2
ओनेगेलाइ, केलाइको प्रभु येसु:ख्रिस्तको आगमनको बारेता कालाउ वासेहेङ भेतिलि केलाइ एदोफाङ जोम्जेङ हिका बिसयता केलाइ नेलाइहेङ बिन्ति पान्हाखे | 2 कि हिदोइबुङ अगमबानि माकुनु बचन हिदोइबुङ कि पातारा प्रभुको दिना भेरपा लोका हि दोतेङ दोअ्हे पानु, इङ्को केलाइसो लोका दोअ्तेङ्सा नेलाइको मन मारफाङ बिजोक माज्याको,माको नेलाइ माथिसु | 3 हासुबुङ हिदोइबुङ किसिमसो नेलाइहेङ धोका माप्याको | हाइपालिपानु लाम्फा जेलाउ थेकापा परमेस्वरको बिरुदको बिद्रोह माजेवा इङ्को दिना मालवाङ | जेलाउ थेकापा नासापाका द्याङ मालवाङ एनसालाउ थेकापा इङ्को दिना मालवाङ | गोतेङ नासापाका चान माजेम्पाथेकापा इङ्को दिल मालावा | 4 वा परमेस्वरदोतेङ कहलाइका गोतेङ कालाउ पुजिका आमेगेलाइको बिरुद पाखे कालाउ इङ्को खान्तेङ ताइमिहेङ बारका सम्झिखे, इता थेकापा कि ताइमिहेङ परमेस्वरदोङ घोसाना पाखेकालाउ परमेस्वरको थानता(मन्दिरता) इङ्को हिखे | 5 हाइ नेलाइहेङ फोम मान्थु,का नेलाइदोफा हिलाउदोङ का इदोइ काथागेलाइ नेलाइहेङ दोका हिघाखा ? 6 इङ्को ताइको बेलाता प्रकट ज्याको दोअ्तेङ्सा हिदोइ काथाहोइ एला थेकापा खोराइतेतेङ ताअ्का हि, इदोइ नेलाइ गिसुखेना | 7 हाइपालिपानु अधर्मको रहस्यसो लाम्फासोङ काम पादोङ्खे | एला थेकापा जाइदोङ वासेहेङ थामितेङ ताका हि,वा मालोप्पा थेकापा इङ्कोहेङ थामितेङ दोङ ताअ्तावा | 8 कालाउ इङ्को पापको द्याङ प्रकट जेनावा,ज्याइहेङ प्रभु येसु: ताइको नुइको हुसिसो नासा पावा,कालाउ वाको आगमनको जोल्का धाङ्काहोइ इङ्कोहेङ नास पावा (से:तावा) | 9 सैतानको कामपाका भाइपा पापको द्याङ गोतेङ सरबुङ्होइ कालाउ झुकिपाका इसारागेलाइ कालाउ भारबुसाइपातेङ ; 10 कालाउ नास जेङ्कागेलाइहेङ झुकिपातेङ गोतेङ खाराब कामपाका सुधाङ लोवाङ,हाइपालिपानु इम्बालाइ सत्येहेङ प्रेम पालि कालाउ एसाङ दोङ बान्चेलि माकिहि | 11 ओदोङ भाअ्सिङ इम्बालाइहेङ धाताइका काथाता खान्धुरि पाको दोतेङ परमेस्वरदोङ इम्बालाइ हुत्ता एलोङ बारका सर्वाङ्सालि भ्रम पिगिल्खे | 12 कालाउ सर्बुङ्हुता खान्धुरि मापाका कालाउ अधामिकता आनन्द पाका झाराङ दोसि जेनावा | 13 प्रभु प्रेम पाका ओनेगेलाइ, नेलाइको भाअ्सिङ केलाइ परमेस्वरता जेलाउलाबुङ धन्यबाद पिलि बाध्य हिनाहि, हाइपानु सुरूसोङ पबित्तरो आत्मासो पबित्तरो पाका कामसो कालाउ सत्येको हुताको खान्धुरिसो सिन्चालिको भाअ्सिङ परमेस्वरदोङ नेलाइहेङ साल्हि | 14 याकोङ भाअ्सिङ केलाइको ये: बनालसो केलाइको प्रभु येसु:ख्रिस्तको महिमा निङ्लिको भाअ्सिङ वादोङ नेलाइहेङ काइका हि | 15 ओदोङ भाअ्सिङ ओनेगेलाइ,बलियाका जेङ्तेङ्सा ल्होसु,कालाउ चाहे नुइको बचन सो हृयाको,चाहे केलाइको पातारासो हृयाको नेलाइदोङ जेदोङ सिक्स्या निङ्का हिसुना इङ्कोहेङ थामितेङ ताअ्सु | 16 एला केलाइहेङ माया पाका कालाउ अनुग्रहसो अनन्तको सान्त्वाना कालाउ उतम आसा पिका केलाइको प्रभु येसु: ख्रिस्त ताइमिङ कालाउ परमेसर केलाइकोआबादोङ , 17 नेलाइको हृदयहेङ सान्त्वाना प्याको,कालाउ गोतेङ रेम्का काम कालाउ बचनता नेलाइहेङ बलियापा पाको |