1 Timothy
1 तीमुथियुस
1
केलाइको मुक्तिदाता परमेस्वर कालाउ केलाइको आसा ख्रिस्त येसु:को आग्यासो ख्रिस्त येसु:को प्रेरित पावलसो, 2 खान्धुरिता (बिस्वासमा) काङको जातिङ्को जामाल तिमोथिहेङ परमेस्वर आबा कालाउ केलाइको प्रभु ख्रिस्त येसु:सो अनुग्रह,कृपा कालाउ सान्ति मिल्याको | 3 जेलाउ का माकेडोनिया भारि हानेलाउ नासेहेङ आग्रह पातेङ्सा ना एफिससताङ हि,कालाउ धाताइलि धिरपाका ग्यान पिका द्याङ्गेलाइहेङ एसा मापासु दोअ्तेङ कडासो थिपाङ आग्या पिसु | 4 कालाउ इम्बालाइ ता-ताइमिको गिका काथा गेलाइ खिनिङ आगा लाम्पातेङ ताइको नुइसो बानाइका दन्त काथागेलाइ कालाउ माओताका हाडा गुटिया (दादा-ओने )गेलाइभारि मालाग्याको,भरु खान्धुरिकोता हिका परमेस्वरको तालिम भारि लाग्याको | 5 केलाइको आग्याको उदेस्य माया पालि,ज्याइ साफ़ हृदय,रेम्का ग्यान बुदिृ, कालाउ झाराङ्हेङ एकनाससो खाङ्का खान्धुरिसो लोखे | 6 हेठेते हेन्साङ द्याङगेलाइ इदोइ गोतेङ्सो आबाइतेङ वावाइतेङ कामदोङ मालागिका काथाको भनाइता आवाइतुखे कालाउ इन्साङ हिगिलखे || 7 इम्बालाइ व्यवस्थाको गुरु जेङ्लि इच्सा पाखे,कालाउ ताइमिङ्को दोअ्का काथा माको ताइमिङ कितानुपातेङ दोअ्का इदोइ काथा ठिक हि दोअ्का काथागेलाइ इम्बालाइ ताइमिङ माबुझिखे | 8 केलाइ गिनाखे कि यदि हासुबुङ रेम्का तरिकासो मानिनु (पालन) पानु व्यवस्थाको रेम्का हि | 9 केलाइ याबुङ गिन्हाखे कि व्यवस्था असल द्याङ्को भाअ्सिङ माको,कालाउ व्य्वस्था बिगिरपाकागेलाइ कालाउ नियमदोङ मानेकागेलाइ को भाअ्सिङ खान्धुरि मापाका कालाउ पापिगेलाइ आपबीत्तरो मामानेका कालाउ धुसितगेलाइ, आबा आमाइगेलाइको आग्या मामानेका गेलाइको भाअ्सिङ, सेकालाइको भाअ्सिङ, 10 लेसाइकागेलाइको भाअ्सिङ,(कासिबेरि) वाबालसो -वाबालहेङ लेसाइकागेलाइको भाअ्सिङ, अपहरकारिको भाअ्सिङ , धाताइका काथा पाकागेलाइको भाअ्सिङ,कालाउ धाताइतेङ्सा बयान(गवाहि) पिकागेलाइको भाअ्सिङ,कालाउ सत्ये सिदान्तको बिरोधता जेङ्का आरोङ्बुङ काथागेलाइको भाअ्सिङ दोङ | 11 या कासेहेङ सोम्पिका परमधन्य परमेस्वरको महिमित ये: बानाल आन्सर जेङ्का हि | 12 कासेहेङ सरबुङ पिका ख्रिस्त येसु:केलाइको प्रभुहेङ का धन्यबाद पिखा,हाइपानु ताइको सेवाता लागाइतेङ वादोङ कासेहेङ खन्धुरियोग्य मानिहि | 13 लाम्फा का मन्दामाताघा ,चेरघा ,सानताइघा कालाउ वाको बेइज्जत पाघा,कालाउ का इदोइ कामगेलाइ मागितेङ्सा कालाउ खान्धुरि मापातेङ पाका जेङ्कासो का कृपा निङ्घा | 14 ख्रिस्त येसु:ता हिका खान्धुरि कालाउ प्रेमको दोफा काङको भाअ्सिङ केलाइको प्रभुको अनुग्रह हेङसाङ खुतेङ लोहि | 15 इदोइ वचन हेसाङ्बुङ स्विकार पालि योग्य हि,पापिगेलाइहेङ बान्चिपालि येसु:ख्रिस्त सुमिङ्ता लोहि,कालाउ पापिगेलाइता का झाराङ खान्तेङसा मुल हिघा | 16 कालाउ ओदोङ भाअ्सिङ का कृपा निङ्घा कि पापिगेलाइसो झाराङ खान्तेङ मुल जेङ्तेङ बुङ का सो येसु:ख्रिस्तदोङ ताइको असिम र्-हुम्तेम्सा हिलि दाको, कालाउ वाको हुता खान्धुरि पातेङ अनन्त जिवन निङ्कागेलाइको भाअ्सिङ का एनोङ उदाहरन जेङ्लि दोलि द्वाको | 17 जुग-जुगका राजा,हेलाउबुङ मासिका कालाउ तिङ्लि मादोका एनोङ्खिनिङ परमेस्वरहेङ आदर कालाउ महिमा हेलाउलाउबुङ ज्याको | आमिन | 18 काङको चान तिमोथि,का नासेहेङ या आग्या पिदोङ्खा कि,नाङ्को सन्बन्धता लाम्फासोङ दोअ्का अगमबानि आन्सार इङ्कोसो प्रेरना निङ्तेङ खान्धुरि कालाउ रेम्का ग्यान बुदिृ तातेङ्सा ना असल धुम लदिलि दो | 19 खान्धुरि कालाउ साफा रेम्का बुदिृ ग्यान पातेङ ताअ्सु | आधिमि-आधिमि द्याङ बिबेकहेङ इन्कार पातेङ ताइको खान्धुरिको जहाज दुबिपाका हिखे | 20 इङको मध्येता हुमेनियस कालाउ आलेक्जेन्ड्ररबुङ हि,ओबालाइहेङ साराप मापासु दोका काथा धिराको दोअ्तेङ का सैतानको खुरता सोम्पिका हिघा |