इब्रानियों 9

लाम्फाको करारता आराधनाको तरिकागेलाइ हि, कालाउ आराधानाको भाअ्सिङ द्याङगेलाइ बानाइका थामे हिघाखे | 2 इङ्को थामे पाल लिता हिखे ,पाललिताको लाम्फाको कोठाहेङ पबित्तरो थामे दोघाखे जेता परमेस्वरहेङ दियो,सेले पिलि चाङ्चाउकि हिघाखे | 3 न्हेतेङ पर्दा न्हुपाहा,न्हेतेङ कोठा हिघाखे जाइहेङ महा पबित्तरो थामे दोघाखे | 4 इङ्को थामेता सोनाको सामदान कालाउ सोनाको केउपातेङ लागाइका बानाइका कारारको सन्दुक हिघाखे, सन्दुकलिता मन्न ताअ्का सोनाको भाडा,भारलि तोम्का हारुनको लाठि कालाउ उन्थुइको पाटिगेलाइ हिगाखे , इन्ता पुराना कारारको तेनोङ आग्या खोपितेङ लेखेका हिघाखे | 5 बाक्साको हुता करुनको योम्काहुता परमेस्वरको महिमा तिङपालि एनो जोडि स्वर्गदुतगेलाइ हिघाखे | कालाउ एलाउ केलाइ इदोङ काथागेलाइको बिस्तारपा नावाइ पालि मादाङ | 6 इसिकाङ किसिमसो पाल ताङ्गाइका हिघाखे, कालाउ दिनाङ धामिगेलाइ आराधानाको भाअ्सिङ बाहार पाहाको पबित्तरो थामेसो लिता दुल्घाखे | 7 कालाउ लितापाहाको न्हेतेङ कोठाता बारका धामि खेनिङ दुल्लि निङ्घाखे,इङ्कोबुङ बासारता एखेप,कालाउ इङ्को बेलाबुङ ताइमिदोफा हिति माचुम्पुसिङ वा दुल्लि मादोघाखे | वा इङ्को हिति परमेस्वरहेङ वाको ताइकोङ कालाउ बोमि द्याङ्गेलाइको अन्जानता जेङ्का पापगेलाइको भाअ्सिङ पिघाखे | 8 पबित्तरो आत्मासो इङ्को न्हेलोङ भेनाङ-भेनाङ कोठा केलाइहेङ इदोइ धिरपालि प्रयोग पाघाखे कि जेलाउ थेकापा इन्ता हिघाखे केलाइको भाअ्सिङ झाराङ खान्तेङ पबित्तरो थामे माखोलिघाखे | 9 नानि या केलाइहेङ एनोङ उदाहरन जेङ्का हि, इदोइ झाला-झालापा तिङ्पाखे कि परमेस्वरहेङ चढाइका भोख कालाउ भेटिहोइ आराधाना पाका साफा सुद्द बानाइलि मादोघाखे | इदोइ भोकगेलाइसो आराधाना पाकागेलाइहेङ हृदयता पुर्न मापाघाखे | 10 इङ्को भोकगेलाइ कालाउ भेतिगेलाइते खालि चालि,आम्लि कालाउ भेनाङ तरिकासो चिउलि बिसयखेनिङ इङ्को खालि जिउको बिधिगेलाइ खिनिङ हिघाखे, हृद्यको मान्ठुघाखे | परमेस्वरको नावा तरिका मालोपा ठेकापा परमेस्वरसो इदोइ नियमगेलाइ बानाइका हिघाखे 11 झाराङ खान्तेङ बारका धामिको रुपसो ख्रिस्त रेम्का काथागेलाइको भाअ्सिङ लोका हि जेदोङ काथा नानि केलाइदोफा हि | कालाउ वा भेनाङ धामिगेलाइ पाका भाइपा पालाता आराधाना मापाखे | वाको आराधाना पाका थामे पाल खान्तेङ रेम्का कालाउ साचो हि जेदोङ एदोइ सुमिङ्ता मान्थु कालाउ द्याङ्सो बानाइका माको | 12 प्रभु येसु:ख्रिस्त माहा पबित्तरो थामेता जेलाउलाउबुङको भाअ्सिङ एखेपताङ दुल्हि वा माहा पबित्तरो थामेता ताइकोङ हिति चुम्तेङ लिता दुल्हि | मेसा कालाउ बाचसागेलाइको हिति माको | ख्रिस्त इन्ता दुल्हि कालाउ जेलाउलाउबुङको भाअ्सिङ केलाइहेङ पापसो सुटकारा पिलि दोहि | 13 असुदृद द्याङ्गेलाइहेङ मेसाको कालाउ ,बाचसाको हिति कालाउ कोरलि बासिको बुसुरी उतेङ सुदृद पाघाखे | हिति कालाउ खरानिसो चाहि द्याङको जिउखेनिङ सुदृद पाघाखे | 14 ओदोङ भाअ्सिङ ख्रिस्तको हितिसो इदोइ काथागेलाइ खान्तेङ हेन्जा काथा पालि दोखे | ख्रिस्त ताइमिहेङ अनन्त आत्मासो परमेस्वरदोफा पुरा गोतेङ भोख चढाइहि | वाको हितिसो केलाइको हृदयहेङ मारेमका कामगेलाइसो सुदृद पाखे जेसा कि केलाइ सिन्हुका परमेस्वरहेङ आराधाना पालि दोवाङ | 15 ख्रिस्त परमेस्वरसो