इब्रानियों 10

व्यवस्थासोते केलाइहेङ भबिस्य्ता लोका रेम्का बास्ताविक्ताको ना:का नाक्सा खिनिङ तिङ्पाहि | व्यवस्था बास्तबिक्ताको जातिङ्को रूप माको | इङ्को वयवस्थासोते द्याङ्गेलाइहेङ बासार किपाङ इङ्को भोख पिलि धिरपाखे ,परमेस्वरहेङ पुजिलि लोकागेलाइ इङ्को भोख पिलि मालातावा | कालाउ व्यवस्था इङ्को द्याङ्गेलाइहेङ हेलाउबुङ पुर्न काम भारि चुम्पुलि मादोहि | 2 व्यवस्था इम्बालाइहेङ पुर्न काम भारि थोङ्लि दोका जेङ्नु भोखगेलाइ हेन्जा लाम्फा दोङ माधावा, उङ्को द्याङ्गेलाइ ताइको पापगेलाइसो लाम्फाङ सुदृद जेङ्धावा | कालाउ ताइको पापगेलाइको भाअ्सिङ इम्बालाइ ताइमिहेङ आपराधि अनुभव मापाधावा , कालाउ व्यवस्था इङ्को काम पालि मादोखे | 3 इदोइ बलिगेलाइसो बासार किपाङ द्याङ्गेलाइहेङ ताइको पापगेलाइ फोमपाका काम खिनिङ पाखे | 4 हाइपालिपानु गाइको बास्सा कालाउ मेसागेलाइको हितिसो पापगेलाइ झालि मादोखे | 5 कालाउबुङ जेलाउ येसु:प्रिथिबिता लोहि वा दोअ्हि: ''ना भोख कालाउ भेटिगेलाइ माभोखेना ,कालाउ ना, काङ्को भाअ्सिङ एनोङ जिउ तियार पान्हा | 6 बलि चढाइका कालाउ ओपाका गुपुसगेलाइसो ना खु:सि माजेङ्खेना, पापगेलाइ झालि चढाइका भोख सो ना खु:सि माजेङ्खेना | 7 कालाउ का दोअ्घा,''परमेस्वर का इता हिगा ,व्यवस्थाको किताबता काङ्को बारेता लेखेका हि, नाङ्को चाहिका काम पालि का लोका हिघा |'' 8 वा लाम्फाङ दोअ्खे,''ना भोख कालाउ अर्पन होमबलि कालाउ पापबलिगेलाइ ना' माभोखेना ''कालाउ इङ्कोगेलाइसो ना खु:सिबुङ माजेङ्खेना |'' इदोइ भोखगेलाइ पिन्हाखे हाइपालिपानु इम्बालाइ व्यवस्थादोङ भोखे | 9 कालाउ न्हुसो वा दोअ्हि,''हे परमेस्वर का इता हिघा , ना पालि भोखा पुरा काम पालि लोका हिघा |'' एसाङ परमेस्वर भोख पिका लाम्फाको मुन्धुम मअ्पावा कालाउ ताइको नावा तरिका सुरू पावा | 10 येसु:ख्रिस्त परमेस्वर भोका काम पाहि, ओदोङ भाअ्सिङ ख्रिस्तको जिउको बलिदानसो केलाइ पबित्तरो जेङ्का हिनाहि, ख्रिस्त हेलाउलाउकोङ भाअ्सिङ एखेपताङ ताइमिहेङ बलिदान पिहि | 11 दिनाङ दिना,धामिगेलाइ ताइको धार्मिक सेवा पाखे , धामिगेलाइ इनताङ भोख घुरि -घुरि चढाइखे, कालाउ इङ्को भोखगेलाइसो हेलाउबुङ पापगेलाइ लाअ्पालि मादोखे | 12 कालाउ ख्रिस्त पापको भाअ्सिङ हेलाउलाउबुङ को एखेपताङ बलि पिहि कालाउ ख्रिस्त परमेस्वरको दाम्पाहा योम्हितेङ बिराजमान जेङ्हि | 13 एला वा ताइको सारा सतुरुगेलाइ ताइको कब्जाता