5
येसु:दोङ ख्रिस्त हिकाहि दोअ्तेङ खान्धुरि पाका परमेस्वरको जामालाइ गेलाइ हि | ज्याइ आबाहेङ प्रेमपाखे वा वाको चानबुङ प्रेम पाखे | 2 जेलाउ केलाइ परमेस्वरहेङ प्रेम पानाखे कालाउ वाको आग्यागेलाइ पालन पानाखे, कालाउ कि इदोइ पाहा थाहा निङ्नाखे,कि केलाइहेङ परमेस्वरको सन्तानहेङ प्रेम पानाखे | 3 परमेस्वरको प्रेम इदोइ दोङ हि कि केलाइ वाको आग्या गेलाइ पालन पानाखे,कालाउ वाको आग्या गेलाइ ल्हिका(भारि) मन्थु | 4 हाइपालिपानु परमेस्वरसो जलम जेङ्का झाराङ सुमिङ हुता बिजय निङ्खे,कालाउ सुमिङहेङ जितिका बिजय केलाइको खान्धुरि हि | 5 सुमिङ हुता बिजय निङ्का हासु ? उङ्कोदोङ हि,ज्याइ येसु:ख्रिस्तदोङ परमेस्वरको चान हिका हि दोतेङ खान्धुरि पाखे | 6 वा वा-आङ्दोङ हि,ज्याइ चि कालाउ हितिसो लोका हि, येसु:ख्रिस्त,ज्याइ चि पाहासो खिनिङ माको,कालाउ चि कालाउ हिति पाहासो लोहि | 7 गवाहि पिका ते पबित्तर आत्मादोङ हि,हाइपालिपानु पबित्तर आत्मा सत्ये हिकाहि | 8 हाइपालिदोनु गवाहिपिकालाइ सुमिहि,पबित्तर आत्मा,चि कालाउ हिति,कालाउ गोताङ काथाता इदोइ सहमति हिखे | 9 एदि केलाइ द्याङ्को गवाहि किनाखे पानु परमेस्वरको गवाहि झन झाउका हि | हाइपालिपानु इदोइ दोङ परमेस्वरको गवाहि हि,जेदोङ गवाहि वा ताइको चानको बिसोयोता पिका हि | 10 ज्याइ परमेस्वरको चान हुता खान्धुरि पाखे,वाको हृदयता इङ्को कथाको गवाहि हिखे | परमेस्वरता खान्धुरि मापाका वासिहेङ धताइका बानाइका हिखे | हाइपालिपानु परमेस्वर ताइको चानको बिसयता पिका गवाहिता वा खान्धुरि पाका मान्थुखे | 11 गवाहि चाहि इदोइदोङ हि,कि परमेस्वर केलाइहेङ अनन्त जिबन पिहि,कालाउ इङ्को जिबन वाको चानता हि | 12 ज्याइ दोफा चान हि, वाको दोफा जिवनबुङ हि,ज्याइदोफा परमेस्वरको चान मान्थु वाको दोफा जिबनबुङ मान्थुखे | 13 नेलाइ अनन्त जिवन निङ्का हिसुना दोका काथा गेलि दोका हितुहोइ परमेस्वरको चानको मिङ्ता खान्धुरि पाका नेलाइहेङ इदोइ पातारा लेखिदोङ्खा | 14 परमेस्वरता केलाइको पुर्न आसा हि कि वाको इच्छा बमोजिम जेदोङ हेलाबुङ वा केलाइको काथा हिङपिखे | 15 केलाइ दोमचालाउ जेदोङ्बुङ हेलाबुङ परमेस्वर हिङ्पिखे दोका केलाइ गिनाखे पानु,इङ्कोबुङ गिनाखे कि वासिहेङ केलाइ जेदोङ हेका हिनाहि इङ्को केलाइ इङ्को निङ्का हिनाहि | 16 एदि हासुबुङ ताइको ओनेको पाप पाका तिङ्खे,कालाउ इङ्को पापचाहि सि:काता माचुम्पुखेपानु,वा उङ्को ओनेको भाअ्सिङ परमेस्वर दोफा दोमचाकाइ पिलि गोइखे,कालाउ ज्याइको पाप सि:काता चुम्पुका खालको मान्थु,वासिहेङ परमेस्वर जिबन पिखे | कालाउ इसिका पाप बुङ हिखे,जेदोङ सि:काथामेता चुम्पुका हिखे,ज्याइको भाअ्सिङ हासुबुङ बिन्ति पालि गोयाङ दोतेङ का मादोङ्का | 17 गोताङ अधर्म चाहि पाप हि,कालाउ इसिका पापबुङ हिखे जेदोङ सि:का भाइका माजेङ्खे | 18 परमेस्वरसो सिरजाइका हासुबुङ पाप पातेङ माहिखे,कालाउ परमेस्वरको चान वासिहेङ सामाराइतेङ ताअ्खे,कालाउ दुस्त वा दुस्तबुङ वासिहेङ मासाइखे | 19 केलाइ गिनाखे,केलाइ परमेस्वरको हिनाहि,कालाउ सारा सुमिङ उङ्को दुस्तको खाबाराता परिका हि | 20 केलाइ गिनाखे,कि परमेस्वरको चान लोका हि,ज्याइ सत्ये हिकाहि | वासिहेङ नाल्लि द्वाको दोअ्तेङ वा केलाइहेङ समझ पिकाहि | ज्याइ सत्ये हिकाहि,केलाइ वाकोता हिनाहि,वाको चान येसु:ख्रिस्तता | वादोङ जातिङ्को परमेस्वर कालाउ अनन्त जिवन हिकाहि | 21 म्हुइका जामालाइ,ताताइ-ताताइमिहेङ मुर्तिगेलाइसो जोगाइतेङ तासु |