ buhu, makə fi bə́ sə biə bə ŋgusa, makə bə kɨdəŋkə, makə bə ta. 30 Tsa yi bənɨ nə̀ bambi kɨjuwɔ ntɨŋ, bɔ nə̀ fɨtɨ biɔŋ bibiə biŋ, Nyɔ galɨ ma. Bəmanɨ, fɛŋ yu na tɨdi lə bənɨ bəchi fîchə shəŋ yibɔlə. 31 Bɔ fichə shəŋ ndzɨ yu' ga butsu bu yu ná saa mbi chi dzə yi kɨyɛyi ntɨŋ. Yu' sa miɨ wuhu wu ná kɨ sakɨ. Yu donchɛ fiŋ bə bənɨ bəchi lə na yɛyi nɨ yu nə̀ dzakɔ miɨ wa nə kkpə lɨ.”
32 Lə Pɔl chanyɛ manɨ, bɔ wɔ yu tɨdi kɨ ndzakɔ ya nə kkpə lɨ, bənɨ bədɔ gbɔ kɨ sɨŋfɨ yu. Bədɔ tɨdi yibɔ lə, “Kə na se lə kə chi wɔɔ tsukɔ fiɔŋ fi wə chanyɛ fiŋ wɨ.” 33 Pɔl fɔ ba shə bɔ. 34 Bəmanɨ, bənɨ bədɔ bɨŋ fiɔŋ fi yu nə̀ chanyɛ ba tɛshɛ yu. Miɨ wudɔ nə bɔ ntɨŋ nə̀ Diɔnisius wu nə̀ ji miɨ wu kɨjimiɛ kɨ Aleɔpagɔs, wudɔ ji kpansɨ, yɨ wuhu ji lə Damalis, ma bə bənɨ bədɔ tɨ.