मालोपाभरि र्-हुम्तेङ हि | 14 एनोङ्दोङ बलिसो जेलाउलाउबुङ को भाअ्सिङ ख्रिस्तदोङ इम्बालाइहेङ परिपक्का बानाइहि, जाइ जाइहेङ वाको भोखहोइ पबित्तरो पादोङ्खे | 15 पबित्तरो आत्माबुङ केलाइहेङ इदोइबारे साक्सि पिखे लाम्फा वा दोअ्खे: 16 इङ्को कारार इदोङ हि जेदोङ भविस्यता काङ्को व्यवस्था नेलाइको हृदयता ताअ्प्याङका ,का काङ्को व्यवस्था नेलाइको मनताबुङ का लेखे प्याङका, परमप्रभु दोअ्खे |'' 17 कालाउ व वा दोअ्खे: ''कालाउ का वाको पापगेलाइ कालाउ दुस्त कामगेलाइ स्यामा प्याङ्का,| का इदोइ काथागेलाइ उतासो आरोङ फोम मापाङ्का |'' 18 कालाउ जेलाउ इदोइ गोतेङ्को स्यामा जेङ्खे ,इन्ता पापगेलाइको भाअ्सिङ बलिदानको आरोङ हेलाउबुङ खाचो माजेनावा | 19 कालाउबुङ,दादा-ओने,बाइ-आनाउगेलाइ, महा-पबित्तरो थामेता दुल्लि केलाइ झाराङ द्याङ येसु:को हितिको कारनसो केलाइ हाइदोङ माथिसिङ हानिहि द्वाङ | 20 कालाउ येसु: केलाइको भाअ्सिङ हिअ्पिका एनोङ नावा कालाउ सिन्हुका दामासो केलाइ दुल्लि द्वाङ , इदोइ नावा दामासो पार्दाभारि चुम्पुखे,जेदोङ ख्रिस्तको जिउ दोङ | 21 जाइ केलाइको महा प्रधान धामि हिका हि,जाइदोङ परमेस्वरको 'सा' सामाराइलि कालाउ चालाइलिखे | 22 सुदृद जाहाका चिहोइ केलाइको जिउ झाका हि , केलाइ सुदृद,पबित्तरो पाका हिनाहि कालाउ अपराधसो लाअ्निङ्चाका हिनाहि अदोङ भाअ्सिङ केलाइ जाहाका हृदय बानाइतेङ ताइको खान्धुरिसो ढुक्क जेङ्तेङ परमेस्वरको भेर्पा लोन्हाखे | 23 केलाइको ताइमिता हिका आसाहेङ थामिलितेङ ताअ्लि गोइखे कालाउ ताइको आसाको बारेता,द्याङ्गेलाइहेङ हिङ्पालि लाअ्लि माएल , ताइमिदोङ वचन पिका काथागेलाइ परमेस्वर पावा दोअ्का काथा केलाइ सा:लि द्वाङ | 24 केलाइ ताइमिसो-भेनेङ्हेङ बिचार पालि गोइखे कालाउ माया तिङ्पालि कालाउ रेम्का काम पालि केलाइ ताइमिसो-भेनेङ्हेङ हेथे थेकापा दोका सक्दो ल्होपालि दोकाङ इङ्को खाङ्लि गोइखे | 25 केलाइ दोफा दुसुलिसो भेन्चाकाइतेङ हानिलि माको हेथेते द्याङ्गेलाइ इन्साङ पाखे , केलाइ ताइको बोमिहेङ भेतपालि कालाउ साघाइलि गोइखे | नेलाइ एसाङ पालि गोइखे हाइपालिपानु दिना झन भेरपा-भेरपा लोदोङ्खे | 26 सत्येको ग्यान निङ्का न्हुसो बुङ केलाइ गितेङ -गितेङ्सा पाप पालि मालाअ्हि पानु इङ्को पाप गेलाइ झालि हेदोइबुङ बलिदान मान्थु | 27 एदि केलाइ जेलाउबुङ पापकामता लागितेङ हिनु केलाइहेङ एनोङ थिलिगोइका इन्साफ कालाउ थिलिगोइका मेहेङ र्-हुम्लि गोयाङ जाइदोङ परमेस्वरको बिरोतता जेङ्कागेलाइहेङ नासा पावा | 28 एदि हासुबुङ मोसाको व्यवस्थाहेङ मामानिखे वा न्हेमि वा सुमि साक्सिगेलाइको खाङ्का आधारता दोसिलि तिङ्घाखे, वासेहेङ स्यामा मापिघाखे कालाउ वासेहेङ से:घाखे | (सि:का समय पिघाखे) 29 जाइ परमेस्वरको चानहेङ हेला पाखे कालाउ नावा कराराको हितिहेङ आदर मापाखे कालाउ जाइ अनुग्रहको आत्माहेङ हेला पाखे इन्सिका द्याङ्हेङ नेलाइ हाइ सम्झिसुखेना ? उङ्को द्याङदोङ हेसाबुङ निक्कोङ बारका दण्ड निनावा | इङ्को हितिसो वासेहेङ पबित्तरो बानाइका हिघाखे | 30 केलाइ गिनाखे कि परमेस्वर दोअ्हि,''का द्याङ्गेलाइहेङ वाको गल्ति कामगेलाइको भाअ्सिङ दण्ड प्याङ्का का नेलाइहेङ वाको कामको ज्याला प्याङ्का |''परमेस्वर एन्साङ दोअ्हि:''परमप्रभु ताइको द्याङ्गेलाइहेङ इन्साफ पावा | 31 सिन्हुका परमेस्वरको खुरता परेलि पापिगेलाइहेङ थिलिगोइका काथा हि | 32 इङ्को दिना थेकापा जेलाउ लाम्फोर्ति नेलाइ सत्येको सिक्स्या निङ्का हिघासुखेना ,नेलाइ बारका दुःख पालि गोइका हिघासुखेना कालाउ हेन्जाङ दुःख भोगिलि गोइका हिघासुखेना,कालाउ नेलाइ आत्माता बलियाका जेङ्तेङ हिसुना | 33 आलेङ -कालेङ (जेलाउ-सेलाउ) द्याङ्गेलाइ नेलाइहेङ फोहरि काथा पानु कालाउ हेन्जाको आगाता चेर्हे पाहि पानु | कालाउ आलेङ कालेङ इसिका व्यवहार पाकागेलाइहेङ नेलाइदोङ साघाइसुन्हा | 34 ऐइ ,नेलाइ इन्सिका द्याङ्गेलाइहेङ जेलता साघाइसुना कालाउ इम्बालाइको दुःखगेलाइ दोअ्न्हा , कालाउ ताइमिदोफा हिका गोतेङ आनेमाने घिङ्पिलाउबुङ खु:सिदोङ हिसुना | नेलाइते लेङ्चासुना हाइपालिदोनु नेलाइदोफा जेदोङ हिघाहि जाइ उतम हि कालाउ जेलाउबुङ हितेङ ह्यावा दोका गिका हिघासुखेनाखेना | 35 कालाउ बुङ ताइको जोसहेङ माराम्पासु जेदोङ नेलाइको लाम्फाको बेलाता हिघाखे, नाङ्को जोसहेङ हेन्जाङ पुरस्कार प्यावा | 36 नेलाइहेङ गोइका धैर्य हिलि परमेस्वर भोका काम पाहेपानु वा बाचा पाका काथा नेलाइ निङ्स्वाना | 37 धेमाङ दोङ,''जाइ लोदोङ्खे वा ल्वाङ वा धिला मापाङ | 38 जाइ का दोफा धर्मि हि वाको खान्धुरिको कारनहोइ जिवन निनावा, कालाउ एदि उङ्को द्याङ दु:खता नुइ म्होखे पानु का वादोफा खु:सि जेङ्तेङ हिलि मादाङ्का | 39 कालाउ केलाइ नइम्बालाइ मध्येको माको जाइ थिकासो घुरिखे कालाउ नास जेङ्का हि, माको केलाइ ते खान्धुरि पाका द्याङ्गेलाइ हिनाहि, कालाउ बान्चिपाकाबुङ हिनाहि |