Jisɔs yashənɨ Sɔl dzə yi Damaskus
9
Tsa ya wɨ nə̀ ji Sɔl bambi yu fu bə bulo, yu lesɛ bənɨ bə nɨŋ'ə bə Baba lə, lə yu jiwa ɨ yu kkpɨshɛ bɔ. Yu gəŋ fə fo wu bəchɛ bintɔfiɛ lə ku 2 ba nende lə yu nyâ biŋwatɨ yu gəŋ bə bi tsɔ́ŋ yi kɨntsɨsɨ yi Damaskus ntɨŋ, bi na donchɛ lə ɨ yu ŋəŋ bənɨ ji sɔ bə na biəlɨ Dzə yi Baba, se lɨ ji bəkansɨ, makə bənɨnsə, yu kwe bɔ kanshɛ lɨ ba ba bə bɔ Jɛlosalɛm.3 Fo wu bəchɛ bintɔfiɛ lə wa nya, Sɔl dza kɨ gɨntɨ Damaskus, lə yu kɨ gɨntɨ gwɨgwɨ fə kɨtuŋ ka ku, kɨŋgbooŋ bu lakiɛ nə bɔ́ ba shi yu wɨ. 4 Yu gbɔ fəkoso ba wɔ nɨ diɛ chanyɛ bə yu lə, “Sɔl, Sɔl, wə na sesɛ gbo mɨ nəjiŋ mɛ ndzɨ la?”
5 Sɔl bi lə, “Baba, na wə yəŋ?” Diɛ ya chi lə, “Na mɨ Jisɔs, ɨji mɨ wa wu wə na sesɛ gbo mɨ nəjiŋ. 6 Bə fɛŋ, dzâ wə, wə be ba gəŋ kɨtuŋ ka ntɨŋ, bə́ jiba ɨ bə́ tə wə fiɔŋ fi naji lə wə fə.” 7 Bənɨ bə nə̀ gəndəə bə Sɔl ləŋ mɨ ba fɨŋgbə lɨ, nɨ bɔ nə̀ woko diɛ ya bɔ jikə ŋəŋkəhə miɨ wɨ.
8 Lə Sɔl dza wə nə fəkoso yu diɔ lə yu sasə yəsɨ, yu tsukə ŋəŋkəhə bidɨ. Bɔ chiŋfi yu kɨbandə wɨ, kɨ tsɛtsɛ bɔ gɨntɨ bə yu Damaskus. 9 Yu gəŋ jiŋ díɔ tɛ ŋəŋ sɨŋ bidɨ wɨ. Yu ji manɨ, ndiə sɨŋ, mu sɨŋ fiɔŋ tɨ.
10 Miɨ wu kɨmbɨŋ wudɔ nə̀ ji sɔ Damaskus yɨ wuhu ji lə Ananias. Baba Jisɔs bəndɨ yu budəŋfɨ ntɨŋ lə, “Ananias.” Yu bɨŋ lə, “Baba, mɨ no mɛ.”
11 Baba tə bə yu lə, “Dzâ, kɨ gɨntɨ dzə ntɨŋ yi bə́ na tsɨsə lə Diəŋ, wə gəŋ ba fɔ ku wu Judas lə ntɨŋ, wə bi miɨ wudɔ wu Tasɔs wu bə́ na tsɨsə lə Sɔl. Wôkɔ wɔ, yu na ji mɨ yu tsɨsə, 12 yu sə ŋəŋ miɨ wu bə́ na tsɨsə lə Ananias budəŋfɨ ntɨŋ, miɨ wa ba ba ga kaŋ yu bɨŋ lə yu kɨ chisə ŋəŋə biɔŋ wɨ.”
13 Bəmanɨ, Ananias tə lə, “Baba, mɨ ŋ'wɔ nə bənɨ kɨyɛŋ'ɨ tsukɔ miɨ no wɨ nɨ yu na fɨtɨ biɔŋ bibiə bə bənɨ bə Nyɔ lə bə na ji Jɛlosalɛm. 14 Yu na ba mɛ, ɨji yu' ləkə buŋga nə bəchɛ bintɔfiɛ bəbəŋ'ɨ, lə yu ba kwediɛ bənɨ bəchi sɛŋ bə na tsɨsə bɔ bɨndɨ yɨ wɔhɔ.”
15 Baba chi bə yu lə, “Gə̂ŋ kwa. Mɨ' nsa miɨ wa lə yu kɨ ji miɨ wɛmɨ wu nɨŋ, lə yu tɨfiə yɨ wɛŋ bə bənɨ bə na jimiɛhɛ Bəju bə bəŋkuŋ bəbɔlə, ma bə bənɨ bə Isla. 16 Mɨ kɨbɛɛ njiwa ndonchɛ yu nɨ yu jiwa yu wɔ ŋgə ndzɨ yɨ wɛŋ.”
