3
खाङ्सु,आबा केलाइहेङ हिसिका खालको प्रेमपाका हि,कि केलाइ परमेस्वरको सन्तानदोङ दोअ्तेङ जेङ्का हिनाहि,कालाउ इङ्को जातिङ्कोङ दोङ | ओदोङ भाअ्सिङ ते सुमिङ केलाइहेङ मानाल्खे,हाइपालि दोनु उङ्को वासिहेङ मानाल्हि | 2 प्रिय आनाउ,एला केलाइ परमेस्वरको सान्तानदोङ,कालाउ केलाइ हाइजेनाङ वाला इङ्को एला थेकापा प्रकट जेङ्का मान्थु | इदोइ झोको गिनाखे कि,जेलाउ वा प्रकट जेनावा,कालाउ केलाइ वाको भाइकाङ जेनाङ | हाइपालिपानु वा जेस्काङ हि केलाइ वासिहेङ इन्सिकाङ तिनाङ | 3 कालाउ जेसाङ वा पबित्तर हि,वाको हुत्ता इदोइ आसा ताका गोताङ द्याङ ताइमिहेङ पबित्तर बानाइखे | 4 पाप पाका झाराङ ब्यबस्था भङ्ग पाखे | पाप दोङ ब्यबस्थाको भङ्ग हि | 5 पाप माअ्पालिदोङ वा प्रकट जेङ्का काथा दोका काथा नेलाइ गिसुखेना | कालाउ वाकोता हिदोइबुङ पाप मान्थु | 6 वाकोता हिका हासुबुङ पाप मापाखे | पाप पातेङ हिका हासुबुङ वासिहेङ नाते तिङ्का हि नाते नाल्कादोङ हि | 7 म्हुइका जामालाइ,हिदोइबुङ द्याङ नेलाइहेङ धाताइलि मानिनाको | ज्याइ ठिक काम पाखे उङ्को धार्मिक हि,जिस्काङ वा धार्मिक हि | 8 ज्याइ पाप पाखे उङ्को वा दियाबलस हि | हाइपालिपानु दियाबलसते लाम्फासोङ पापपाकाताङ लोका हि | दियाबलसको कामगेलाइ नासापालि दोङ परमेस्वरको चान प्रकट जेङ्हि | 9 परमेस्वरसो जलम जेङ्का हासुबुङ पाप पातेङ माहिखे,हाइपालिपानु वाको सभाब इङ्कोता हिखे,कालाउ इङ्कोबुङ पाप पातेङ हिलि मादोखे,हाइपालिदोनु उङ्को परमेस्वरसो जलम जेङ्का हि | 10 परमेस्वरको सन्तान हासु कालाउ दियाबलसको सन्तान हासु,इदोइ पाहासोङ झालाझालाखे कि ठिक काम मापाका द्याङ परमेस्वरको सन्तान माको,कालाउ उङ्को द्याङबुङ माको,ज्याइ ताइको दादा-ओनेहेङ प्रेम मापाखे | 11 नेलाइ लाम्फासोङ हिङ्का सान्देस इदोइ दोङ,''केलाइ एमिसो भेनाइहेङ प्रेमपालि गोइखे |'' 12 कयिन भाइपा माजेङ, ज्याइ साइतानको हिघाहि | वा ताइको ओनेहेङ से:हि |वा ताइको ओनेहेङ हाइपालि से:हि ? हाइपालिपानु वाको ताइको कामगेलाइ दुस्त हिघाहि,कालाउ वाको ओनेको कामगेलाइ चाहि धार्मिक हिघाहि | 13 ओनेगेलाइ सुमिङ नेलाइहेङ मन्दा मतानु आच्चम मामानेसु | 14 केलाइ गिनाखे,कि केलाइते सि:कासो पारातेङ जिबनता दुल्का हिनाहि,हाइपालिदोनु केलाइ ताइको दादा-ओनेगेलाइहेङ प्रेम पानाखे | ज्याइ प्रेम मापाखे उङ्को सि:तेङ हितेङहिखे | 15 ताइको दादा-ओनेगेलाइहेङ मन्दा माताका गोताङ से:कालाइ,कालाउ हिदोइबुङ से:कालाइदोफा अनन्त जिबन माहिखे दोफा नेलाइदोङ थाहा दोङ हि | 16 एसापासोङ प्रेम हाइ वाला केलाइ थाहा निङ्नाखे,कि वा वादोङ केलाइको भाअ्सिङ ताइको प्रान पिहि | केलाइबुङ ताइको दादा-ओनेगेलाइको भाअ्सिङ ताइको प्रान पिलि गोइखे | 17 हासुबुङ दोफा सुमिङ्को धनसम्पति हि,कालाउबुङ ताइकोदादा-ओने हेङ खाचोता हिका तिङ्लाउ ओबालाइ प्रति ताइको मन थाङ पाखेपानु,परमेस्वरको प्रेम हेसा वाकोता बास हावारो ? 18 म्हुइका जामालाइ बचन कालाउ तापा नुइहिखिनिङ केलाइ प्रेम मापाइने,कालाउ काम कालाउ सत्येता होइ प्रेम पाइने | 19 इदोइ पाहादोङ केलाइ गिलिदोनाखे कि केलाइ सत्येको हिनाहि,कालाउ एसापा वाको आगाता केलाइको हृदयहेङ धादसपिलि द्वाको | 20 जेलाउ केलाइको हृदय होइ केलाइहेङ दोसिखे,केलाइ गिनाखे परमेस्वर केलाइको हृदय खान्तेङ माहान हि,कालाउ वा गोताङ थोक गिखे | 21 प्रिय आनाउ,केलाइको हृदयहोइ केलाइहेङ मादोसिखेपानु परमेस्वरको आगाता केलाइहेङ साहस लोखे | 22 केलाइ जेदोङ र्-हेनाखे,इङ्को वाकोसो निङ्नाखे,हाइपालिदोनु केलाइ वाको आग्यापालंन पानाखे | कालाउ वासेहेङ मन परिका कामगेलाइ पानाखे | 23 वाको आग्या इदोइदोङ हि कि केलाइ वाको चान येसु:ख्रिस्तको मिङता खान्धुरिपालि गोइखे,कालाउ वा केलाइहेङ आग्या पिका बमोजिम एमिसो भेनाङहेङ प्रेम पालि गोइखे | 24 वाको आग्या पालन पाकालाइ झाराङ वाकोता हिखे,कालाउ वा इम्बालाइ कोता हिखे | वा केलाइहेङ हिका पबित्तर आत्मासो केलाइ गिनाखे,कि वा केलाकोता बासिखे |