Philemon
फिलेमोन
1
ख्रिस्त येसु:को एनोङ कैदि पावल कालाउ केलाइको ओने तिमोथिता केलाइको प्रिय आनाङ सानाइति कालाउ सहयोगि फिलेमोनहेङ अभिबादन | 2 दोफाङ केलाइको बेजान ओने अफ्फियाहेङ,सहयोगि अर्खिपप्सहेङ कालाउ नाङ्को साता जोम्का मण्डलिहेङ बुङ ! 3 केलाइको परमेस्वर आबा कालाउ सान्ति कालाउ प्रभु येसु: क्रिस्टसो अनुग्रह कालाउ सान्ति नेलाइदोफा ह्याको | 4 नासिहेङ ताइको दोम्चाकालाउ फोम पाङ्का कालाउ नाङको भाअ्सिङ का जेलाउबुङ काङको परमेस्वरहेङ धन्यबाद चदाङका | परमेस्वरको पबित्त्तरो द्याङगेलाइ दोफा नाङको प्रेम कालाउ प्रभु ये:सुता खान्धुरिको काथा का हिङखा | 5 परमेस्वरको पबितरो द्याङ्गेलाइ दोफा नाङ्को प्रेम कालाउ प्रभु येसुता नाङ्को खान्धुरिको काथा हिङ्खा | 6 का दोमचाकायाङका कि ना केलाइदोफा सहयोग पाका खान्धुरि,ख्रिस्तता हिका केलाइको गोतेङ सोबाइका काथा गहन तरिकासो बुझिलि नासिहेङ साहायाता प्यावा | 7 काङको ओने ! ना परमेस्वरको द्याङगेलाइहेङ प्रेम पान्हा कालाउ ''ओबालाइहेङ प्रफुल्लित बानाइखा | या कासेहेङ आनन्द कालाउ सुबिस्ता पिकाहि | 8 ना हाइदोङ पालि हि | ख्रिस्तदोफा हिका काङको खाबाराको कारनहोइका नासिहेङ एसा पा दोअ्लि द्वाङका | 9 कालाउ का नासिहे आदेस पिका माको खिनिङ प्रेमको सरबुङता नासिहेङ निबेदन पाखा | का पावल कालाउ एला का बुद्का वाराङ द्याङ कालाउ ख्रिस्त ये:सुको भाअ्सिङ बन्दि हिघा | 10 का काङको चान ओनेसिम्सको बारेता निबेदन पातेङ हिघाका कारागरता हिलाउ वा काङको चान जेङहि | 11 दोफा दिना गेलाइता वा नाङको भाअ्सिङ बेक्कारको हिघाहि | कालाउ बर्तमान को समयता ना कालाउ का किधिन्हेमिको भाअ्सिङ वा उपयोगि द्याङ जेङका हि | 12 वासेहेङ का आरूङ नाङकोता काङको हृदय सुधाङ पिगिल्खा दोङ | 13 का कारागारता हिका बेला कासेहेङ साहायता पालि भाअ्सिङका ताइमिङ वासेहेङ इता ये:बानालको भाअ्सिङ ताअ्लि भोघाइखा | कासेहेङ साहायाता पातेङ वा नाङको सेवा पाधावा | 14 कालाउ नाङको खाबारा माकोसिङ का हाइदोङ पालि माचाहिखा | एन्सा जेङलाउ ना काङको भाअ्सिङ पाका रेम्का काम ना स्वयम पालि चाहेका जेनाना कालाउ का कर लगाएका माजेनावा | 15 ओनेसिमस नादोफा हाइदोङ समयको भाअ्सिङ लाअ्न्हाका हिघाहि | एसा जेङलि द्वाङ कि वासेहेङ ना सदाको भाअ्सिङ धुरि निङचाना | 16 एलाउबुङ एलोङ बान्धाइतिको रूपता माको,कालाउ बान्धाति खान्तेङ आसा हेन्जा कालाउ एलोङ प्रिय आनोङ ओनेको रूपता ग्रहन पाका वासेहेङ खुब मायारू पाखा | कालाउ ना वासेहेङ झन हेन्जा मायारू पाना | ना वासेहेङ एलाङ द्याङको रूपता कालाउ प्रभुता ओनेको रूपता बुङ मायारू पाना | 17 एसापा एदि कासेहेङ सानाइति दोअ्तेङ स्वागत पान्हापानु ओनेसिमसहेङ बुङ स्वागत पासु | 18 ओनेसिमस नादोफा हाइदोङ भुल पाका हिहेपानु कासेहेङ भरू दोसिसु | एदि वा हाइदोङ तिरिलि गोइ हे पानु कासिहेङ तिरिलि लगाइ | का तिरिप्याङका | 19 का पावल,इदोइ का काङको ताइको खुरहोइ लेखिदोङखा एदि ओनेसिसको हाइदोङ बाकि तिरिलि हे हे पानु इङको का तिरियाङका | ताइको जिबनको भाअ्सिङ ना काङको हेठे रिनि हिना,याको बारेता का हाइदोङ दोअ्लि माचाहिखा वाङका | 20 एइ,काङको ओने,प्रभुको भाअ्सिङ काङको भाअ्सिङ हाइ दोङपापि | ख्रिस्त काङको हृदय सान्ति पापि | 21 ना काङको आसा पुरा पाना दोअ्का पुर्न खान्धुरिता का इदोइ पतर लेखिदोङखा | का गिखा ना काङको दोअ्का खान्तेङ हेन्जा पाना | 22 दाया पाते कासेहेङ हिलिको भाअ्सिङ एलोङ कोठाको ब्यबस्था पापि | का आसा पाखा कि परमेस्वर नाङको दोमचाका हिङप्यावा कालाउ का नाङकोता लोलि द्वाङका | 23 काङको भाया इपाफ्रास बुङ ख्रिस्त ये:सुको भाअ्सिङ कादोका बन्दि हि | वा नासिहेङ अभिबादन पिगिल्खे | 24 कालाउ मर्कुस,अरिस्ताखर्स,डेमास कालाउ लुका बुङङ नासिहेङ सेउपालि कादोका एदोफा हि | एवालाइ झाराङ का दोफा काम पादोङखे | 25 केलाइको प्रभु ये:सु ख्रिस्तको अनुग्रह नाङको आत्मादोङ ह्न्याको | आमेन |