17 Bəma, Ananias gəŋ ba be tsɔŋ ya ntɨŋ ba ga kaŋ yihi Sɔl bɨŋ, bəndɨ lə, “Sɔl ŋgwɨŋ, ə faŋ Baba Jisɔs mɨ. Na yu Jisɔs wu sə lafɔ wa wə nəfiə dzəchi tsa yi wə sə ba ya sɛŋ. Yu faŋ mɨ mɛ lə mba mfə wə kɨ chisə ŋəŋə biɔŋ wɨ, Kɨn'yɨntɨ kɨ Ntsaaŋ yi wə wɨ.” 18 Lə yu chanyɛ manɨ, mwɔŋ mundɔ nɨ mənjɛni fɔ nə Sɔl yəsɨ ba gbɔ fəkoso, yu gbɔ kɨ chisə ŋəŋə bidɨ. Yu dza wə, bə́ chɛse yu biɔ. 19 Lə yu diə, buŋga chi ba yu wɨ.
Sɔl tɨfiə shɔŋ yi Jisɔs Damaskus
Sɔl me Damaskus bə ntɛshɛ yi bənɨ bə kɨmbɨŋ'ə díɔ tsəsɨ, 20 mɨ mɨ, yu gbɔ kɨ gəndə tsɔ́ŋ yi kɨntsɨsɨ lə ntɨŋ yu tɨfiə lə, “Jisɔs na Wɛŋ wu Nyɔ.” 21 Bənɨ bəchi bə nə̀ woko kɨ masə lə, “Ntɨlə no na miɨ wu nə̀ gəndəə wa Jɛlosalɛm yu kwediɛ bənɨ bə na tsɨsə bɔ bɨndɨ yɨ wuŋ? Ntɨlə yu nə ba sɛŋ mɛ lə yu kɨ kwediɛ bɔ yu chisə gəŋə bə bɔ sɔ, yu nya bə bəchɛ bintɔfiɛ bəbəŋ?”
22 Sɔl kɨ bu tɨfiə fihi tsukɔ Jisɔs wɨ, yu tɛsɛ gwɨ, yu donchɛɛ lə Jisɔs na Nchitə wu Nyɔ nə̀ kaa wa. Bəju bə nə̀ ji Damaskus fiəŋkə fiɔŋ fi naji ɨ bɔ chi bə yu.
23 Lə díɔ chɛ kɨyɛŋ, Bəju ba jiŋ ba sese lə bɔ kkpɨsɨ Sɔl. 24 Bɔ tə kɨ shɨ bɔ kɨki yu fə fiənsɨ wu mbaŋ wu Damaskus ku fə tsa yi yu kɨ chɛti, ɨ se lɨ kɨ ji bbutsu makə bbushə, ɨ bɔ kkpɨsɨ yu. Bəmanɨ, Sɔl kkə biŋgɔmbiɛ bibɔlə. 25 Bənɨ buhu bə nɨŋ'ə dze yu bbutsu ba chɛse ŋka ntɨŋ ba foso kɨbɔŋɔ kɨ mbaŋ'ə ntɨŋ ba shisəsɨ yu binchi.
Sɔl gəŋ Jɛlosalɛm
26 Sɔl tsu jiŋ Jɛlosalɛm, lə yu kɨ se lə yu tɛshɛ bə ntɛshɛ yi bənɨ bə kɨmbɨŋ'ə, bɔ kɨ lete yu bulenɛ ndzɨ bɔ nə̀ bɨmiɛhɛ yɛyi lə yu na ji wɛŋ wu nɨŋ. 27 Bəmanɨ, Banabas dze yu, bɔ bə yu gəŋ fə beŋ bə faŋə bə Jisɔs lə ku. Yu tə bə bɔ nɨ Sɔl nə̀ ŋəŋə Baba wɨ dzə, Baba chanyɛ bə yu, yu chi tədiə bə bɔ chi yu nə̀ tɨfiə tsukɔ Jisɔs wɨ Damaskus nle sɨŋ. 28 Bəma, Sɔl kɨ ji bə bɔ yu gəndəə bidɨ bichi Jɛlosalɛm, yu tɨfiəə kɨ Jisɔs lə nle sɨŋ. 29 Yu kɨ chanyɛ bə Bəju bə nə̀ chanyɛɛ díɛ yi Glek, yu yimbiɛ bə bɔ, bɔ gbɔ kɨ noŋko lə bɔ kkpɨsɨ yu. 30 Bənɨ bə kɨmbɨŋ'ə kkə lə bɔ na noŋko lə bɔ kkpɨsɨ Sɔl, bɔ dze ba shi bə yu kɨtuŋ kɨ Kasaliya ntɨŋ ba faŋ yu, yu gəŋ Tasɔs.
