याकूब 4

नेलाइको माझाता धुम कालाउ चेरसुका हिदोइ काथासो लोखे ? हाइ इदोइ गोताङ नाङ्को जिउको अङ्गगेलाइता सोङ्घरसो पाका दिका आनिबानिगेलाइ दोका लोका माको ? 2 नेलाइ इचसा ते पासुखेना,कालाउ नेलाइ मानिङ्सुखेना | नेलाइ बोमिहेङ पाल्सुखेना (से:सुखेना) कालाउ दि:सुखेना ,कालाउ निङ्लि मादोसुखेना | नेलाइ चेरसुखेना कालाउ धुम | नेलाइदोफा मान्थुखे,हाइपालिपानु नेलाइ परमेस्वरदोफा मार्हेसुखेना | 3 नेलाइ र्हेसुखेना कालाउ मानिङसुखेना,हाइपानु ताइको स्वार्थ पुरा पालिको भाअ्सिङ गलत ढङ्सो र्हेसुखेना | 4 लेसाइका द्याङ्गेलाइ, सुमिङ्दोफाको सानाइति परमेस्वरदोफाको दुस्मन दोङ दोअ्का काथा हाइ नासेहेङ थाहा मान्थु ? ओदोङ भाअ्सिङ ज्याइ सुमिङ्दोफा सानाइति जेङ्लि भोखे वादोङ ताइमिहेङ परमेस्वरको दुस्मन बानाइखे | 5 हाइ नेलाइ या सम्झिसुखेना,कि पबित्तरो धर्मसास्तरदोङ ब्यर्थता एसा दोअ्खे,केलाइकोता परमेस्वर ताअ्का आत्माको भाअ्सिङ वा मारफाङ डाह ताअ्खे | 6 कालाउ वा झन हेन्साङ अनुग्रह पिखे ? ओदोङ भाअ्सिङ पबित्तरो धर्मसास्तर एसा दोअ्खे ,''परमेस्वर घमन्दिगेलाइको बिरोध पाखे,कालाउ नम्रगेलाइ अन्ग्रह पाखे |'' 7 ओदोङ भाअ्सिङ ताइमिहेङ परमेस्वरको खाबाराता हिसु | सैतानको दियाबलस बिरोध पासु,कालाउ इङ्को नेलाइसो थितेङ खातावा | 8 परमेस्वरको भेरपाङ लोसु,कालाउ वा नेलाइको भेरपाङ लावा | पापिगेलाइ ! नेलाइको खुर रेम्का चोखो बानाइसु (चुधाइसु) | न्हेनोङ मन पाका दयाङ्गेलाइ ! नेलाइको हृदय सुदद पासु | 9 दु:खि जेङ्सु,सोक पासु ,कालाउ खारसु | नेलाइको लेङ्चाकाता सोकता ,कालाउ नेलाइको आन्नदता दुःखता परिनत ह्याको | 10 प्रभुको आगाता ताइमिहेङ का हेन्साङ पापि हिघा दोअ्तेङ म्हुइका समझिसु कालाउ वादोङ नेलाइहेङ हुता बानाइवा | 11 ओनेगेलाइ,एमिसो बोमिको बारेता मारेम्का काथा मापासु | ज्याइ ताइको ओनेको बिरोधता खराब दोअ्खे पानु , माको ताइको ओनेहेङ दोसिलि लगाइखे,इङ्को व्यवस्थाको बिरोधता दोअ्खे,कालाउ वा व्यवस्थाको दोसिलि तिङ्पाखे | कालाउ एदि ना व्यवस्थाको दोसिलि तिङ्पाखेना दोनुते ना व्यवस्था आन्सारको चलिका माजेङ्न्हा | कालाउ व्यवस्थाको न्याय निसाप पाका भाइका माजेङ्सुन्हा , व्यवस्थाको न्या पाका कि जेङ्सुन्हा| 12 व्यवस्था पिका कालाउ न्यायपाकाते एनोङ्दोङ हिका हि; जाइदोङ बान्चिपालि कालाउ से:लिबुङ दोकावा | कालाउ ताइको देरागेलाइहेङ दोसिलि लागाइका नेलाइ हासु ? 13 ''नानि याते जुम्नि केलाइ फालाना सहरता हानाङ वाला,इन्ता एबासार बितिपाङ वाला कालाउ ब्यपार पातेङ नाफा ओल्पाङ '' 14 दोकागेलाइ एला हिङ्सु,जुम्नि हाइ जेनावा नेलाइ मागिसुखेना | ताइको जिन्दगि हाइ हि ? नेलाइ ते कुकुवागेलाइ भाइका,जाइ एघुरिङ्को भासिङ तिङ्खे,कालाउ राम्खे | 15 याको बद्लाताते नेलाइ एसा पालिगोइका हि,''एदि परमेस्वरको इच्सा जेङ्हि पानु केलाइ बान्चायाङ कालाउ इसिका उसिका पाङ्ला |'' 16 कालाउ एला नेलाइ ता-ताइमिको घमन्दिता धाक लागाइसुखेना | इसिका गोतेङ घमन्दि मारेम्का खाराब हि | 17 अदोङ भाअ्सिङ ज्याइ बोमिहेङ भालाइपालि गितेङबुङ मापाखे वादोङ पाप पाखे |