इब्रानियों 7

मल्किसेदेक सालोमको राजा हिघाखे कालाउ झाराङ खान्तेङ सर्वोच्चा परमेस्वरको धामि हिघाखे | जेलाउ आब्राहाम धुमता् जितितेङ लोलि खाङ्घाखे,मल्किसेदेक वासेहेङ भेतिहि कालाउ आसिरबाद पिहि | 2 कालाउ आब्राहाम मल्किसेदेकहेङ ताइमिदोफा जेथे हिगाखे वाकोते भाग पिहि |''मल्किसेदेक'' मिङ्को न्हेलोङ माने हि | लाङफोर्तिको माने जेङ्खे धार्मिकताको राजा |''सालेमको राजाकोबुङ अर्थ जेङ्खे ''सान्तिको राजा'' | 3 मल्किसेदेकको आमाइ-आबा हासु हिघाखे कालाउ हिसोसो लोका हिघाखे इङ्को हासुबुङ मागिखे | कालाउ वाको हेलाउ जोलोम जेङ्हि कालाउ हेलाउ सि:हि इङ्कोबुङ पताबुङ मान्थु | वा परमेस्वरको चानदोङ भाइका हि कालाउ वा हेलाउलाउबुङ धामि जेङ्तेङ हिखे | 4 वाकोसो नेलाइ गिलिदोस्वाना कि मल्किसेदेक एमि हेन्जाङ बारका द्याङ हिघाखे, आबाकोबुङ आबा आब्राहाम मल्किसेदेकहेङ ताइमिङ धुमता जितिकाको गोतेङ्को दसाङ्सा भाग पिहि | 5 एला नियम दोअ्खे, लेबिको सन्तानसो हाहुबुङ पुजारिगेलाइ जेङ्खे,द्याङ्गेलाइसो वादोङ दसाङ्सा भाग निङ्लि गोइखे | पुजारिगेलाइ कालाउ वाको द्याङ्गेलाइ न्हेमिङ अब्राहामकोङ जाहानसो हिगाहि | कालाउबुङ धामिगेलाइ ताइकोङ द्याङ्गेलाइसो दसाङ्सा ल्होपाखे | 6 मल्किसेदेक लेबिको सान्तानसो लोका मान्थु धाखे , कालाउ बुङ वा अब्राहामसो दसाङ्सा निङ्हि | कालाउ वा आब्राहमहेङ आसिरबाद पिहि जाइहेङ परमेस्वर वचन पिका हिगाखे | 7 कालाउ गोतेङ द्याङ्गेलाइ गिखे कि जाइ बारका द्याङ्गेलाइ हिसुना आतुइका द्याङ्गेलाइहेङ आसिरबाद पिसुखेना | 8 उङ्को धामिगेलाइ दसाङ्सा निङ्खे कालाउ इङ्को गोतेङ सिन्चालतेङ हिका द्याङ्गेलाइ खिनिङ हिखे | कालाउ मल्किसेदेक जाइदोङ आब्राहाम सो निङ्हि, सिन्चालतेङ हेलाउलाउबुङ हिखे,भाइपा धर्म सास्त्तरदोङ दोअ्खे | 9 लेबिदोङ द्याङ्गेलाइसो दसाङ्सा भाग निङ्खे , कालाउ एसाबुङ दोअ्लि दोखे कि जेलाउ आब्राहामदोङ मल्किसेदेकहेङ दसाङ्सा पिहि लेबिबुङ पिहि | 10 लेबि इङ्को बेला जोलोम जेङ्का मान्थुघाखे , वा ते ताइको आजाइ -आजु आब्राहामकोङ जिउता हिघाखे जेलाउ मल्किसेदेकहेङ आब्राहाम भेतिहि | 11 एदि लेबि धामि पाका कामसो आत्मिक रुपता पुरा जेङ्लि दोनु कालाउ एसाङ धामि काम पाका आधारता इदोइ द्याङ्गेलाइहेङ नियम पिहि पानु,हारुनको धामि दर्जासो मालोतेङ मल्किसेदेक धामि दर्जाता भेनाङ धामि लोलि हाइ खाचो हिघाखे | 12 कालाउ जेलाउ भेनाङ खालको धामि भाइपा पाखे दोनु नियम फेरेलि गोइखे | 13 केलाइ इदोइ काथा ख्रिस्तको बारेता दोन्हाखे , वा भेनाङ कुलको हिघाखे ,इङको कुल हासुबुङ बेदिता हेलाउबुङ सेवा पाका मान्थुघाखे | 14 इदोइ गोतेङ्हेङ थाहा हि कि केलाइको प्रभु यहुदाको बङ्ससो लोहि कालाउ मोसादोङ इङको बङ्ससो धामिगेलाइ जेङ्का बारेता हाइदोङ काथा मापाहि | 15 भेनाङ एनोङ धामि ल्वाङ जाइ मल्किसेदेक भाइकाङ हि दोअ्का प्रमान बारे इदोइ झाला-झालापा गजेनावा | 16 वा मानिमुइ नियम कालाउ बिधानगेलाइ आन्सार धामि माजेङ्हि ,वा ताइको अनन्त जिवनको सरबुङ सो धामि जेङ्हि | 17 धर्म सास्त्तर वाको बारेता इदोइ दोअ्का हि: ''ना मल्किसेदेक भाइकाङ जेलाउबुङ धामिदोङ हिना |'' 18 लाम्फाको नियम एला दोहोइ हाइपालिपानु इङ्को मारेम्का कालाउ बेकारको हिघाखे | 19 मोसाको व्यस्थासो हाइदोङ काथाहेङ रेम्का पुर्ना बानाइलि मादोहि | कालाउ एला केलाइहेङ झन रेम्का आसा पिका हि जाइसो केलाइ परमेस्वरको भेरपा लोलि द्वाङ | 20 झाराङ खान्तेङ मुख्य काथा इदोइ हि, कि परमेस्वर जेलाउ येसु:हेङ झाराङ खान्तेङ बारका धामि बानाइहि,वा प्रतिग्या पिहि , जेलाउ भेनाङ्गेलाइ धामि जेङ्हि इन्ता हाइदोङ्बुङ प्रतिग्या मान्ठुघाखे | 21 कालाउ ख्रिस्तचाहि परमेस्वरको प्रतिग्यासो धामि बानाइहि , परमेस्वर वासेहेङ दोअ्हि: 22 याको माने जेङ्खे,येसु:एनोङ रेम्का करारको साक्सि जेङ्हि | 23 आरुबुङ धामिगेलाइहेङ धामि जेङ्तेङ हिलिसो, सि:कासो बान्चिहि एसाङ हेन्जाङ धामिगेलाइ जेङ्हि | 24 कालाउ येसु:जेलाउबुङ सिन्हुपाङ ह्यावा कालाउ ताइको धामि काम पालि मालातावा | 25 एसाङ जाइबुङ वाको तर्फसो परमेस्वरता लोखे ख्रिस्त इम्बालाइहेङ बान्चिपाखे | ख्रिस्त इदोइ जेलाउबुङ पालि द्वावा ,हाइपालिपानु जाइ परमेस्वरता लोखे इङकोको साघाइलि भाअ्सिङ वा जेलाउबुङ सिन्चावा | 26 एसाङ सो वा केलाइहेङ गोइका भाइकाङ खाल्को प्रधान धामि हिका हि , वा पबित्तरो कालाउ बिना दोसको हिका हि ,वा पाप बिनाको सुद्द साका कालाउ पापिगेलाइको पाप पाका कामसो दुरे हिखे | कालाउ वा स्वर्गखान्तेङ बुङ हुता ल्होका हि | 27 वा बो धामिगेलाइ भाइका मान्थु जाइदोङ दिना दिनाङता एखेप भोख पिलि गोइघाखे | कालाउ इन्तासो बोमिगेलाइको पापको भाअ्सिङ कालाउ ख्रिस्तहेङ एन्सा पालिगोइका दरकार मान्थु | वादोङ ताइमिहेङ थुमाजेङ्तेङ एखेप ताङ भोख पिलि दोहि | 28 वयवस्थाते वासेहेङ झाराङ्खान्तेङ बारका धामि साल्हि ,जाइ बोगेलाइ भाइका थिका द्याङ्गेलाइ हिखे , कालाउ परमेस्वरको प्रतिग्या व्यवस्था न्हुसो लोहि | परमेस्वर पिलि भोका केरा चाका सब्दगेलाइसो परमेस्वरको चानहेङ झाराङ खान्तेङ बारका धामि जेङ्लि बानाइहि | कालाउ चान जेलाउबुङ को भाअ्सिङ पुरा जेङ्लि गोइया