3
या फोमपा आन्तिमको दिनागेलाइता खाताराको समय ज्यावा | 2 इङ्को दिना गेलाइता द्याङगेलाइ ताइमि कालाउ ताका हेङ खिनिङ माया पावा | इङ्को काखिनिङ गिखा काखिनिङ रेमका हिगा घमण्दि पाका कालाउ बोमिहेङ चेरका काम पाखे | द्याङ्गेलाइहेङ ताइको आबा आमाइको आग्या पालन मापाङ | कालाउ वाको दोअ्फा मासातावा | इसिका कारनसो परमेस्वर दोङ द्याङ्गेलाइहेङ मन मपरियावा | 3 द्याङ्गेलाइ दोङ बोमिहेङ माया मापावा,इम्बालाइदोङ बोमिहेङ स्यामा पालि मादावा,इम्बालाइदोङ मारेम्का काथा दोतावा,इम्बालाइदोफा ता-ताइमिता मिलितेङ हिलि माग्यावा | इम्बालाइ बोमिहेङ मारेम्का सम्झिलि तुस्स, निच तिनावा कालाउ एल्का काथागेलाइहेङ सि;सि दुर;दुरपातेङसा हेलापावा | 4 आन्तिमको दिनागेलाइता द्याङ्गेलाइ ताइकोङ सानाइतिको सतुर जेनावा हाइदोङ बिचारदोङ मापासिङ इम्बालाइ मुर्खा काम पावा | इङ्को दि:का जेनावा,इम्बालाइ परमेस्वर खान्तेङ सुख चैन मोजमस्तिहेङ हेन्साङ दोङ प्रेम पावा | 5 इम्बालाइ परमेस्वरको सेवा पाका भाइका खिनिङ पावा | कालाउ ब्यबहारता इम्बालाइ परमेस्वरको सेवा मापावा,तिमोथि ना,इन्सिका द्याङगेलाइसो दुरेहि | 6 इन्सिका हेथे द्याङ्गेलाइ साता हानिखे कालाउ पापसो पुरा दुबिका बेबालहेङ ताइको साता ताअ्खे | इम्बालाइदोङ पालिखाङ्का मारेमका कामगेलाइसो इम्बालाइदोङ पाप भारि हानिखे | 7 इङ्को बेबालाइ जेलाउबुङ नावा ग्यानगेलाइ धिरलि भोखे,कालाउ इम्बालाइ सत्येहेङ पुरारुपसो बुझिलि हेलाउबुङ योग्यको माजेङ्खे | 8 जेन्नोस कालाउ जेम्ब्रसहेङ फोमपा इम्बालाइ मोसाको बिरुद हिगाहि इदोइ द्याङ्गेलाइबुङ इन्सिकाङ हि | इम्बालाइ सत्येको बिरोधि इम्बालाइको बिचार आवाइतुगिल्काहि | इम्बालाइ सत्येको दामाता हिगिल्लिसो आवाइका हि | 9 कालाउ इम्बालाइ ताइको कामता सफल जेङ्लि हेलाबुङ मादावा,झाराङ गिखे कि इम्बालाइ मुर्ख हि | जेन्नोस कालाउ जेम्ब्रेसको बारेता भाइपा झाराङ दोङ ग्यावा कि इम्बालाइ ह़ाइदोङ मागिका हि | 10 काङ्को बिसोयोता ना गोताङ गिखेना,का हाइ धिरपाङ्का, हेसा हिखा, ना गिखेना | ना काङ्को जिवनको लकस्य,काङ्को खान्धुरि,कालाउ धर्यहेङ प्रेमबुङ गिखेना | ना गिखेना कि कोसिस पालि का हेलाउबुङ मालाताङ्का | 11 ना काङ्को दुःख गेलाइ कालाउ दानहाइ निङ्चाका गिखेना, एन्तिओक आइकोनियम कालाउ लिस्तर्ताका हुता घातिका घाताना गेलाइ ना गोताङ गिखेना | इङ्को थामेगेलाइता का सामाना पालि गोइका कष्टगेलाइ नासेहेङ थाहा हि,कालाउ प्रभु दोङ कासिहेङ इङ्को बिपतिसो बान्चिपाहि | 12 ख्रिस्त येसु:ता ज्याइ परमेस्वर दोङ चाहिका भाइपा बान्चिलि भोखे वादोङ कष्टगेलाइ भोगिलि गोइखे | 13 द्याङ्गेलाइ ज्याइ दुस्त कालाउ बोमिहेङ दोखा पिकालाइबुङ हिखे,इङ्को मारेम्का सोबुङ मारेम्काता हानिकाताङ हानिखे | इम्बालाइ बोमिहेङ हाइदोङ मागिका तिङ्खे कालाउ इम्बालाइ ताइमिहेङ बुङ हाइदोङ मागिका बानाइतेङ हिखे | 14 नादोङ धिरका सिकस्या सो नादोङ गिलिगोयाना हाइपालिपानु इङ्को सत्येहि दोतेङ नासेहेङ भरोसा हि | इदोइ काथा गिखेना हाइपालिदोनु इम्बालाइ जेसाङ नासिहेङ इङ्को धिरपाहि इम्बालाइ भरोसा योग्य हि | 15 नाङ्को जामालकालसोङ नासेहेङ पबित्तरो सास्त्तर थाहा हि | इदोइ धर्मसास्त्तर दोङ ग्यानि बानाइखे | कालाउ इङ्को ग्यानसो ख्रिस्त सो खान्धुरिसो जिबनको मुक्तिभारि चुम्पुखे | 16 गोताङ धर्मसास्त्तरगेलाइ परमेस्वरदोङ पिकाहि,इङ्को धर्मसास्त्तर गेलाइ सिक्स्या पिलि कालाउ द्याङ्को जिवनता हिका मारेम्का काथा गेलाइ तिङ्पापिका कामता लागाइका हि | धर्म सास्त्तरगेलाइ गल्ति सुध्राइलि कालाउ एल्का जिवन हेसा जिउलि गोइखे दोअ्तेङ धिरपाका हि | 17 परमेस्वरको गोताङ सेवक धर्म सास्त्तरको सिकस्या धिरतेङ सा तियार जेङ्सु कालाउ हिसिकाबुङ रेमका काम पालि वासिहेङ गोइका गोतेङ काथा पुरा जेङ्खे |