Pɔl bɔ bə Banabas tə shɔŋ yi ndzeŋe tsukɔ Jisɔs wɨ Ikɔnium
14
Lə Pɔl bɔ bə Banabas gəŋ Ikɔnium, bɔ chi fəə diəŋ nɨ bɔ nə̀ fəə Antiɔk, bə mbe tsɔŋ yi kɨntsɨsɨ yi Bəju ntɨŋ ba tə shɔŋ yi ndzeŋe sɔ. Lə bɔ dze tsa ba tɨfiə lɨ, Bəju bə bənɨ kɨyɛŋ bə nə̀ jimiɛhɛ Bəju bɨŋ. 2 Bəmanɨ, Bəju bə nə̀ nɨŋŋə mbɨŋ dza ba nyishi bənɨ bədɔ bə nə̀ jimiɛhɛ Bəju ba bɨsɨ shəŋ yibɔlə lə bɔ kɨ lo bə bənɨ bə kɨmbɨŋ'ə. 3 Pɔl bɔ bə Banabas jiŋ sɔ kɨtso, bɔ chanyɛ kɨ Baba lə nle sɨŋ. Baba nya bɔ buŋga bu fənə biɔŋ bi na donchɛ buŋga bu Nyɔ lə bə biɔŋ bi kɨgəsə kɨ wɨŋə lə bi na donchɛ fiɔŋ fi bɔ na chanyɛ tsukɔ Baba wɨ nɨ yu nə̀ donchə bənɨ shəŋ yihi yi ndzeŋe. 4 Bənɨ bə kɨtuŋ ka lə jɛ gwɨ. Bədɔ bə nə̀ jɛ ba kə bɨmiə tsu dia wu Bəju lə, bə nə̀ bɨmiə ba tsu dia wu beŋ bə faŋə bə Jisɔs lə.5 Bəju ba bə bənɨ bə nə̀ jimiɛhɛ Bəju ma fó yi kɨtuŋ'ə tɛshɛ ba sese lə bɔ funsu beŋ bə faŋə bə Jisɔs lə ba tumiɛ bɔ bə ta, bɔ kkpəyɛ. 6 Beŋ bə faŋə ba kkə kɨsu ba lətə gəŋ sha yi Likɔnia ntɨŋ, kɨ gəndə kɨtuŋ kɨ Lista bə kɨ Dɛlbi ntɨŋ ma bituŋ bi gwɨgwɨ bi sɔ, 7 bɔ tɨdi shɔŋ yi ndzeŋe.
Pɔl bɔ bə Banabas wəmiəsɨ kɨŋkələ Lista
8 Miɨ wudɔ nə̀ ji Lista, yu nə̀ ba yu kɨ jimi kwa fəkoso, yu jikə kafɔ ŋgəndə ndzɨ bə́ nə̀ bɛyɛ yu, yu kətə kɨŋkələ. Lə kɨ ji butsu budɔ, 9 yu jiŋ kɨ woko biɔŋ bi Pɔl nə̀ tɨfiə. Pɔl dɔŋ yəsɨ yu wɨ ba ŋəŋ miɨ wa keŋkɛ kɨmbɨŋ lə naji ɨ Nyɔ wəmiəsɨ yu, 10 Pɔl tə bə yu bə diɛ bɔ́ lə, “Dzâ ləŋ wə!” Miɨ wa bu tə ba ləŋ wə ba gbɔ kɨ gəndə.
11 Lə kuta wu bənɨ ŋəŋ fiɔŋ fi Pɔl fəə, bɔ kɨ kpɨsə wulu, bɔ chanyɛɛ díɛ yi Likɔnia ntɨŋ lə, “Bənyɔ tsu bənɨ ba shi ba bɨ ntɨŋ.” 12 Bɔ tə kɨ tsɨsə Banabas lə Siyus, bɔ tsɨsə Pɔl lə Ɛmisª ndzɨ nə̀ yu wu nə̀ yakɨ chanyɛ. 13 Nə̀ ji tsɔŋ yi bintɔfiɛ yi nyɔ wu bə́ nə̀ tsɨsə lə Siyus ji fə kɨtuŋ ka ku. Chɛ bintɔfiɛ wu mɨ dze bənaŋ bə nɨnsə bə bəflawa kɨ ba fə fiənsɨ wu mbaŋ'ə ku lə bɔ bə bənɨ fə bintɔfiɛ su Banabas bə Pɔl lɨ.
