2 Thessalonians
2 थिस्सलुनीकियों
1
पावल,सिलास कालाउ थिमोथिसो परमेस्वर केलाइको आबा कालाउ प्रभु येसु:ता थेस्सलोनिकिको मण्डलिहेङ सेउपाखा: नेलाइ केलाइको आबा परमेस्वर कालाउ येसु:ख्रिस्ता हिका हिसुना | 2 परमेस्वर आबा कालाउ प्रभु येसु:ख्रिस्तसो नेलाइहेङ अनुग्रह कालाउ सान्ति | 3 ओ -ओनेगेलाइ, नेलाइको भाअ्सिङ परमेस्वरहेङ जेलाउलाबुङ धन्यबाद पिलि केलाइ बाध्य हिनाखे |एन्सापालि केलाइहेङ थिक हि कारन नेलाइ खान्धुरि झन झन बाढेतेङ्ह हानिखे |नेलाइको एमिसो भेनेङ्ता पाका प्रेमबुङ बाढतेङहि | 4 इदोइ रेम्का बुङ हि,हाइपालीपानु नेलाइको खान्धुरि हेङ्साङ पातेङ बाढेतेङ्सा हानिदोङ्खे, कालाउ ता-ताइमि दोफा नेलाइ झाराङ्को प्रेम बदिदोङ्खे |ओदोङ भाअ्सिङ नेलाइको गोतेङ साताइका कालाउ नेलाइको भोगितेङ हिका दुःख गेलाइको माझाता नेलाइ माथिसिङ बलियाका जेङ्तेङ खान्धुरिको भाअ्सिङ परमेस्वरको मण्डलिगेलाइको माझाता केलाइ हेङ्साङ गर्ब पानाखे | 5 परमेस्वरको धार्मिक न्यायको साक्सी इदोइदोङ हि कि नेलाइ परमेस्वरको राइजिको भाअ्सिङ योग्य ठहराइलि दोसु,ज्याइको भाअ्सिङ नेलाइ दुःख भोगितेङ हिसुना | 6 परमेस्वर न्यायपाका हिका हि,वादोङ नेलाइहेङ दुःख पिकागेलाइहेङ दुःख दोङ पिखे, 7 कालाउ ना दुःख निङ्कागेलाइ केलाइ दोफाङ आराम पालि पिखे | इदोइ जेलाउ जेङ्खे, जेलाउ प्रभु येसु:ताइको सरबुसाइका स्वर्गदुतगेलाइ दोफा तिका मेता स्वर्गसो प्रकत जेनावा | 8 परमेस्वरहेङ मानाल्कागेलाइहेङ कालाउ केलाइको प्रभु येसु:को ये: बानाल मामानेकागेलाइहेङ वादोङ दण्ड प्यावा | 9 इम्बालाइ हेलाउबुङ माओताका बिनासता दण्ड कालाउ प्रभुको लोका बेला कालाउ वाको सरबुङ्को महिमासो खेङ्नाका जेङ्तेङ दण्ड भोगियावा | 10 जेलाउ इङ्को दिना वाको भक्तगेलाइता महिमा निङ्लि कालाउ खान्धुरि पाकालाइ झाराङ्हेङ भार्बुसाइका पालि वा लवाङ, हाइपालिपानु नेलाइहेङ पिका केलाइको साक्सिता नेलाइ खान्धुरि पासुन्हा | 11 एसाङ्दोङ केलाइ नेलाइ झाराङ्को भाअ्सिङ जेलाउलाबुङ दोमचाकाइतेङ हिनाखे ,कि केलाइको परमेस्वर नेलाइहेङ काइतेङ ताइको योग्यको बानाइयाको,कालाउ गोतेङ रेम्का उदेस्य कालाउ खान्धुरिको कामहेङ वाको सर्बुङ्सो गोताङ पाप्याको | 12 कालाउ कि केलाइको परमेस्वर कालाउ प्रभु येसु:को अनुग्रह आन्सार केलाइको प्रभु येसु:को मिङ नेलाइकोता महिमित हृयाको,कालाउ नेलाइ वाकोता |