ताइको द्याङ्गेलाइहेङ एनोङ नावा कारार चुमाङ, ताकि कि परमेस्वर काइका द्याङ्गेलाइहेङ वाको वचन आन्सार गोतेङ काथा निङ्लि द्वाको | परमेस्वरको द्याङगेलाइ इङ्को काथागेलाइ जेलालाउबुङको भाअ्सिङ ताअ्लि दोखे , लाङ कारारता हितेङ द्याङगेलाइको पाका पापको स्यामाको भाअ्सिङ ख्रिस्त ताइको प्रान पिहि कालाउ ओदोङ भाअ्सिङ परमेस्वरको द्याङ्गेलाइ एला इङ्को काथागेलाइ निङ्लि द्वाङ | द्याङ्गेलाइहेङ इङ्को पापगेलाइसो लाअ्पालि ख्रिस्त ताइको ज्यान पिहि | 16 जेलाउ द्याङ सि:खे,वाको ताइको न्हुसोको इच्सा पातारा लाधिखे, कालाउ इच्सा पातारा बानाइका द्याङ्को सि:का प्रमान हिलि गोइखे | 17 द्याङ सिन्हुपाङ हिपाथेकापा वाको इच्सा पताराको हेदोइबुङ खाबारा मान्ठुखे ,इच्सा पाताराहेङ द्याङ्को सि:का न्हुसु खिनिङ चालाइलि दोखे | 18 लाङ कारारबुङ इन्सिकाङ हि ,नियम मानेलिको भाअ्सिङ लाम्फा इन्ता हिति गोइका हिघाखे | 19 लाम्फा मोसा गोतेङ द्याङ्गेलाइको आगाता नियमको एनोङ एनोङ आग्या हिङ्पाघाखे इङ्को न्हुसो बाच्साको कालाउ मेसाको हिति 'चि' दोफा मिसालाइतेङ नियमको पातारा कालाउ इ:का उनिको लोखन धाबा लगाइघाखे | कालाउ गोतेङ द्याङ्गेलाइ हुता हिसपको डालेङ होइ सर्रकाइ पिघाखे | 20 कालाउ मोसादोङ दोअ्हि,''इदोङ परमेस्वर नेलाइहेङ जेदोङ वचनता हि एन्साङ आन्सार पालि दोतेङ दोअ्का नियमको हितिदोङ | 21 एसाङ दोङ मोसा इङ्को हिति पबित्तरो थामेहुता कालाउ आराधानाता प्रयोग पाका गोतेङ आनेमाने गेलाइहुता सर्किघाखे | 22 व्यवस्था दोअ्खे प्राय:गोताङ आमेनेगेलाइ हितिसो सुदृद पाखे ,कालाउ हिति माकोसिङ हिदोइबुङ पाप स्यामा जेङ्लि मादोखे | 23 इदोइ गोताङ स्वर्गिय काथागेलाइको नक्कल खिनीङ हि, इदोइ गोतेङ नमुनागेलाइहेङ गपुसको भोखसो सुदृपालि गोइखे | कालाउ स्वर्गको सक्कलि काथागेलाइ इदोइ खान्तेङ रेम्का भोख गेलाइसो साफा सुदृद पालि गोइखे | 24 ख्रिस्त परम पबित्तरो थामेता हानिहि जेदोङ थामे द्याङ्गेलाइ बानाइका मान्ठुघाखे, इङ्को नक्कल मान्ठुघाखे| कालाउ जेदोङ् चाहि जातिङ्को पबित्तरो भाइका नक्कल थामे हिघाहि | ख्रिस्त केलाइहेङ साघाइलिको भाअ्सिङ परमेस्वरको आगाता एला तिङ्चालि स्वर्गदोङ हानिहि | 25 प्रधान धामि परम पबित्तरो थामेता बासाराता एखेप दुल्खे,वादोङ इन्ता हिति चुम्तेङ चढाइलि हानिखे | कालाउ वा ताइकोङ हिति अर्पन मापाखे जेसाङ ख्रिस्त पाहि | ख्रिस्त स्वर्ग हानिहि कालाउ भेनाङ धामिगेलाइहेङ भाइपा घरिघरि चढाइ पिका भाइपा ताइमिहेङ हेन्जा खेप चढाइलि माको | 26 एदि ख्रिस्त ताइमिहेङ हेन्जा खेप चढाइका जेङ्का सिरजाइकाको सुरुसोङ वा हेन्जा खेप दुःख भोगिलि गोइधावा | कालाउ ख्रिस्त लोहि कालाउ एखेप खिनिङ ताइमिहेङ अर्पन पाहि , कालाउ एनोङदोङ अर्पन हेलाउलाबुङको भाअ्सिङ पुरा हिघाखे | जेलाउ इदोइ सुमिङ अन्त भेरपाङ लोदोङ्घाखे;येसु: इदोइ सुमिङता लोहि | ताइमिहेङ एनोङ भोख जेङ्तेङ्सा पाप झालिको भाअ्सिङ ख्रिस्त लोहि | 27 झाराङ एखेप सि:लि गोयाङ , सि:का न्हुसो वाको न्याय जेनाङ | 28 ओदोङ भाअ्सिङ हेन्जाङ्को पापगेलाइ लाअ्पालि, ख्रिस्त एखेपताङ ताइमिहेङ बलि पिहि | ख्रिस्त न्हेतेङ खेप लोदोङ्खे कालाउ द्याङको पापको भाअ्सिङ माको,वा न्हेखेप इम्बालाइको मुक्तिको भाअ्सिङ लावा ,वासेहेङ र्-हुर्म्तेङ हिका हि |