Way zləgam ngə Pol a Timote
4
Kərti ɗa, Yesu Kristu av kə jəɓah kə zəm bay am talan mahayək. Sin av kə zla dalgway ngə hidiy taa micin ɓəw ngə hidiy mə məcməc. Makavay səna acin, kata pəloh day day a kibik Bayzlav ɓəw a kibik tik: 2 a ceɗ zləgam ngə Bayzlav a hidigi. Ko av kə yəkta, ko a yəkta kwən, a ceɗenta dap. Avə zləgam səna, a ceɗenta mə ngavngav taniy mə ɗiyta kaɗ. A ngəzta kə jan taniy kə geɗiy ɗiy mə ngavngav kaɗ. A vəlenta gədan taniy kə ɗiyiy malaw. Mandal hoh ɗiy jəgwan səna, hoh kə musuf. 3 Kat tu luw anhi, kadaban wan tik av kə hosohoh, hidiy sənan a mayiy kə zlimiy zləgam maa mindiwin ngə Bayzlav ɗaba. Av kə səbiy may ngatan. Taniy av kə ɗefentəma a hidiy məpərmay dolom, məv kə jugwanenta təkən mana nəv ngatan taa may kə zlimta. 4 Av kə nekiy zlimiy ngatan kaɗ mətak zlimiy ləbar maa mindiwin, zəni av kə zləriy zlim ngatan kə zlimiy mələmbra mə ngawngaw. 5 Amma hoh, ma ɗew kə hid njə bərngəzl mə ɗiy təkən a mozlokotuf tik. Maa musuf am takwan. Maa ɗiy kəzəɗ ngə ceɗ Ləbar Malaw a hidigi. A ɗiy kəzəɗ Bayzlav mə vəloh nha am way tik.6 Amma ngaɗ wər, wan ngə məc ngaɗ mbeh. Av kə bənakta kaɗ wa taa ɗiyenta vəl a Bayzlav. 7 Kat tu jəgəm jəgəm malaw, kat tu way kəzəɗ ngaɗa, mana hid taa way si ngetik. Kat tə geɗ vəl nəv ngaɗa a Bayzlav bugwən. 8 Dəga tanjinhi, Bayzlav a puwak avə gəd mazlən a dibizlav kadaban kat tu ɗew mana sin mə mayu. Gəd mazlən maa mindiwin Məmar hidi mə zla dalgway maa tiɗtiɗe av kə vəlak am mandal sin tu kə zla dalgway ngə talan mahayək. Av kə vəlen aa kata ɓəw aa hidiy taa mayiy kə limta mandal sin tu kə jəɓaha.
Təkən mə janen a Pol
9 Kərti ɗa, a mbəlam kə yah angaw, ma janakku, 10 kadaban Demas mə geɗek kaɗ makavay sin aa may təkəniy təm talan mahayək maa tanjinhi dayday, sin taa vətik a liɓde Tesaloniki. Kireskes təm taa vətik am hayək Galatiya. Za Titus təm vətik am hayək Dalmatiya. 11 Tanjinhi yikwan avə Luka a gendik səsaray. Mandal hoh tu kə yah, ma ngazlah Markus gəzza. Kadaban sin av kə mənak day day am kəzəɗ ngə Bayzlav. 12 Kat taa zlən Tikikus a liɓde Efesus. 13 Mandal hoh tu kə yah, ma dahak ləkwət cəcən ɗa kat mə geɗ tə ngər Karpus a liɓde Torowas. Za ma dahak ɗereweliy ɗa gəzza, kambay deftere ngə bagulaª hoh gər kə zlaya kaɗ kwən.
14 Njə mbəzl məpərmay, zlim tik Aleksandire, tu ɗiyak mə ngavngav godokwən. Məmar Hidi av kə zlen dalgway makavay səna. 15 Hoh təm, maa kaw talan koh law law avə sin, kadaban sin tu ɓon day day kə yək jəgwan yikwan taa ɗiy tik.
16 Mandal mə ɗefektəma ngə tizin tik am dalgway kat kə ceɗ təkəniy cike kata mə ɗiyu, hid mə mənak ko takan ɗahkwən, hidiy cike geɗekta. Ko asəna, Bayzlav mə geɗenta mə ngavngav ngatan kaɗ. 17 Amma Məmar Hidi wər tu mənakku. Sin mohok aa mə ma ngə mobor za. Sin vəlak gədan ngə ceɗ ləbar ngetik a hidigi. Zəni kat way kə ceɗ ləbar səna, nha hidiy maa səban tan par a Yahudigi cike tu zlimta. 18 Məmar Hidi av kə mohok a mə təkəniy mə ngavngav cike wayza. Sin av kə mbəlak kə jan kat kə pət am bay ngetik tə dibizlav. Nəmkwan kə vəlen mordoy ko a pu. Amina.
Ɗə mbeli way tik
19 A ɗen mbeli a Priskila avə Akilas. A ɗen mbeli a hidiy tə de Onesiforus təm. 20 Erastus a wəlen a liɓde Korintu. Torofimus kat mə geɗeh adəwən a liɓde Miletus kadaban a dal. 21 A mbəlamah kə yah kə janak awənhi dəga tər cəcən a diw gesin bugwən. Ewbulus, Pudes, Linus, Kalawdiya ɓəw wertiy avə mawəligi cike mə səbiy Yesu aa ɗiy mbeli.
22 Məmar Hidi mə ɗew avə hoh. Bayzlav mə ɗəye hin malaw.