Bə́ faŋ Banabas bɔ bə Sɔl
13
Bənɨ bədɔ nə̀ ji ntɛshɛ yi bənɨ bə kɨmbɨŋ'ə ntɨŋ Antiɔk, ɨji bə nə̀ tɨdi biɔŋ bi bɔ na woko Nyɔ chanyɛ, bɔ tɨfiə tɨ bənɨ. Bənɨ ba nə̀ Banabas, Semiɔn wu bə́ nə̀ tsɨsə lə Wu Yi, Lusius wu Silin, Sɔl bə Manɛn wu nə̀ kɔ bɔ bə Hɛlɔd miɨ wu sakɨ. 2 Lə bɔ kɨ chinə bidiəŋ bɔ kuntəə Nyɔ, Kɨn'yɨntɨ kɨ Ntsaaŋ jiji ba tə bə bɔ lə, “Bə tsɔ̂ Banabas bɔ bə Sɔl bə ga, bɔ kɨ nɨntɨ nɨŋ yi mɨ mbəndə bɔ lə bɔ kɨ nɨntɨ.” 3 Lə bɔ wɔ manɨ, bɔ chinə bidiəŋ ba tsɨsɨ lɨ, tə ga kaŋ Banabas bɔ bə Sɔl bɨŋ ba faŋ bɔ, bɔ kɨ gɨntɨ.Banabas bɔ bə Sɔl gəŋ Saiplus
4 Banabas bɔ bə Sɔl kɨ gɨntɨ nɨ Kɨn'yɨntɨ kɨ Ntsaaŋ nə̀ faŋə bɔ. Bɔ shi kɨtuŋ kɨ Sɛlusha ntɨŋ ba be kɨkpɔŋkɔ kɨbəŋ ntɨŋ kɨ llɨ bɔ gɨntɨ kɨtuŋ kɨ Saiplus ntɨŋ. 5 Lə bɔ llə, bɔ fɔ kɨtuŋ kɨ Salamis ba kɨ gəndə bɔ tɨdi diɛ yi Nyɔ tsɔ́ŋ yi Bəju lə yi kɨntsɨsɨ lə ntɨŋ, Jɔŋ Maku gəndəə bə bɔ, yu chitəə bɔ.
6 Lə bɔ gəndə kɨtuŋ kɨ ŋgɔŋ fəntɨŋ ka ntɨŋ, bɔ llə ba gəŋ sɨŋsɨŋ ba fɔ kɨtuŋ kɨ Pafɔs ntɨŋ. Nɨ bɔ gəŋə, bɔ gəŋ ba lafu Miɨbəju wudɔ wɨ sɔ, ɨji miɨ wu mfiŋ, yɨ wuhu ji lə Bal Jisɔs, yu nə̀ ba yu kɨ yundi lə yu na ji miɨ wu na tɨdi biɔŋ bi yu na woko Nyɔ chanyɛ. 7 Yu nə̀ ba yu kɨ shɨ bɔ bə Sɛgus Baulus miɨ wu sakɨ wu kɨtuŋ ka ntɨŋ. Miɨ wu sakɨ wa nə̀ ji bə bufɨ kɨtso. Yu bəndɨ Banabas bɔ bə Sɔl ndzɨ yu nə̀ se lə yu wɔ diɛ yi Nyɔ. 8 Bəmanɨ Ɛlimas miɨ wu mfiŋ wa nɨ yɨ wuhu nə̀ ji díɛ yi Glek ntɨŋ, yu gbɔ kɨ yimbiɛ bə bɔ, yu see lə yu fə lə miɨ wu sakɨ wa jikə galə shəŋ Jisɔs wɨ. 9 Kɨn'yɨntɨ kɨ Ntsaaŋ yi Sɔl wɨ, wu yɨ wuhu wudɔ nə̀ ji lə Pɔl, yu dɔŋ yəsɨ miɨ wu mfiŋ wa wɨ 10 ba tə bə yu lə, “Wə na ji wɛŋ wu Satan, wə na ji miɨ wu nchɛnɛ wu biɔŋ bichi bi na ji diəŋ. Biŋfukiɛ bə biyɔndu' yi wə shəŋ. Wə na ba wə kɨ yashɛnɨ kɨyɛyi kɨ Nyɔ lə kɨ tsu ji dyɛ. 11 Wôkɔ wɔ, kɨbandə kɨ Nyɔ lə jika ɨ kɨ gbɔ wə bɨŋ ɨ wə nyimə, ɨ fi dze tsa fə wə chisə ŋəŋə wɨmbɨ wɨ.” Mɨ kɨsɨkɨ, fiɔŋ fidɔ nɨ kɨku kusə yəsɨ yi Ɛlimas lə. Yu dza kɨ fəfə bidɨ, yu noŋko miɨ wu tsɛtsɛ yu. 12 Lə miɨ wu sakɨ wa ŋəŋ manɨ, yu bu ga shəŋ Jisɔs wɨ, nɨ kɨgəsə nə̀ wɨŋə yu bə biɔŋ bi bɔ nə̀ tɨfiə tsukɔ Baba Jisɔs wɨ.
