गलातियों 2

तेदया बासार न्हुसो बर्नाबासदोफा का आरोङ यरुसलेमता हानिघा | कालाउ तितसहेङ दोफाङ चुम्पुघा | 2 का हानिका कारण परमेस्वर कासेहेङ इनता हानिलि गोइका तिङ्पाहि | का खान्धुराइ गेलाइको अगुवागेलाइहेङ इन्ता दुसुघा | जेलाउ केलाइ एपाहा जेङ्नाहि का इम्बालाइहेङ इनता इङकोङ ये:बानाल ब्याख्या पाघा जेदोङ का गैर-यहुदिगेलाइको माझाता बानल पाघा | नेलाइ काङ्को काम बुझीयाको दोअ्का का चाहिघाखा जेत्ता कि काङ्को लाम्फाको (दोका)कामगेलाइ कालाउ बर्तमानको (एलाको) प्रयासगेलाइ खेर मान्हाको | 3 कालाउ काङ्को दोफा हिका तितसहेङ ग्रिकगेलाइ हिलाउबुङ खतना हिलिगोयाङ दोअ्तेङ हासुबुङ कर मालागाइहि | 4 केलाइ इस्काङ स्मस्यागेलाइको बारेता काथा पालि भोघानाखे (चाहिघानाखे),हाइपालि पानु आधिमि गैर-यहुदिगेलाइ गुप्त रूपता (सिकापा ) केलाइको जेरता दुल्का हिघाहि | ख्रिस्त येसु:ता केलाइको स्वतन्तरोता बुझिलि इम्बालाइ जासुस जेङतेङ दुल्का हिघाहि | 5 कालाउ केलाइ इङ्को धाताइका ओनेगेलाइ भोका काथाता आतुइसाबुङ मासान्हाहि जेता कि नेलाइकोता ये:बानालको सत्येता हिदोङ ह्याको | 6 कालाउ बा-बारका मानिनिय द्याङ्गेलाइ का बानाल पाका ये:बानाल हेङ दाहे-माहे मापाहि | इम्बालाइ बा-बारका मानिनिय गेलाइ वाला, या माको इङ्को कासेहेङ हाइदोङ फरक मापरियाङ | परमेस्वरको भाअ्सिङ झाराङ एलोङ्दोङ हि | 7 कालाउ इङ्को नाइकेगेलाइ तिङ्हि कि परमेस्वर पतरुसहेङ यहुदिगेलाइको माझाता कालाइ कासेहेङ गैर- यहुदिगेलाइको माझाता ये:बानाल,प्रचार पालि लगाइहि | 8 परमेस्वर पतरुसहेङ यहुदिगेलाइको प्रेरित जेङ्तेङ काम पालि लगाइहि | कालाउ कासिहेङ गैर-यहुदिगेलाइको प्रेरित जेङ्तेङ काम पालि लागाइहि | 9 याकुब,पतरुस,कालाउ यु:हान्नाहेङ अगुवा भाइपा मानिखे | इम्बालाइ बुझिहिकि परमेस्वर कासेहेङ बिसेस बरदान पिका हि | ओदोङ भाअ्सिङ इम्बालाइ बर्नाबास कालाउ कासेहेङ सुइकार पाहि | इम्बालाइ दोअ्हि,''पावल कालाउ बर्नाबासहेङ केलाइ मानिन्हाखे कि नेलाइ इङ्को द्याङ्गेलाइकोता हाने ज्याइ यहुदि माको कालाउ केलाइ चाहि यहुदिगेलाइको माझाता हानाङ |'' 10 इम्बालाइ केलाइहेङ एलोङ काथा दोअ्हि कि गरिबगेलाइहेङ साघाइलि मानिल्सु | कालाउ का दिनाङ उङ्को काथा पालि भरसक प्रयास पाका हिघा | 11 जेलाउ पतरुस एन्तिओकाता लोहि,वा आधे इसिका काम पाहि जेदोङ सरासर भुल हिघाहि ,ओदोङ भाअ्सिङ का वाको आगाता बिरद पाघा हाइपालिपानु वा भुल ता हिघाहि | 12 इदोइ हेसा जेङ्हिपानु:जेलाउ पतरुस लाङ प खेप (पटक) एन्तिओकाता लोहि वा गैर-यहुदिगेलाइ दोफा चाहि कालाउ बासा हि | जेलाउ याकुब पाहासो आधिमि यहुदिगेलाइ लोहि पतरुस इङ्को गैर-यहुदिगेलाइ सो सङ्गत पालि लाअ्हि वा ताइमिहेङ गैर-यहुदिगेलाइसो अलग ताअ्हि,वा इम्बालाइदोफा चालि-आम्लि लाअ्पिहि | हाइपालि ? हाइपालिपानु वा यहुदिगेलाइ दोफा थिहि | ज्याइ गोताङ गैर-यहुदिगेलाइ खतना पालि गोयाङ दोअ्तेङ खान्धुरि पाघाखे | 13 इन्ता हिका आरू यहुदि ख्रिस्ततियन गेलाइबुङ पतरुसको दि:का पनता साथ पिहि | बार्नाबासबुङ इम्बालाइसो प्रभाबित जेङ्हि कालाउ एलोङ चिचा भाइपा काम पाहि 14 का उङ्को यहुदिगेलाइ मन बिचार पाघा | ओबालाइ ये: बानालको सत्येताहेङ पिताइका मान्थुघाहि | ओदोङ भाअ्सिङ सारा मण्डलिगेलाइको आगाता का पतरुसहेङ दोअ्घा: ''पतरुस ना यहुदि हिना | कालाउ यहुदि भाइपा ना ताइको जिबन जिउतेङ हिका मान्थुना | ना गैर-यहुदिगेलाइ सरह हिका हिना | एदि एन्सा नु नानु हाइपालि गैर-यहुदिगेलाइहेङ यहुदीगेला भाइपा भाइपा हिलि कर लगाइखेना ? 15 केलाइ यहुदिगेलाइ झाराङ यहुदिदोङ,गैर-यहुदि पापिगेलाइ भाइका माको | 16 केलाइ गिनाखे कि, ब्यबस्था मानिकाता खिनीङ हासुबुङ परमेस्वरको आगाता धर्मि माजेङ्खे | येसु:ख्रिस्टा खान्धुरि पाहेपानु खिनिङ द्याङ परमेस्वरता धर्मि जेङ्लि द्वावा | ओदोङ भाअ्सिङ केलाइबुङ येसु:ख्रिस्तता खान्धुरि पानाखे | कालाउ परमेस्वरको माध्यमसो ख्रिस्टा खान्धुरि ताअ्तेङदोङ केलाइ परमेस्वरको सेवक जेङ्का हिनाहि ,ब्यबस्था मानितेङ माको | हाइपालिपानु ब्यबस्था मानितेङ खिनिङ हासुबुङ धर्म जेङ्लि मादोखे | 17 धर्मि जेङ्लि केलाइ ख्रिस्तहेङ खान्धुरि पानाहि | एसापा केलाइबुङ पापि हिघाहि दोअ्का प्रस्त हि | कालाउ हाइ ख्रिस्त केलाइहेङ पापि बानाइखे ? पक्कै या ते माको | 18 एदि का आरुङ इङकोङ लाअ्लि दोका ब्यबस्था बानाल पाहे पानु का सुइकार पाघा कि का ब्यबस्था भङ्ग पाघा | 19 ब्य्बस्थाता बान्चिलि का लाअ्लि दोहोइका, इङ्कोङ ब्यवस्था कासीहेङ से:हि | इङ्को व्यवस्थाको भाअ्सिङ का सि:लि दोहोइका ताकि का परमेस्वरता बान्चेका हिघा | का ख्रिस्तदोफाङ क्रुस्ता तोइनाघा | 20 ओदोङ भाअ्सिङ का बान्चितेङ हिका मान्ठुघा कालाउ ख्रिस्त चाहि हिका-हि वा काङ्कोता बान्चितेङ हि | का काङ्को जिउता आरूङ जियाइका हिघा कालाउ का परमेस्वरको चानको खान्धुरिता जियाइका हिघा | कासेहेङ वा प्रेम पाहि कालाउ कासेहेङ बान्चिपालि वाआङ काङ्को भाअ्सिङ ताइमिहेङ अरपन पाहि | 21 परमेस्वरसो निङ्का इदोइ बरदान कासेहेङ एकदम महत्वपुर्न हि | हाइपालिपानु यदि ब्यवस्था केलाइहेङ परमेस्वरको धर्मि बानाइका पानु ते,ख्रिस्त सि:लि हिदोइबुङ आवसयक मान्थुघाहि |