कुलुस्सियों 2

नेलाइहेङ साघाइपालि का दो-मादोपा कोसिस पादोङ्खा दोअ्का काथा दोअ्लि भोखा | कालाउ का भेनेङ दोफा जातिङ्कोङ लाओदिसियाता द्याङ्गेलाइहेङ साघाइलि प्रगाद कोसिसता हिघा ज्याइ कासेहेङ तिङ्काङ मान्थु | 2 का नेलाइहेङ द्वढ कालाउ प्रेमता एलोङ बानाइलि खाङ्खा | का नेलाइहेङ बल्याका खान्धुरिता धनि बानाइलि भोखा जेदोङ समझदारिसो मिलिलि लोखे | काङ्को दोअ्लि खाङ्का इदोङ्दोङ हि परमेस्वर प्रकट पाका म्होनाका गोप्य सत्ये नेलाइ पुरा गिलि गोइस्वाना | इङ्को सत्ये ख्रिस्तदोङ ताइमिङ्दोङ हि | 3 ग्यान कालाउ बुदिृको सारा गोताङ भाकारगेलाइ ख्रिस्ता येसु:ता म्होतेङ ताअ्का हि | 4 का नेलाइहेङ इदोइ काथागेलाइ दोअ्दोङ्खा ताकि हासुबुङ नेलाइहेङ उल्लिदुल्लिको काथा दोअ्तेङ मुर्ख बनाइलि मादावाको | 5 का नेलाइदोफा इन्ता मान्थुघा कालाउबुङ काङ्को हृदय इनताङ हि | नेलाइ रेम्का जिवन धारन सुरु पाकाता कालाउ ख्रिस्ता बलियाका खान्धुरि ताअ्का तिङ्तेङ का आनन्दित हिघा | 6 नेलाइ ख्रिस्त येसु::हेङ प्रभुको रूपता निङ्स्वाना वाकोताङ हिसु | 7 नेलाइ ख्रिस्ता जारि गिङ्सु कालाउ नेलाइको वासेहेङ सुक्खा हिलि पिसु | ज्याइ कि नेलाइहेङ सत्ये धिरपाहि,इङ्को खान्धुरिता बलियाका कालाउ खान्धुरि जेङ्सु कालाउ दिनाङ परमेस्वरहेङ धन्यबाद चदाइसु | 8 सतर्क जेङ्सु ताकि हासुबुङ धाताइका कालाउ माजेङ्का(व्यर्थ) बिचारहोइ नेलाइहेङ धोका माप्याको| इ न्सिका बिचारगेलाइ द्याङ्सो लोखे कालाउ ख्रिस्तसो माको | इन्सिका बिचारगेलाइ सुमीङ्को द्याङ्गेलाइ योग्य बिचार खिनिङ | 9 परमेस्वरको समपुर्न्ता ख्रिस्ता जिउको रूपता हि| , 10 कालाउ ख्रिस्तता नेलाइ पुर्न हिसुना,ज्याइ गोताङ सासक कालाउ सरभुङ गेलाइको पुरुङ हि | 11 ख्रिस्ता नेलाइको भेनेङ खतना पाहि,इसिका खतना द्याङ्सो मापाखे | काङ्को मतलब,नेलाइ ताइको पापपुर्न प्रकृतिको सरबुङ्सो मुक्त पाका हिसुना | ख्रिस्त पालिगोइका खतना इसिका प्रकृतिको हि | 12 इसिका जेङ्हि,जेलाउ नेलाइ बपतिस्ताको मध्याम येसु:ख्रिस्त दोफा लिअ्न्हका हिघासुना कालाउ वाको दोफाङ सिन्चाल्पाहि हाइपालिदोनु परमेस्वरको सरबुङ्ता नेलाइ खान्धुरिपाका हिसुना | ख्रिस्तहेङ सिकासो सिन्चालपातेङ परमेस्वर ताइको सरबुङ तिङ्पाहि | 13 नेलाइको पापगेलाइको कामहोइ कालाउ ताइको पापमय प्रकृतिसो मुक्ति मानिनाङ नेलाइ सि:का हिगासुखेना | कालाउ परमेस्वर नेलाइहेङ ख्रिस्त दोफाङ सिनुपाहि कालाउ केलाइको गोताङ पापगेलाइ स्यामा पापिहि| 14 केलाइ रिनचाका हिनाहि हाइपालिपानु केलाइ परमेस्वरको नियम भङ्ग पाका हिगानाहि | इङ्को रिन पाताराता नियमको सुचि मान्थुघाहि जेदोङ केलाइ मानिका मान्थुघानाहि | कालाउ परमेस्वर केलाइहेङ इङ्को रिनसोबुङ लाअ्पापिहि, परमेस्वर उङ्को रिन क्रुसता चुम्पुतेङ | 15 परमेस्वर आत्मिक सरबुङ कालाउ खाबारागेलाइहेङ जितिहि | क्रुसहोइ परमेस्वर बिजय जेङ्हि कालाउ इङ्को खाबारागेलाइ,सरबुङ गेलाइहेङ हारिपापिहि | इम्बालाइ सरबुङ्हिन हिगाहि,दोअ्का काथा परमेस्वर सुमिङ्ता तिङ्पाहि | 16 ओदोङ भाअ्सिङ नेलाइको चाका-आमकाता यहुदि नियम गेलाइको बिसयता हासुबुङ मादोसुवाको(उत्सब,औसि,पार्बा कालाउ माइसाचाका दिना) | 17 लाम्फा इदोइ काथागेलाइ भबिस्यता जेङ्का काथागेलाइको स्याइरे हिगाहि | इङ्को आमेनेगेलाइ ख्रिस्तादोङ निङ्खे | 18 आधिमि-आधिमि बाहानापालि मनपाखे कालाउ आधिमि स्वर्गदुतगेलाइको आराधाना पालि मनपाखे | इम्बालाइ दोअ्खे ओबालाइ दर्सनगेलाइ तिङ्काहि | ओबालाइहेङ दोअ्का अनुमतिपिलि माएल,''नेलाइ भुल दामाता हिसुना,हाइपालिदोनु नेलाइ इन्सिका आमेनेगेलाइ मापाखे |'' 19 उङ्को द्याङ्गेलाइ ख्रिस्तको खाबाराता हिलि मन्दा माताखे,गोताङ जिउ ख्रिस्तता भर परिखे | ख्रिस्तकोङ कारनहोइ जिउको गोताङ अङ्गगेलाइ एमिसो -भेनेङ्हेङ याद पापाखे औ साघाइखे | इदोइ जिउहेङ सरबुङ साइका बानाइखे कालाउ एदोफाङ ताअ्खे,कालाउ जिउ परमेस्वर चाहेका भाइपाङ बाराखे | 20 नेलाइ ख्रिस्त दोफाङ सिका हिसुना कालाउ सुमिङको ब्यर्थको नियम गेलाइसो मुक्त जेङ्का हिसुना | ओदोङ भाअ्सिङ एलाबुङ ना इदोइ दोङ सुमिङकोङदोङ हिनुपानुते दोअ्का भाइपाङ हाइपालि नाटक पाखेना ? का हाइदोअ्खा पानु इसिका नियम गेलाइ हाइपालि मानितेङ हिसुना ? 21 'इदोइ माचासु'',''इङ्को माचाखेसु'',इङ्को मासाइसु''दोअ्का; 22 इदोइ गोताङ सुमिङ्को नियमगेलाइ इसिका आनेमाने गेलाइ दोफा सामान्दा हि जेदोङ एखे ब्यबहार पालाउ दोखे: | इदोइते द्याङ्गेलाइको आदेस कालाउ आग्यागेलाइ जेङ,परमेस्वरको माको | 23 इसिका नियमगेलाइ सुन्दर कालाउ बुदिमानि तिङ्नाखे,कालाउबुङ इदोइ द्याङ बानाइका धर्मको अङ्गगेलाइ जेङ | इदोइहोइ द्याङ्गेलाइ बिनम्र जेङ्का बाहाना पाखे,कालाउ जिउहेङ साताइखे | कालाउ धर्महोइ द्याङ्गेलाइहेङ ओबालाइको पापमय प्रकृतिहोइ चाहेखा दुस्त काथागेलाइ मनसो मारोकिखे |