इब्रानियों 11

एला खान्धुरि चाहि , आस ताअ्का काथा गेलाइको निसित , कालाउ हाइदोङ काथाहेङ मातिङ्लाउबुङ इङ्को बास्तबिक हि दोअ्का हि | 2 हाइपालिपानु इदोइदोङ खान्धुरिसो प्राचिन समयको द्याङ्गेलाइहेङ परमेस्वर ग्रहन पाहि | 3 खान्धुरिसो केलाइ गिनाखे कि परमेस्वर ताइको हुकुमसो इदोइ सुमिङ सिरजाइहि , यादोङ केलाइ गिनाखे कि जेदोङ तिङ्का हि इङ्को हाइदोङ मातिङ्कासो बानाइका हिघाखे | 4 कयिन कालाउ हाबिल न्हेमिदोङ परमेस्वरहेङ भेतिगेलाइ पिहि, कालाउ हाबिलको खान्धुरि हिघाहि , एसापाङ वा परमेस्वरहेङ असल भेतिगेलाइ पिहि | परमेस्वर हाबिलको भेतिगेलाइसो खुसि जेङ्हि | कालाउ वाको खान्धुरिको कारनसो,वा असल द्याङ कहलाइहि | हाबिल सि:हि कालाउ वाको खान्धुरि एलाबुङ सिन्हुका हि | 5 हनोकहेङ इदोइ सुमिङ्ता सि:का माचाखिसिङ स्वर्ग हुता ल्होपाहि , वा मासि:हि , धर्म सास्त्तर दोअ्खे: वा हुता चुम्पुलि खान्तेङ लाम्फा वा जातिङ्को परमेस्वरहेङ खु:सि पाहि | न्हुसो द्याङ्गेलाइहेङ हनोकहेङ मातिङ्हि | कारन परमेस्वरदोङ वासेहेङ ताइमिदोफा ताअ्लि ल्होपातेङ चुम्पुका हिघाखे | ह्नोकको खान्धुरिकोङ कारनसो इसिका जेङ्का हिघाखे | 6 खान्धुरि बिना हासुबुङ परमेस्वरहेङ खु:सि बानाइलि असम्भव हि (मादोखे) ,जाइ परमेस्वरता लोखे वा परमेस्वर सत्ये हिका हि दोका गिलिगोइखे कालाउ जाइ जातिङ्को वासेहेङ निङ्लभोखे इङ्को द्याङ् गेलाइहेङ परमेस्वर इनाम प्यावा दोका पक्का खान्धुरि पालि गोइखे | 7 नुह इङ्को बेला थेकापा जेदोङ तिङ्काङ मान्ठुघाखे इङ्को भाअ्सिङ वासेहेङ परमेस्वर चेताउनि पिहि,परमेस्वरदोफा नुहको खान्धुरि कालाउ भक्ति हिघाखे | कालाउबुङ वा ताइको जहानहेङ सिन्हुपालि एनोङ बारका जाहाज बानाइहि | ताइको खान्धुरिसो सुमिङ गल्ति हि दोका तोहराइहि कालाउ खान्धुरिसो परमेस्वरको धार्मिकता जेङ्का इङ्को द्याङ्गेलाइ मध्येता वा एमि उतराधिकारि जेङ्हि | 8 परमेस्वर आब्राहामहेङ भेनाङ थामेता हानिलि अराइहि जेदोङ वा वासेहेङ पिका वचन पिका हिघाखे | इङ्को भेनाङ थामे हिदोइ कालाउ हिसो हि,इङ्को ग्यान आब्राहामहेङ थाहा मान्थुघाखे | कालाउ परमेस्वरको आग्या मानेतेङ वा हानिलि दोअ्का थामेता हानेहि हाइपालिपानु वाको खान्धुरि हिघाखे | 9 खान्धुरिपाहासोङ वा एनोङ परदेसि भाइपाङ जेङ्तेङ प्रतिग्याको सरभिता इसाहाक कालाउ याकुब भाइपा तम्बुता हिगिल चागिल घाहि | हाइपालिपानु ओबालाइबुङ आब्राहामदोफाङ ओदोङ प्रतिग्याको हकदार हि | वा इङ्को सारभिता कालाउ इसाहाक र याकुबसो बुङ परमेस्वरसो इसिकाङ बचन निङ्का हिघाखे | 10 अब्राहाम एनोङ बलियाका जग जेङ्का सहरको आस पाका हिघाखे,जाइहेङ बानाइका कालाउ सिरजाइका परमेस्वरदोङ हि | 11 आब्राहाम जामालाइ जेङ्पालि मादोका वाराङ हिघाखे कालाउ साराबुङ बाझि हिघाखे कालाउ परमेस्वरता खान्धुरिकोङ कारनसो वा गान्धितेका सरबुङ निङ्हि कालाउ आब्राहाम आबा जेङ्हि | वा वचन पुरा पालि