Pol aa ngəz Timote kə ɗiy kəzəɗ ngə Kristu a nəv takan
2
Kat tə luwen a hoh kərti ɗa, a geɗ Yesu Kristu mə vəloh gədan avə marɓən ngetik. 2 Jəgwan hoh mə lim kat mə ɗiy a kibik hidiy dolom nhi, a jəgwanen a hidiy mə njə kə kawiy kəzəɗ ngər səsaray, za taniy təm kə hosiy gəga kə jəgwanenta a hidiy sənan.3 A musuf am takwan makavay Yesu Kristu mana kata. Soje malaw ngə Yesu ɗaw kə ɗiy atəgo . 4 Mana hidi a may kə ɗew kə soje, za aa may kə fet nəv ngə mordoy ngetik, a zlay talan tik am kəzəɗ məpərmay ɗahkwən . 5 Asəna təm baha, mana hidi a ɗiy sla avə si, a njə kə si mana mə luwenta. Asənkwən a jan gəd mazlən tik kwən. 6 Hid mə zlən takwan dayday avə biz am tuz ngetik, sin acin ngə dezl təkən sin mə biz səna məpəlpla. 7 A ɓən lawlaw atalan zləgam kat mə ceɗeh nhi, za Məmar Hidi av kə mənoh kə zlim zləgam səna law law.
8 A ɓən atalan Yesu Kristu,
sin hid təm səban ngə Bay Dawda.
Bayzlav tu mbəlah kaɗ a mə məc za,
mana kat taa ceɗen a hidigi am Ləbar Malaw nhi.
9 Makavay Ləbar Malaw səna, kata sa takwan, za jawakta avə selelen wa mə njə kə jawiy hid mə ɗiy mə ngavngav. Amma zləgam ngə Bayzlav wər mə jawah ɗahkwən . 10 Kadaban səna acin, kata musuf am takwaniy cike, makavay hidiy Bayzlav mə welta. Za kə jan taniy təm Yesu Kristu kə mbəlta kaɗ, za ɓəw kə pətiy am mordoy ngetik maa a way ɓahɗahkwən. 11 Zləgam kat tu kə zləgam nhi, zləgam maa mindiwin. Anhi zləgam səna:
‹‹ Mana yikwan tu məc avə Kristu, yikwan məv kə ɗew avə micin avə sin təm.
12 Mana yikwan tu musuf hoy hoy am takwan makavay sin wər, yikwan məv kə zəm bay avə sin təm.
Mana yikwan tu luw yikwan ma sən ɗahkwən, sin təm avə kə luw a səni yikwan ɗahkwən . 13 Mana yikwan maa ɗiy mana sin mə may ɗahkwən,
sin wər av kə ɗiy mana sin mə luw av kə ɗiy tik,
kadaban sin wər aa zləgam zəni kə buw zləgam kaɗ ɗahkwən .
Timote mə ɗew kə mə ɗiy kəzəɗ Bayzlav taa fet avə sin
14 Zləgamiy cike kat mə ceɗeh nhi, maa slekenta talan a hidiy cike a kimin. Ma zləgamenta a gədan a kibik Bayzlav, mə ɗewiy mətak ngiway atalan madaba ma. Ngəway səna a mən hidiy ko gwedek kwən. Amma hidiy mə zlimta av lekiy am mozlokotuf ngə Bayzlav. 15 A mbəlam kə ɗew kə hid mə fet nəv ngə Bayzlav. A ɗew kə hid taa fet a kəzəɗ ngetik. Za kə hid mə njə kə ceɗ zləgam ngə Bayzlav maa mindiwin a hidigi. 16 Ma gəjeh kəsəm koh a ngəway maa hayya maa a mgbuw a zləgam ngə Bayzlav ɗahkwən. Hidiy mə njə kə zləgamiy ma səna, a lekiy a mozlokotuf ngə Bayzlav a dagaytik. 17 Zləgam ngə hidiy səna, a njə kə cakway kibik kibik wa gəjəgwasl mbəlah ta zləzlar. Himeneyus avə Filetus awaniy a dab hidiy səna. 18 Himeneyus avə Filetus səna tu geɗiy mozlokotuf maa mindiwin kaɗ. Ɗaw kə ɗiyiy polkoy, za ɗaw kə luwta Bayzlav mə mbəlah hidiy a mə məc way za. A səna, hidiy sənan geɗiy vəl nəv ngatan a Yesu kaɗ makavay ma ngatan.
Mbasl maa cekcek Bayzlav mə ɗiyu
19 Amma mindiwin ngə Bayzlav a zlambaɗ ɗahkwən. Sin wa lay mə mbasl mbasl maa a kəz ɗahkwən. Tu ɗəɗefta am lay mə mbasl mbasl səna anhi: ‹‹Bayzlav Məmar Hidi a sən hidiy ngetikª. ›› Za tu ɗəɗefta təm: ‹‹Ko hid ngayi mə luw: Kat hid ngə Bayzlav Məmar Hidi, mə geɗ ɗiy mə ngavngav kaɗ. ››
20 Mana hid tu pət a de ngə hid mə njənja, av kə jan yeniy par par ngə ɗiy kəzəɗ. Av kə jan sənan yen mə ndən ndən ta melenge ɓəw yen mə ndən ndən avə masa ngə ta suloy. Av kə jan sənan təm yen ngə pay mə cəmcəm ɓəw yeniy mə ndən ndən avə ɓuzu. Yeniy məpərmay ɗaw kə ɗiyiy kəzəɗ avə sin am pic məmbəlwa. Za sənan təm ɗaw kə ɗiyiy kəzəɗ hoy hoy avə sin. 21 Wa səna avə yikwan təm. Ko hid ngayi tu geɗ ɗiy mə ngavngav kat mə luw nhi kaɗ wər, sin av kə mbaɗ mana yen ta njə kə ɗiyiy kəzəɗ avə sin am pic məmbəlwa. Bayzlav av kə wel tik kə ɗiy kəzəɗ ngetik, sin təm mə sləsləɓah kaɗ ngə ɗiy kəzəɗ malaw.
Hid mə ɗiy kəzəɗ ngə Məmar Hidi
22 Asəna acin, a gəjeh a təkəniy mə ngavngav wəriy gawliy taa may kə ɗiyta. Ma jar kə ɗew kə hid mə ɗiy kəzəɗ tiɗtiɗe, a jar vəl nəv koh a Bayzlav, ma may hidigi, za a ɗew a zoy avə hidiy mə tariy Məmar Hidi avə nəv maa kweɗek. 23 Ngəway ma madabah atalan ɗahkwən, hoh gər kə fiy mə koh a kimin kwən. Hoh mə sən za, ngəway mana tugo, a njə kə dah gbezlerma dap. 24 Hid mə njə kə ɗiy kəzəɗ ngə Məmar Hidi, a ɗiy gbezlerma ɗahkwən. A njə kə mbis avə hidiy cike wayza. A njə kə jugwanenta təkən a hidiy law law, za a njə kə musuf avə hidigi təm. 25 Hidiy mə njə kə ɓoniy ma ngetik, a njə kə ngəz ta a zləgam malaw. Ezen Bayzlav av kə zlərenta mozlokotuf taniy kə buwiy nəv ngatan kaɗ, taniy kə səniy mindiwin. 26 Za acin, bərngəzl talan ngatan av kə zlər, za av kə leriy aa mə ngər ngə Bay musuruf mə pek bərngəzl talan tan kaɗ, taniy kə ɗiyiy təkən sin mə mayu.