Bənɨ bə kɨmbɨŋ'ə jiŋ kɨjimiɛ Jɛlosalɛm
15
Bənɨ bədɔ dza nə Judɛya ba shi Antiɔk ba kɨ tɨfiə bənɨ bə kɨmbɨŋ'ə lə, “Naji ɨ miɨ fɔfo kə fiəŋkə lə bə́' sɔmbu dzɔ yihi chi kɨlaŋ kɨ Mose lə na donchɛ.” 2 Pɔl bɔ bə Banabas nɨŋŋ bitɨfiɛ bia, bɔ bə bənɨ ba jiŋ ba yimbiɛ tsukɔ bitɨfiɛ bia wɨ ɨ jikə jimiɛ yímbiɛ yintse. Lə fi ya buŋga, ntɛshɛ yi bənɨ bə kɨmbɨŋ'ə bə Antiɔk sa Pɔl bɔ bə Banabas bə bənɨ bə kɨmbɨŋ'ə bədɔ ba faŋ lə bɔ bəndɨ Jɛlosalɛm ba ŋəŋ beŋ bə faŋə bə Jisɔs lə bə fó yi ntɛshɛ yi bənɨ bə kɨmbɨŋ'ə yi sɔ, lə bɔ chɛse bifuŋ fiɔŋ fia ntɨŋ.3 Bəma, ntɛshɛ yi bənɨ bə kɨmbɨŋ'ə yi Antiɔk faŋ bɔ, chi bɔ nə̀ gɨntɨ, bɔ kɨ chɛti bidia bi Fɔnisha bə bi Samaliya ntɨŋ bɔ tɨdi bə bənɨ bə kɨmbɨŋ'ə bə sɔ lə bənɨ bə na jimiɛhɛ Bəju fîchə shəŋ yibɔlə tɨ. Lə bənɨ bəchi wɔ manɨ, bɔ kɨ laŋkɨ kɨtso. 4 Lə bɔ bəndɨ ba gəŋ fɔ Jɛlosalɛm, ntɛshɛ yi bənɨ bə kɨmbɨŋ'ə bə beŋ bə faŋə bə Jisɔs lə ma bə fó yi bəntɛshɛ lə yi sɔ ləkə bɔ. Bɔ tə fiɔŋ fichi bə bɔ chi Nyɔ nə ji bə bɔ nɨŋ yi bɔ ntɨŋ. 5 Bəmanɨ, bənɨ bə kɨmbɨŋ'ə bədɔ bə nə̀ ji kɨntsu kɨ Bəfalasi lə ntɨŋ dza wə ba tə lə, “Bə́ naji lə bə́ kɨ sɔmbiɛ dzɔ́ yi bənɨ bə na jimiɛhɛ Bəju lə, bə́ tɨdi lə bɔ kɨ galɨ bilaŋ bi Mose lə.”
6 Lə bɔ tə manɨ, beŋ bə faŋə bə Jisɔs lə bə fó yi bəntɛshɛ lə chi jimiɛ bə bɔ lə bɔ jiŋgə fiɔŋ fia ntɨŋ. 7 Bɔ jiŋ ba chanyɛ gəŋ dzəbudə, Pita tə ba ləŋ wə tə lə, “Bəŋgwɨŋ, bə na kkɨ lə fiəfiə nə̀ ji Nyɔ sa mɨ nə bəŋ ntɨŋ lə na nə mɨ dze wu bənɨ bə na jimiɛhɛ Bəju jiba bɔ wɔ shɔŋ yihi yi ndzeŋe ba bɨŋ bə yi. 8 Nyɔ wu kkɨ shəŋ yi bənɨ lə nə̀ donchɛ lə yu' ləkə bənɨ bə na jimiɛhɛ Bəju nɨ yu nə̀ nya bɔ Kɨn'yɨntɨ kɨ Ntsaaŋ diəŋ nɨ yu nə̀ nya bɨ. 9 Yu nə̀ kə donchɛ kɨchichi bɨ ntɨŋ bə bənɨ ba. Yu nə̀ fə shəŋ yibɔlə kɨ tsalə ndzɨ bɔ nə̀ ga shəŋ Jisɔs wɨ. 10 Nɨ fi na ji manɨ, ə fə la lə bə kɨ moŋko shəŋ yi Nyɔ lə, bə dzee ntə́ yinjitə bə galɨ bənɨ bə kɨmbɨŋ'ə bɨŋ, ɨji ntə́ yinjitə yiŋ nə̀ ya bɨ ma bə bəchɛ bətaa baha? 11 Fi na jimiɛhɛ diəŋ. Kə' bɨŋ lə Nyɔ na fɨtɨ kə foto fo ɨji ndzɨ shəŋ yi ndzeŋe yi Baba Jisɔs donchə bə bɨ. Ɨji tɨ diəŋ nɨ yu na donchɛ shəŋ yi ndzeŋe bə bənɨ bə na jimiɛhɛ Bəju.”
