3
इदोइ दोअ्का काथा खान्धुरिपालि योग्य खालको हि,एदि हिदोइबुङ द्याङ बिसपको काम पालि भोखे दोनु वा रेम्काङ कामको इच्सा पाखे | 2 ओदोङ भाअ्सिङ बिसपचाहि हासुकोङ्बुङ दोसिलि लागाइलि मादोका,एनोङ्दोङ बेको के, सयमि, नाइतिगेलाइ दोफा मिलिका, साम्मानित बुझिका,गिका,झाराङ द्याङ्गेलाइदोङ मानेका,बान्सालाइहेङ चापाका -आम्पाका रेम्फासो खाङ्का गोताङ काथागेलाइसो गिका गुरु जेनाको, 3 गोरा चि माआम्का कालाउ हेन्साङ चेर माताङ्पाका माको कालाउ वा खु:सि जेङ्तेङ हिका,माफेसुका,धनको लालच मापाका, 4 ताइको सा रेम्फासो खाङ्लि(चालाइलि) दोका कालाउ ताइको चानचामेन्दिगेलाइहेङ रेम्का तरिकासो आग्या पालि दोका बानाइयावा | 5 एदि हिदोइबुङ द्याङ ताइको साको जाहानगेलाइहेङ तहता ताअ्लि मादोखेपानु वा परमेस्वरको मण्डलिहेङ हेसापातेङ साअ्म्हाराइयावा द्वारो ? 6 वा नावा खान्धुराइ माज्याको ,माकुनु वा घमन्ड जेङ्तेङ फुलियावा कालाउ वा दियाबलसहेङ पिका दण्डता परियावा | 7 आरोङ अन्यजातिगेलाइको नजरताबुङ वा असल हिलि वा गोइयावा,माकुनु वा निन्दा सराप साइतानको पासोता परियावा | 8 एनसापातेङ डिकनगेलाइबुङ होसियार हिलि गोइखे,न्हेलोङ नुइ माको,हेन्जा गोरा चि-आमका कालाउ धनको चिचा पाका माको, 9 कालाउ इम्बालाइ खान्धुरिको रहस्य साफा पुन्धुइ (दिमागता) ताअ्तेङ हिलि दोका गोइखे, 10 लाम्फाङ इम्बालाइको जाचबुङ जेनाको | इन्तासो इम्बालाइ ताइमिहेङ दोसिलिपालि मादोका दोतेङ प्रमाणित पालिदोनु इम्बालाइ डिकनको सेवा पाको | 11 तिरिगेलाइबुङ एसाङपातेङ होसियार हिसु,बोमिको मारेम्का काथा मापाका,कालाउ गोतेङ काथाता सियमि, मिलितेङ हिका कालाउ खान्धुरि पालिको भाअ्सिङ योग्य हिलि गोइखे | 12 डिकन एनोङ्दोङ बेको के ह्याको | ताइको चानचामिन्दिगेलाइ कालाउ ताइको साको बन्दोबस्त रेम्फासो मिलिपालि दोका ह्याको | 13 हाइपालिपानु डिकनबुङ पालिगोइका सेवा जाइदोङ रेम्फासो पाखे,इम्बालाइदोङ ता-ताइमिको भाअ्सिङ मानसम्मान कालाउ येसु:ख्रिस्तता जेङ्का खान्धुरिताबुङ बारका आसा निनावा | 14 नाङको दोफा मारफाङ लोलि आसा पाका हिगा,कालाउ का या नासिहेङ लेखिखा; 15 कालाउ हिसोबुङ का न्हुघा (धिला जेङ्घा) पानुबुङ परमेस्वरको साता,जाइ सिन्हुका परमेस्वरको मण्डलिदोङ कालाउ सत्येको खाम्बा कालाउ टेकुवा हि,इन्ता हेसा हिलि,चोलिलि गोइखे एसा ना गितेङ हिसु | 16 केलाइ या मानिन्हाखे कि केलाइको खान्धुरिता लिताको काथागेलाइ हेङ्साङ (हेन्जाङ) माहान हि:वा ताइकोङ जिउता प्रकट जेङ्हि,पबित्तरो आत्मासो धर्मि थोहराइहि,स्वर्गदुतगेलाइसो तिङ्पाहि,जाति-जातिगेलाइको माझाता बानाल पाहि,स्सुमिङ्ता (संसार) खान्धुरि पालिदोहि,महिमाता हुत्ता तोल्होहि |