Pɔl bɔ bə Banabas gəŋ Antiɔk wu Pisidia ntɨŋ
13 Pɔl bə kɨntsu kɨhɨ be kɨkpɔŋkɔ kɨbəŋ ntɨŋ Pafɔs ba llə ŋgɔŋ məmbəŋ fɔ Pɛlga sha yi Paŋfilia ntɨŋ. Lə bɔ fɔ sɔ, Jɔŋ Maku shə bɔ ba tsu jiŋ Jɛlosalɛm. 14 Bɔ dza nə nɔ ba chɛ gəŋ kɨtuŋ kɨ Antiɔk wu Pisidia ntɨŋ. Lə kɨ ji butsu bu fufiɛ, bɔ gəŋ ba be ba jiŋ tsɔŋ yi kɨntsɨsɨ ntɨŋ. 15 Lə bənɨ tanchɛ Kɨŋwatɨ kɨ bilaŋ bi Mose lə ma bə biŋwatɨ bi bənɨ bə shɔŋ yi Nyɔ lə kanə lɨ, bənɨ bəbəŋ bə tsɔŋ yi kɨntsɨsɨ ya lə faŋ shɔŋ bə bə Pɔl lə, “Bəŋgwɨŋ, ɨ bə na keŋkɛ bitɨfiə bidɔ bi nyanə bənɨ, bə nya.”
16 Pɔl dza wə ba chi bənɨ bə kɨbandə ba gbɔ kɨ chanyɛ lə, “Bənɨ bə Isla bə bənɨ bə na jimiɛhɛ Bəju bə na kuntə Nyɔ, bə wôkɔ bə wɔ. 17 Nyɔ wu bənɨ bə Isla nə̀ sa bəchɛ bətaa baha ba fə ku yibɔlə kɨ ko tsa yi bɔ nə̀ ji bəbanə kɨtuŋ kɨ Ijip ntɨŋ, yu foso bɔ nə nɔ bə buŋga buhu bubəŋ 18 ba kansɨ shəŋ kɨ ji bə bɔ kpa biya mbaania. 19 Yu jishi bituŋ fumba sha yi Kanan ntɨŋ ba nya sha ya bə bɔ. 20 Biɔŋ biŋ bichi nə̀ dze nɨ biya gɨna bə mbaashɨŋ (450). Lə yu nya sha ya bə bɔ, yu ga bənɨ bə kɨ sakɨ bɔ. Bɔ sa ba gəŋ fɔ tsa yi Samwɛl miɨ wuhu wu shɔŋ nə̀ sakɨ bɨŋ. 21 Tsa ya wɨ, bɔ jiji ba nende lə bɔ kɨ keŋkɛ ji ŋkuŋ, Nyɔ nya bɔ Sɔl wɛŋ wu Kish nə kɨtsɔŋ kɨ Bɛnjamɛn lə ntɨŋ. Yu jiŋ buŋkuŋ bɨŋ biya mbaania. 22 Lə Nyɔ shisəsɨ yu, yu ga Dɛbi kɨ ji Ŋkuŋ wubɔ. Nyɔ nə̀ chanyɛ tsukɔ Dɛbi no wɨ lə,
‘Mɨ ŋŋəŋ Dɛbi wɛŋ wu Jɛse yu ji miɨ wu na gəndə dzə́ yi shəŋ yɛmɨ na se ntɨŋ.
Yu ná kɨ fɨtɨ fiɔŋ fichi fi nna nse.’
23 Nə̀ nə ku wu Ŋkuŋ Dɛbi no lə ntɨŋ wu Nyɔ nə̀ fosɔ Nchitə ba nya bə bənɨ bə Isla nɨ yu nə̀ kaa. Nchitə no ji Jisɔs. 24 Fə Jisɔs no nə̀ji lə yu gbɔ nɨŋ yihi, nə̀ ji Jɔŋ' gbɔ kɨ tɨfiə bənɨ bəchi Bəisla lə bɔ fichə shəŋ yibɔlə yu chɛse bɔ biɔ. 25 Lə Jɔŋ kɨ ji bə ŋkanə nɨŋ yihi, yu jiji ba bi bə bənɨ lə, ‘Bə na gɔmbiɛ lə nna nji yəŋ? Nna njimiɛhɛ miɨ wu bə na wokɔ wa kə. Miɨ wa ba wa mɨ nəjiŋ, ŋkə ŋkwətsə tɨmo wu naji ntsəkə ba yanshɛ bikpa bihi.’”
