8
Lə bə́ kkpɨsə Tefen, Sɔl laŋ.
Sɔl nya ŋgə bə ntɛshɛ yi bənɨ bə kɨmbɨŋ'ə
Butsu bwa butsu bwa, bə́ gbɔ kɨ nya ŋgə wuntaŋ bə ntɛshɛ yi bənɨ bə kɨmbɨŋ'ə yi Jɛlosalɛm. Ntɛshɛ ya tsaŋ duka ba fɔ nə nɔ ba gəŋ sha yi Judɛya bə Samaliya ntɨŋ, ə shə kwa beŋ bə faŋə bə Jisɔs lə. 2 Bənɨnsə bədɔ bə nə̀ galə shəŋ Nyɔ wɨ kɨtso ba ba dze kɨŋgundu kɨ Tefen lə ba di lɨ, ba də yu mɛ yɛyi yɛyi. 3 Sɔl nə̀ ji yihi yu gəndəə, yu kanə bɨsə ntɛshɛ yi bənɨ bə kɨmbɨŋ'ə, yu bekiɛ tsɔ́ŋ ntɨŋ, yu kpa bənɨ bə kɨmbɨŋ'ə bənɨnsə bə bəkansɨ, yu faŋkɨ tsɔ́ŋ yi buŋfia lə ntɨŋ.
Felip tə diɛ yi Nyɔ Samaliya
4 Bənɨ bə nə̀ tsaŋə ba kɨ gɨntɨ bidɨ bichi wɨ bɔ tɨdi diɛ yi Nyɔ. 5 Felip shi fihi ba gəŋ kɨtuŋ kɨ Samaliya ntɨŋ, kɨ tɨdi shɔŋ sɔ yi na tsukɔ Nchitə wu Nyɔ nə̀ kaa wa wɨ. 6 Bənɨ kɨyɛŋ wɔ ba ŋəŋ tɨ biɔŋ bi na donchɛ buŋga bu Nyɔ lə bi yu nə̀ fɨtɨ, bɔ nya bitiu bə yu buni. 7 Bin'yɨntɨ bibiə nə̀ foto nə bənɨ wɨ, bi wɛnti kɨtso, bənɨ kɨyɛŋ bə nə̀ kkpə dia mo ma bəŋkpesɛ wəmiɛ tɨ. 8 Bəma, kɨnlaŋ kɨbəŋ kɨ ji kɨtuŋ ka ntɨŋ.
9 Miɨ wudɔ nə̀ ji kɨtuŋ ka ntɨŋ yɨ wuhu ji lə Semon, yu nə̀ shɨ yu donchɛ mfiŋ yihi dze nə ndɛŋkəlɨ, bənɨ bə Samaliya bəchi ŋɨntɨ kɨgəsə wɨntɨ bɔ. Yu nə̀ tɨdi tɨ lə yu na ji miɨ wudɔ wubəŋ. 10 Bənɨ bəchi bə kɨtuŋ ka ntɨŋ dze nə bəntse bɨŋ gəŋ fɔ bəbəŋ bɨŋ nya bitiu bə yu kɨ tɨdi lə, “Miɨ no na ji buŋga bu Nyɔ lə bu bə́ na tsɨsə lə Buŋga Bubəŋ.” 11 Bɔ nə̀ nya bitiu bə yu manɨ ndzɨ yu nə̀ donchɛɛ mfiŋ yihi dze nə ndɛŋkəlɨ, bənɨ ŋɨntɨ kɨgəsə wɨntɨ bɔ. 12 Bəmanɨ, lə Felip ba kɨ tɨdi shɔŋ yi ndzeŋe yi na tsukɔ buŋkuŋ bu Nyɔ lə wɨ ma yi na tsukɔ yɨ wu Jisɔs Klistu lə wɨ, bəkansɨ bə bənɨnsə bɨŋ shɔŋ ya, yu chɛse bɔ biɔ. 13 Semon wa kɨbɛɛ bɨŋ tɨ bə́ chɛse yu biɔ. Yu kətə kwa fə Felip ku, yu ŋɨntɨ biɔŋ bintaŋ kɨyɛŋ bi na donchɛ buŋga bu Nyɔ lə bi Felip nə̀ fɨtɨ, kɨgəsə wɨntɨ yu.