12 Lə Pita chanyɛ ba kanə lɨ, bənɨ bəchi də nshiiŋ ba kɨ woko nɨ Banabas bɔ bə Pɔl na tɨdi chi bɔ nə̀ gəndəə bɔ gɨntɨ bidɨ bi bənɨ bə na jimiɛhɛ Bəju lə, Nyɔ nya bɔ buŋga lə bɔ kɨ fɨtɨ biɔŋ bi na donchɛ buŋga bu Nyɔ lə bə biɔŋ bi kɨgəsə kɨ wɨŋə lə. 13 Lə bɔ chanyɛ ba kanə lɨ, Jɛm tə tə lə, “Bəŋgwɨŋ, bə wôkɔ bə wɔ fiɔŋ fi njiwa nchanyɛ. 14 Semon tə bə bɨ nɨ Nyɔ nə gbɔɔ kɨ nya kɨgaŋ kɨhɨ bə bənɨ bə na jimiɛhɛ Bəju, bə nsa bədɔ nə bɔ ntɨŋ lə na bənɨ buhu. 15 Fiɔŋ fi bənɨ bə shɔŋ yi Nyɔ lə nə̀ bɔndɔ' gbɔnɔ diəŋ bə fi Nyɔ nə̀ fəə. Bɔ nə̀ bɔndu lə,
16 ‘Tsa ba ya yi njiwa mfichə ba lɨ,
ba lɨmə tsɔŋ yi Dɛbi yi nə̀ gbɔɔ.
Njiwa mma bichə bia,
ɨ bi chi ləmiə nɨ bi nə̀ ji.
17 Bəma, ɨ bədɔ ba bənɨ kɨ noŋko Baba,
ɨji bənɨ bɛŋ bəchi na bənɨ bə na jimiɛhɛ Bəju bə mɨ nsabiɛ
lə na bənɨ bɛmɨ.
18 Nyi na nchanyɛ yi Nyɔ,
ɨji yu nə̀ fə bənɨ kkə ɨ bambi tsa yiko bɨŋ.’
19 Nna ŋŋɨntɨ yəmɨ lə kə kə kɨ nya ŋgə bə bənɨ bə na jimiɛhɛ Bəju, bə' galə shəŋ Nyɔ wɨ. 20 Kə bɔ̂ndu ji kɨŋwatɨ bə bɔ lə, bɔ kə kɨ diɨ biɔŋ bi bənɨ na fɨtɨ bintɔfiɛ su bə bənyɔ, ndzɨ na biɔŋ bi kɨnyənə lə. Bɔ kə kɨ dzenɛ. Bɔ kə kɨ diɨ nyɛ́ŋ yi bə́ kə yembiɛ lə ŋgwembe fɔ. Bɔ kə kɨ diɨ ŋgwembe mə nyɛ́ŋ'ə. 21 Bə́ bɔndu manɨ, ndzɨ bə́ nə̀ tɨfiə bilaŋ bi Mose lə biŋ nə ndɛŋkəlɨ bidɨ bichi ntɨŋ bənɨ woko, ɨji tɨ bi bi bə́ na tanchɛ ndɛŋ tsɔ́ŋ yi kɨntsɨsɨ lə ntɨŋ díɔ yi fufiɛ chi.”