26 Pɔl gəŋ fiə bə nchanyɛ lə, “Bəŋgwɨŋ bə na ji kɨtsɔŋ kɨ Ablaham lə ntɨŋ bə bəŋ bənɨ bəchi bə na jimiɛhɛ Bəju bə na kuntə Nyɔ tɨ. Nyɔ nə̀ faŋ shɔŋ nyi bə bɨ, ɨji shɔŋ yi naji ɨ bənɨ fɔfo ndzɨ yi. 27 Bəmanɨ, bənɨ bə Jɛlosalɛm bə bənɨ bəbɔlə bə sakɨ kɨtuŋ jikə dzɛɛ Jisɔs nɨ Nchitə. Bɔ jikə kkə kɨnyi kɨ biɔŋ bi bənɨ bə shɔŋ yi Nyɔ lə nə̀ bɔndɔ tsukɔ yu wɨ. Na tɨ bi bi bɔ nə̀ shɨ bɔ tanchɛ díɔ yi fufiɛ ntɨŋ chi. Lə bɔ ba tə lə bə́ kkpɨsɨ yu manɨ, fiŋfi tə fə fi ba fɔ diəŋ nɨ bənɨ bə shɔŋ yi Nyɔ lə nə̀ chanyɛ. 28 Mɛfə bɔ nə̀ kə ŋəŋkəhə tɨmo ŋgbɔ yi nə̀ ji ɨ bɔ kkpɨsɨ yu ndzɨ yi, bɔ kətə kwa bɔ tɨdi bə Pailɛt lə bə́ kkpɨsɨ yu. 29 Bɔ ba fə biɔŋ bichi nɨ Kɨŋwatɨ kɨ Nyɔ lə nə̀ chanyɛ tsukɔ Jisɔs wɨ, bə́ shisəsɨ yu nə kɨtɨ kɨ ŋ'wa lə wɨ ba gəŋ kɨnsɨ yu dzəŋ ntɨŋ. 30 Bəmanɨ, Nyɔ dzakɔ yu nə kkpə lɨ. 31 Yu donchɛ gwɨ yihi díɔ kɨyɛŋ bə bənɨ bə bɔ bə bɔ nə̀ fɔɔ nə Galili ba gəŋ Jɛlosalɛm. Na bɔ bə na tɨfiə bənɨ bə Isla tsukɔ yu wɨ fɛŋ.
32 Bəma, kə na ji mɛni fɛŋ lə kə tɨfiə shɔŋ yi ndzeŋe ya bə bəŋ. Shɔŋ ya ji lə, fiɔŋ fi Nyɔ nə̀ kaa bəchɛ bətaa baha, 33 yu' fə fi ba fɔ diəŋ fɛŋ tsa yaha nyi bɨŋ, bɨ bə na ji beŋ bəbɔlə. Fiŋfi fɔ diəŋ nɨ Nyɔ nə̀ dzakɔ Jisɔs nə kkpə lɨ. Fi nə̀ ji bubɔndɔ tsukɔ fiɔŋ fiŋ wɨ Kɨŋwatɨ kɨ Kɨŋkuntə lə ntɨŋ bitsə bifɛ bɨŋ, Nyɔ chanyɛ lə,
‘Wə na ji Wɛnɛ,
ndɛŋ nna nji Chaa.’
34 Tsukɔ ndzakɔ yi Nyɔ nə̀ dzakɔ Jisɔs nə kkpə lɨ lə yu kə fɛɛ, Nyɔ nə̀ chanyɛ nyi dzə ntɨŋ lə,
‘Njiwa nnya bəŋ budə bwɛŋ,
bu nnə̀ ŋkaa bə Dɛbi ba chɛŋ'ɨ.’
35 Fi ji tɨ bubɔndɔ dɨ wudɔ wɨ Kɨŋwatɨ kɨ Kɨŋkuntə lə ntɨŋ Dɛbi chanyɛ lə,
‘Naji ɨ wə ga lə Wana wu nɨŋ wu Ntsaaŋ
fe dzəŋ ntɨŋ kə.’
36 Fi na tsukɔ Dɛbi wɨ na ji lə yu nə̀ nɨŋ nɨŋ yihi yi Nyɔ nə̀ nya yu tsa yihi ntɨŋ, lə yu kkpə, bə́ di yu fə bətɨɨ ku, yu fe. 37 Bəmanɨ, miɨ wu Nyɔ nə̀ dzakɔ no nə kkpə lɨ nə̀ kə fɛɛ dzəŋ ntɨŋ.
