5
वाराङ द्याङहेङ माहापकाइ, कालाउ वासेहेङ आबाहेङ भाइपाङ सम्झाइ | ताइमिखान्तेङ म्हुइका गेलाइदोफा ताइको ओने समान ब्यवहार पा | 2 बेराङ,बेबालाइदोफा ताइको आमाइदोङ भाइपा,कालाउ बेजालाइदोफा चाहि झाराङहे्ङ पबित्तरो रेम्का नजरसो ताइको आनाउ बेजान ओने भाइपाङ समान ब्यवहर पासु | 3 ज्याइ जातिङ्कोदोङ रान्धि हि,वासेहेङ आदर समान पा | 4 हिदोइबुङ रान्धिको चान चामेन्दि वा चुगेलाइ हिनुपानु इम्बालाइ लाम्फाङ ताइकोङ जहानखिनिङ ,ताइको धार्मिक कर्तब्य मानेलि धिराको,कालाउ ताइको आबा-आमाइको पोसिलिको भाअ्सिङ रिन तिरिलि दोकाको.हाइपालिपानु या परमेस्वरको नजरता हेङ्साङ असल हि | 5 कालाउ जाइ जातिङकोङ दोङ रान्धि हिनु,कालाउ वाको हासुबुङ मान्थुहि पानु वा परमेस्वरको भरोसा पाखे,कालाउ न्हिसिङ नितिमा मादोसिङ प्रभुता जेलाबुङ प्राथना पातेङ लागागितेङ हिखे | 6 कालाउ एदि वा सु:ख सान्ति मोजमस्तिता हिखेपानु ते वा सिन्हुपाङ सि:का भाइपा जेङ्खे | 7 इम्बालाइहेङ इदोइ काथाको आग्या पिसु,कालाउ इम्बालाइहेङ दोसिलि माद्वाको | 8 एदि हासुबुङ ताइकोगेलाइको कालाउ बिसेस पातेङ ताइकोङ जाहानको रेम्फासो चापालि-आम्पालि मादोखेदोनु वादोङ खान्धुरिहेङ इन्कार पाखे,कालाउ खान्धुरि मापागेलाइखान्तेङ बुङ खराब हिखे | 9 सुमकुरि बासारसो हुत्ताको रान्धि,जाइको एखेप खेनिङ बिहु जेङ्का हिगाखे,वासेहेङ खेनिङ रान्धिको दर्जाता ता | 10 दोसाङ वादोङ असल काम पाका,चानचामेन्दिगेलाइ पोसेका,बोमिगेलाइहेङ बान्सा मानेका,प्रभुको दासगेलाइको खोकोइ झापिका,मान्थुकागेलाइहेङ दान पिका कालाउ हिदोइबुङ रेम्का कामता ख्याल पाका हिलि गोइखे | इदोइ गोताङ साबित हिलि गोइखे | 11 कालाउ आतुइसा म्हुइका उमेरको रान्धिगेलाइको मिङ चाहि रान्धि-दर्ताता मालेखेसु ,हाइपालिपानु जेलाउ इम्बालाइको लेसाइका मन जेनावा इम्बालाइहेङ ख्रिस्तसो दुरे चुम्पुखे,कालाउ इम्बालाइ बिहु पाका इच्सा पाखे | 12 एसापा ताइको लाङ कसम चाका भङ्ग पानाङ इङ्को कारन इम्बालाइ दण्डता परिखे | 13 इङ्को बाहेक इन्तासो आरोङ इम्बालाइ सा-सा हिगिल्का जेङ्तेङ आल्सि पाका खिनिङ माको कालाउ काथा भानाइका बोमिको कामता खुर लागाइका, दानाइपाका, धुइलि मासोबाइका, दोअ्लि माएलका काथागेलाइ दोअ्का जेङ्खे | 14 इदोइ भाअ्सिङ आतुइका उमेरको रान्धिगेलाइ बिहु पाको,चान चामिन्दिगेलाइ जेनाको,सापातेङ चाको कालाउ खाङ्लिमाकिगेलाइ केलाइको बदनाम पाका मौका मापियाको दोका का भोखा | 15 हाइपालिपानु आधिमि-आधिमिते लाम्फाङ दोङ सैतानभारि हानेका हि | 16 एदि खान्धुरि तिरिको(नारि) हासुबुङ ताइको गेलाइ रान्धि हि दोनु वा इम्बालाइहेङ साघाइसु कालाउ मण्डलि हुत्ता हेदोइबुङ झन्झट माज्याको,कालाउ मण्डलि चाहि रान्धिगेलाइहेङ साघाइलि पिलि द्वाको | 17 मन्डलिको रेम्फा हेरचाह पाका एल्डरगेलाइ दोब्बल मानको योग्यको हिखे,बिसेस पातेङ जाइ वचनको बानाल कालाउ धिरपाका परिश्रम पाखे | 18 हाइपालिपानु पबित्तरो सास्त्तर दोअ्खे,''दाउनि पाका पियाको नुइता मोहोला मालागाइसु ''कालाउ''काम पाका द्याङ्गेलाइको कामको ज्याला (हाजिरा) निङ्लिगोइखे |'' 19 न्हेमि वा सुमि गवाहिको माकोसिङ एल्डरको बिरुद्ता लागाइका आरोप हेलाउबुङ मामानेसु | 20 पापता लागितेङ् हिकागेलाइहेङ झाराङ्को आगाता ह्प्काइसु, कालाउ एसापाङ आरुगेलाइबुङ थियावा | 21 परमेस्वर कालाउ ख्रिस्त येसु:को आगाता कालाउ साल्का स्वर्गदुतगेलाइको आगाता का नेलाइहेङ कडासो आदेस पिखा,हेदोइबुङ काथाता लेता हुता मासुताइसिङ वा दा:का जे:का मादोसिङ इदोइ नियमगेलाइ नादोङ मानेसु | 22 हासुकोबुङ हुता खुर ताअ्का काम हातार मापा ,हिदोइबुङ द्याङ्को पापता सह्भागि माजेङ्सु , ताइमिहेङ पबित्तरो तासु | 23 लाम्फा भाइपा चि खिनिङ माआम्सु, कालाउ नाङ्को हामुको भासिङ कालाउ जेलाउ -सेलाउ मासाधितेङ हिलाउ आतुङ-आतुङ्सा पातेङ गोरा चि आम्सु | 24 हिदोइबुङ हेदोइ द्याङ्को पापगेलाइते सिधाङ न्यायता हानेका भाइपाङ सलर्ग तिङ्खे,कालाउ हेथेको पापगेलाइ न्हुसोखिनिङ तिङ्लि दोखे | 25 एसापाङ पातेङ रेम्का कामगेलाइताते मिसियाको आगाता धाइधाइपा तिङ्लिदोखे, कालाउ जेदोङ कामगेलाइ थाइथाइपा मान्थुहि पानुबुङ इङ्को कामगेलाइ लिता हिलि माद्वा |