Təkəniy tu kə ton am pic Yesu tu kə jəɓaha
3
Timote, a zlim mana kat tu kə ceɗeh nhi: mandal talan mahayək mbeh kə way, takwaniy av kə tonigi. 2 Am mandal səna, ko hid ngayi av kə may talan tik a gendik. Av kə ɗiyiy tammah am suloy, av kə kafiy kocofron, av kə gəliy talan. Taniy av kə riy Bayzlav, za a zlimiy mə ngə hidiy mə mbuwta kwən. A luwenta soko a hidiy mə vəlenta təkən kwən. Av kə zeliy təkəniy maa kweɗek ngə Bayzlav. 3 Av kə njenta lem a hidigi, za a safiy kaymah ngə hidiy kwən. Av kə zəmiy madabah ngə hidigi. A puwiy talan tan kwən, av kə jəgəmiy a hidigi. Za av kə zeliy ɗiy malaw. 4 Av kə ɗewiy kə hidiy mə vəliy hidigi. A ɓəniy a ɓən kə ɗiyiy kəzəɗ ngatan kwən. Av kə gəliy talan tan day godokwən. Av kə mayiy təkən məv kə zəzay nəv ngatan day ngə Bayzlav. 5 Hidiy av kə safta wa a səbiy mozlokotuf ngə Bayzlav mindiwin. Amma taniy atalan tan a mayiy Bayzlav kə ɗiy təkən avə gədan ngetik kə zlambaɗ nəv ngatan kaɗ kwən. Hoh kərti ɗa, a gəjeh kəsəm koh avə tanigi. 6 Ko tanjinhi hidiy məpərmay tə dab tan a njə kə pətiy a de ngə hidigi. A njə kə lebeɗiy wertiy ma kukuɗ kə yəkiy jəgwan ngatan. Wərtiy səna, wertiy mə njə kə ɗiyiy təkən mə ngavngav day godokwən, za mə njə kə ɗiyiy təkən ma par par mana nəv ngatan mə mayu. 7 Taniy a njə kə mayiy kə jəgwaniy təkən hoyhoy, amma bərngəzl talan tan gəɗak kə səniy mindiwin. 8 Yannes avə Yamberes tu zeliy ma ngə Musa amicek. Wa səna a hidiy tafnan, a njə kə zeliy mindiwin. Bərngəzl talan ngatan ngə ɓən tu ngav, za vəl nəv ngatan a Bayzlav mə mbaɗa kə təkən may may. 9 Amma taniy a viy a kibik kwən, kadaban am kəzəɗ taniy ta ɗiyta, hidiy cike av kə sənta taniy a səniy təkən ɓahɗahkwən, mana mə səniy ngə Yannes avə Yamberes tamicek.Zay ngə Deftere ngə Bayzlav
10 Hoh Timote, hoh mə səb jəgwan ngaɗ za law law. Hoh sən ngar ngaɗ wayza. Za ko təkəniy kat mə may kə ɗiy tik, hoh sən mana kat mə vəlen nəv a Kristu, mana kat mə musuf a dab hidigi, za mana kat mə mayta. Hoh sən mana kat mə musuf am mozlokotuf ngə Kristu. 11 Za hoh mə sən mana hidiy mə jarakta jəgəm za. Hoh mə sən mana mə zlənakta takwan a liɓde Antakiya, a liɓde Ikoniya ɓəw a liɓde Listra. Mindiwin, kat tu zlən takwan day day. Amma Məmar Hidi tu mbəlak kaɗ am takwaniy səna za. 12 Ko hid ngayi mə may kə ɗew mana Bayzlav mə mayu am lap tav Yesu Kristu, hidiy av kə jarenta gadaray. 13 Amma hidiy mə njə kə ɗiyiy mə ngav ngav, ɓəw hidiy mə ɗiyiy mə wəzlwəzlək, taniy av kə ɗiyiy mə ngavngav kibik kibik. Taniy Av kə jəkiy hidigi, za hidiy təm av kə jəkta.
14 Amma hoh Timote, a kaw təkəniy hoh mə jəgwanu, za hoh mə yəku a nəv takan. Hoh sən hidiy mə jəgwaniy təkəniy səna. 15 Dəga hoh wəlen kərti, hoh sən zləgam təm deftere ngə Bayzlav law law. Zləgam səna kwəl kə vəloh bərngəzl talan malaw, kə jan hoh kə vəl nəv koh a Yesu Kristu, za Bayzlav kə mbəloh kaɗ. 16 Zləgamiy cike wayza hidiy mə ɗəɗefta am deftere, a pətah a kəma ngə Bayzlav za. Zləgamiy səna law kə jəgwanen mindiwin a hidigi. Law kə ceɗen a hidigi mə ngavngav taniy mə ɗiyta, law kə mən hid kə zaɓ ɗew ngə hidigi, law kə ngəz hidiy kə ɗiy təkəniy Bayzlav mə mayu. 17 Zləgam ngə Bayzlav a ɗiy anhi, kə jan ko hid ngayi taa ɗiy kəzəɗ ngə Bayzlav, zləgam səna kə mənenni am sləsləɓ, kadaban sin awana təkəniy cike wayza ngə ɗiy kəzəɗ malaw.