38 Bəma bəŋgwɨŋ, bə kkə̂ fɛŋ buni lə shɔŋ yi kə na tɨdi nyi lə Nyɔ na gufiɛ məmbiə mə bənɨ lə, yu na gufiɛ ji ndzɨ Jisɔs no. 39 Miɨ wu na ji lə yu sə ga shəŋ yihi Jisɔs wɨ, yu' wəmiə nə məmbiə muhu lɨ mənchi, ɨji fiɔŋ fi na ji ɨ kɨlaŋ kɨ Mose lə jikə fəkə. 40 Bəma, bə dzê tsa fiɔŋ fi bənɨ bə shɔŋ yi Nyɔ lə nə̀ bɔndɔ tə kə kwɛɛ bəŋ. Fi na ji sɔ bubɔndɔ lə,
41 ‘Bə wôkɔ bə wɔ, bəŋ bə na ŋgo Nyɔ.
Kɨgəsə jika kɨ wɨŋ bəŋ, ɨ bə kkpəyɛ.
Njiwa mmɔŋ fiɔŋ tsa yɛnɨ ntɨŋ,
ɨji fi na ji lə miɨ tə nə̀ tə bəŋ, bə tə nə̀ jikə bɨmiə.’”
42 Pɔl bɔ bə Banabas kɨ foto nə tsɔŋ yi kɨntsɨsɨ ya ntɨŋ, bənɨ ba kɨ nende lə bɔ chi ba butsu bu fufiɛ bu ná ba bwa wɨ ba chanyɛ biɔŋ biŋ. 43 Lə bənɨ fɔ nə tsɔŋ yi kɨntsɨsɨ ya ntɨŋ, Bəju kɨyɛŋ bə bənɨ bə nə̀ fichə ba tsu bənɨ bə kɨmbɨŋ kɨ Bəju lə kɨ biəlɨ Pɔl bɔ bə Banabas. Bɔ kɨ chanyɛ bɔ nyaa bənɨ bitɨfiə lə bɔ kə̂tə bɔ ji shəŋ yi Nyɔ lə yi ndzeŋe ntɨŋ yi yu na donchə bə bɔ.
44 Lə kɨ ji butsu bu fufiɛ bu nə̀ biəlɨ bwa wɨ, shə tsəsɨ lə kɨtuŋ ka kɨchi fɔ ba wɔ diɛ yi Nyɔ. 45 Lə Bəju ŋəŋ nɨ kuta wu bənɨ tɛshɛ manɨ, kɨndɔ kɨ chindi bɔ, bɔ kɨ nɨnntɨ fiɔŋ fi Pɔl na chanyɛ, bɔ suŋku yu. 46 Pɔl bɔ bə Banabas kɨ bu chanyɛ nle sɨŋ, bɔ tɨdi lə, “Fi sə ji diəŋ lə kə sa tɨfiə diɛ yi Nyɔ ji bə bəŋ Bəju. Nɨ bə na wadiɛ gwɨ, bə dze gwɨ yɛnɨ lə bə kə kwətsə bə naji lə bə keŋkɛ buwəŋ bu kəkaha, kɨjilə kə jiba kə fichɛ fiaha ba tɨfiə ji bənɨ bə na jimiɛhɛ Bəju. 47 Na nɨ Nyɔ tədiə bə bɨ, nɨ yu nə̀ chanyɛ lə,
‘Mɨ ŋga wə lə wə kɨ ji kɨbɨlə kɨ bənɨ bə na jimiɛhɛ Bəju lə,
fə bənɨ bə bo yi mbi lə ntɨŋ chi fɔɔfo.’”
48 Lə bənɨ bə na jimiɛhɛ Bəju wɔ manɨ, bɔ kɨ woko buni, bɔ sɛnti diɛ yi Baba. Bənɨ kɨyɛŋ bɨŋ fiɔŋ fia, ɨji bə Nyɔ nə̀ sabiɛ lə bɔ ná keŋkɛ buwəŋ bu kəkaha.
49 Diɛ yi Baba gəndə kɨtuŋ ka ntɨŋ kɨchi. 50 Bəmanɨ, Bəju dza ba nyishi fó yi kɨtuŋ'ə bə bəkansɨ bəbəŋ, bəkansɨ bɛŋ ji bə nə̀ ba bɔ kɨ ba tsɔŋ yi kɨntsɨsɨ ntɨŋ. Bənɨ bɛŋ kɨ ti bə Pɔl bɔ bə Banabas, bɔ kɔŋ bɔ lə bɔ dza nə nɔ. 51 Lə bɔ kɨ dza manɨ, bɔ kuchɛ bidi nə go yibɔlə wɨ lə fi kɨ ji ntseyɛ yi fiɔŋ fi bənɨ ba mɔŋɔ ba tə gəŋ kɨtuŋ kɨ Ikɔnium ntɨŋ. 52 Ntɛshɛ yi bənɨ bə kɨmbɨŋ'ə shə kɨ ji fibɔlə bɔ woko buni kɨtso, Kɨn'yɨntɨ kɨ Ntsaaŋ yi bɔ wɨ.