Mə saray ɗerewel ngə Pol a
Timote
Pol aa ɗen mbeli a Timote
1
Kat Pol, kat mə ɗəɗefeh ɗerewel nhi, kat məzlənzlən ngə Yesu Kristu, mana Bayzlav mə luwu. Sin tu zlənakku kə ceɗ ləbar atalan micin ndawyan a hidiy mə səbiy Yesu mana sin mə luw av kə vəlenta. 2 Kat tə ɗəɗef aa hoh Timote, kərti ɗa kat taa mayu. Pəl ngaɗa, Vay Bayzlav avə Məmar yikwan Yesu Kristu mə safiy marɓən, mə safiy kaymah koh, za mə vəliy zoy.Pol a luwen soko a Bayzlav makavay Timote
3 Hoy hoy mandal kata a tar Bayzlav vuɗu avə pic, kat ɗaw kə nəf zlim koh. Makavay ngəkoh, kata luwen soko a Bayzlav kat taa ɗiyen kəzəɗ avə nəv takan, wa didiy ɗa mə ɗiyenta. 4 Kata slek talan atalan teweɗ koh mandal pətar ngiykwan. May ngaɗ day yikwan kə gbam avə hoh, kə jan nəv ngaɗ kə wek avə zəzay. 5 Talan ngaɗ slekeh am vəl nəv ngəkoh hoh mə vəlen law law a Yesu. Wa səna, didi koh werti Lowis avə mamay koh Ewnike tu vəliy nəv ngatan a Kristu məpəlpla kə hoh. Kat mə sən za, hoh vəl nəv koh a Kristu təm mana tanigi.
Pol aa səsak Timote am kəzəɗ ngə Kristu
6 Kadaban səna acin, kata zləroh zlimi: a kaw təkən Bayzlav mə vəloh kə ɗiy kəzəɗ ngetik avə sin nhi law law. Təkən səna, sin a vəloh mandal kat mə ɗiy ngəra atalan koh. 7 Kat tə luw atəgo , kadaban Mbiɗ maa Kweɗek Bayzlav mə vəli yikwan səna, aa geɗiy yikwan am hovok ɗahkwən. Amma a vəli yikwan ɗər Mbiɗ ngə vəl gədan, Mbiɗ ngə may caliy ngiykwan, za ɓəw Mbiɗ ngə məniy yikwan yikwan kə puw talan ngiykwan law law.
8 Kadaban səna acin, hoh gər kə ɗiy weli kə zləgam təkən hoh mə sənu atalan Məmar yikwan Yesu kwən. Za weli mə gər kə ɗiyoh a kata hid təm jik jaw makavay Yesu kwən təm. Amma, a musuf am takwan mana kata am ceɗ Ləbar Malaw aa hidigi avə gədan Bayzlav mə vəli yikwan. 9 Sin tu mbəli yikwan, za sin ɗefi yikwan ma kə ɗew kə hidiy ngetik. A ɗiy atəgo makavay kəzəɗ ngiykwan malaw kwən, amma makavay ɓən ngetik ɓəw marɓən ngetik dap. A safi yikwan marɓən ngetik səna may may avə Yesu Kristu dəga a ndən talan mahayək gesin bugwən. 10 Tanjinhi, Bayzlav ɗefi yikwan marɓən ngetik səna avə yah ngə mə mbəl yikwan Yesu Kristu. Sin tu day gədan ngə məc, za avə sin mə ceɗi yikwan Ləbar Malaw, tu ɗefi yikwan mozlokotuf ngə jan micin maa a way ɗahkwən . 11 Bayzlav vrəkak kə məzlənzlən ngə Yesu kə ceɗ ləbar malaw səna, ɓəw kə ɗiyen jəgwan a hidigi. 12 Makavay kəzəɗ səna acin, kata zlən takwan tanjinhi. Ko asəna, wel a kawak kwən, kadaban kata sən hid kat mə vəlen nəv ɗa. Zəni mindiwin, kat mə sən za, Bayzlav awana avə gədan kə puw Ləbar Malaw sin mə vəlak kat kə ceɗ tik səna, hos am pic sin tu kə zla dalgway ngə hidigi.
13 A kaw ləbar kat mə ceɗeh nhi ngər səsaray, ləbar səna mindiwin. Za ma jəgwanenta kpekpe a hidigi. A jugwanenta avə vəl nəv ngəkoh a Yesu, ɓəw a may hidigi kadaban lap ngəkin avə Yesu Kristu. 14 Ləbar malaw Bayzlav mə vəloh am ngəra nhi, ma kaw ngər səsaray avə mən ngə Mbiɗ ngə Bayzlav tə kəsəm ngiykwan.
15 Hoh mə sən za, hidiy cike mə səbiy Yesu təm hayək Asiya mə geɗek tə za, ko Figelus avə Hermogenes mə geɗekta za. 16 Məmar Hidi mə saf kaymah ngə hidiy tə de Onesiforus. Kadaban Onesiforus səna ɗaw kə vəlak gədan. Ko mandal kata awan am jik jaw avə selelen, a ɗiy weli a kat bugwən. 17 Amma, sin maa hosohoh a liɓde Roma za, sin tu jarak godokwən, za sin janakku. 18 Məmar yikwan Yesu mə safen kaymah am pic Bayzlav tu kə zla dalgway ngə hidigi. Hoh atalan koh, hoh mə sən za lawlaw hid mə sən mana sin mə mənakku a liɓde Efesus kə day hoh ɗahkwən .