Timɔti tɛshɛ kɨntsu kɨ bə Pɔl bə Silas lə ntɨŋ
16
Pɔl gəndə ba gəŋ fɔ kɨtuŋ kɨ Dɛlbi ntɨŋ ba dza gəŋ kɨ Lista ntɨŋ. Miɨ wu nɨŋ wu Jisɔs wudɔ nə̀ ji sɔ Lista, yɨ wuhu ji lə Timɔti, mɛni ji Miɨbəju, yu ji kpansɨ wu kɨmbɨŋ, bəmanɨ tɨɨ nə̀ ji miɨ Bəglek. 2 Timɔti no nə̀ miɨ wu bənɨ bə kɨmbɨŋ'ə bəchi bə Lista bə bə Ikɔnium nə̀ sɛnti yu. 3 Pɔl sɔmbu dzɔ yi Timɔtiª ndzɨ yu nə̀ se lə yu dze yu bɔ bə yu kɨ gəndə. Yu nə̀ sɔmbu yu dzɔ manɨ ndzɨ Bəju bəchi bə nə̀ ji bidia bia ntɨŋ nə̀ kkɨ lɨ lə chɛ Timɔti nə̀ miɨ Bəglek. 4 Bɔ kɨ gəndə bituŋ ntɨŋ, bɔ tɨdi bənɨ bə kɨmbɨŋ'ə bəchi bilaŋ bi beŋ bə faŋə bə Jisɔs lə bi fó yi kɨntsu lə yi Jɛlosalɛm nə̀ jimiɛ ba bɨŋ lə bɔ kɨ galɨ. 5 Bəma, bəntɛshɛ bə bənɨ bə kɨmbɨŋ'ə ba kɨ ko bɔ gɨntɨ fiəfiə kɨmbɨŋ ntɨŋ, bənɨ yinəə bɔ wɨ díɔ chi.Budəŋfɨ kwe Pɔl Tɔwas
6 Pɔl bə kɨntsu kɨhɨ dza lə bɔ gəŋ tɨfiə diɛ yi Nyɔ sha yi Ɛsha ntɨŋ, Kɨn'yɨntɨ kɨ Ntsaaŋ nɨŋŋ. Bɔ gəndə ba chɛ ji sha yi Flija bə yi Galɛsha ntɨŋ. 7 Lə bɔ gəŋ fɔɔ fə sha yi Misha ku kɨ se lə bɔ be ba gəŋ kɨtuŋ kɨ Bitinia ntɨŋ, Kɨn'yɨntɨ kɨ Jisɔs lə chi nɨŋŋə. 8 Bəma, bɔ chɛ sha yi Misha ntɨŋ ba shi gəŋ kɨtuŋ kɨ Tɔwas ntɨŋ. 9 Lə kɨ ji bbutsu, budəŋfɨ kwe Pɔl. Yu ŋəŋ budəŋfɨ bwa ntɨŋ miɨ wudɔ wu Mɛsɛdɔnia' ləŋ kɨ nende yu lə, “Butɨɨ, llə̂ wə ba chitə bɨ sɛŋ Mɛsɛdɔnia.” 10 Lə budəŋfɨ bwa kwe Pɔl manɨ, bɨ bə bɔª ŋəŋ lə Nyɔ' donchɛ bɨ lə kə gəŋ tə shɔŋ yihi yi ndzeŋe sha yi Mɛsɛdɔnia ya ntɨŋ. Mɨ kɨsɨkɨ, kə fə gwɨ yi gəŋə sɔ.
Lidia ga shəŋ Jisɔs wɨ Filipi
11 Kə dza nə Tɔwas ba llə nyɨlɨlɨ kɨkpɔŋkɔ kɨ biɔ ntɨŋ ba lafu Samɔtɛs. Butsu wɔ, kə gəŋ fiə ba fɔ Niapɔlis. 12 Kə dza nə mɨ ba gəndə gəŋ Filipi, ɨji kɨtuŋ kɨbəŋ sha yi Mɛsɛdɔniaª ntɨŋ. Kɨtuŋ ka nə̀ Bəloma bə nə̀ keŋkɛ buŋga kɨ bɨŋ. Kə jiŋ sɔ díɔ yidɔ. 13 Lə ba kɨ ji butsu bu fufiɛ, kə fɔ nə kɨtuŋ ka ntɨŋ ba gəŋ fɔ fə ŋgɔŋ ku mə kə nə̀ gɔmbiɛ lə na dɨ wu Bəju lə wu kɨntsɨsɨ lə. Lə kə gəŋ, kə ŋəŋ ji bəkansɨ bədɔ' tɛshɛ mɨ, kə jiŋ kɨ chanyɛ bə bɔ. 14 Kpansɨ wudɔ nə̀ ji tɨ mɨ yu woko, yɨ wuhu ji lə Lidia, yu nə̀ kuntəə Nyɔ. Kpansɨ no nə̀ fɔ nə kɨtuŋ kɨ Tayatila ntɨŋ, yu nə̀ ba yu kɨ taŋŋə ŋgwe yi bindzu bidɔ biyə, bi tɛti kpə. Baba gu shəŋ yihi, yu bɨŋ fiɔŋ fi Pɔl nə̀ chanyɛ. 15 Bə́ chɛse yu bə bənɨ bə yu tsɔŋ biɔ, yu nende bɨ lə, “Butɨɨ, jilə bə ŋəŋ lə mɨ' ŋga shəŋ yɛmɨ chi Baba wɨ, bə ba me mɨ tsɔŋ.” Yu kɨ bu nendɛ bɨ, kə bu gəŋ.
