Colossians
कुलुस्सियों
1
ख्रिस्त ये:सुको प्रेरित पावलसो,का एमि प्रेरित हाइपालिपानु परमेस्वर इदोइदोङ मन चाहि | तिमोथि ख्रिस्ता हिका केलाइको ओनेसोबुङ | 2 क्ल्ससेता हिका ज्याइ ख्रिस्तता हिका पबित्तरो कालाउ खान्धुराइ दाइ-ओने बाइ-बेजान ओनेगेलाइ | नेलाइहेङ केलाइको आबा परमेस्वरसो अनुग्रह कालाउ सान्ति मिलियाको | 3 जेलाउ केलाइ नेलाइको भाअ्सिङ दोमचानाखे,परमेस्वरहेङ ज्याइ केलाइको प्रभु ये:सुख्रिस्तको आबा हि,दिनाङ धन्यबाद पामाखे | 4 केलाइ परमेस्वरहेङ धन्यबाद पिनाखे हाइपालिपानु ख्रिस्त ये:सुता नेलाइको खान्धुरि कालाउ परमेस्वरको गोताङ जनगेलाइता प्रेमहिका काथा केलाइ हिङ्न्हाहि | 5 नेलाइता आसा हिनाङ नेलाइको ख्रिस्ता खान्धुरि हि कालाउ परमेस्वरको गोताङ जनगेलाइहेङ नेलाइ प्रेम पासुखेना | नेलाइको आसापाका काथा नेलाइको भाअ्सिङ स्वर्गता जोम्पातेङ ताअ्का हि दोअ्का नेलाइ गिसुखेना | नेलाइ इदोइ आसाको बारेता सत्ये सिक्स्यासो ये:बानाल धिरनाहि जेदोङ नेलाइहेङ दोअ्का हि | 6 सुमिङ्को गोताङ कुन्हा-कुन्हाता इङ्को ये: बानालहोइ आसिस कालाउ सेकागेलाइ चुमादोङ्खे | इङ्को ये:बानाल हिङ्तेङ कालाउ परमेस्वरको अनुग्रहको बारे सत्ये काथा बुझितेङ नेलाइबुङ इङ्कोङ अनुभब पाकाताङ हिसुन्हा | 7 परमेस्वरको अनुग्रहको बारे नेलाइ इपाफ्राससो धिर्का हिसुन्हा | इपाफ्रास केलाइदोफाङ काम पाखे,कालाउ केलाइ वासेहेङ मायारो पानाखे | केलाउको भाअ्सिङ वा ख्रिस्ता खान्धुरि सेवक हि | 8 पबित्तरो आत्मासो नेलाइ निङ्का प्रेमको बारेता इपाफ्रास केलाइहेङ दोअ्पिहि | 9 नेलाइको बारेता इदोइ गोताङ काथागेलाइ केलाइ हिङ्का दिनासोङ,केलाइ नेलाइको भाअ्सिङ लागातार दोमचाकाइतेङ हिनाहि | केलाइ इदोइ गेलाइको भाअ्सि दोमचाकाइनाखे: परमेस्वरको मन भाइपा गोताङ काथागेलाइ बुझिलि ग्यान कालाउ सरबुङ निनाको, 10 नेलाइ इसिका पातेङ बान्चिसु कि नेलाइ प्रभुता गौरब चुमास्वाना कालाउ गोताङपाहासो वासेहेङ लेङचापास्वाना | नेलाइ झाराङ रेम्फा पास्वाना कालाउ परमेस्वरको ग्यानता बिकास पातेङ हिलि दोअ्स्वाना | 11 ना परमेस्वरको गौरबमय सरबुङ्होइ सारबुसाइका जेङ्लि दोअ्स्वाना जेलाउ कि ना र्-हुमलि दोका जेनावा कालाउ गोताङ कस्तगेलाइ सहिलि द्वाना | कालाउ नेलाइ लेङ्चातेङ हिलि दोस्वाना | 12 कालाउ ना आबाहेङ धन्यबाद प्याना,ज्याइ नासेहेङ परमेस्वरको द्याङ्गेलाइ ज्याइ फाइसालामाकाता बान्चिखे,परमेस्वर इम्बालाइको भाअ्सिङ तियारपाका आमेनेगेलाइता भाग र्हुलि योग्य बानाइहि | 13 कितिकितिका को सरबुङ्सो परमेस्वर केलाइहेङ लाअ्पाका हि | कालाउ वा केलाइहेङ ताइको मायारु चानको सारभिता चुमाका हि | 14 केलाइहेङ वा लाअ्पाहि(मुक्तपाहि) कालाउ वाकोता केलाइको पापगेलाइ स्यामा पापिका हि | 15 परमेस्वरहेङ हासुबुङ तिङ्लि माद्वाङ कालाउ परमेस्वर आवाङ ये:सुदोङ हि | ख्रिस्तको गोताङ आनेमाने हुसो(हुता) येसु: सासक हि | 16 वाकोङ सरबुङ सो गोताङ आनेमाने सिरजाइका हि स्वर्ग कालाउ पृथ्विको काथागेलाइ,तिङ्लि दोका कालाउ तिङ्लि मादोका काथागेलाइ,सिङ्हासन कालाउ सरबुङ गेलाइ,सासकगेलाइ कालाउ खाबारागेलाइ,इदोइ गोताङ काथागेलाइ ख्रिस्तसो कालाउ वाकोङ भाअ्सिङ बनाइका हि | 17 गोताङ आनेमाने जेङ्लि खान्तेङ्बुङ ख्रिस्त हिका हिघाहि | कालाउ वाकोसो गोताङ आमेने एदोफाङ ताअ्का हि,लागातार काम जेङ्तेङ हिलि | 18 येसु: ख्रिस्त जिउको पुरुङ हि | जिउ मण्डलि | कालाउ वा प्रभु हिका हि ज्याइ सिकासो सिन्चाल्हि(सिन्हुहि, बान्चिहि,सिन्चाल्हि,) | इदोइताङ गोताङ काथाता येसु:दोङ एलोङ हेन्जा महत्वपुर्ण हि | 19 इदोइ परमेस्वरको मन हिघाखे कि वाको गोताङ्ता येसु: ख्रिस्तदोङ बान्चितेङ ह्याको | 20 कालाउ इदोइ परमेस्वरको मन हिखाखे कि वा स्वर्ग कालाउ पृथ्विको गोताङ आनेमानेगेलाइ ख्रिस्त पाहासो आरोङ वाकोता चुमालि | क्रुसता परमेस्वर ख्रिस्तको हितिसो सान्ति चुमाहि | 21 एलोङ समय नेलाइ परमेस्वरसो लाअ्पाका हिघासुना | नेलाइको दुस्त कामगेलाइ जेदोङ परमेस्वर बिरोधि हिनाङ नेलाइ परमेस्वरको सतुर हिघासुघाना | 22 कालाउ ख्रिस्त नेलाइहेङ आरोङ परमेस्वरको सानाइति बानाइ पिकाहि ,ताइको सिकापाहासो इङ्को पाहि,जेलाउ वा जिउता हिघाहि | परमेस्वरको आगाता नेलाइहेङ दोसिलि माबानाइलि वा इन्सिका पाहि | जेलाउ वा जिउता हिघाहि,परमेस्वरको आगाउरि नेलाइहेङ पबित्तरो,निस्क्लङ्क,कालाउ हिदोइबुङ खाल्सो मन्दामाताकासो ताका बानाइतेङ जाअ्पालि वा इन्सा पाहि | 23 नेलाइ हिङ्का ये:बानालता खान्धुरि पाहे पानु ख्रिस्त एन्सा पावा | नेलाइ ताइको खान्धुरिता दृद कालाउ निसित हिलि गोइखे | ये:बानालसो पिका आसासो माचिलबिल्लिसु, इङ्कोङ ये:बानाल सुमिङ्को गोताङ द्याङ्गेलाइहेङ हिङ्पाका हि | का पावल इङ्को ये:बानालको सेवक हिघा | 24 नेलाइको भाअ्सिङ दु:खगेलाइ तोअ्ल्होलि का लेङचाका हिघा | ख्रिस्तको जिउहोइ दु:ख झेलिहि गोइका आरु हेन्जा हि | ज्याइ काङ्को जिउ निङ्लि गोइका कस्तगेलाइ का ग्रहन पालि दोअ्होइका | का वाको जिउ मण्डलिको भाअ्सिङ दु:ख ल्होपाङका | 25 का मण्डलिको सेवक जेङ्घा हाइपालिपानि परमेस्वर कासेहेङ एलोङ बिसेस काम पालि दोअ्तेङ आराइहि | इदोइ कामहोइ नेलाइहेङ्दोङ साघाइयावा | परमेस्वरको वचन गोताङ रेम्फा दोअ्लि काङ्को काम हि | 26 इदोइ म्होका गोप्य सत्ये सुरुसोङ्दोङ गोताङ द्याङ्गेलाइसो म्होन्हाका हिघाहि | कालाउ एला परमेस्वरको पबित्त्तरो जनहेङ इदोइ गोप्यो सत्ये काथा प्रकट पाका हि | 27 उङ्को धनि कालाउ महिमामय सत्ये ताइको द्याङ ग्याको दोअ्तेङ निसित परमेस्वर पाका हि | इङको महान सत्ये गोताङ जातिगेलाइको भाअ्सिङ हि | कालाउ वा सत्ये हिका हि ख्रिस्त स्वयम,ज्याइ नेलाइता झाराङ्ता हि | परमेस्वरको महिमाता भागदारि हिलि वा केलाइको एलोङ आसा हि | 28 ओदोङ भाअ्सिङ केलाइ ख्रिस्तको बारेता लगातार दोअ्काताङ हिनाहि | गोताङ द्याङ्गेलाइहेङ सम्झाइलि कालाउ झाराङहेङ सिक्स्या पिलि केलाइ गोताङ ग्यानहेङ कामता लागाइन्हाखे ताकि झाराङ द्याङ्गेलाइ ख्रिस्तता परिपक्क बनाइतेङ परमेस्वरको आगाता चुमालि द्वाको | 29 एन्सापालि | का ख्रिस्तको पिका बुदिृ कालाउ सरबुङहेङ कामता लगाइकाताङ सङ्घर्सो कालाउ काम पाखा | काङ्को जिवनता इङ्कोङ सरबुङ होइ काम पाखे |