गलातियों 3

हे गलातिबासिगेलाइ, क्रुसता येसु: ख्रिस्तको सि:काको बारेता नेलाइको मिसिह्या आगाता प्रस्ततोइ तिङ्पा पिकाङ हिघाहि | कालाउ नेलाइ हाइदोङ मागिका (मुर्ख) हिगासुखेना | हासुबुङ नेलाइहेङ आवाइपाहि | 2 कासेहेङ एनोङ काथा दोपि:नेलाइ पबित्तरो आत्मा हेसा निङ्सुना ? हाइ ब्यवस्था पालन पातेङ्दोङ आत्मा निङ्न्हा ? माको | नेलाइ ए:बानाल हिङ्तेङ कालाउ खन्धुरि पातेङ आत्मा निङ्का हिना | 3 नेलाइ इसिका हाइदोङ मागीका(मुर्खा) हेसा जेङ्लि दोस्वाना ? नेलाइ ताइको आत्मादोफा ख्रिस्टा जिवन सुरु पासुना | कालाउ एला हाइ ताइकोङ सरबुङ्होइ पुरा पालि कोसिस पाखेना ? इदोइ मुर्खता हि | 4 नेलाइ हेङ्जाङ काथाको अनुभब पाका हिसुना | हाइ इङ्को गोताङ बेकारका जेङ्हि ? का आसा पाखा इङ्को ब्यर्थ मा जेङ्हि | 5 ब्यवस्था मान्याना दोअ्तेङ परमेस्वरदोङ आत्मा पिका हिगाखे माको ? ब्यवस्था मान्याङ दोअ्तेङ परमेस्वर नेलाइको माझाता भारबुसाइका काम पाका हिगाखे माको ? | नेलाइ ये:बानाल हिङ्सुना कालाउ इन्ता खान्धुरि पानाहि दोअ्तेङ परमेस्वर ताइको आत्मा पिहि कालाउ भारबुसाइका काम पाहि | 6 आब्राहामको बारेता धर्मसास्टर इङ्कोङ दोअ्खे | आब्राहाम परमेस्वरहेङ खान्धुरि पाहि कालाउ परमेस्वरह वाकोङ खान्धुरिहेङ सुइकार पाहि | ओदोङ भाअ्सिङ आब्राहामहेङ परमेस्वरदोङ धर्मि थहराइहि |'' 7 अदोङ भासिङ,नेलाइ गिलिगोइस्वाना कि ज्याइदोफा खान्धुरि हि इम्बालाइदोङ आब्राहामको जातिङ्को सन्तान हि | 8 धर्मसास्तर दोअ्का हि कि गैर-यहुदिगेलाइहेङ खान्धुरिसो परमेस्वरदोङ धर्मि थहराइयावा | आब्राहामहेङ इदोइ ये: बानाल लाङ्फादोङ हिङ्पाका हिगाहि, जेसाङ धर्मसास्तर दोअ्खे,''नापाहासो गोताङ जातिगेलाइहेङ आसिरबाद प्यावा |'' 9 आब्राहामको या खान्धुरि पाहि कालाउ वा आसिसित जेङ्हि | एलाबुङ इनसिकाङ हि | ज्याइ-ज्याइदोफा खान्धुरि हिघाहि इम्बालाइ झाराङ आब्राहाम भाइपाङ आसिरबाद निङ्हि | 10 कालाउ ब्यवस्था पिताइकाता भर पाकागेलाइ स्राप निङ्हि हाइपानु धर्मसास्तर दोअ्खे:''ब्यवस्थाता लेखेका गोतेङ काथा झाराङ मानेलि गोइखे | ज्याइ मामानिखे वा हुता सराप परिखे | 11 इदोइसो या झालाझालाका जेङ्खे कि ब्यबस्थासो हासुहेङ्बुङ परमेस्वरता धार्मिक जेङ्लि मादोअ्खे |'' ज्याइ द्याङ खान्धुरिसो परमेस्वरदोफा थिक हि,वा जेलाउबुङ बान्चितेङ ह्यावा |'' 12 ब्यवस्था खान्धुरिता हिका मान्थु | ब्यवस्थादोङ दोअ्खे,''ज्याइ इदोइ कामगेलाइ पातेङ बानचेलि भोखे वादोङ ब्यबस्थाता दोताङ काथागेलाइ पालन पालि गोइखे |'' 13 ब्यवस्थासो केलाइता स्राप चुमाहि कालाउ ख्रिस्त इङ्को स्राप केलाइसो लाअ्पापिहि | केलाइको थामे वादोङ र्हुहि कालाउ ताइमिङ इङ्को स्राप फुहि |धर्म सास्तरता एदोइ लेखेका हि,''जेलाउ हासुकोबुङ जिउ सिङ्हुता तोइहि इङ्कोङ स्रापितदोङ जेङ्हि | 14 परमेस्वरको आसिस गोतेङ द्याङ्गेलाइ निङ्लि द्वाको दोअ्तेङ येसु: ख्रिस्त इसिका पाहि | परमेस्वर आब्राहामहेङ इदोइ आसिस प्रतिग्या पाहि जेदोङ ख्रिस्त येसु:सो लोखे | येसु: सि:हि ज्याइता कि पबित्तरो आत्मा जेदोङ परमेस्वर प्रतिग्या पाका केलाइ निङ्लि दोकाइने(द्वाको) | केलाइ इदोइ प्रतिग्या खान्धुरिसो निङ्न्हाखे | 15 दादा-ओने बाइ-ओनेगेलाइ,का