3
आखिरता ओनेगेलाइ, केलाइको भाअ्सिङ दोमचाकाइ पि,कालाउ प्रभुको बचन मारफाङ चारचाराइयाको : कालाउ बिजय ज्याको,जेसाङ नेलाइको माझाता जेङ्काबुङ हिघाखे, 2 कालाउ भ्रस्ट कालाउ दुस्त द्याङ्गेलाइसो केलाइ मुक्ति निङ्लि द्वाको हाइपालिपानु झाराङदोफा खान्धुरि मान्ठुखे | 3 कालाउ प्रभुते खान्धुरि योग्यो हिका हि | वादोङ नेलाइहेङ हिसिकाबुङ बेलाता माथिसिङ हिलि धिरपाखे कालाउ पापिसो इस्तिर (घेराङ्तेङ्सा) ताअ्खे |कालाउ दुस्तसो सुरुक्स्या ताअ्खे | 4 केलाइ जेदोङ काथाको आग्या पिन्हाखे,इङ्को नेलाइ पादोङ्सुखेना कालाउ पासुवानाबुङ दोअ्का केलाइ नेलाइको बारेता प्रभुता आसा ताका हिनाहि | 5 प्रभु नेलाइको हृदयहेङ परमेस्वरको माया कालाउ ख्रिस्तको धेर्य्रभारी हिलि थोनावा | 6 एला ओनेगेलाइ,केलाइको प्रभु येसु:ख्रिस्तको मिङ्ता केलाइ नेलाइहेङ आग्या पिन्हाखे,कि केलाइसो नेलाइदोङ निङ्का सिक्स्याता मालागिका गोताङ कुरिया ओनेसो फारापा हिसु | 7 हाइपालिपानु नेलाइदोङ हेसा केलाइको भाइपाङ पालिगोइखे इङ्को नेलासोइ ताइमिङ गिसुवाना | केलाइ नेलाइ दोफा हिलाउ कुरिया जेङ्तेङ माहिनाहि | 8 केलाइ हासुकोबुङ सेले एनसाङ सितैता माचान्हाहि | कालाउ नेलाइ हासुहेङ्बुङ मार्का माज्याको दोअ्तेङ केलाइ न्हिसिङ नितिमा मादोसिङ दुःख पातेङ्सा काम पान्हाहि | 9 साघाइ निङ्लि केलाइको खाबारा माजेङ्तेङ माको,कालाउ केलाइको बानिबेहोरा नेलाइको भाअ्सिङ एनोङ रेम्का उदाहरन जेनाको दोअ्तेङ केलाइ इङ्सा पान्हाहि | 10 नेलाइको दोफा हिलाउ केलाइ नेलाइहेङ इदोइ आग्या पिका हिघनाखे,''हासुबुङ काम मापाखे पानु वादोङ उम माचाको |'' 11 हाइपालिपानु केलाइ हिङ्नाखे, कि नेलाइ मध्येता हेथेते कुरिया जिवन भोगितेङ हिसुखेना | नेलाइ ताइमि चाहि हाइदोङ कामदोङ मापाखे कालाउ बोमिको कामता बेकार्ता खुर लगाइखे | 12 एला इसिका द्याङ्गेलाइहेङ प्रभु येसु:ख्रिस्तको मिङ्ता केलाइ आग्या कालाउ आर्ति प्याङ,कि इम्बालाइ सिकापा ताइको काम पाको कालाउ ताइकोङ खुरसो कामाइतेङ चाको | 13 नेलाइ चाहि ओनेगेलाइ,भालाइ पालिको भाअ्सिङ मामाइसु | 14 एदोङ पाताराता केलाइ दोअ्का काथा यदि हासुबुङ मानेलि माभोखेदोनु इङ्को द्याङहेङ नाल्तेङ ताअ्सु कालाउ वा दोफा हाइदोङ सम्बन्ध माअ्तासु ,कालाउ इङ्को सर्मता जेङ्तेङ्सा लेदेरताको | 15 ताबुङ वासेहेङ सतुरभाइपा मासम्झे,कालाउ ताइकोङ ओने भाइपा पातेङ वासेहेङ थिपासु | 16 एला सान्तिको प्रभु ताइमिङ गोतेङ समय,गोतेङ पाहासो नेलाइहेङ सान्ति प्याको |प्रभु नेलाइ झाराङ दोफा हृयाको | 17 का पावल,ताइकोङ खुरसो इदोइ अभिबादन लेखिदोङ्खा | काङ्को गोतेङ पाताराको नालपाका इदोङ्दोङ हि | इन्साङ्दोङ का लेखिदोङ्खा | 18 केलाइको प्रभु येसु:ख्रिस्तको अनुग्रह नेलाइ झाराङदोफा ह्याको |