इब्रानियों 8

केलाइ हाइ दोन्हाखे इङ्को काथासो दोअ्का इदोइ दोङ : केलाइको प्रधान धामि हिकाहि | वा स्वर्गता परमेस्वरको सिङ्हासनको दामापाहा योम्तेङ हि | 2 वा परमपबित्तरो थामेता सेवा पाखे,द्याङ्हेङ माको,परमेस्वर बानाइका सत्ये मुन्दिरता सेवा पाखे | 3 गोतेङ बारका धामिको काम हिखे परमेस्वरहेङ भेति कालाउ भोख पिलि , एसाङ केलाइको झाराङ खान्तेङ बारका धामिबुङ परमेस्वरहेङ हाइदोङ पिलि गोइखे | 4 एदि केलाइको झाराङ खान्तेङ बारका प्रधान धामि पृथ्विता हिनु पानु,वा धामि माजेन्दावा , का ओदोङ भाअ्सिङ या दोदोङ्खा व्यवस्थादोङ भोका भेति पिलि इन्ता धामिगेलाइ हिदोङ्खे | 5 आखिरि धामिगेलाइदोङ पाका सेवा ते स्वर्गता जेङ्का काथागेलाइको नक्कल कालाउ स्याइरि खेनिङ ते हि | ओदोङ भाअ्सिङ मोसा जेलाउ पबित्तरो पाल ताङ्गाइतेङ हिघाखे परमेस्वर वासेहेङ खबरदारि पाहि,''फोमपा ना गोतेङ जेदोङ आमेगेलाइ एसाङ भाइपा बानाइ जेदोङ नासेहेङ का झाउका आराडाङ्ता तिङ्पाघा | 6 कालाउ येसु:हेङ सोम्पिका काम भेनाङ धामिगेलाइको काम खान्तेङ हेन्जा बारका हिघाखे , एनसाङ पातेङ नावा करार जेदोङ येसु: परमेस्वरसो ताइको द्याङ्गेलाइहेङ चुमाका हि इङ्को पुर्ना करारको खान्तेङ हेन्जा बारका हि | कालाउ नावा कारार उतम प्रतिग्याको आधारता हि | 7 लाम्फाको करारता हाइदोङ भुल माहिनु न्हेतेङ कारारको खाचो माजेङ्धावा | 8 कालाउ परमेस्वर द्याङ्गेलाइता हाइदोङ भुल पाका निङ्हि वा दोअ्हि :''बेला लोदोङ्खे जेलाउ का इस्राएलको द्याङ्गेलाइहेङ कालाउ यहुदाको द्याङ्गेलाइहेङ एनोङ नावा कारार प्याङ्का प्रभु दोअ्खे, 9 इदोइ करार इन्सिका माजेनाङ जेसाङ का वाको आजु-आजाइगेलाइहेङ पिघा | इङ्को करार का पिघा जेलाउ का इम्बालाइको खुर रिम्घा कालाउ मिस्रदेससो चुम्माघा | कालाउ का कारारको भाइपा वा मापाहि कालाउ का इम्बालाइसो ताइको नुइ घुरिपाघा,परमेस्वर दोअ्खे | 10 'का या नावा कारार इस्राएलको द्याङ्गेलाइहेङ भविस्यता प्याङ्का,परमेस्वर दोअ्खे: का ताइको कारार वाको मनता ह्वाप्याङ्का | का ताइको कारार वाको हृदयता कोरि प्याङ्का, का वाको परमेस्वर जेनाङ्का कालाउ उङ्को काङ्को रैतिगेलाइ जेनावा | 11 एला उसो हासुबुङ ताइको सा-सालेङ्को सानाइति भाया वा ताइको ओने -आनाउगेलाइहेङ प्रभु नाल्पालि धिरपालि मागोयाङ ना हाइ ? हाइपालिपानु गोतेङ द्याङ चाहे बा-बारका द्याङ ह्याको चाहे म्हुम्हुइका द्याङ ह्याको कासेहेङ नालावा | 12 काङ्को बिरोधता इम्बालाइ गल्ति काथागेलाइ पाहि का स्यामा पियाङ्का कालाउ एला उसो का वाको पापगेलाइ हेलाउबुङ फोम माताअ्ताङ्का | 13 एसापा परमेस्वर वासेहेङ नावा करार दोअ्हि कालाउ लाम्फाकोहेङ पुर्ना कारार ठहराइहि | कालाउ पुर्ना कारार थोत्तरे जेङ्तेङ बेकारता मारफाङ राम्तेङ हानावा |