Bə́ fasɨ Pɔl bɔ bə Silas tsɔŋ yi buŋfia ntɨŋ Filipi
16 Lə kɨ ji butsu budɔ, kə kɨ gɨntɨ fə dɨ wu kɨntsɨsɨ lə ku, kə bɨkənɨ bə wɛŋ wu kansɨ wudɔ yu ji mfia. Yu nə̀ ji bə kɨn'yɨntɨ kɨdɔ yu wɨ, ɨji kɨ ba kɨ fə miɨ kɨ ji miɨ wu kɨba. Bənɨ bə wɛŋ wu kansɨ wa lə nə̀ fichi kpə nə yu wɨ mɛ kɨtso ndzɨ yu nə̀ ba yu kɨ tɨdi biɔŋ bi naji lə bi tɨchə. 17 Lə wɛŋ wu kansɨ wa ŋəŋ bɨ bə Pɔl wɨ, yu kɨ biəlɨ bɨ yu wɛnti, yu tɨdi lə, “Bənɨ bɛŋ na bənɨ bə nɨŋ'ə bə Nyɔ wu ji Fo wu Biɔŋ Bichi lə, bɔ na donchɛ dzə yi naji ɨ bə chɛ yi ntɨŋ ba fɔfo.” 18 Lə yu fə manɨ díɔ kɨyɛŋ, fi lɔ Pɔl wɨ, yu fichə ba wɛŋ bə kɨn'yɨntɨ ka lə, “Nna ntɨdi bə wə yɨ wu Jisɔs Klistu lə lɨ, fɔ̂ nə wɛŋ no wɨ.” Kɨn'yɨntɨ ka bu fɔ nə yu wɨ mɨ kɨsɨkɨ.
19 Lə bənɨ bə mfia wa lə ŋəŋ lə dzə́ yibɔlə yi nɔŋɔ kpə' kpɨyi, bɔ kwe Pɔl bə Silas ba kpa gəŋ bə bɔ toko, fó yi kɨtuŋ'ə nəfiə. 20 Lə bɔ gəŋ bə bɔ manɨ, bɔ ga bɔ bənɨ bə kɨlaŋ'ə bə nə̀ sakɨ bənsa nəfiə, ba tə lə, “Bənɨ bɛŋ na Bəju, bɔ na nya ŋgə kɨtuŋ kaha ntɨŋ. 21 Bɔ tɨfiə bənɨ fiə wu kɨlaŋ kaha kə bɨmiə. Kə na ji bənɨ bə Lom, ɨjikə jimiə lə kə kɨ biəlɨ fiə wubɔlə.” 22 Kuta wu bənɨ wu nə̀ ji mɨ tɛshɛ bɔ ba koŋ gəŋ bə Pɔl bə Silas wɨ. Bənɨ bə nə̀ sakɨ ba bənsa shakiɛ bindzu nə bə Pɔl bə Silas gwɨ ba tə lə bə́ shɔkiɛ bɔ. 23 Bə́ dze tsa ba shɔkiɛ bɔ buni, tə dze bɔ ba gəŋ ga tsɔŋ yi buŋfia ntɨŋ ba tə bə miɨ wu nə̀ kɨki wa tsɔŋ yi buŋfia lə yu kɨ kɨki bɔ buni. 24 Lə yu wɔ manɨ, yu dze bɔ ba gəŋ fasɨ dia wu nəntɨŋ wu tsɔŋ yi buŋfia lə ba fasɨ go yibɔlə bə mfasɨ.