दोहि दोअ्तेङ सारा परमेस्वरहेङ खान्धुरि योग्य ठानिका हिघाहि | 12 वा एथे वाराङ हिघाखे कि वा सि:लि दोङ तोम्का हिघाखे, हेन्जा बान्चिका आसाबुङ आतुइसाबुङ मान्ठुघाहि | कालाउ इन्सिका द्याङ्सो सुमिङ्ता फुरुगेलाइ झोकोङ गान्धिलि मादोका कालाउ झोराको बालासरि झोकोङ गान्धिलि मादोका चानचामिन्दिगेलाइ जोलोम जेङ्हि | 13 इदोइ गोतेङ द्याङ्गेलाइ मासि:पाघाउ खान्धुरिताङ सिन्चाहि, इम्बालाइदोङ परमेस्वरको वचन आन्सारको काथागेलाइ मानिङ्हि | कालाउ दुरेसो वासेहेङ तिङ्हि कालाउ सन्तोक जेङ्हि कालाउ इन्सिकाताङ रमाइहि | ताइमेते इदोइ सुमिङ्ता घुराइगिल्का कालाउ बिदेसिखेनिङ हिनाहि दोअ्का प्रमान इम्बालाइ मानेहि | 14 इसिका काथा दोअ्का द्याङ्गेलाइ ताइको भाअ्सिङ एनोङ सरभि भोतेङ हि दोअ्का काथा झालाझालापा या तिङ्पाखे कि इम्बालाइ इदोइ खान्तेङ एनोङ ताइकोङ सारभिको हुम्खे | 15 इम्बालाइ ताइमि लाअ्तेङ लोका सरभि फोमपाखे पानु घुरितेङ हानेका मौका इम्बालाइ निङ्लिधावा | | 16 कालाउ इम्बालाइ एनोङ उतम सारभि ,एनोङ स्वर्गिय सारभिको आसाता हिघाखे, कालाउबुङ परमेस्वर इम्बालाइको परमेस्वर जेङ्लिको भाअ्सिङ मालेदेरखे हाइपालिपानु परमेस्वर इम्बालाइको भाअ्सिङ एनोङ सहर बानाइपिका हिघाखे | 17 आब्राहामको खान्धुरिको जाच पालि परमेस्वर वासेहेङ इसाहाकको भोख पिलि दोअ्हि, आब्राहाम परमेस्वरसो प्रतिग्या निङ्का हिघाखे ,कालाउबुङ एनोङ ताइको खिनिङ चान भोक वा तियार जेङ्हि | 18 वाकोङ बिसयता एसा दोअ्का हि, इसाहाकसोङ दोङ नाङ्को सान्तानको मिङ ह्यावा | 19 आब्राहामहेङ खान्धुरि हिघाखे कि परमेस्वर द्याङ्हेङ सि:कासो सुधाङ ल्होपालि दोखे कालाउ जातिङ्को जेलाउ परमेस्वरदोङ इसाहाकहेङ सि:कासो सिन्चापाहि,अब्राहाम इसाहाकहेङ सि:कासो घुरिपाहि निङ्हि | 20 खानधुरिसोङ इसाहाक बुङ एन्साङ वा याकुब कालाउ एसाबहेङ इम्बालाइको भबिस्य्को भाअ्सिङ आसिरबाद पिहि | 21 खान्धुरिसोङ कालाउ वा ताइको सि:का बेलाता ताइको लाठिको टुप्पाता तुघुरतेङ परमेस्वरको आराधाना पातेङ युसुफको झाराङ चानगेलाइहेङ आसिस पिहि | 22 कालाउ वाको सि:का समयता युसुफ इस्राइलिगेलाइहेङ मिस्रोसारभि लाअ्का भविस्यवानी पाहि , खान्धुरिकोङ कारनसो वा ताइको तोमको बारे आदेस पिहि | 23 खान्धुरिकोङ कारनसो मोसाको आमाइ-आबा वासेहेङ सुम माइना थेकापा म्होतेङ ताअ्हि ,मोसा सुन्दर जामाल हिघाखे इम्बालाइ राजाको आदेस मानेलि माथिहि | 24 मोसा बारातेङ जावान जेङ्हि, ताइको खान्धुरिको कारनसो वा ताइमिहेङ फिरूउनको चामेन्दिको चान जेङ्हि माकिहि | 25 वा पापको आनन्द पालि माकिहि, इदोइ आनन्द एघुरिङ्को खिनिङ हिखे भरु परमेस्वरको द्याङ्गेलाइदोफा हितेङ दुःख भोगिलि मनपाहि ,वाको इदोइ खान्धुरिको कारनसो पाहि | 26 मोसा मिस्रोसारभिको धन-सम्पति खान्तेङ ख्रिस्तको भाअ्सिङ भोगेका दुःख झन बार्का सम्पति दोका बिचार पाहि | मोसा परमेस्वरसो पुरस्कार निङ्लि