4
परमेस्वर कालाउ येसु:ख्रिस्तको मिङ्ता का नासेहेङ आदेस पिखा | सिन्हुका कालाउसि:का इदोइ काथागेलाइ पिताइहेङ हेठे झना ताइको खान्धुरिको लक्स्यता मापुगितेङ हानेका हि | नादोफा अनुग्रह ह्याको | 2 द्याङ्गेलाइहेङ बानाल हिङपा,जिसिकाङ बेलाबुङ इदोइ दोअ् | द्याङ्गेलाइहेङ इम्बालाइ पालि गोइका काम दोपि | इम्बालाइको भुल जेङ्लाउबुङ इम्बालाइहेङ उत्साह पि | इदोइ काथा गेलाइ बार्का धेर्य कालाउ सावधान सिक्स्यासो पा | 3 समय इस्का लाङ, जेलाउ द्याङ्गेलाइ सत्ये सिक्स्या सहेलि मादाङ | इम्बालाइ हेङ्सा गुरुजिगेलाइ निङ्चावा जाइ इङ्को द्याङ्गेलाइको इच्सागेलाइ दोफा इम्बालाइ मिल्यावा | इङ्को गुरुजिगेलाइ इम्बालाइ दोङ इम्बालाइहेङ हिङ्लि खाङ्का काथागेलाइ धिर्पावा | 4 द्याङ्गेलाइ सत्ये हिङ्लि लाअ्ताङ ,इम्बालाइ धाताइका काथागेलाइ पिताइयावा | 5 कालाउ ना जेलाउ बुङ ताइमिहेङ सयमिता ताअ्लि गोइखे | एसाङ दुःख दोङ लोलाउ इङ्कोहेङ स्विकार पा | ये: बानाल, बानाल पाका काम माला | परमेस्वरको सेवकदोङ पाका जेदोङ्बुङ काम गितेङ पा | 6 काङ्को जिवनहेङ परमेस्वरको माझाको बेदिता बलिदान पिदोङ्खे | का इदोइ जिवनहेङ लाअ्लि बेला लोका हि | 7 का धुमता फेसुलाका हिघा, कालाउ काङ्को धाअ्का काम पुरा दोपाका हिघा | का खान्धुरि ताका हिघा | 8 एला एनोङ मुकुतसो कासेहेङ र्-हुमतेङ हिका हि | का परमेस्वर दोफा ठिक हिकाको कारनसो का इङ्को धार्मिकताको मुकुट निनाङका | इदोइ वादोङ कासेहेङ इङ्को मुकुत इङ्कोङ दिनाता प्यावा | वा इङ्को मुकुत इङ्को गोताङ द्याङ्गेलाइहेङ प्यावा,ज्याइदोङ,वाको लोका दामा खाङ्तेङ हिखे कालाउ जाइदोङ वाको प्रतिकस्या पाका हिका हि | 9 जेथे धेमा सम्भव ज्यावा,का दोफा लोलि कोसिस पा | 10 डेमस सुमिङहेङ हेङ्साङ प्रेम पागाखे कालाउ वा कासेहेङ लाअ्दोङ्खे,वा थेस्लोनिकिकि हानेहि | क्रेसेनस गलातिया हानिहि कालाउ तितस डालमितियावा हानिहोइ | 11 एलाउ लुका खिनिङ का दोफा हि | मर्कुसहेङ भेतिलि हाने कालाउ ना लोलाउ वासेहेङ ना दोफा चुम्तेङ लो | वा कासेहेङ इता काङ्को कामता सघाइलि दोकावा | 12 ताइकिकसहेङ का एफिससता दिङ्गिल्घा | 13 का त्रोआस्ता हिलाउ इङ्ता कार्पसदोफा काङ्को कोट लाधिगा , ना लोलाउ इङ्को बुङ चुमापि | काङको किताबगेलाइ जाइ धालेको पातारा बुङ चुमापि | इङको हेन्साङ आवस्यकता हि | 14 चिरको काम पाका सानाइति अलेकज्यान्दर कासेहेङ हेङसाङ हान्ति पाका हि | प्रभु वासेहेङ रेम्का दण्ड पिलि दावा | 15 ना बुङ सर्तक हि कालाउ ना वासेहेङ हान्ति पुगिपालि मादावा | केलाइको सिक्स्याको वा एकदम बिरोध पाका हि | 16 लाङफर्तिको हिङ्काता का कासेहेङ काङ्को भासिङ बान्चिलि दोअ्हि,कासेहेङ साथ पिका इङता हासु मान्ठुघाखे | झाराङ कासेहेङ लाअ्हि , का दोमपाघा कि परमेस्वर नेलाइहेङ स्यामा प्यावो | 17 कालाउ प्रभु काङ्को दोफा हिघाखे , वादोङ कासेहेङ भारबुसाइका बानाइहि जाइसो गैर-यहुदिगेलाइ ये:-बानाल ब्यखया पालि दोघा | प्रभुदोङ चाहेका हिघाहि कि गोताङ गैर यहुदिगेलाइ ये:-बानाल हिङ्लि गोयाङ | का खुह्वाको नुइसो खाअ्घा | 18 एदि हासुदोङ कासेहेङ हान्ति पालि भोखे,प्रभु कासेहेङ उददार पाङ , वा कासेहेङ बान्चिपावा,कालाउ ताइको अनन्त सारभिता चुमावा | वाको महिमा हेलालाउबुङ ह्यावा | आमेन | 19 प्रिस्किला कालाउ अक्विलाको दोफा ओन्सिफरसको गोतेङ जाहानगेलाइहेङ सेउपाखा हि | 20 इरासत्तस कोरन्थिताङ हि, कालाउ का त्रोफिमसहेङ मिलेतसाता लातेङ लोगा वा आतुइसा मेसालोका हिगाखे | 21 चुङ्दिनको समय खाङ्तेङ लाम्फादोङ का दोका लोलि सकभर कोसिस पा | युबलस नासेहेङ सेउपाखा पिगिल्खे | पुदेनस लिनसक्लोडिया कालाउ इता हिका झाराङ दादा-ओने,बाइ-आनाउ गेलाइहेङ ताइको सेउपाखा पिगिल्दोङ्खे | 22 परमेस्वरको आत्मा नाङ्को दोफा ह्याको नाङ्को दोफा अनुग्रह ह्याको |