2 Peter
2 पतरस
1
येसु:ख्रिस्तको बन्धाइति कालाउ प्रेरित,सिमोन,पतरूससो,केलाइको परमेस्वर कालाउ मुक्तिदाता येसु:ख्रिस्तको धार्मिकताता केलाइको भाइकाङ अनमोल खान्धुरि निङ्कालाइहेङ, 2 परमेस्वरको कालाउ येसु:ख्रिस्त केलाइको प्रभुको ग्यानता अनुग्रह सान्ति नेलाइकोता गेनागेल्पा हानिकाताङ ह्यको| 3 ताइको महिमा कालाउ स्रेस्तता सो केलाइहेङ काइका हिकाहेङ केलाइ नाल्कानाङ परमेस्वरको बारका सरबुङ्सो जिवन कालाउ भक्तिको भाअ्सिङ केलाइहेङ गोइका गोताङ आनेमाने वा पिकाहि | 4 इदोइ पाहासो वा केलाइहेङ वाको अनमोल कालाउ माहान प्रतिग्यागेलाइ पिकाहि,कि या सुमिङ्को कु- इस्सा गेलाइसो लोका भ्रष्ट तासो खातेङ नेलाइ इसवरिय स्वभाबको जेङ्तेङ सहभागि जेङ्सु | 5 ओदोङ भाअ्सिङ गोताङ प्रकारको कोसिससो नेलाइको खान्धुरिता सदगुन कालाउ सदगुनता ग्यान थपिसु, 6 ग्यानता आत्मासयमि, आत्मासयमि मिता धर्य,धर्यता भक्ति, 7 भक्तिता भातरू-स्नेह,भातरू-स्नेहता प्रेम थोपिसु | 8 हाइपालिपानु इदोइ काथागेलाइ नेलाइकोता गेना गेल्पा हि दोअ्का केलाइको प्रभु येसु:ख्रिस्तको ग्यानता इदोइ काथागेलाइ नेलाइहेङ बेक्कार कालाउ निस्फल जेङ्लिसो बान्चिपावा | 9 हाइपालिपानु इदोइ काथागेलाइता हाइदोङ मान्थुका द्-याङचाहि पुरना पापगेलाइसो सुदद जेङ्का काथा निल्तेङ कान्हा कालाउ दुरेको आमेने मातिङ्का भाइपा जेङ्खे | 10 ओदोङ भाअ्सिङ ओने गेलाइ,नेलाइहेङ काइका कालाउ चुनाउ निस्चित पालि झन हाउसाइसु,हाइपालिपानु इदोइ काथा पालि नेलाइ हेलाउबुङ माहारि स्वाना | 11 हाइपालिदोनु एसापा केलाइको प्रभु कालाउ मुक्ति दाता येसु:ख्रिस्तको अनन्त राइजि लिता नेलाइहेङ बारका सान्दार स्वागत दोफाङ नेलाइहेङ लिता दुल्लि निङ्स्वाना | 12 ओदोङ भाअ्सिङ इदोइ काथागेलाइ नेलाइहेङ का दिनाङ सम्झायाङ्का,कालाउबुङ नेलाइ इदोइ गोताङ गिसुखेना, कालाउ नेलाइकोता हिका सत्येता नेलाइ स्थिर हिसु | 13 जेलाउ थेकापा का इदोइ जिउता हिघा,नेलाइहेङ समझाना पापाकाताङ सचेतपालिका सहि थानिखा | 14 हाइपालिदोनु का गिखा केलाइको प्रभु येसु:ख्रिस्त कासिहेङ तिङ्पापिकाहि कि काङ्को जिउ लाअ्लि गोइका बेला धेमाङ लोदोङ्खे | 15 का सिकाको न्हुसोबुङ नेलाइ या काथागेलाइ हिदोइबुङ समयता समझिलि दोसु दोअ्का का कोसिस ङ्का | 16 हाइपालिपानु केलाइ नेलाइहेङ केलाइको प्रभु येसु:ख्रिस्तको माहा सरबुङ कालाउ आगामनको बानाल पिलाउ चलाख दोफाङ रचिका दंत्यकाथा गेलाइको केलाइ अनुसरन मापानाहि,वाको बैभब दुरुस्त तिङ्का केलाइ साक्सि हिनाहि | 17 वा परमेस्वर आबासो आदर कालाउ महिमा प्रापत पाहि,जेलाउ इङ्को ओसारा जोल्का माहिमासो एनोङ गाला उलितेङ लोहि,''या काङ्को प्रिय चान जेङ,जाइदोफाका मेनाङ लेङ्चाका हिघा |'' 18 इङ्को पबित्तर तिकार्ता केलाइ वाको दोफाङ हिलाउ स्वर्गसो लोका इङ्को गाला केलाइ ताइमिङ हिङ्का हिगानाहि | 19 केलाइ दोफा हिका अगम बक्तागेलाइको बचन झन निस्चित जेङ्काहि | माचालममुचुलमको झेङ्का माजेङ्पा थिकापा कालाउ नेलाइको हृदयता र्-माको फुरु मालोपा थिकापा कितिकितिकाता जोल्तेङ हिका गेसा भाइकाङ नेलाइ इङ्को बचनहेङ ध्यान पिसुनापानु रेम्काङ पासुवाना | 20 झाराङ खान्तेङ लाम्फा नेलाइ या बुझिलि गोइस्वाना,कि धर्म सास्त्तरको हिदोइबुङ अगमबानि एमि खिनिङ द्-याङ्को बाख्याको बिसोयोता माको | 21 हाइपालिपानु द्-याङको मनसो हिदोइबुङ अगमबानि मालोहि,कालाउ पबित्तरो आत्मासो प्रेरना निङ्तेङ द्-याङ्गेलाइ परमेस्वरको तर्फसो धुइका हि |