र्-हुम्तेङ हिखे | 27 खान्धुरिकोङ कारनसो वा मिस्रोसारभि लाअ्हि, वा राजाको चेरसो माथिहि | वा चटपटाइ मापासिङ,जेसाङ कि मिसिहासो तिङ्लि मादोका (अदृश्य) परमेस्वरहेङ वा तिङ्लि द्वावा | 28 खन्धुरिको कारनसो निस्तार पार्बाको भोज तियार पाहि,कालाउ सि:का दुतहेङ यहुदिगेलाइको जेठा चानगेलाइ से:लिसो रोकिलि वा फिनुहुता हिति सोम्काइहि | 29 कालाउ खान्धुरिको कारनसो मोसा थोङ्गिल्का गोतेङ द्याङ गेलाइ सेङ्का भोनोइहुता भाइका लालसमुन्द्रता तेतेङ पाराहि | कालाउ मिस्रोसारभि बासिगेलाइ एन्साङ दोङ पारालि भोलाउ 'चिता' दुबितेङ सि:हि | 30 परमेस्वरको द्याङ्गेलाइको खान्धुरिको कारनसो यरिहोको बेहेरेम भापाहि ,ओबालाइ बेहेरेमको कोर्पाहाङ न्हिदिन ठेकापा घुराइतेङ न्हुसो इङ्को भापाहि | 31 राहाब दोका एनोङ कासिबेरिसो इस्राएलि जासुसगेलाइहेङ सानाइतिगेलाइ भाइपाङ स्वागत कालाउ साघाइहि | कालाउ वाको खान्धुरिको कारनसो आग्या मामानेका बोमि द्याङ्गेलाइ दोफा वा चाहि नास माजेङ्हि | 32 हाइ का आरोङ हेन्जा उदाहरनगेलाइ पिलिगोयाङ ? गिदोन,बाराक,सिमसन,यिप्तइका बारेता,दाउद,सामुएल कालाउ अगमबक्तागेलाइको बारेता दोअ्लि का दोफा हेन्जा प्रससत समय मान्थु | 33 जाइ ताइको खान्धुरिको कारनसो राज्यगेलाइ जितिहि, न्यायगेलाइ बानाइहि , परमेस्वरको बचन प्रतिग्या निङ्लि सफल जेङ्हि खुहा गेलाइको नुइ थुनेहि | 34 मेको डालडालाइका ज्वालाहेङ रोकिहि, कालाउ तलबारको धारसो खाहिहि, खान्धुरिको कारनसो इम्बालाइदोङ इदोइ गोतेङ पाहि | कमजोरिगेलाइ बलियाका जेङ्हि,धुमता बिर जेङ्हि,इम्बालाइ बिदेसी सिपाइगेलाइहेङ हुता बिजय पाहि | 35 बेबालगेलाइ सि:का गेलाइहेङ बाउराइपातेङ ल्होका निङ्हि, भेनाङ्गेलाइहेङ सि:कासो झन उतम जिवन निङ्लि ताइमिङ लाअ्पाका मानकिहि | भरु इम्बालाइहेङ साताइतेङ से:हि, इम्बालाइ एनसाङ पाहि हाइपालिपानु इम्बालाइ झन रेम्का जिवनता लोलि भोगाखे | 36 हेथेते द्याङ्गेलाइ खुजालाइते लेङ्पिहि, हेथेहेङ ड्वालीलिहोइ म्हेहि,कालाउ हेथेहेङ साङ्गालाहोइ (झिन्जिरिहोइ) धेउतेङ झेलखानाता ह्वाहि | 37 हेथेहेङ उन्थुइ तोतेङ से:हि,कालाउ हेथेहेङ पाल्तेङ न्हे चिरा पातेङ ,हेथेहेङ तरबारहोइ पाल्तेङ से:हि | कोइ-कोइ भेडा कालाउ मेसाको धाले लागाइघाखे,इम्बालाइ गरिब,साताइनाका कालाउ बोमिगेलाइ भाइपा मारेम्का व्यवहार निङ्कालाइ हिघाखे | ओबालाइ दु:ख निङ्तेङ इसोउसो घुराइतेङ हिगिल्हि | 38 सुमिङ ओबालाइको भाअ्सिङ योग्य मान्ठुघाहि , इम्बालाइ रागेलाइ, कालाउ मारालाअ्काभोनाइ गेलाता, गुफागेलाइता आवाइतेङ वाबाइतेङ हिगिल्घाखे,पृथ्विको आर्दाङ्गेलाइ घुराइकाताङ हिगिल्लि गोइहि | 39 इम्बालाइ इदोइ गोताङ खान्धुरिता बाखिन निङ्हि कालाउ परमेस्वरको प्रतिग्या पाका काथा इम्बालाइ हासुबुङ मानिङ्हि | 40 परमेस्वर केलाइको भाअ्सिङ झन रेम्का योजना बानाइतेङ ता:का हिघाहि ताकि केलाइदोफा खिनीङ इम्बालाइ सिद्द बानाइलि द्वाको |