14 Beŋ bə faŋə bə Jisɔs lə wɔ nə Jɛlosalɛm lə bənɨ bə Samaliya' ləkə tɨ diɛ yi Nyɔ, bɔ faŋ Pita bə Jɔŋ bɔ lɨ. 15 Lə bɔ fɔ sɔ, bɔ tsɨsɨ bə bənɨ bə kɨmbɨŋ'ə ba lə bɔ lə̂kə Kɨn'yɨntɨ kɨ Ntsaaŋ, 16 ndzɨ Kɨn'yɨntɨ kɨ Ntsaaŋ nə̀ bambi kə baha miɨ wudɔ wɨ nə bɔ ntɨŋ. Bə́ nə̀ chɛse kwa bɔ ji biɔ yɨ wu Baba Jisɔs lə lɨ. 17 Pita bə Jɔŋ tsɨsɨ ba ga kaŋ bɔ bɨŋ, bɔ tə keŋkɛ Kɨn'yɨntɨ kɨ Ntsaaŋ. 18 Lə Semon ŋəŋ lə beŋ bə faŋə bə Jisɔs lə na galɨ kaŋ bənɨ bɨŋ Kɨn'yɨntɨ kɨ Ntsaaŋ ba bɔ wɨ, yu nya bə Pita bɔ bə Jɔŋ kpə 19 ba kɨ tɨdi lə, “Bə nyâ mɨ buŋga buŋ tɨ, fə ma yəŋ wu ŋgalə kaŋ yɛŋ yu bɨŋ, ɨ yu keŋkɛ Kɨn'yɨntɨ kɨ Ntsaaŋ.” 20 Pita chi bə yu lə, “Wə bə kpə wɔhɔ wa, bə lâ kɨlɔlɔ. Fi fə nəŋ fə wə na gɔmbiɛ lə naji ɨ bə́ taŋ kɨnya kɨ Nyɔ lə bə kpə? 21 Wə na keŋkɛhɛ tɨmo shi nɨŋ nyi ntɨŋ, ndzɨ shəŋ yɔhɔ na tsaləhə Nyɔ nəfiə. 22 Yâshənɨ shəŋ yɔhɔ bə fiɔŋ fibiə fi wə na gɔmbiə fiŋ lə wə fə, kɨ tsɨsə bə Baba Nyɔ diŋkəla ɨ yu gufiɛ biŋgɔmbiɛ bibiə bi wə na keŋkɛ biŋ wə shəŋ. 23 Nna ŋŋɨntɨ lə wə' yi bə yəsɨ yi yə, ba tsu mfia wu bubiə.” 24 Semon nende Pita bɔ bə Jɔŋ lə, “Butɨɨ, bə tsɨ̂sɨ bə Baba lə fiɔŋ fidɔ nə biɔŋ bi bə tanchɛ biŋ ntɨŋ kə̂ tɨchə mɨ.”
25 Lə Pita bɔ bə Jɔŋ kanə bə ntə yi diɛ yi Nyɔ ba tə biɔŋ bi bɔ na kkɨ tsukɔ Jisɔs wɨ, bɔ dza kɨ tsu Jɛlosalɛm. Nɨ bɔ nə̀ tsu, bɔ kɨ chɛti bituŋ bi Samaliya ntɨŋ kɨyɛŋ, bɔ tɨdi shɔŋ yi ndzeŋe yi Nyɔ sɔ.
