इब्रानियों 6

ओदोङ भाअ्सिङ एला केलाइ ख्रिस्तको बारेता प्राथमिक सिदान्तगेलाइ लाअ्लि गोइखे कालाउ पुर्नता भारि हानिलि गोइखे | केलाइ लाम्फाको भारि घुरिलि माएल | सिका कामगेलाइ लाअ्तेङदोङ कालाउ परमेस्वरता खान्धुरि पातेङ केलाइ ख्रिस्त केलाइको जिबन सुरु पाका हिघानाहि | 2 ओदोङ बेला,केलाइ बप्तिस्तागेलाइ,द्याङ गेलाइहुता खुरगेलाइ ताअ्का,बिसेस काम,सिका काकोसो ल्होपालि कालाउ अनन्त न्यायको बारेता धिर्पाका हिघाहि | कालाउ एला केलाइ आरू परिपक्का सिक्स्या भारि आगाभारि हानिलि गोइखे | 3 परमेस्वर चाहिहे पानि केलाइ इङकोबुङ पाङ | 4 द्याङ गेलाइ ख्रिस्तहेङ लाअ्लि दोअ्तेङ इम्बालाइको जिबनको दामा आरुङ बदेल्हि द्वावा रो ? सत्ये धिरकालाइको बारेता का दोअ्दोङखा | इम्बालाइ परमेस्वरसो उपहार र्हुका हि कालाउ पबित्त्तरो आत्माको भागिदार जेङका हिसुना | 5 इम्बालाइ परमेस्वर दोअ्का बचन हिङका हि,कालाउ परमेस्वरको नावा सुमिङको मोहा सरबुङङ तिङका हि | कालाउ इङको काथा गेलाइ मेनाङ रेम्का हिघाहि दोअ्तेङ इम्बालाइ बुझिका हि | कालाउबुङ न्हुसो इम्बालाइ ख्रिस्तहेङ लाअ्हि | 6 एला इम्बालाइहेङ घुरिपातेङ आरुङ ख्रिस्तताङ चुमालि सम्भव मान्थु | हाइ पानि ? हाइपालिपानु इम्बालाइ ख्रिस्तहेङ आरुङ क्रुसता तोङतेङ किला ताराइदोङखे | इम्बालाइ द्याङगेलाइको आगाता ख्रिस्तहेङ लेदर पादोङखे | 7 जेदोङ मिलिङ घुरि-घुरि (एलाङ-एलाङ) चि निङखे कालाउ रोपा थिङकालाइ सेका सेपाखे | इसिका मिलिङ परमेस्वरको आसिरबाद निङखे | 8 कालाउ एदि इङको मिलिङ चुइ कालाउ घासिगेलाइ खिनिङ पाहेपानु इङको बेकामको जेनावा | इङको मिलिङ परमेस्वरसो स्राप निनावा कालाउ इङको हेङ मे होइ ओपावा | 9 प्रिय सानाइतिगेलाइ,कालाउबुङ केलाइ नेलाइको इदोइ काथागेलाइ दोअ्स्वाना पानु | कालाउ केलाइ ढुक्क हिनाहि कि नेलाइको अबस्था इङको खान्तेङ हेन्जा रेम्का हि | कालाउ वा नाङको मुक्ति निसित प्यावा | 10 परमेस्वर न्याय निसाप हि | परमेस्वर नेलाइको पाका कामको याद पाखे पावा | वाको द्याङगेलाइहेङ साघाइतेङ नेलाइको तिङपाका ताइको प्रेमहेङ नेलाइको साघाइका परमेस्वर फोम पावा | कालाउ नेलाइको आसा बुङ पुर्न पाप्यावा | 11 नेलाइ झाराङ ताइको जिबनभरि इसिकाङ पाकाताङ भोतेङ हानिसु,केलाइ भोअ्नाखे | कालाउ नेलाइको आसा पुरा जेनावा | 12 आल्से माजेङसु,, केलाइ नेलाइहेङ इम्बालाइ भाइकाङ जेङसु दोअ्का चाहिखा ज्याइ परमेस्वरको बचन अनुसारको काथागेलाइ निङहि | इम्बालाइ परमेस्वर बचन गेलाइ निनावा हाइपालिपानु इम्बालाइको खान्धुरि कालाउ र्हुम्लि दोअ्का हि | 13 परमेस्वर आब्राहमहेङ प्रतिग्या पिका हिघाहि | परमेस्वर खान्तेङ बारका हासुबुङ मान्थु,एसापा परमेस्वर स्वयम ताइको मिङता वासेहेङ सपथ पिका हि कि वा ताइको बचन पुरा पाङ | 14 परमेस्वर दोअ्हि,''का नासेहेङ जातिङकोङ आसिरबाद पिप्याङका | का नासेहेङ हिन्जा सन्तान प्याङका |'' 15 या काथा जेङलि आब्राहाम मेनाङ र्हुम्हि | कालाउ न्हुसो ,आब्राहाम परमेस्वरको बचन निङहि | 16 सपथ र्हुलाउ द्याङ ताइमिखान्तेङ बारको मिङ र्हुखे | इम्बालाइ हाइ दोअ्खे, इङको सपथको खाचो हि दोअ्तेङ निसित पाखे कालाउ मारेम्का बिबाद हेङ अन्त पाखे | 17 ज्याइ इङको निङलि गोइखे वासेहेङ ताइको बचन सत्ये हि दोअ्का काथा परमेस्वर प्रमान पालि भोगाखे | वाको निर्नय हेलाउ बुङ माब्दलायाङ दोअ्का काथा इम्बालाइ झाला-झालापा रुपता बुझ्याको बुरु परमेस्वर चाहिघाखे | परमेस्वर सपथ (केरा चाका) पातेङ जेदोङ दोअ्हि इङकोहेङ वा प्रमानित पाहि | परमेस्वर जेलाउ हाइदोङ दोअ्खे वा ढाताइलि मादोखे,कालाउ जेलाउ वा हिदोइबुङ सपथ र्हुखे वा धातिलि मादोअ्खे | 18 इदोइ न्हेलोङ काथागेलाइ बदलेलि मादोअ्खे | कालाउ इम्बालाइ केलाइहेङ केलाइको आगाहिका आसाता दृद हिलि सारबुसाइ प्रेरना पिखे जेदोङ बेला केलाइ बान्चिलिको भाअ्सिङ परमेस्वरकोता लोनाहि | 19 केलाइको आसा नाउहेङ गोइका एलोङ दिहाम भाइका लङगुर हि | इङको बलियाका कालाउ निसित हि कालाउ इङकोहोइ केलाइको प्रान बान्चिपाखे | इङको थानको पबित्त्तरो स्थानको पार्जाको न्हुसो सुधाङ दुल्खे 20 येसु:आन्याङ सोङ इङको थामेता दुल्लि दोका हि कालाउ केलाइको भाअ्सिङ मल्किसेदेक भाइपाङ प्रधानधामि जेङका हि |