इब्रानियों 13

ख्रिस्तता नेलाइ दादा-ओने कालाउ बाइ-आनाउगेलाइ भाइका हिसुना कालाउ आपसता माया पालि लाअ्लि मान्थु | 2 परदेसिगेलाइहेङ बान्साको रूपा मानेतेङ साघाइलि हेलाबुङ मानिल ,एसाङ पालाउ आधिमि-द्याङ्गेलाइ अन्जानताङ स्वर्गदुतगेलाइ साघाइहि | 3 जाइ थुनाता हि,वासेहेङ मानिल्सु इम्बालाइ भाइपा ताइमिबुङ इम्बालाइदोफाङ झाल्खानाता हिकालाइको ख्याल पाअ् | कालाउ ताइमिहेङ्दोङ दु:खभोगिका भाइकाङ जेङ्का कालाउ अत्यचारता परिका द्याङ्गेलाइहेङ मानिल्सु,हाइपालिपानु नेलाइ एलाबुङ जिउताङ हिसुना | 4 झाराङको माझाता बिहु चाहि आदारनिय ज्याको ,'के' 'बे' को सम्बन्ध न्हेमिको माझाता पबित्तरो हिलि गोइखे कालाउ मनमताब माज्याको | हाइपालिपानु लेसाइलि कालाउ कासिबेरिगेलाइ इन्साप परमेस्वर पावा | 5 ताकाको चिचासो ताइमिहेङ फारापा ताअ्सु ताइमिदोफा जेदोङ हि इङ्कोताङ सन्तोक मानिसु | परमेस्वर दोअ्का हि,''का नेलाइहेङ हिदोइबुङ रितिहोइ हेलाउबुङ मालाअ्ताङ्का का नेलाइहेङ हेलाउबुङ माखाताङका |'' 6 ''प्रभु काङ्को साहेतापाका हि,कासेहेङ हाइदोङ थिका चुङ्का मान्थु हासुबुङ कासेहेङ हाइदोङ मारेम्का पालि दावाउ | 7 ताइको अगुवागेलाइहेङ फोम पाइने इम्बालाइ नेलाइहेङ परमेस्वरको सन्देस हिङ्पाहि , इम्बालाइको जिवनको परिमानहेङ ध्यान पिसु , कालाउ इम्बालाइको खान्धुरिको उदाहरन भाइकाङ पा | 8 येसु:ख्रिस्त आन्जि,नानि कालाउ हेलाउलाउबुङ एसामान हिका हि | 9 खाल-खालको इथिका सिकस्याकोगेलाइको भ्रमता मापरेसु , परमेस्वरको अनुग्रहसो नेलाइको हृदय बलियाका बानाइसु | चाका-आमका नियम मापासु इन्सिका नियम जाइ पाखे इङ्कोसो हासुबुङ फाइदा पाका मान्थु | 10 केलाइको एनोङ बेदि हि जाइसो इङ्को पबित्तरो पालता सेवा पाकागेलाइहेङ चाका खाबारा मान्थु | 11 पापको भोकको भाअ्सिङ अर्पनको रूपता प्रधान धामिसो गपुसको हिति माहा- पबित्तरो थामेता चुम्पुखे ,कालाउ गपुस गेलाइको जिउ चाहि मुन्दिर बाहिर ओपाखे | 12 ओदोङ भाअ्सिङ येसु:बुङ सहर बाहिर ताइको द्याङगेलाइहेङ पबित्तरो पालि फिनु बाहार कष्ट भोगिहि | 13 एसाङ केलाइबुङ सिबिर बाहार येसु:दोका हानाइने , येसु:भाइपाङ हेला सहिलि गोइका बेइज्यत केलाइबुङ सहियाइने | 14 हाइपालिपानु केलाइको इता हितेङ्हिका सहर मान्थु , कालाउ भविस्व्ताता लोका सहरको आसता केलाइ हिनाहि | 15 ओदोङ भाअ्सिङ येसु:सो बाखिनको भोख लागातार चढाइने वाको मिङ जपिलि केलाइको नुइसो ओल्हेका बाखिनदोङ इङ्को फोल दोङ | 16 कालाउ बोमिको भालाइ पालि कालाउ बोमिको दुःखता सहभागि जेङ्लि ताइको हिका आनेमाने बाखाराइलि मानिल्सु | हाइपालिपानु इसिकाङ भोखगेलाइता परमेस्वर खु:सि जेङ्खे | 17 ताइको अगुवागेलाइको आग्या माने कालाउ इम्बालाको अधिनता हि,इम्बालाइ नाङ्को जिम्मेबार हिखे कालाउ नाङ्को आत्मा बान्चिपालिको भाअ्सिङ इङ्को नेलाइको हेरचाहा पाखे | इम्बालाइको आग्या माने कालाउ इम्बालाइको ताइको काम दुःख मानेतेङ माको,इङ्को ताइको कामता आनन्द लिङ्लि दोकाङ | वाको काम सजिलो ज्यावा | आनन्दसो पालिद्वाको कालाउ इम्बालाइ ताइको कामदुःख मानिताङपाखेदोअ् वासो नाङ्को साहेता नापाङ | 18 केलाइको भाअ्सिङ दोमचाकाइसु केलाइहेङ निसित हि हाइपालिपानु केलाइको मन जाहाका हि, कालाउ गोताङ काम इमानदारीसो पाका हि इङ्को पालि प्रयास पान्हाखे | 19 का नेलाइहेङ आग्राह् पाखा दोचाइपिसु कालाउ परमेस्वर कासेहेङ मारफाङ नेलाइ हिकाता लोलि द्वाको, इदोइ खान्तेङ हेन्जा का हाइदोङ माभोखा | 20 एला भेडाको महान गोठालो केलाइको प्रभु येसु:हेङ अनन्त करारको हिटिसो सिकासो पसिन्हुपाका सान्तिको परमेस्वर| 21 नेलाइहेङ गोतेङ असल गुनहोइ सिद्द पाको कालाउ नेलाइ वाको इच्सा पुरा पालि द्वाको |जेदोङ परमेस्वरहेङ मन परेका हि येसु:ख्रिस्त पाहासो वा नेलाइकोता पाको | वाको महिमा हेलाउलाउबुङ महिमा हितेङह्याको | आमिन | 22 काङको दादा-ओने कालाउ बाइ-आनाउगेलाइ,काङ्को अर्तिको काथागेलाइ मानिसु | हाइपालिपानु का नेलाइहेङ पोतोपातेङ लेखेका हिगा | 23 केलाइको ओने तिमोथि झ्यालखानासो ओल्हिहि का इदोइ नेलाइहेङ गिपालि भोखा | कालाउ एदि वा का हिकाता मारफाङ लोहि पानु केलाइ न्हेमिङ नेलाइहेङ भेटपालि ल्वाङ | 24 नेलाइको अगुवागेलाइ कालाउ परमेस्वरको गोतेङ जनगेलाइहेङ सेउपाखा दोअ्पि | इतालियासो लोका झाराङ्को सेउपाखा | 25 परमेस्वरको अनुग्रह नेलाइ गोतेङ हुता ह्याको | आमेन |