31 Tsa nyi bɨŋ, ntɛshɛ yi bənɨ bə kɨmbɨŋ'ə yi sha yi Judɛya bə yi Galili ma yi Samaliya fufiə nə ŋgə kaŋ. Kɨn'yɨntɨ kɨ Ntsaaŋ fə ntɛshɛ ya ləŋ buntaŋ, kɨn'yɨntɨ ka chitəə ntɛshɛ ya, yi ko. Bɔ kɨ kuntə Baba.
Pita gəŋ Lida bə Jɔpa
32 Pita kɨ gəndə bidɨ bichi, yu lɛti jii bənɨ bə Nyɔ lə ku, yu gəndə ba gəŋ fɔ fə bənɨ bə kɨmbɨŋ'ə bə Lida ku. 33 Nɨ yu nə̀ ji sɔ, yu ŋəŋ miɨ wudɔ ɨji yu' kkpə dia mo, yɨ wuhu ji lə Ɛnias, yu' tsə bə gwɨ ya ta biya yaŋ. 34 Lə Pita ŋəŋ yu wɨ, Pita bəndɨ lə, “Ɛnias, Jisɔs Klistu wəmiəsɨ wa wə. Dzâ wə, chɛ̂ kɨga kɔhɔ.” Mɨ kɨsɨkɨ, Ɛnias bu dza wə. 35 Bənɨ bə Lida bə bənɨ bə ndəŋgə wu Shalɔn ntɨŋ bəchi ŋəŋ nɨ miɨ wa wəmiə, bɔ ga shəŋ yibɔlə Baba Jisɔs wɨ.
36 Nə̀ ji kpansɨ wudɔ ji kɨtuŋ kɨ Jɔpa ntɨŋ, ɨji kpansɨ wu kɨmbɨŋ, yɨ wuhu ji lə Tabita, wu ji díɛ yi Glek ntɨŋ lə Dɔkas.ª Yu nə̀ ba yu kɨ fɨtɨ biɔŋ bi ndzeŋe tsá chi, yu chitə bənɨ bə fiəŋkə. 37 Lə kɨ ji díɔ ya wɨ, kpansɨ wa gbɔ gwɨ ba kkpə lɨ. Bə́ wwɔ kɨŋgundu kɨhɨ ba bəndɨ ga kɨ tsɔŋ yi nəbɔ́ ntɨŋ. 38 Nɨ Jɔpa nə̀ ji gwɨgwɨ fə Lida ku, ntɛshɛ yi bənɨ bə kɨmbɨŋ'ə wɔ lə Pita wa Lida bɔ faŋ bənɨnsə bəfɛ yu lɨ. Bɔ gəŋ nende yu lə butɨɨ yu bâ fɔfɔ.
39 Pita bu dza bɔ bə bɔ kɨ gɨntɨ. Lə yu gəŋ fɔ mɨ, bɔ dze yu ba bəndɨ bə yu tsɔŋ yi nəbɔ́ ya ntɨŋ. Bəkansɨ bə bəŋku lə bəchi bə sɔ kɨtuŋ ka ntɨŋ tɛshɛ ba fiədiɛ yu kɨ dɨ bɔ tseyɛ bindzu bi Dɔkas nə̀ fɨtɨ tsa yi yu nə̀ bambi su. 40 Pita foso bɔ bəchi binchi, yu tuŋ nu koso ba tsɨsɨ lɨ, tə dza ba fichə tə bə kɨŋgundu ka lə, “Tabita, dzâ wə.” Yu bu sasə yəsɨ ba ŋəŋ Pita wɨ, tə dza ba jiŋ'ɨ. 41 Pita chiŋfi yu kɨbandə wɨ ba dzasɨ yu wə. Yu bəndɨ bənɨ bə Nyɔ lə, bɔ jiŋ bə bəkansɨ bə bəŋku lə ba, yu donchɛ Tabita bə bɔ, ɨji yu' tsu wuwəŋ. 42 Shɔŋ ya tsaŋ ba gəndə Jɔpa chi. Bənɨ kɨyɛŋ ga shəŋ Baba wɨ. 43 Pita jiŋ Jɔpa díɔ kɨyɛŋ, yu mee bɔ bə miɨ wudɔ wu nə̀ nachɛɛ dzɨ́ yi nyɛ́ŋ'ə, yɨ wuhu ji lə Semon.