Bə Pɔl fɔ Malta
28
Lə kə fɔ fəkpa nyəkə manɨ, kə wɔ lə bə́ na tsɨsə dɨ wa lə Malta, ɨji kɨtuŋ kɨ ŋgɔŋ fəntɨŋ. 2 Bənɨ bə kɨtuŋ ka lə donchɛ kɨnse bə bɨ ɨjikə jimiɛ kɨntse, bɔ ləkə bɨ ba fə boso, kə kɨ yuku, ndzɨ nə̀ ji dzaŋ' gbɔ kɨ ba, fiəfɨ ji. 3 Pɔl banchɛ muŋgansɨ ba gəŋ lə yu ji, yɛtɛ ji muŋgansɨ mwa ntɨŋ, boso shi ba fə yɛtɛ ya fɔ ba gbe kɨbandə kɨ Pɔl lə ba shiŋ kɨ wɨ. 4 Lə bənɨ bə kɨtuŋ ka lə ŋəŋ nɨ yi na shiŋkə kɨbandə kɨhɨ wɨ, bɔ kɨ chanyɛ bɔ bɔ lə, “Miɨ no jiwa yu kɨ ji miɨ wu nə̀ kkpɨsə miɨ. Yu sə fɔfo nə biɔ, bəmanɨ lɔŋ kwe yu, yu jiwa yu kkpə.” 5 Bəmanɨ, Pɔl bu shadi yɛtɛ ya, yi gbɔ boso wa ntɨŋ, fiɔŋ jikə fəkə yu. 6 Bənɨ ba kɨ wokɔ, bɔ gɔmbiɛɛ lə gwɨ yi Pɔl jiya ɨ yi gbɔ kɨ mɨchə, makə lə yu jiwa ɨ yu jiji ba bu gbɔ kkpə lɨ. Lə bɔ wokɔ sɨŋsɨŋ ba ŋəŋ fiɔŋ jikə fəkə yu, bɔ yashənɨ biŋgɔmbiɛ bibɔlə ba kɨ tɨdi ji lə, “Miɨ no na nyɔ wudɔ.”7 Ŋkuŋ wu mɨ nə̀ keŋkɛ kə́ yihi gwɨgwɨ fə dɨ wu kə nə̀ ji wa wɨ. Yɨ wuhu ji lə Bublius. Yu ləkə bɨ, kə me yu ku díɔ tɛ, yu chiŋfi bɨ buni. 8 Fi fɔ lə chɛ Bublius nə̀ ji yu gwente fiəfɨ bə kɨjilə funchɛ bə ŋgwembe. Pɔl gəŋ dɨ wu yu nə̀ me ba tsɨsɨ bə yu ba ga kaŋ yu bɨŋ, wəmiəsɨ yu. 9 Nɨ fi nə̀ tɨchə manɨ, bənɨ bə gwí lə bə kɨtuŋ ka lə bəchi kɨ ba, Pɔl wəmiəsɨ tɨ bɔ. 10 Bɔ nya bɨ biɔŋ kɨyɛŋ. Lə kə kɨ dza nə mɨ, bɔ ba bə biɔŋ bichi bi kə nə̀ se ba ga kɨkpɔŋkɔ ntɨŋ.
Bə Pɔl dza nə Malta ba gəŋ Lom
11 Kə jiŋ sɔ Malta kɨtuŋ kɨ ŋgɔŋ fəntɨŋ ka ntɨŋ fiə tɛ tə be kɨkpɔŋkɔ ntɨŋ kɨ gɨntɨ. Kɨkpɔŋkɔ ka nə̀ kɨ Alɛdzandia, bə́ tsɨsə kɨ lə Bənyɔª bə na ji Maŋ, kɨ nə̀ ji kɨtuŋ ka ntɨŋ kɨ wokɔ tsa yi kɨkumɔ kɨntaŋ chɛɛ. 12 Lə kə gəŋ fɔ ŋgɔŋ nəkpo, kɨtuŋ kɨ Silakus lə wɨ, kə me mɨ díɔ tɛ, 13 kə dza nə nɔ, kə gəŋ fɔ kɨtuŋ kɨ Lɛgium ntɨŋ ba me mɨ. Lə butsu wɔ, fiəfɨ gbɔ kɨ bɨndɨ nə dzə nəshiŋ, kə kɨ gɨntɨ, lə kɨ ji díɔ fɛ, kə fɔ fə dɨ wu ŋgɔŋ nəkpo lə Putiɔli. 14 Lə kə fɔ mɨ ba ŋəŋ bənɨ bə kɨmbɨŋ'ə bə mɨ, bɔ nende bɨ lə kə gəŋ jiŋ bə bɔ díɔ fumba. Kə jiŋ bə bɔ, fə kə tə gəŋə ba fɔ Lom.
15 Lə kə kɨ gɨntɨ, bənɨ bə kɨmbɨŋ'ə bə Lom wɔ lə kə ba ba, bɔ fɔ kɨ gəndə bɔ baa lə kə bɨkənɨ. Bɔ ba ma ba fɔ fə bituŋ bifɛ ku bi bə́ nə̀ tsɨsə lə Shɨ yi Abiyus, bə Tsɔ́ŋ Tiɛ yi Bənɨ bə Gbəndɨ lə. Lə Pɔl ŋəŋ bɔ wɨ, shəŋ də yu, yu nya kɨmbafə bə Nyɔ. 16 Lə kə fɔ Lom, bə́ shə Pɔl yu kɨ me fihi yu wumbɔŋ, miɨ wu kɨtsa kɨki yu.
Pɔl kɨ ji mfíaŋ ntɨŋ Lom yu tɨdi diɛ yi Nyɔ
17 Lə díɔ tɛ chɛ, Pɔl bəndɨ fó yi Bəju lə yi mɨ. Lə yi ba, yu tə bə yi lə, “Bəŋgwɨŋ, nna nji mfíaŋ ntɨŋ mɛ, bə́ nə̀ kwe mɨ Jɛlosalɛm ba nya bə bənɨ bə Lom ɨji ŋkə ŋgbɔɔ tɨmo fiɔŋ bə bənɨ baha makə fiə wu bəchɛ bətaa baha bədɔ lə. 18 Nɨ bənɨ bə Lom ba nə̀ chənə nsa yɛmɨ ba jikə ŋəŋkəhə fiɔŋ fi naji ɨ bɔ kkpɨsɨ mɨ ndzɨ fi. Bɔ kɨ se lə bɔ tɔkaŋ nə mɨ wɨ, 19 bəmanɨ, Bəju nɨŋŋ. Mɨ ŋkɨ nnende fɛŋ lə nsa yɛmɨ gəŋ fiə fə Ŋkuŋ wu Lom ku. Nnə̀ mfɨtəhə mɛni lə nnə̀ ŋkeŋkɛ fiɔŋ fi tədiə bənɨ bɛŋŋ wɨ. 20 Na fiɔŋ fi mɨ mbəndɨ bəŋ lə kə chanyɛ. Nna nji mfíaŋ yiŋ ntɨŋ mɛ ɨji ndzɨ miɨ wu bənɨ baha Bəisla nə wokɔ.”
21 Bənɨ ba chi bə yu lə, “Kə kə keŋkɛ kɨŋwatɨ kɨ fɔɔ nə Judɛya tsukɔ wə wɨ, miɨ wudɔ nə bəŋgwɨŋ baha ntɨŋ bə na foto nə nɔ bɔ ba sɛŋ kə sɔmɔ wə makə nchanyɛ yi fiɔŋ fibiə tsukɔ wə wɨ. 22 Bəmanɨ, kə jiba ɨ kə kɨ se lə kə wɔ biɔhɔ biŋgɔmbiɛ. Fi kə na kkɨ na ji kwa lə kɨntsu kɨ wə na ji kɨŋ kɨ ntɨŋ, bənɨ na dadiɛ gwɨ tsukɔ kɨ wɨ bidɨ bichi.”
23 Bɔ tə ga butsu bu bɔ ná ba, ɨ Pɔl chanyɛ bə bɔ. Lə kɨ ji butsu bwa, bənɨ kɨyɛŋ tɛshɛ dɨ wu yu nə̀ ji wa, yu dze nə fuwɔki lɨ gəŋ fɔ fudiɔ, yu nachɛ biɔŋ bichi bə bɔ, yu tɨfiə tsukɔ buŋkuŋ bu Nyɔ lə wɨ. Yu kɨ chanyɛ yu donchɛ biɔŋ bi na ji Kɨŋwatɨ kɨ bilaŋ bi Mose lə ntɨŋ bə Biŋwatɨ bi bənɨ bə shɔŋ yi Nyɔ lə ntɨŋ tsukɔ Jisɔs wɨ, yu se lə yu fə lə fə bɔ bɨmiə lə fiɔŋ fi yu na chanyɛ na yɛyi. 24 Bənɨ bədɔ bɨŋ fiɔŋ fi yu nə̀ chanyɛ, bədɔ nɨŋŋ. 25 Nɨ bɔ nə̀ yimbiɛ manɨ, bɔ tsukə jimiɛ fiɔŋ fimo, bɔ kɨ fɔdiɛ ndzɨ Pɔl nə̀ li diɛ lə, “Fiɔŋ fi Kɨn'yɨntɨ kɨ Ntsaaŋ nə̀ chanyɛ bə bəchɛ chaa bɛnɨ nə Adzaya miɨ wu shɔŋ yi Nyɔ dze nə̀ yɛyi. 26 Kɨn'yɨntɨ ka nə̀ chanyɛ lə,
‘Gə̂ŋ tə bə bənɨ bɛŋ lə,
bə jiba bə kɨ wokɔ buni bəmanɨ bə jikə wɔkɔhɔ,
ɨ bə kɨ jiŋgə tɨ biɔŋ buni bəmanɨ bə jikə ŋəŋkəhə.
27 Fi ji manɨ ndzɨ shəŋ yi bənɨ ba lə
na ji yi wəəə.
Bə́' jində bitiu bibɔlə ba
baŋ yəsɨ yibɔlə.
Bə́ fə manɨ, fə yəsɨ yibɔlə jɛkə kɨ ŋɨntɨ,
bitiu bibɔlə jikə wɔkɔhɔ,
shəŋ yibɔlə kɨ shi,
bɔ tsu fə mɨ ku, ŋ'wəmiəsɨ bɔ.’”
28 Pɔl tə kanə lə, “Bə kkə̂ lə shɔŋ nyi yi na tsukɔ nɨ Nyɔ na fɨtɨ bənɨ foto fo, yu' faŋ yi bənɨ bə na jimiɛhɛ Bəju lɨ, bɔ jiba bɔ wɔ.” 29 ª [Nɨ yu chanyɛ manɨ, Bəju ba bu dza kɨ fɔdiɛ, bɔ kɨ yimbiɛ tsukɔ nchanyɛ ya wɨ ɨjikə jimiɛ yímbiɛ yintse.]