25 Lə kɨ ji nɨ bbutsu kɨntɨŋ kɨntɨŋ, Pɔl bə Silas kɨ tsɨsə, bɔ tɨtɨ, bɔ kuntəə Nyɔ, bənɨ bə tsɔŋ yi buŋfia ntɨŋ woko, 26 sha jiji ba gbɔ kɨ nɨkə bə buŋga, tsɔŋ yi buŋfia ya nɨkə gəŋ fɔ kɨchə wɨ. Mɨ kɨsɨkɨ, bigwəŋ bichi gulɔ, mfíaŋ yi bənɨ bə tsɔŋ yi buŋfia lə bəchi kəmbiɛ. 27 Miɨ wu nə̀ kɨki wa tsɔŋ yi buŋfia ya dzakɔ ba ŋəŋ bigwəŋ ji biŋgulɔ, yu kɨ gɔmbiɛ lə bənɨ bə tsɔŋ yi buŋfia lə ba' lətə. Yu tsɔ mbiəlɨ nə kɨbalə ntɨŋ lə yu kkpɨsɨ gwɨ yihi su. 28 Pɔl wɛŋ bə diɛ bɔ́ ba tə lə, “Wə kɨ wə kkpɨsə gwɨ yɔhɔ! Kə bɛŋ mɛ bəchi!”
29 Miɨ wu nə̀ kɨki wa tsɔŋ yi buŋfia ya bəndɨ miɨ wudɔ, miɨ wa ba bə kɨbɨlə, yu lətə ba be sɔ tsɔŋ ba gəŋ tuŋ nu Pɔl bə Silas nəfiə kɨ jakɨ bə nyiŋ. 30 Yu dza ba dze bɔ, fɔ bə bɔ binchi ba bi bə bɔ lə, “Bətaa, mfɨtɨ nəŋ tə fɔfo.” 31 Bɔ chi bə yu lə, “Gâ shəŋ yɔhɔ Baba Jisɔs wɨ, bəŋ bə bənɨ bə wə tsɔŋ jiba fɔfo.” 32 Bɔ tə yu shɔŋ yi Baba, ma bə bənɨ bə yu ku bəchi. 33 Yu dze bɔ fa bbutsu wa ba wwɔ biba bibɔlə. Mɨ kɨsɨkɨ, bɔ chɛse yu bə bənɨ bəchi bə yu tsɔŋ biɔ. 34 Yu dze bɔ, bɔ bəndɨ yu ku, yu nya bɔ bidiəŋ bɔ diə. Bɔ bə bənɨ bəchi bə yu tsɔŋ kɨ laŋkɨ lə bɔ' ga shəŋ Nyɔ wɨ.
35 Lə butsu wɔ, bənɨ bə kɨlaŋ'ə bə nə̀ sakɨ ba bənsa faŋ bənɨ bə bitsa lə lə bɔ gəŋ tə bə miɨ wu na kɨki wa tsɔŋ yi buŋfia lə yu gəŋ tə bə́ foso bənɨ ba, bɔ kɨ gɨntɨ. 36 Miɨ wu nə̀ kɨki wa tsɔŋ yi buŋfia ya gəŋ ba ŋəŋ Pɔl ba tə bə yu lə, “Bənɨ bə kɨlaŋ'ə sə faŋ shɔŋ lə mfoso bəŋ, bə kɨ gɨntɨ nyəkə.” 37 Bəmanɨ, Pɔl tə bə bənɨ bə bitsa lə ba lə, “Bə́ nə shɔkiɛ bɨ toko, bə́ bambi kə sakəhə nsa yaha, ɨji kə na ji tɨ bənɨ bə Lom nɨ bəŋ, bə́ fasɨ tɨ bɨ tsɔŋ yi buŋfia ntɨŋ. Bə́ na tɨdi fɛŋ lə bə́ foso bɨ nəjiŋ nəjiŋ nəŋɨlɨ? Naji ɨ fi gəndə kə. Na bənɨ bə kɨlaŋ'ə bəsu bə jiba ɨ bɔ ba ɨ bə́ tə foso bɨ.”
38 Bənɨ bə bitsa lə ba tsu jiŋ ba tə bə bənɨ bə kɨlaŋ'ə ba nɨ Pɔl chanyɛ. Lə bɔ wɔ lə Pɔl bə Silas nə̀ ji bənɨ bə Lom, bɔ le. 39 Bɔ ba ku kaŋ bə bɔ ba foso bɔ nə tsɔŋ yi buŋfia ya ntɨŋ, bɔ chində bə Pɔl bə Silas ba nende lə bɔ dza nə kɨtuŋ ka ntɨŋ. 40 Pɔl bə Silas fɔ nə tsɔŋ yi buŋfia ya ntɨŋ ba gəŋ Lidia tsɔŋ, ɨji bənɨ bə kɨmbɨŋ'ə ji sɔ, Pɔl bə Silas nya bɔ bitɨfiə ba tə dza nə nɔ.