Bə́ bɔndu kɨŋwatɨ bə bənɨ bə kɨmbɨŋ'ə bə na jimiɛhɛ Bəju
22 Bəma, beŋ bə faŋə bə Jisɔs lə bə fó yi bəntɛshɛ lə ma bəntɛshɛ bə bənɨ bə kɨmbɨŋ'ə bəchi bɨŋ fiɔŋ fia ba ŋəŋ lə fi na ndzeŋe lə bɔ sa bənɨ nə bɔ ntɨŋ faŋ'ɨ, bɔ bə Banabas ma Pɔl gəŋ Antiɔk. Bɔ tə sa Judas wu yɨ wuhu wudɔ nə̀ ji lə Basabas, ba sa tɨ Silas. Bənɨ bɛŋ bəfɛ nə̀ bənsafiə bə bənɨ bə kɨmbɨŋ'ə. 23 Bə́ bɔndu kɨŋwatɨ kɨ na ji lə bə́ faŋ bɔ bə kɨ, kɨ ji lə:
“Bɨ bəwəma bə na ji beŋ bə faŋə bə Jisɔs lə bə fó yi bintsu lə na tsɨsə bəŋ bənɨ bə kɨmbɨŋ'ə bəchi bə na jimiɛhɛ Bəju, bə na ji kɨtuŋ kɨ Antiɔk ntɨŋ bə bə na ji dia wu Silia ntɨŋ ma bə na ji Silisha. 24 Kə nə wɔ lə bənɨ bədɔ nə fɔ nə bɨ ntɨŋ ba ba kɨ nya ŋgə, bɔ bɨsə bufɨ bwɛnɨ bə bitɨfiə bidɔ ɨ jikə jimiɛ bɨ bə nə tədiə. 25 Bəma, kə tə jiŋ bɨ bəchi ba bɨŋ'ɨ, tə sa bənɨ bədɔ ba faŋ bəŋ'ɨ. Bɔ ba ba ntɛshɛ bə bə Banabas bə Pɔl bə na ji nsáŋ yaha yi shəŋ'ə. 26 Bənɨ bɛŋ' nya tɨ bin'yɨntɨ bibɔlə ndzɨ nɨŋ yi Baba waha Jisɔs Klistu. 27 Kə faŋkɨ ba Judas bɔ bə Silas lə bɔ ba chi chanyɛ fiɔŋ fi na ji kɨŋwatɨ kɨŋ ntɨŋ bə bifuŋ. 28 Kɨn'yɨntɨ kɨ Ntsaaŋ bə bɨ, kə ŋəŋ lə fi na ndzeŋɛhɛ ntoshɛ bəŋ ntə́ yinjitə yidɔ fiəŋkə bilaŋ biŋ bi na ji lə: 29 Bə kə kɨ diɨ bidiəŋ bi na ji lə bə́' fə bintɔfiɛ su bə bənyɔ. Bə kə kɨ diɨ ŋgwembe mə nyɛ́ŋ'ə. Bə kə kɨ diɨ nyɛŋ yi bə́ kə yembɛhɛ lə ŋgwembe fɔ. Bə kə kɨ dzenɛ. Ɨ bə ga gwɨ nə biɔŋ biŋ wɨ, tə bə fə diəŋ. Bə kəshə.”
30 Bɔ bɔndu manɨ ba faŋ bənɨ ba bɔ shi sɔ Antiɔk. Bɔ gəŋ ba banchɛ ntɛshɛ yi bənɨ bə kɨmbɨŋ'ə yi sɔ chi ba nya kɨŋwatɨ ka bə bɔ. 31 Lə bɔ tanchɛ kɨŋwatɨ ka, shɔŋ ya dɨsɨ shəŋ yibɔlə, bɔ wɔ buni kɨtso. 32 Judas bɔ bə Silas bə nə̀ ji bənɨ bə nə̀ tɨdi biɔŋ bi bɔ na woko Nyɔ chanyɛ, bɔ nya bitɨfiɛ kɨyɛŋ bə bənɨ bə kɨmbɨŋ'ə ba fə bɔ kɨ keŋkɛ buŋga bɔ shəŋ. 33 Bɔ chɛse tsa yidɔ sɔ. Bənɨ bə kɨmbɨŋ'ə ba chində bɔ bə budə, bɔ fichə kɨ tsu fə bənɨ bə nə̀ faŋə ba bɔ ku. 34 ª 35 Pɔl bɔ bə Banabas shə sɔ Antiɔk, bɔ bə bənɨ bədɔ kɨ tɨfiə, bɔ tɨdi diɛ yi Baba.
Pɔl bɔ bə Banabas jɛ gwɨ
36 Lə díɔ chɛ su, Pɔl tə bə Banabas lə, “Kə tsû jiŋ ba gəndə bituŋ bi kə nə tɨdi bia diɛ yi Baba bi ntɨŋ ba ŋəŋ lə bənɨ bə kɨmbɨŋ'ə bə sɔ fə nəŋ lə.” 37 Banabas kɨ se lə yu dze Jɔŋ Maku lə yu gəŋ bə bɔ. 38 Bəmanɨ, Pɔl jikə sɛhɛ lə bɔ dze yu, ndzɨ yu nə̀ shə bɔ Paŋfilia bɔ bambi kə kanə gbəndɨ wu bɔ nə̀ keŋkɛ. 39 Pɔl bɔ bə Banabas yimbiɛ kɨtso ba bu jɛ gwɨ. Banabas dze Maku, bɔ bə yu be kɨkpɔŋkɔ kɨbəŋ ntɨŋ ba gəŋ Saiplus. 40 Pɔl chiŋ fihi ji Silas. Bɔ bə yu dza, fə bɔ nə̀ dza nə̀ ji bənɨ bə kɨmbɨŋ'ə' nya bɔ Baba kaŋ, yu donchə bɔ shəŋ yihi yi ndzeŋe. 41 Bɔ chɛ sha yi Silia bə yi Silisha ntɨŋ, bɔ gəndəə bɔ kosɔ shəŋ yi bənɨ bə bəntɛshɛ bə bənɨ bə kɨmbɨŋ'ə.