2 Timothy
2 तीमुथियुस
1
ख्रिस्त येसु:को एनोङ प्रेरित पावलसो,परमेस्वर कासिहेङ प्रेरित बानाइलि खाङ्हि | वा कासिहेङ ख्रिस्त येसु:ता जिनको प्रतिग्याताको बारे बानाल पालि आदेस पिहि | 2 काङ्को प्रिय सोना चान तिमोथि दोफा,कालाउ आबा परमेस्वर कालाउ केलाइको प्रभु ख्रिस्त येसु:सो नासेहेङ,अनुग्रह,कृपा कालाउ सान्ति मिलियाको | 3 निसिन कालाउ नितिम ताइको दोमचाकाता नासिहेङ फोमपाङ्का,काङ्को दोमचाकाइका गेलाइता का नाङ्को भाअ्सिङ परमेस्वरहेङ धन्यबाद चदाइखा | काङ्को आजाइ -आजुगेलाइ सेवापाका परमेस्वर वादोङ हिकाहि,जेदोङ काथापालि उचित हि दोअ्का का गिखा,इङ्कोङ काथागेलाइ पातेङ का दिनाङ वाको सेवा पाङ्का | 4 का काङ्को मनता मितिह्यापाका फोम्पाखा ,ओदोङ भाअ्सिङ का नासेहेङ भेतिलि मेनाङ उत्सुक हिगा ज्याइसो का आनन्दहोइ पोङ्घातेङ हिलि द्वाको | 5 का नाङ्को सत्ये खान्धुरिबुङ फोम्पाखा,नाङ्को आजाइ लोइस कालाउ नाङ्को आमाइ युनिस्माता इन्सिका किसिमको खान्धुरि हिगाहि | एला का निस्चित हिगा नाङ्कोबुङ इन्सिकाङ खान्धुरि हि | 6 ओदोङ भाअ्सिङ का नासेहेङ परमेस्वर पिका इङ्को बरदान को बारे फोम्पालि खाङ्खा ,जेलाउ का ताइको काङ्को खुर नाङ्कोता ताअ्घा, परमेस्वर नासेहेङ इङ्को वरदान पिहि | एला का चाहिखा इङ्को बरदानको उपयोग पाअ् कालाउ में दाल्दाल्लातेङ धालाङ्गापा भाइपाङ् बाराको | 7 परमेस्वर केलाइहेङ माथिका आत्मा पिका हि, वा केलाइहेङ सरबुङ्को आत्मा, कालाउ आत्मासयमीको आत्मा पिका हि | 8 ओदोङ भाअ्सिङ केलाइको प्रभु येसु:को बारेता द्याङ्गेलाइहेङ दोअ्लि मालेदेरसु | कालाउ का कैदता हिगा दोअ्तेङ्बुङ मालेदेरसु,कालाउ ये: बानालको भाअ्सिङ का दोफा दुःखता सहभागि जेङ्सु | एन्सापालि परमेस्वर केलाइहेङ सरबुङ पिखे | 9 परमेस्वर केलाइहेङ बान्चिपाका हि कालाउ केलाइहेङ ताइको पबित्तरो द्याङ बानाइका हि | या केलाइ हाइदोङ पातेङ जेङ्का माको | माको,परमेस्वर या वाको इस्सा कालाउ अनुग्रहहोइ केलाइहेङ बान्चिपाहि कालाउ वाको द्याङ जेङ्लि काइहि | या अनुग्रह ख्रिस्त येसु:पाहा केलाइहेङ लाम्फोर्तिसोङ खान्तेङ्बुङ लाम्फा सोङ पिका हिगाहि | 10 इङ्को अनुग्रह नासेहेङ नानि थिकापा तिङ्पाका मान्थुघाहि,केलाइको मुक्ति दाता ख्रिस्त येसु:लोतेङ न्हुसो इङ्को तिङ्पाहि | येसु:सिकाहेङ नासापाहि कालाउ जिवनको दामा तिङ्पाहि | एइ ये: बानालपाहासो येसु:केलाइहेङ अनन्त जिवनको इङ्को दामा तिङ्पाहि | 11 ओदोङ ये: बानाल बानालपालिको भाअ्सिङ एमि गुरु कालाउ प्रेरितको रुपता कासेहेङ नियुक्त पाहि | 12 ओदोङ ये: बानाल बानालपालिको भाअ्सिङ एला का कष्ट भोगिलि परितेङ हिगा,कालाउबुङ काङ्को लेदेर मान्थु | का वा एमिहेङ गिखा ज्याइहेङ का खान्धुरिपाघा | का खान्धुरि पाखा कि कासिहेङ वा स सोम्पिपिखा काङ्को हेरचाह पालि इङ्को दिना थेकापा वा राजि पाकाहि | 13 काङ्को सो हिङ्का सत्ये सिकस्या गेलाइको भाइपाङ पासु ख्रिस्त येसु:ता हिका केलाइको प्रेम कालाउ खान्धुरिदोफा इदोइ सिकस्या गेलाइको अनुसरन पा | इङ्को सिक्स्यागेलाइ नाङ्को सिकस्याको भाअ्सिङ उदाहरन जेङ | 14 नासिहेङ पिका सत्येको रक्स्या पा,केलाइकोता हिका पबित्तरो आत्माको साघाइकाको इङ्को काथागेलाइ को रकस्सया पा | 15 नासिहेङ थाहा हि कि एसियाता कासिहेङ झाराङ लाअ्हि | थाइगेलस कालाउ हर्मोजेनस धरिबुङ कासेहेङ लाअ्हि | 16 अन्सिफरसको जाहानहेङ परमेस्वर कृपा पाको दोअ्तेङ का दोम्चाखा | अन्सिफोरस कासेहेङ काङ्को कष्टता हेन्जाङ खेप सघाइहि , कासिहेङ बन्दि तिङ्तेङ वा मालेदेर हि | 17 ओहो! जेलाउ वा रोमता लोहि कासेहेङ मानिङ्पा भरि वा कासेहेङ लागातार भोअ्तेङ हि | 18 का दोम्चाखा इङ्को दिना प्रभु अन्सिफोरसहेङ कृपा पाको | ना रेम्फा गिखेना कि एफिससता वा कासेहेङ हेन्जाङ प्रकारसो सघाइहि |