4
दाइ-ओनेगेलाइ कालाउ बाइ-ओनेगेलाइ,एला का नेलाइहेङ आराङ आतुइसा भेनेङ काथा दोअ्दोङ्खा | परमेस्वरहेङ लेङ्चापा ताअ्लिको भाअ्सिङ हेसा जिउलि गोइखे इङ्को केलाइ नेलाइहेङ धिरपाका हिनाहि कालाउ एन्सापाङ्दोङ नेलाइ हिघासुखेना | एला केलाइ नेलाइहेङ दोअ्नाखे कालाउ उत्साहा प्याङ कि प्रभु येसु:ता एन्साङ्पातेङ झन लागेतेङ हिसु | 2 नेलाइ गिसुखेना कि केलाइ नेलाइहेङ हाइ पालि सिक्स्या पिका हिनाहि | केलाइ इङ्को काथागेलाइ प्रभु येसु:को खाबारासो दोअ्का हिनाहि | 3 परमेस्वर चाहिखे नेलाइ पबित्त्तरो जिवन बितिपासु कालाउ कासिबिरिसो दुरे हिसु | 4 परमेस्वर इच्सा पाखे कि नेलाइ ताइको जिउ काबुता ताअ्लि धिरलि गोइखे | कालाउ कुसुमिसो (कासिबिरि) दुरे हिसु कालाउ परमेस्वरहेङ सामान पालि नेलाइको जिउ पबित्त्तरो ताअ्सु | 5 ताइको जिउहेङ कासिबिरिको कामता मालागाइसु | इम्बालाइ ज्याइ-ज्याइ परमेस्वरहेङ मानाल्खे इम्बालाइ एन्सा पाखे | 6 इदोइ बिसयता नेलाइ हासुबुङ ख्रिस्ता हिका आनेदोफा गाल्ति काम पालि माएल कालाउ वाको सोसन पालि माएल | इन्सिका मारेम्का काम पाकालाइहेङ परमप्रभु दण्ड प्यावा | इदोइको बारेता लाम्फाङ दोअ्लि दोका हिनाहि कालाउ चेताउनिबुङ पिलि दोका हिनाहि | 7 परमेस्वर केलाइहेङ पबित्त्तरो हिलि दोअ्तेङ काइका हि | मा-पबित्त्तरो माको | 8 ओदोङ भाअ्सिङ ज्याइ इदोइ सिक्स्याहेङ किलि माकिखे एन्साङ वा परमेस्वरहेङ किलि माकिखे द्याङ्हेङ माको | परमेस्वर नेलाइहेङ ताइको पबित्त्तरो आत्मा प्यावा | 9 ख्रिस्ता काङ्को आनाङ वाजान ओनेलाइ कालाउ बेजान ओनलाइहेङ प्रेम पासु दोअ्तेङ लेखेतेङ हिलि हिदोइबुङ जरुरि मातिङ्खे | ता-ताइमिता प्रेम पासु दोअ्का आग्या परमेस्वर स्वयम ताइमिङ पिलि दोअ्होइ | 10 हुनु ते नेलाइ म्यासिजेनियाका गोताङ दाइ-ओने कालाउ बाइ-ओनेगेलाइहेङ प्रेम पासुखेना | दाइ-ओने,बाइ-ओनेगेलाइ,इम्बालाइहेङ झन बलियापा प्रेम पासु , या केलाइको हाउसाइपाका | 11 सान्ति पुर्न जिवन बान्चिकाचिका कोसिस पासु | ताइकोङ ब्यवहार याद पासु,ताइकोङ खुरहोइ काम पासु | केलाइ नेलाइहेङ इदोइ कामगेलाइ पासु दोअ्तेङ दोअ्लि दोनाहोइ | 12 एदि नेलाइ इसिका काम पाहे पानु खान्धुरि मापाकालाइबुङ नाङ्को जिवन सैलिको आदार पावा | कालाउ ताइकोङ गोइकाको भाअ्सिङ हासुबुङ दोफा भर परिलि मागोइखे | 13 दाइ-ओनेगेलाइ कालाउ बाइ-ओनेगेलाइ: केलाइ भोनाखे,ज्याइ सि:लि तोमका हायावा वाको बिसयताबुङ नेलाइ गिसु | केलाइ माचाहिनाखे कि आरू आसा मान्थुका द्याङ्गेलाइ भाइका नेलाइ सोक पालि मागोयाको | 14 केलाइ खान्धुरि पानाखे,कि येसु: सि:हि,|कालाउ केलाइ इदोइबुङ खान्धुरि पानाखे कि येसु: आरोङ सिन्हुहि | ओदोङ भाअ्सिङ येसु:कोङ कारनहोइ परमेस्वर इङ्को सिकालाइहेङ आरुङ येसु: दोफा एदोफाङ चुमावा | 15 एला नेलाइहेङ केलाइ जेदोङ दोनाखे इङ्को बचन परम प्रभु स्वयम ताइमिङ सो लोका हि | केलाइको माझाता या जिवन एला बान्चिका हि,परमप्रभु लोलाउबुङ आधे बान्चियावा | कालाउबुङ केलाइ इङ्को समयता थेकापा बान्चितेङ हिका हृयाङ,परमप्रभु दोफा ह्याङ,कालाउ ज्याइ लाम्फा सिकालाइ खान्तेङ लाम्फा माको | 16 परमप्रभु स्वयम स्वर्ग्स ल्वाङ | ओदोङ बेला एलोङ बारका गालाता आदेस हिनाङ | आदेस प्रधान स्वर्गदुतको गालाता कालाउ परमेस्वरको तुरहिको स्वरता जेनावा | कालाउ लाम्फा ज्याइ सि:का हि कालाउ ख्रिस्ता हिघाहि,लाम्फा ल्होकावा | 17 कालाउ न्हुसो एन्सालाउ ठेकापा बान्चितेङ हिका केलाइहेङ जोम्पावा | केलाइहेङ बादेलता चुम्पावा कालाउ प्रभुहेङ भेर्माता भेप्याङ | कालाउ केलाइ हेलालाउबुङ (सदाकाल) प्रभुदोका ह्याङ | 18 ओदोङ भाअ्सिङ इसिका बचनगेलाइहेङ एमि सो भेनेङ्हेङ हाउसाइ पातेङ हिसु |