एनोङ उदाहरन प्याङ्का : जेलाउ हासुबुङ या इच्सा पातरा लेखिखे कालाउ इङ्को अधिकृत जेङ्खे,कालाउ हासुबुङ वासेहेङ पिताइलि मादोखे इदोइता नाते हाइदोङ्बुङ थोपेलि द्वाङ | 16 परमेस्वर आब्राहाम कालाउ वाको सानतान्हेङ(चानचुहेङ) प्रतिग्या पाका हिघाखे | परमेस्वर ''कालाउ नाङ्को सान्तानगेलाइहेङ '' मा दोअ्हि,जाइको माने एमि द्याङ ख्रिस्तखेनिङ हि | 17 काङ्को दोअ्काको मतलब: परमेस्वर करार बानाइलि खाङ्तेङ हेङ्साङ बासार लाम्फादोङ इदोइ करार आब्राहामदोफा पाका हिघाखे | ब्यवस्था ते, द्यासाइ न्हेकुरी ते-बासार न्हुसो खेनिङ बानाइका हि | ओंदोङ भाअ्सिङ ब्यबस्थाहोइ कारार रदृ पालि मादोखे कालाउ आब्राहामहेङ परमेस्वर पिका प्रतिग्याहेङ मापालि मादोअ्खे | 18 कारारहेङ मानितेङ परमेस्वरदोङ पाका प्रतिग्या निङ्खे र ? मानिङ्खे | एदि ब्यबस्था मानितेङ इङ्को काथागेलाइ केलाइको निङ्न्हाए पानु इङ्को प्रतिग्यासो माको | कालाउ आब्राहामको पक्स्यता ताइको प्रतिग्याको आधारता उपहार स्वरूप परमेस्वर वासेहेङ आसिस पिहि | 19 एन्सापाहेपानु ब्यवस्था हाइपालि आवस्यक परेहि ? द्याङ्गेलाइ गल्ति पाहि दोअ्का तिम्पालिको भाअ्सिङ ब्यवस्था पिका हिघाहि | अब्राहामको खास सन्तान माजेम्माठेकापा इङ्को ब्यवस्था चोलितेङ हि | परमेस्वरको प्रतिग्या इदोइदोङ सन्तानको बिसयता हिगाखे | ब्यवस्था स्वर्गदुतसो पिका हिघाहि | स्वर्गदुतगेलाइ द्याङ्गेलाइहेङ ब्यवस्था पिका बेला मोसाहेङ माझाता तातेङ ताहि | 20 कालाउ इदोइ एनोङ खिनिङ पक्स्यता हिहेपानु मध्यसतको आसयक मागोयाङ हाइपालिपानु परमेस्वर खिनिङ एनोङ्दोङ हिका हिघाहि | 21 हाइ इसिकाङ ब्यवस्था परमेस्वरको प्रतिग्याको बिरुद हि दोअ्का माने लागिखे ? माको | द्याङ्गेलाइहेङ जिवन पिका इङ्सिका ब्यबस्था जेङ्खेपानु,ते केलाइ ब्यवस्था पालन पातेङ्दोङ धार्मिक जेङ्लि दोधाङ | 22 कालाउ इदोइ सत्ये माको,हाइपालिपानु ध्रर्मसास्तरदोङ घोसना पाखे कि झाराङ द्याङ्गेलाइ पापको कैदि हि | याको माने इस्का जेङखे कि द्याङ्गेलाइहेङ पिका प्रतिग्या खान्धुरिसो पिखे | एदोइ येसु:ख्रिस्ता खान्धुरि ताका द्याङ्गेलाइहेङ पिका हिघाखे | 23 जेलाउ ठेकापा इदोइ खान्धुरि लोका मान्ठुघाखे केलाइ ब्यवस्थाको कैदि हिघानाखे | जेलाउ थेकापा परमेस्वरता पालि गोइका खान्धुरि मापान्हाखे,केलाइ स्वतन्तरो माजेङ्न्हाखे | 24 इदोइ भासिङ ख्रिस्तको आगमन थेकापा ब्यवस्था केलाइको आबा-आमाइ हिघाखे | ख्रिस्त लोका न्हुसो खान्धुरिसो केलाइ धर्मि जेङ्लि दोअ्नाहि | 25 एला खान्धुरिको दामा खुलेका हि कालाउ केलाइ ब्यवस्थाको मासामाराइनाका मान्थुन्हाहि | 26 ओदोङ भाअ्सिङ एला इङ्को खान्धुरिसो ख्रिस्ता नेलाइ परमेस्वरको जामालगेलाइ हिसुना | 27 नेलाइ गोतेङ ख्रिस्ता बप्तिस्ता र्-हुतेङ नेलाइ ख्रिस्तहेङ्बुङ धारन पाका हिसुवाना | 28 एला ख्रिस्तता हेदोइबुङ द्याङ यहुदि नाते ग्रिक,बान्धाइति कालाउ लाअ्न्हाका कालाउ तिरि वा मर्दता हेदोइबुङ भेनाङ मान्थु | हाइपालिपानु ख्रिस्त येसु:ता नेलाइ झाराङ एनोङ्दोङ हिनाहि | 29 नेलाइ ख्रिस्तता हिसुवानापानु नेलाइ आब्राहामको सन्तान जेङ्सुवाना | याको माने आब्राहामदोफा परमेस्वरदोङ प्रतिग्या पाका गोतेङ आसिस निङ्सुवाना |