Felip chɛse miɨ wu Itiɔpia biɔ
26 Nchinda wu Baba jiji ba tə bə Felip lə, “Dzâ, wə shi dzə nəshiŋ ba gəŋ dzə yi na dza nə Jɛlosalɛm yi chɛti kpa yi gɨntɨ Gasa.” 27 Felip dza kɨ shichi. Miɨ wubəŋ wudɔ wu Itiɔpia nə̀ ji dzə ya ntɨŋ. Yu nə̀ ji miɨ wu bə́ nə̀ tandə ba foso biəlɨ yihi, ɨji miɨ wu nə̀ jiŋgə dɨ wu kpə lə wu Yaa yi nə̀ sakɨ kɨtuŋ kɨ Itiɔpia lə, yɨ wuhu ji lə Kandɛs. Miɨ wa nə̀ dza nə Jɛlosalɛm dɨ wu yu nə̀ gəŋə kɨ tsɨsə Nyɔ. 28 Yu nə̀ tsuu jiŋ kɨtuŋ kɨhɨ ntɨŋ ji kɨkpɔtɔ ntɨŋ, ŋkpa yi nyɛ́ŋ, yu' jiŋ sɔ kɨ tanchɛ fiɔŋ nə Kɨŋwatɨ ntɨŋ kɨ Adzaya miɨ wu shɔŋ yi Nyɔ nə̀ bɔndɔ. 29 Kɨn'yɨntɨ kɨ Ntsaaŋ tə bə Felip lə, “Kɨ̂nɨ, wə gəŋ fə kɨkpɔtɔ kɨhɨ ku.” 30 Felip lətə ba gəŋ mɨ, yu wɔ nɨ miɨ wa na tanchɛ Kɨŋwatɨ kɨ Adzaya lə. Yu bi bə miɨ wa lə, “Wə na tanchɛ mɛ wə woko fiɔŋ fi kɨ na tɨdi?” 31 Miɨ wa chi lə, “Naji ŋ'wɔ nəŋ ɨji miɨ kə nachə bə mɨ?” Yu tə tə lə Felip bəndɨ bɔ bə yu jiŋ kɨkpɔtɔ ka ntɨŋ. 32 Dɨ wu yu nə̀ tanchɛ wa nə Kɨŋwatɨ ka ntɨŋ nə̀ chanyɛɛ lə,
“Yu nə̀ ji nɨ shiŋ yi bə́ na gɨntɨ yimbɛ,
yu ji tɨ nɨ wɛŋ wu shiŋ wu bə́ na ba bə́ kɨ kwende dí nə yu gwɨ,
yu jikə dəə.
Cha chi yu nə̀ ji tɨ bifuŋ bimbaŋə.
33 Bə́ nə̀ nya yu yaa, bə́ nɨŋŋ nsa nsa yihi diəŋ.
Naji ɨ yəŋ shəshə ba chanyɛ tsukɔ ŋkɨkɨ wuhu wɨ,
ɨji bə́ nə̀ kəmbɨ buwəŋ buhu nə sɛŋ koso?”
34 Miɨ wubəŋ wa nende Felip ba tə lə, “Butɨɨ, tə̂ mɨ, miɨ wu shɔŋ yi Nyɔ no na chanyɛ ji kɨ yəŋ'ə? Yu na chanyɛ kɨ gwɨ yihi lə maa kɨ miɨ wudɔ lə lə?” 35 Felip gbɔ kwa bə dɨ wu kɨŋwatɨ lə wa, kɨ nachɛ yu shɔŋ yi ndzeŋe tsukɔ Jisɔs wɨ.
36 Lə bɔ kɨ gɨntɨ dzə, bɔ gəŋ fɔ dɨ wudɔ wɨ ŋgɔŋ ji mɨ. Miɨ wubəŋ wa tə lə, “Bô ŋəŋ, mɛŋ na ŋgɔŋ mɛ, na la fi naji ɨ fi nɨŋŋ lə wə kə̂ chɛsɛ mɨ biɔ?” [ 37 Felip chi bə yu lə, “Jilə wə' bɨŋ Jisɔs Klistu bə shəŋ yɔhɔ chi, nchɛse wə biɔ.” Miɨ wa chi lə, “Mɨ' mbɨŋ lə Jisɔs Klistu na Wɛŋ wu Nyɔ.”]ª
38 Miɨ wubəŋ wa tə fə lə kɨkpɔtɔ ka ləŋ. Bɔ bə Felip shi ba be gəŋ biɔ, Felip chɛse yu biɔ. 39 Nɨ bɔ fɔɔ nɔ nə biɔ, Kɨn'yɨntɨ kɨ Baba lə ba waŋkɨ Felip nə mɨ, miɨ wubəŋ wa tsukə ŋəŋkəhə yu wɨ. Bəmanɨ, yu kɨ gɨntɨ yu laŋkɨ. 40 Felip jiji ba lafu Asɔtus, tə dza kɨ gɨntɨ, yu chɛti bituŋ bichi ntɨŋ, yu tɨdi shɔŋ yi ndzeŋe yi Nyɔ, yu gəŋ fɔ kɨtuŋ kɨ Kasaliya ntɨŋ.