James
याकूब
1
परमेस्वर कालाउ प्रभु येसु :ख्रिस्तको बानधाइति याकुब सो परमेस्वरको ज्याइ गोतेङ दयाङ्गेलाइ थामे-थामेता कोरपाहाङ चारबिराइतेङ हिका न्हेते हाडागुटियागेलाइहेङ सेउपाखा | 2 काङ्को दादा-ओनेगेलाइ कालाउ बेजान बाइ- ओनेगेलाइ, नेलाइकोता भेनाङ -भेनाङ खाल्को दु;ख कस्त लोलाउबुङ पुरा आनन्दको काथा फोम पाअ् | 3 हाइपालिपानु नेलाइ गिसुखेना , कि नेलाइको खान्धुरिको जाचहोइ र्-हुमतेङ्सा हिलि धिरपाखे| 4 जेदोङ नेलाइ पासुखेना इङ्कोता र्-हुमतेङ्सा गोतेङ काम पुरा पासु ,कालाउ नेलाइता हिदोइबुङ काथाको खाचो माजेङ्सिङ् नेलाइ गोतेङ काथाता परिपक्का गितेङ हिसु कालाउ पुरा जेङ्सु | 5 कालाउ एदि नेलाइको सो हासुहेङबुङ बुदिको खाचो हिहे पानु रेम्फा ताइ मनसो माझरकिसिङ पिलिदोअ्का परमेस्वर दोफा वादोङ र्-हेकाको, कालाउ वासेहेङ इङ्को पियावा | 6 कालाउ वासेहेङ हेथेबुङ साङ्का मापासिङ खान्धुरिसो र्-हेकाको | कालाउ साङ्का पाका चाहि इको भेरमाहोइ तोलिन्हाकात उराइपाकाताङ लोम्पाकाताङ पाका समुन्द्रको साल्काका चि' भाइपा जेनावा | 7 इनसिका द्याङ या मासम्झ्याको कि वा प्रभुसो हाइदोङ निनावाको दोअ्तेङ | 8 हाइपालिपानु न्हेनोङ मन हिका द्याङ वाको गोतेङ आनिबानिता कम्जोरि हिखे 9 गरिब ओने धनि जेङ्लाउ खु:सि(लेङ्चाको) जेनाको 10 कालाउ धनिगेलाइ गरिब जेङलाउ खु:सि जेनाको, हाइपानु दयाङ घासिको ल्हे भाइपा चुतेङ हानिखे | 11 हाइपालिपानु ओपाका धाङ्का सान्हेको बेला ल्होखे, कालाउ घासि चुपापिखे | ल्हेहुल्खे कालाउ साङ्का(सोबाइका) नासाखे जेङ्खे | इन्सापाङ धनि द्याङ बुङ ताइको कामधान्दाता नासातेङ हानेखे | 12 उङको द्याङ धन्नेको हि, जाइ आपत- बिपतको बेलाता मथिसिङ (दाहे-माहे माजेङ हिखे ) हिखे, हाइपानुपानु जेदोङ बेलाता जाँचेका सामाना पाखे इन्तासो पारपातेङ्सा वा जिवनको इङ्को मुकुत निनावा, ज्याइ परमेश्वर वासेहेङ प्रेम पाकागेलाइहेङ पिलि दोअ्का परतिग्या पाका हि | 13 परिक्स्या जेङ्लाउ हासुबुङ इसिका माअ्दोताको, “परमेश्वरसो काङ्को परिक्स्या जेङ्हि |” हाइपालिपानु हिदोइबुङ मारेम्का काथासो परमेश्वरसो परिक्स्या जेङ्लि मादोखे, कालाउ वाताइ मिङबुङ हिदोइबुङ द्याङ्को मापाखे | 14 कालाउ हेदोइबुङ द्याङ ताइकोङ खाराब इच्सासो दिइनाङ परिक्स्याता परिखे | 15 कालाउ खराब इच्सा चानतेङ वा पापको जोलोम पिखे कालाउ पाप हेङ्साङ जेन्तेङ वाको सि:का बेला चुमाखे | 16 काङ्को मायारो ओनेगेलाइ, धोखाता मापरेसु | 17 हेदोइबुङ रेम्का दान कालाउ हेदोइबुङ सिड्द खाल्को बरदान स्वर्गसोङ लोखे इदोइ बरदान फाइसालापा जोल्का आबासो लोखे | बदलेतेङ हिका साइर्हे (साहिरि) भाइका वाकोता हाइकोङ्बुङ अदलबदल माजेङ्खे | 18 वा ताइकोङ इच्सासो सत्येको बचनसो केलाइहेङ जोलोम पिहि|, इसिाका ज्याको कि केलाइ वाको सिरजाइकाको एलोङ लाङ्ति सेका फल भाइपा जेङ्लि द्वाकाइने | 19 काङ्को प्रिय आनाउ (मायारो) ओनेगेलाइ, इदोइ काथा गिसु, झाराङ द्याङ मारफा हिङ्लि, धिलापा( लेद्द्रापा) दोअ्लि कालाउ चेरताम्पालि़ धिला जेङ्लि गोइखखे| 20 हाइपालिपानु द्याङ्को चेरसो परमेश्वरको धारमिक्ता मालोख | 21 ओदोङ भाअ्सिङ गोताङ आखेका काथा कालाउ गोताङ मारेम्का दुष्ट पाप कामगेलाइहेङ लाअ्सु ,कालाउ नेलााइको हृदयता थिङ्तेङ ताका बचन लेङ्तेङ्तेसाङ( नम्रतापुर्बक) धारन पासु, ज्याइ नेलाइको प्रानहेङ बान्चेपालि दावा | 22 कालाउ बचन पालन पाका जेङ्सु, कालाउ हिङ्तेङ खिनिङ ताइमिहेङ धोखा मापिसु | 23 हिदोइबुङ द्याङ वचन हिङ्खे कालाउ पालन मापाखे, उङ्को एलोङ इसिका द्याङ भाइका जेनावा ज्याइ ताइको र्-हाइ आइनाता खाङ्खे 24 हाइपालिदोनु वा ताइमिहेङ खाङ्खे कालाउ वा हानेखे कालाउ उङ्को ताइमि हिसिका हिघाखे, उङ्को इघुरिङ्ताङ निल्खे | 25 कालाउ उङ्को द्याङ ज्याइ स्वतन्त्रोता पिका सुद्ड व्यव्स्थाहेङ खाङ्खे कालाउ इङ्कोङ्ताङ लागिपरितेङ हिखे ,कालाउ हिङ्तेङ्सा निल्लका माकोभरु काम पाकाबुङ जेङ्खे, इङ्को चाहि ताइमि पाका कामता आसिस निनावा | 26 एदि हासुबुङ द्याङ ताइमिहेङ धर्मि सम्झिखे, कालाउ ताइको देतोङ्ता लागाम मालागाइखे, कालाउ ताइको हृदयहेङ धोखा पिहे पानुते उङ्को दयाङ्को धर्म व्यर्थ जेङ्खे | 27 परमेश्वर कालाउ आबाको आगाता कालाउ पबित्तरो धर्म इदोइदोङ हि: टुहुरा-टुहुरि कालाउ रान्दिगेलाइ इम्बालाइको दु:खता खाङ्लि गोइखे कालाउ ताइमिहेङ सुङ्मिङ्सो निसकलङ्ग तालि गोइखे |