14 Beŋ bə faŋə bə Jisɔs lə bɛmbɛ wɔ fiɔŋ fi bənɨ ba nə̀ gɔmbiɛɛ lə bɔ fə. Bɔ shakiɛ bindzuª nə bɔ gwɨ́ ba lətə be bənɨ ba ntɨŋ kɨ wɛnti lə, 15 “Bənɨ bɛŋ, fiŋ na la fi bə na fɨtɨ? Kə na ji bənɨ diəŋ chi bəŋ. Kə ba mɛni lə kə tə shɔŋ yi ndzeŋe yi fɔɔ nə Nyɔ lɨ, lə bə shə̂ bənyɔ bə kɨlɔlɔ lə bɛŋ ba kɨ biəlɨ ji Nyɔ wu yɛyi. Nyɔ no na wu nə̀ fəə bɔlu bə sha bə ŋgɔŋ məmbəŋ ma biɔŋ bichi bi na ji bidɨ biŋ ntɨŋ. 16 Fiəfiə nə̀ ji, yu tɔkaŋ nə bənɨ wɨ bituŋ ntɨŋ bichi, bɔ kɨ fɨtɨ nɨ bɔ na se. 17 Bəmanɨ, yu fɨtɨ kwa biɔŋ bi ndzeŋe bə bənɨ, bə ntseyɛ lə yu wa bə bɔ. Yu nə̀ nya bɔ dzaŋ, bɔ keŋkɛ bidiəŋ tsa yi diəŋ bɨŋ, bɔ diɨ bɔ woko buni.” 18 Nɨ Banabas bɔ bə Pɔl chanyɛ biɔŋ biŋ bə bɔ mɛ, bɔ fə mɛ ŋkɨɨŋ wɨ ba tə loso bənɨ ba lə bɔ kə fəkə bintɔfiɛ bɔ lɨ.
19 Bəju bədɔ dza ba ba sɔ ɨji bɔ' fɔ nə Antiɔk bə Ikɔnium, bɔ nyishi bənɨ kɨyɛŋ, bənɨ ba tumiɛ Pɔl bə ta. Lə bɔ tumiɛ manɨ, bɔ kpa ba fɔ bə yu nɔ nə kɨtuŋ ka ntɨŋ, bɔ se lə yu sə kkpə. 20 Bəmanɨ, ntɛshɛ yi bənɨ bə kɨmbɨŋ'ə ba ba tɛshɛ yu bɨŋ, yu chi dza wə ba tsu sɔ kɨtuŋ ka ntɨŋ. Lə butsu wɔ, Pɔl bɔ bə Banabas dza nə nɔ kɨ gɨntɨ kɨtuŋ kɨ Dɛlbi ntɨŋ.
21 Lə Pɔl bɔ bə Banabas be Dɛlbi ba tə shɔŋ yi ndzeŋe tsukɔ Jisɔs wɨ, bɔ keŋkɛ bənɨ bə kɨmbɨŋ'ə sɔ kɨyɛŋ. Lə bɔ dza nə nɔ ba fichə kɨ tsu jiŋ, bɔ kɨ chɛti bituŋ bi Lista bə Ikɔnium ma Antiɔk wu Pisidia ntɨŋ. 22 Lə bɔ kɨ chɛti manɨ, bɔ kɨ kosɔ shəŋ yi bənɨ bə kɨmbɨŋ'ə, bɔ nya bɔ bitɨfiə lə, “Bə kə̂tə kwa bə lɨmi ŋkɨɨŋ kɨmbɨŋ kɛnɨ wɨ. Bə kɨ kkɨ lə bɨ bəchi kə naji lə kə ŋəŋ bəŋgə kɨyɛŋ ba tə be buŋkuŋ bu Nyɔ lə ntɨŋ.” 23 Bɔ kɨ sabi fó yi bəntɛshɛ bə bənɨ bə kɨmbɨŋ'ə, bɔ galɨ bəntɛshɛ bə bənɨ bə kɨmbɨŋ'ə ntɨŋ bəchi. Lə bɔ kɨ galɨ, bɔ chinə bidiəŋ ba kɨ tsɨsə bɔ nyaa bɔ Baba Jisɔs kaŋ wu bɔ na bɨmi bə yu.
Pɔl bɔ bə Banabas tsu jiŋ Antiɔk sha yi Silia ntɨŋ
24 Pɔl bɔ bə Banabas yasə sha yi Pisidia ba llə gəŋ sha yi Paŋfilia ntɨŋ. 25 Bɔ tə diɛ yi Nyɔ kɨtuŋ kɨ Pɛlga ntɨŋ ba shi gəŋ kɨtuŋ kɨ Atalia ntɨŋ. 26 Lə bɔ shi sɔ, bɔ be kɨkpɔŋkɔ kɨbəŋ ntɨŋ ba fichə kɨ tsu Antiɔk. Antiɔk no ji dɨ wu bə́ nə̀ nya bɔ Nyɔ kaŋ, yu kuntə bɔ bə shəŋ yihi yi ndzeŋe fə bɔ kɨ gəndə bɔ nɨntɨ nɨŋ yi bɔ nə̀ kanə nyi. 27 Lə bɔ fɔ sɔ, bɔ tɛshɛ bənɨ bə ntɛshɛ yi bənɨ bə kɨmbɨŋ'ə ba tə fiɔŋ fichi bə bɔ nɨ Nyɔ nə ji bə bɔ nɨŋ yi bɔ ntɨŋ, bə nɨ yu nə guyɛ shəŋ yi bənɨ bə na jimiɛhɛ Bəju lə, bɔ ga shəŋ Jisɔs wɨ. 28 Pɔl bɔ bə Banabas jiŋ bə ntɛshɛ yi bənɨ bə kɨmbɨŋ'ə ya díɔ kɨyɛŋ.