इब्रानियों 2

ओदोङ भाअ्सिङ धिरपाका काथागेलाइको भाइपाङ पालाउ झन हेन्जा होसियार हिलि गोइखे,ताकि केलाइ सत्येको दामासो माबहक्याइने | 2 स्वर्गदुतगेलाइसो परमेस्वर पिका सिक्स्या जातिङ्को हि दोअ्का तिङ्पिका हिघाहि ,कालाउ जेलाउबुङ यहुदिगेलाइ इङ्को सिक्स्याको बिरोध पाहि कालाउ वाको भाइपाङ मापाहि इम्बालाइ उचित दण्ड निङ्हि | 3 केलाइहेङ पिका उदार हेन्जा माहान हि ओदोङ भाअ्सिङ केलाइ इङ्को उदारको हेला पानाइहेपानु केलाइ दण्डसो हेसा खालि द्वाङ रो ? उदारको बारेता केलाइहेङ लाम्फा दोअ्लि दोअ्का प्रभुदोङ हिघाहि | कालाउ वचन हिङ्का द्याङ्गेलाइहेङ उदार जातिङ्को दोअ्का काथा केलाइहेंङ प्रमानित पाहि | 4 परमेस्वरबुङ माचाआम्का चिन्हागेलाइ कालाउ भेनाङ-भेनाङ खालको भारबुसाइका कामगेलाइ प्रमानित पापिहि | कालाउ पबित्तरो आत्मापाहा द्याङ्गेलाइहेङ, उपहार पितेङ इङको प्रमानित पापिहि | वा इङको उपहारगेलाइ ताइको इच्सा आन्सार पिहि | 5 लोलि तोम्का इङको नावा सुमिङ्को सासक बानाइलि परमेस्वर स्वर्गदुतगेलाइहेङ मासाल्हि | इङ्को भबिस्यको सुमिङ जेदोङ केलाइ चर्चा पालि तोम्का हिनाहि | 6 धर्म सास्त्तरता हिदोइबुङ एलोङ थामेता एसा दोअ्तेङ गवाहि पिका हि,''द्याङ हाइ रो,ना वाको भाअ्सिङ फोमपाखेना ? द्याङ्को चान हासु रो,ना वाको भाअ्सिङ सोचिखेना ? हाइ महत्व पुर्न हि रो ? 7 आतुइसा समयको भाअ्सिङ खिनिङ ना वासेहेङ स्वर्गदुतगेलाइ खान्तेङ आसा म्हुइका बानाइना ना वासेहेङ आदार कालाउ महिमाको मुकुट तुपान्हा | 8 कालाउ गोताङ काथागेलाइ ना वाकोङ खाबाराता चुमापिना , परमेस्वर'' गोताङ काम वाकोङ खाबाराता चुमापिहि दोअ्का बुझिखे | कालाउबुङ केलाइ वादोङ झाराङ दोफा सासन पाका मातिङ्न्हाखे | 9 आतुइसा समयको भाअ्सिङ येसु:स्वर्गदुतगेलाइ खान्तेङ म्हुइका बानाइका हिघाहि | कालाउ एला केलाइ वासेहेङ आदार कालाउ महिमाको मुकुत तुका तिङ्न्हाखे हाइपालि पानु वा कस्त भोगिहि कालाउ क्रुस्ता सि:हि | हाइपालि पानु परमेस्वरको अनुग्रहहोइ येसु:झाराङ द्याङ्को भाअ्सिङ सि:कासो अनुभब पाहि | 10 परमेस्वर हि ,जाइ ताइको महिमाको भाअ्सिङ गोताङ आनेमाने बानाइहि, वा ताइको महिमाको भागिदार बानाइलि वा हेन्जा चान्गेलाइ भोहि | एसापा परमेस्वर जेदोङ-जेदोङ पालि गोइका हिघाहि इङ | ओदोङ पाहि , परमेस्वर वासेहेङ एलोङ पुर्न द्याङ बानाइहि जाइ झाराङ्हेङ मुक्ति भारि थोङ्खे | परमेस्वर वाको याताना पाहासो येसु:हेङ पुर्न बानाइहि | 11 वादोङ ए हि ज्याइ द्याङगेलाइहेङ पबित्तरो बानाइखे कालाउ इङ्को पबित्तरो बानाइकागेलाइ एलोङ जाहानसो लोका हि | ओदोङ भाअ्सिङ वा इम्बालाइहेङ ताइको दादा-ओनेगेलाइ कालाउ बाइ-ओनेगेलाइ दोअ्लि लागाइहि | 12 ओदोङ भाअ्सिङ वा दोअ्खे :हे परमेस्वर ,नाङ्को बारेता का ताइको बाइ-ओने वाजान-ओनेगेलाइ घोसाना पाआङ्का | नाङ्को गोताङ द्याङ्गेलाइको आगाता का नाङ्को बाखानाइको ले,लेकाङ्का |'' 13 वा एसाबुङ दोअ्खे ,''का परमेस्वरता भोसोसा ताअ्खा ,'' कालाउ वा दोअ्खे,''का इता हिघा कालाउ का दोअ्फा उङ्को चानचामिन्दिगेलाइ हि जेदोङ परमेस्वर कासेहेङ पिका हि |'' 14 या चानचामिन्दि गेलाइ भौतिक जिउता हि,जेदोङ द्याङ्गेलाइ हि , कालाउ येसु:बुङ उङ्को द्याङ्गेलाइ भाइका जेङ्पिहि कालाउ इम्बालाइको भाइकाङ अनुभव जोम्पाहि , ओदोङ भाअ्सिङ वा सि:काहेङ जितितेङ साइतानहेङ नासा पाहि ज्याइ दोफा से:का सरबुङ हि | 15 येसु:या द्याङ्गेलाइ भाइपाङ जेङ्पिहि कालाउ सि:पिहि जाइसो इम्बालाइहेङ मुक्तपालि द्वाको | ताइको सि:काको थिकासो इम्बालाइ गोताङ जिवन चाकारिया भाइपाङ बितिपाहि | 16 इदोइ झाला-झालापाङ हि कि,येसु:स्वर्गदुतगेलाइहेङ माको, कालाउ अब्राहामको सन्तानगेलाइहेङ साघाइखे | 17 ओदोङ भाअ्सिङ येसु:ताइमिहेङ हेसा पालाउबुङ ताइको वाजान ओने-कालाउ बेजान ओनेगेलाइ भाइकाङ बानाइलि गोइका हिघाहि ताकि वा परमेस्वरको सेवाता दयालु कालाउ खान्धुरिता योग्यो प्रधान धामि जेङ्लि द्वाको कालाउ इदोइ खालको द्याङ्गेलाइहेङ पापगेलाइसो स्यामा पिलि द्वाको | 18 हाइपालिपानु वा ताइमिहेङ कस्त भोगिहि कालाउ जाचिन्हाहि,ओदोङ भाअ्सिङ जाचिकाता परिकालाइहेङ वा साघाइलि द्वाङ |