2
तिमोथि! ना काङ्को चान भाइका हिना,ख्रिस्त येसु:ता हिका केलाइको अनुग्रहता दृदता जेङ्सु | 2 का धिरपाका काथा ना हिङ्का हिना,आरु हेन्जाङ द्याङ्गेलाइ इङ्को काथा हिङ्का हि | नासेहेङ पत्यार लागेका द्याङ्गेलाइहेङ इङ्को काथागेलाइ सोमपि जेसाङ इम्बालाइबुङ इङ्को पाहासो आरू गेलाइहेङ धिरपालि योग्य जेनाको | 3 केलाइको दुःखको भागिदार जेङ्सु,ख्रिस्त येसु:को सन्चो लान्ठागेलाइ भाइका दुःखगेलाइ स्विकार पासु | 4 लान्ठागेलाइ ताइको नायकेहेङ सनतुस्त बानाइलि भोखे | ओदोङ भाअ्सिङ वा साधारन जिवनको कामता माफसिखे | 5 एदि हिदोइबुङ खेलाडि धाअ्काता भाग र्-हुलि इचसा पाहेपानु इनाम निङ्लिको भाअ्सिङ वा धाअ्काको नियम पालन पालि गोइखे | 6 किसानगेलाइ थाङ्का परिस्रम पाखे वा ताइमि योपाका बालिको लाङ् खाबारा हिलि गोइखे | 7 काङ्को दोअ्का काथा गेलाइता बिचार पासु,प्रभु नासेहेङ इदोइ बुझिलि दोका गोताङ सरबुङ प्यावा | 8 येसु:ख्रिस्तको फोमपासु,वा दाउदको सान्तान हिकाहि | येसु:हेङ सिकासो न्हुसो सिन्हुपाका हिगाहि,ओदोङ भाअ्सिङ ये: बानाल का द्याङ्गेलाइहेङ दोअ्खा | 9 कालाउ इङ्को ये:बानाल खान्तेङ का दुःख निङ्चातेङ हिघा, आपराधिहेङ भाइपाङ झिनझिरिहोइ धेउका आवास्थाता का कष्ट निङ्तेङ हिघा | कालाउ परमेस्वरको सिक्स्या झिनझिरिहोइ माधेउनाखे | 10 ओदोङ भाअ्सिङ का इदोइ गोताङ कष्टगेलाइ धर्यता पुर्बक भोगितेङ हिघा,परमेस्वर चुनिका इङ्को झाराङ्को भाअ्सिङ्का एसापाखा ख्रिस्त येसु:ता हिका इङ्को द्याङ्गेलाइ मुक्ति निनाको दोतेङ्दोङ का इदोइ यातानागेलाइ स्विकार पाखा | ओदोङ मुक्तिसो महिमा लोखे जेदोङ अनन्त हिखे | 11 या एनोङ जातिङ्को सिकस्या हि: एदि केलाइ वाको दोफा सि:कानु,कालाउ केलाइबुङ वाको दोफाङ सिन्हुधाङ | 12 एदि केलाइ दुःख कालाउ कष्ट सहिलि दोहेपानु केलाइ वाको दोफाङ सासन पाङ | एदि केलाइ स्विकार माहेपानु वाबुङ केलाइहेङ स्विकार मापावा | 13 एदि केलाइ खान्धुराइ माजेङ्लाउबुङ,वा झन हेन्जा खान्धुरि हिकाहि हाइपालिपानु वा ताइको स्वभाबहेङ अस्विकार पालि मादोखे | 14 द्याङ्गेलाइहेङ इदोइ काथागेलाइ दोअ्तेङ हिसु,कालाउ परमेस्वर आगाता इम्बालाइहेङ चेतावनि पि ज्याइ सो ओबालाइ बचन चुम्पुतेङ हिदोइबुङ काथाता माफेसुसु | बचनगेलाइको बारेता काथा चिसु काथा हाइबुङ फाइदा मान्थु | जातिङ्कोङ इदोइहोइ हिङ्कालाइहेङबुङ नासा पाखे | 15 परमेस्वरको आगाता इसिका खाल्को ताइमिङ जाअ्लि भरसक कोसिस पासु कि वा नेलाइहेङ अनुमद्न पावा | ताइको कामता लेदेरका माजेङ्सु,भरू सत्ये सिक्स्याहेङ ठिकसो प्रयोग पाका द्याङ जेङ्सु | 16 ज्याइ परमेस्वरसो लोका माको इन्सिका माजेङ्का काथागेलाइ दोअ्कालाइसो फारापा हिसु | इन्सिका काथा होइ द्याङ्गेलाइहेङ परमेस्वरको झनझन बिरोधि बानाइलि आगालधाअ्पाखे | 17 इम्बालाइको धाताइका सिक्स्या जिउता रोग भाइपाङ चारयावा,हाइमिनियोस कालाउ फिलितोस इन्सिकाङ द्याङ्गेलाइ दोङ | 18 इम्बालाइ सत्ये सिक्स्या लाअ्हि,इम्बालाइ धिरपाखेकि सिकासो सिन्चालते लाम्फाङ जेङ्हि | इदोइदोङ रिति होइ इङ्को न्हेमि हेथेते द्याङ्गेलाइको खान्धुरिगेलाइहेङ मअ्पादोङ्खे | 19 कालाउ परमेस्वरको द्द जग जातिङ हिखे,कालाउ इङ्कोता इदोइ साप लगिकाहि,''प्रभु ताइको द्याङ्गेलाइहेङ नाल्खे,''कालाउ प्रभुको मिङ र्-हुका जति गोताङ द्याङ अधर्मसो दुरेदोङ ह्याको | 20 एनोङ सातासोना कालाउ चान्दिहोइ बानाइका आनेमाने हिखे,कालाउबुङ इन्ता फाला कालाउ भनोइहोइ बानाइका आमेनेबुङ हि | आधे बिसेस कामको भाअ्सिङ हिखेपानु आधे साधारन कामको भाअ्सिङ हिखे | 21 एदि हासुबुङ ताइमिहेङ मारेमका कामसो बिसुद बानाइखेपानु वासेहेङ बिसेस रेमकाकामता प्रयोग पावा | उङ्को द्याङ पबित्तरो जेनावा कालाउ वा साको माझनको भाअ्सिङ उपयोगि जेङ्खे वा गोताङ कामको भाअ्सिङ रेमका कालाउ सोबाइका जेङ्खे | 22 धानाको अभिलासासो दुरे हिसु रेमका जिवन जाइलि खान्धुरि,प्रेम कालाउ सान्ति निङ्लि बारका कोसिस पासु | इदोइ काथागेलाइ सुद हृदय जेङ्का कालाउ प्रभुता खान्धुरिहिका द्याङ्गेलाइको सङ्गत पालि कोसिस पासु | 23 हाइदोङ मागिका कालाउ सम्झिलि मादोका जालबाजिगेलाइ लाअ्सु ना गिखेना इन्सिका जाबाजि पातेङ हेन्जा झन मारेमका काथा गेलाइ जेनावा | 24 प्रभुको सेवक चेरसुलि माएल,झाराङ दोफा दाया हिलिगोइखे | प्रभुको सेवक एल्का गुरु हिल गोइखे,वा सहिलिदोका हिलिगोइखे | 25 ताइमिदोफा सहमत माजेङ्का द्याङ्गेलाइहेङ वा नम्रता तिङ्पातेङ धिरपालि गोइखे | परमेस्वर ओबालाइको हृदय परिबर्तन पालि द्वाङ कालाउ ओबालाइ सत्येहेङ स्विकार ह्यावा | 26 कालाउ ओबालाइ चेतना निङ्तेङ दियाबलसको जालेसो खातावा,ज्याइ ओबालाइहेङ वाको इस्सा आनुसार चलिलि बन्दि बानाइका हि |