2
दादा-ओनेगेलाइ कालाउ बाइ-आनाउगेलाइ,नेलाइ गिसुखेना,केलाइदोफा लोका ब्यर्थ माजेङ हि | 2 केलाइ इनता लोका खाङ्तेङ लाम्फा फिलिप्पिता हेङ्साङ दुःख निङ्चानाहि | इन्ताको द्याङ्गेलाइ केलाइको बिरोधता मारेमका- मारेमका काथा पाहि | एदोइ गोतेङ नेलाइ गिसुखेना | कालाउ जेलाउ नेलाइदोफा पुगिघा, इङ्को समयताबुङ हेन्जा झना केलाइको बिरोधताङ हिगाखे | कालाउबुङ केलाइको परमेस्वरदोङ केलाइहेङ माथिसिङ नेलाइहेङ इदोइ बानाल पिलि साघाइ पिहि | 3 केलाइहेङ हासुबुङ धोखा मापिहि,केलाइ दुस्त माको | केलाउ हासुहेङ्बुङ सलेलि चेस्ता मापानाहि | अदोङ भाअ्सिङ इदोइ द्याङ्गेलाइहेङ केलाइ जाइ खान्धुरि पालि हाउसाइ पिन्हाखे इङ्को इदोइ या कारनगेलाइसो हिदोबुङ एनोङ्बुङ माको | 4 माको,केलाइ ये :बानाल हिङ्पान्हाखे हाइपालिपानु परमेस्वरदोङ केलाइहेङ परिकस्या र्-हुका हि कालाउ एसा पालिको भाअ्सिङ खान्धुरि पाका हि |अदोङ्भासिङ जेलाउ केलाइ दोअ्नाखे केलाइ द्याङ्गेलाइहेङ रिझाइ पालि कोसिस पान्हाखे रो ? | केलाइ ते परमेस्वरहेङ खु:सि पालि भोनाखे | परमेस्वर एनौङ्दोङ हि वादोङ केलाइको हृदयता जाचिखे | 5 नेलाइको बाखिन पातेङ केलाइ नेलाइहेङ तोङ्पालि (प्रभाबित) पालि भोका मान्थुनाहि | नेलाइसो केलाइको स्वार्थ म्होलि हाइदोङ मान्थु | परमेस्वरदोङ गिखे,या सत्ये हि | 6 केलाइ हिदोइबुङ द्याङ्सो बाखिनबुङ भोका मान्थुन्हाहि,ना नेलाइसो नाते बोमिसो | 7 केलाइ ख्रिस्तको प्रेरितगेलाइदोङ ,कालाउ जेलाउ केलाइ नेलाइ दोफा योम्तेङ हिगानाखे केलाइ ताइको खाबाराबुङ प्रयोग पालि दोधाङ कालाउ नेलाइहेङ केलाइको काम पाका बानाइलि दोधाङ | कालाउ केलाइको ब्यबहार नेलाइदोफा भद्र जेङ्हि जेसाङ एनौङ्दोङ आमाइसो ताइको चान-चामिन्दिगेलाइहेङ सामाराइख पाखे | 8 केलाइ नेलाइहेङ हेङ्साङ मायारू पान्हाखे | इदोइ भाअ्सिङ नेलाइहेङ परमेस्वरको ये:बानालको भागिदार भोगाखेना | कालाउ इदोङ झोकोङ खिनीङ माको केलाइ ताइको जिवनबुङ नेलाइदोफा बाखाराइलि भोन्हाखे | 9 दादा-ओनेगेलाइ कालाउ बाइ-ओनेगेलाइ,सायद नेलाइहेङ थाहा जेङ्हि वाला केलाइ हेथे परिस्रोम पान्हाखे | केलाइ परमेस्वरको ये: बानाल, बानाल पालि न्हीसिन नितिम काम पानाहि,हाइ पालिपानु केलाइ इम्बालाइको हुता दुःख पिलि माभोन्हाहि | 10 जेलाउ केलाइ नेलाइ खान्धुराइगेलाइ दोफा हिघानाखे,केलाइ पबित्तरोता,धार्मिक,निसक्लक हिनाहि | इदोइ सत्ये नेलाइ कालाउ परमेस्वरहेङ थाहा(था) हि | 11 जेसाङ कि नेलाइहेङ थाहा हि केलाइ इम्बालाइदोफा इनसिकाङ ब्यबहार पानाहि जेसा एनौङ खिनिङ आबासो ताइको जाममालाइदोफा पाखे | 12 केलाइ नेलाइ हेङ उत्साह पिनाहि,धाडस पिनाहि कालाउ परमेस्वरको भाअ्सिङ पबित्तरो जिवन बान्चेलि आग्रह पानाहि | परमेस्वर नेलाइहेङ ताइको सारभि कालाउ महिमाता हिलि काइखे | 13 नेलाइदोङ केलाइसो परमेस्वरकोङ बचन भाइकाङ ग्रहन पाका कारनसो केलाइ जेलाउबुङ परमेस्वरहेङ धन्यबाद पिनाखे | जेलाउ नेलाइ इङ्को बचन केलाइसो हिङ्सुना | नेलाइको इच्सासो इङ्को बचनगेलाइ परमेस्वरसो निङ्का भाइपा ग्रहन पासुना कालाउ द्याङ्गेलाइसोलोका भाइका माको | हुनु ते इङ्को बचन परमेस्वरकोङ हि | इङ्को बचनहोइ ना, खान्धुराइगेलाइता काम पानाहि | 14 दादा-ओनेगेलाइ,बाइ-ओनेगेलाइ ! ख्रिस्त येसु:ता नेलाइ यहुदियाता परमेस्वरको मण्डलिगेलाइ भाइपाङ हिसु | यहुदियाता परमेस्वरकोङ जनगेलाइ इन्ताको आरोङ यहुदिगेलाइसो हेङ्साङ सास्ति भोगेका, हिगाखे | कालाउ इम्बालाइबुङ ताइकोङ सार्भिको द्याङ्गेलाइसो इङ्सिकाङ सास्ति दुःख भोगेतेङ हिगानाखे | 15 इङ्को यहुदिगेलाइ प्रभु येसु:हेङ कालाउ अगमबक्तागेलाइहेङ से:हि | इम्बालाइ केलाइहेङ केलाइको सारभि लाअ्लि बाध्यता बानाहि | परमेस्वर इम्बालाइदोफा खु:सि मान्थुही | इम्बालाइ झाराङ्को बिरुद हि | 16 इम्बालाइ गैर-यहुदिगेलाइहेङ बानालपालि बाधा पिहि, केलाइ गैर-यहुदिगेलाइ बानाल पानाखे कालाउ कि इम्बालाइबुङ बान्चेलि द्वाको| , कालाउ इङ्को यहुदिगेलाइ ताइको पुरना पापगेलाइ हुताबुङ आरोङ पापगेलाइ रुमभाइखे | एला ओबालाइहुता परमेस्वरको चेर पुराङ लाङ | 17 ऐ दादा-ओनेगेलाइ कालाउ बाइ-आनेगेलाइ ! आतुइसा समयको भाअ्सिङ केलाइ नेलाइसो लाअ्न्हाका हिगानाखे | केलाइ सारिरिक रूपसो नेलाइ दोफा मान्थुन्हाहि कालाउ केलाइको सोचाइता नेलाइदोसाङ हिनाहि | नेलाइहेङ भेतेलि केलाइ हेन्साङ उत्सुक हिगानाखे कालाउ केलाइ भेत पालि बारका चेस्ता पानाहि | 18 एइ केलाइ नेलाइहेङ भेतिलि भोन्हाखे, का पावल नेलाइदोफा लोलि हेङ्सा खेप जातिङ्को चेस्ता पाहा,कालाउ एन्सा पालि सैतान केलाइहेङ जेलाउबुङ बाधा पुगिपाहि | 19 जेलाउ केलाइको प्रभु येसु: ख्रिस्त लावा कालाउ नेलाइ केलाइको गर्बको बिसय जेनावा,हाइपालिपानु नेलाइ केलाइको आसा केलाइको मुकुत कालाउ केलाइको आनन्द ज्यावा | 20 नेलाइ दोङ साच्चैको,केलाइको महिमा कालाउ आनन्द हिसुना |