4
प्रिय आनाउ,जिस्काङ उस्काङ आत्माहेङ खान्धुरि मापासु,कालाउ आत्मागेलाइ परमेस्वरसो लोका हि कि माको दोतेङ वाको जाच पासु | हाइपालिदोनु हेन्जा धाताइका अगमबक्तागेलाइ इदोइ सुमिङता उल्लितेङ लोका हि | 2 इदोइ पाहा नेलाइ परमेस्वरको आत्माहेङ नाल स्वाना,गोताङ आत्मा ज्याइ येसु:ख्रिस्तको जिउता लोका हि दोतेङ स्विकार पाखे,उङ्को परमेस्वरसो हि | 3 येसु:हेङ स्विकार मापाखा गोताङ आत्मा परमेस्वरसो माको,कालाउ इङ्को ख्रिस्त बिरोधिको आत्मा हि,ज्याइको बिसोयोता ''इङ्को लोखे दोअ्का नेलाइ हिङ्का हिसुना | एला उङ्को इदोइ सुमिङता लोलि दोकाहि | 4 काङ्को म्हुइका जामालाइ,नेलाइ चाहि परमेस्वरको हिसुना,कालाउ नेलाइ हुता बिजय जेङ्का हिसुना | हाइपालिदोनु ज्याइ नेलाइ दोफा हिकाहि,वा सुमिङ हिका खान्तेङ माहान हि | 5 इम्बालाइ सुमिङ्को हि,ओदोङ भाअ्सिङ इम्बालाइ सुमिङकोङ काथा पाखे,कालाउ सुमिङ इम्बालाइको काथा हिङ्खे | 6 केलाइ ते परमेस्वरको हिनाहि | ज्याइ परमेस्वर हेङ नाल्खे वा केलाइको काथा हिङ्खे,कालाउ ज्याइ परमेस्वरको माको | वा केलाइको काथा माहिङखे | इदोइ पाहा केलाइ सत्येको आत्मा कालाउ भ्रमको आत्मा हेङ नाल्नाखे | 7 प्रिय आनाउ,केलाइ ताताइमिता प्रेम पाइने,हाइपालिदोनु प्रेम परमेस्वरसो लोखे | ज्याइ प्रेम पाखे उङ्को परमेस्वरसो जलम जेङ्का हि,कालाउ परमेस्वरहेङ नाल्खे | 8 प्रेम मापाकालाइ परमेस्वरहेङ मानाल्खे,हाइपालिदोनु परमेस्वर प्रेम हिकाहि | 9 परमेस्वरको प्रेम केलाइको माझाता एसापा प्रकट जेङ्हि कि,वा दोङ ताइको एनोङ खिनिङ चान सुमिङता दिङगिल्हि,ताकि केलाइ चानसो बान्चिलि द्वाको | 10 प्रेम इदोइताङ हि,कि केलाइ परमेस्वरहेङ प्रेम पाका माको,कालाउ वादोङ केलाइहेङ प्रेम पाहि,कालाउ केलाइको पापको स्यामा जेङ्लिको भाअ्सिङ ताइको चान हेङ दिङ्गिलपिहि | 11 प्रिय आनाउ,एदि परमेस्वर केलाइहेङ एसापा प्रेम पाकापानु,केलाइबुङ ता-ताइमिता प्रेम पालि गोइखे | 12 परमेस्वरहेङ हासुबुङ हेलाउबुङ तिङ्का मान्थु | एदि केलाइ ता-ताइमिता प्रेम पासुनापानु परमेस्वर केलाइता ह्यावा,कालाउ वाको प्रेम केलाइता सिदृ जेङ्का हिखे | 13 वा केलाइहेङ ताइको आत्मासो पिका हि,कालाउ इदोइ भाअ्सिङ केलाइ या गिनाखे कि केलाइ वाकोता हिनाखे कालाउ वा केलाइकोता हिखे | 14 केलाइ तिङ्का हिनाहि,कालाउ गवाहि पिनाखे,कि आबा ताइको चानहेङ सुमिङ्को मुक्तिदाता जेङ्लि दिङ्गिल्हि 15 ज्याइ येसु:हेङ परमेस्वरको चान हि दोअ्तेङ स्विकार पाखे,वाकोता परमेस्वर बासाहिखे,कालाउ उङ्को चाहि परमेस्वरता | 16 एसापा केलाइप्रति हिका परमेस्वरको प्रेम केलाइ गिनाखे कालाउ खान्धुरि पानाखे | परमेस्वर प्रेम हिकाहि,कालाउ ज्याइ प्रेमता हिखे उङ्को परमेस्वरता हिखे,कालाउ परमेस्वर वाकोता हिखे | 17 न्यायको दिनाको भाअ्सिङ केलाइ पुर्न भरोसा दोसाङ हिलि द्वाको दोतेङ प्रेम इदोइ ताङ केलाइता सिदृ हिखे | हाइपालिपानु वा जिस्काङ हिकाहि केलाइबुङ इदोइ सुमिङटा इन्सिकाङ हिनाहि | 18 प्रेमता थिका मान्थुखे,कालाउ सिदृ प्रेमहोइ थिकाहेङ लाअ्पाखे | हाइपालिपानु थिकाको सम्बन्ध ते दण्ड दोफा हिखे,कालाउ ज्याइ थिखे प्रेमता उङ्को प्रेमता सिदृ जेङ्का मान्थुखे | 19 केलाइ प्रेम पानाखे,हाइपालिदोनु लाम्फा वा केलाइहेङ प्रेम पाहि | 20 एदि हासुबुङ ''का परमेस्वरहेङ प्रेम पाखा''दोखे,कालाउ ताइको ओनेहेङ मन्दा माताखेपानु उङ्को झुटो हि,हाइपालिपानु ताइमिङ तिङ्का ताइको ओनेहेङ दोङ प्रेम मापाका मातिङ्का परमेस्वरहेङ प्रेमपालि मादावा | 21 केलाइ वाकोसो इदोइ आग्या निङ्का हिनाहि कि,ज्याइ परमेस्वरहेङ प्रेम पाखे वा ताइको ओनेहेङ बुङ प्रेम पालि गोइखे |